Enu ci yí ŋɖuɖu kleŋ lɔ kpla mì so Jeŋkwimɛ Fyɔ lɔ nu

1-2. (a) Nyi yí taɖo mìakpɔ mɔ mɔ, Yesu ana mìato emɔ fafɛ ɖe ji yí aɖo ŋwi yi ku jiɔ? (b) Nɔnɔmɛ nywi Yesu tɔ ciwo yí mìakpɔɔ?

ÀTƐNŊ adre lé wowanɔ Eŋwiɖoɖo Kristo ku do exweshiaxwea? Kankandoji li mɔ mìwo domɛtɔ sugbɔ atɛnŋ aɖo ŋwi enu ciwo wowanɔ le Axwetɔ Fiɛfiŋɖuɖu lɔ mɛ ji. Nyi yí taɖoɔ? Ðo ŋɖuɖu lɔ degbɔnnu ɖeeɖe o. Ele ahan gan, gɔnmɛsese vevi ɖeka le wana cɛ nu. Eyi taɖo mìatɛnŋ abiɔ se mɔ, ‘Nyi yí taɖo ŋɖuɖu lɔ le kleŋ ahan ɔ?’

² Hwecinu Yesu wakɔ yi sumɔsumɔdɔ le nyigban jiɔ, wojeshi mɔ étonɔ mɔnu fafɛ ji yí kplanɔ nyɔnɔnwi veviwo amɛwo, wo mɛ kɔnɔ petii yí womɔnɔŋje wo mɛ. (Mt. 7:​28, 29) Le emɔ cɛ ke nuɔ, éna mìtonɔ mɔnu fafɛ ci nu gɔnmɛsese le ji yí ɖonɔ ŋwib yi ku ji. Na mìabu tamɛ kpɔ nywiɖe so Eŋwiɖoɖo ŋɖuɖu lɔ, enyɔ ɖewo ci Yesu nu koɖo enu ɖewo ci ewa nu. Mìase gɔnmɛ nɔ amɛɖekisɔsɔhwe, edɔngbegbe koɖo lɔnlɔn Yesu tɔ sɔwu, yí mìagbekpla lé mìatɛnŋ asran Yesu do wu.

YESU SƆ YIÐEKI HWE

3. Shigbe lé wonui le Matie 26:​26-28 mɛ ɖe, lé Eŋwiɖoɖo ŋɖuɖu ciwo Yesu zan le kleŋ ɖe doɔ, yí nyiwo yí wole dumɛ nɔɔ?

³ Yesu le koɖo yi apostolo egbejinɔtɔ 11 lɔwo hwecinu yí eɖo Eŋwiɖoɖo yi ku ji. Ézan ŋɖuɖu ciwo yí kpɔtɔ nɔ Paki lɔ yí sɔ ɖo Eŋwiɖoɖo kleŋ lɔ. (Hlɛn Matie 26:​26-28.) Kpɔnnɔ ci mɛ kpɔnnɔcike dele o koɖo vɛn ci yí le nɔ̀ ɖekɛwo ezan. Yesu nu nɔ apostolo yi tɔwo mɔ, ŋɖuɖu amɛve cɛwo le dumɛ nɔ ye lankpu maɖonuvɔn koɖo ye hun ciwo yí yeasɔ sa vɔn do ta nɔ wo sabaɖe yɛ. Dekpaca apostolo lɔwo mɔ wana yoyu cɛ le bɔbɔɛɖe ahan o. Nyi yí taɖoɔ?

4. Lé aɖaŋ ci Yesu ɖo nɔ Marta vayi, kpedo mì nu yí mìmɔŋje enu ci yí taɖo ena yí Eŋwiɖoɖo ŋɖuɖu lɔwo le kleŋ do mɛɔ?

⁴ Bu tamɛ kpɔ so enu ci yí jɔ wleci ɖewo doŋkɔ le exwe amɛtɔntɔ mɛ nɔ Yesu sumɔsumɔdɔ, hwecinu yí eyi yi xlɔ Laza, Marta koɖo Maria xomɛ nu. Le nɔnɔmɛ ŋtɔ́ mɛɔ, Yesu tɔ enukplakpla wo. Marta le axwe lɔ mɛ vɔ éxa koɖo enu sugbɔ ɖaɖa nɔ mɛdru cɛ, ci nu bubu le. Ci Yesu do jeshiiɔ, ésɔ lɔnlɔn kpla nu Marta yí kpedo nu nɔ anya mɔ ŋɖuɖu sugbɔ deʒan gashiagamɛ o. (Luiki 10:​40-42) Evyɛɔ, ci ekpɔtɔ gaxoxo hwɛɖeka gbɔxwe Yesu asɔ yiɖeki sa vɔn ɔ, éwa do yi ɖaŋɖoɖo ŋtɔ́ ji. Éna yí Eŋwiɖoɖo ŋɖuɖu lɔwo le kleŋ. Nyi yí ecɛ kpla mì so Yesu nuɔ?

5. Nyi yí ŋɖuɖu kleŋ lɔ dasɛ so Yesu nuɔ, yí lé ecɛ wa ɖeka koɖo Filipitɔwo 2:​5-8 doɔ?

⁵ Yesu sɔ yiɖeki hwe le enuwawa koɖo nuxuxoxo ɖepkokpui yi tɔ mɛ. Eyi taɖo dekpaca amɛ mɔ, édasɛ amɛɖekisɔsɔhwe manumanu le ezan kpɛtɛkpɛtɛ cɛ mɛ nɔ yi gbenɔnɔ le nyigban ji o. (Mt. 11:29) Enya mɔ yeasɔ yeɖeki wa avɔnsa ci yí gangan sɔwu le agbetɔwo xolɔlɔ mɛ yí Yehowa afɔn ye so ku keŋ asɔ ye ɖo fyɔ le jeŋkwimɛ. Ele ahan gan, dedɔn amɛwo susu va yiɖeki ji to biɔbiɔ so wo shi mɔ wo le wa akɔnu gangan ɖe, yí asɔ ɖo ŋwi ye ku ji o. Le ecɛ dumɛɔ, énu nɔ yi nukplaviwo mɔ wo le ɖo ŋwi ye ku ji koɖo ŋɖuɖu kleŋ cɛwo, zeɖeka le xwe mɛ. (Ʒan 13:15; 1 Kor. 11:​23-25) Ŋɖuɖu kleŋ cɛ ci yí sɔgbe, dasɛ mɔ Yesu degangannɔ yiɖeki o. Eji jɔ mì mɔ amɛɖekisɔsɔhwe nyi ɖeka le nɔnɔmɛ vevi ciwo yí le mìwo Fyɔ ci yí le jeŋkwimɛ shi.​—Hlɛn Filipitɔwo 2:​5-8.

6. Lé mìasran amɛɖekisɔsɔhwe Yesu tɔ do nɔ mìle tetekpɔwo mɛɔ?

⁶ Lé mìasran amɛɖekisɔsɔhwe Yesu tɔ doɔ? To amɛwo nyɔna sɔsɔ doŋkɔ nɔ mìwoŋtɔwo tɔ ji. (Fili. 2:​3, 4) Bu tamɛ kpɔ so ezan godugodutɔ ci yí Yesu wa le nyigban ji nu. Énya mɔ zaanɖe yɛɔ, yease vevi keke aku; gan, ébu tamɛ kpɔ veviɖe so yi apostolo egbejinɔtɔ ciwo yí afan yi ku sabaɖe yɛ nyɔna nu. Eyi taɖo ezan yi zan kpɛtɛkpɛtɛ lɔ sɔ kpla nu wo, do ŋsɛn lanmɛ nɔ wo yí gbena wo kankandoji. (Ʒan 14:​25-31) Yesu sɔ yiɖeki hwe yí gbedasɛ mɔ yesɔ ɖe le amɛwo nyɔna mɛ sɔwu yeŋtɔ tɔ. Kpɔwɛ nywi ŋtɔteŋ yí eɖo nɔ mì!

YESU NYI EDƆNGBETƆ

7. Lé Yesu dasɛ edɔngbegbe gangan do ci eɖo Axwetɔ Fiɛfiŋɖuɖu lɔ anyi godu zeɖekaɔ?

⁷ Ci yí Yesu ɖo Axwetɔ Fiɛfiŋɖuɖu lɔ anyi godu zeɖekaɔ, édasɛ edɔngbegbe sɛnŋ ɖeka. Léɔ? Yesu lɔn do edro ci Edalɔ ɖo kudo nu ji, ci énya mɔ ecɛ ana woado hwɛ ye mɔ yenu ŋkpɛnnyɔ kpotuwo yí awu ye can. (Mt. 26:​65, 66; Luiki 22:​41, 42.) Yesu kpɔtɔ nɔ egbeji pleŋpleŋ yí sɔ do bubu Yehowa ŋkɔ nu, keŋ sɔ dasɛ mɔ yele acɛkpatɔnyinyi Mawu tɔ kpaxwe, yí gbehun agbe tɛgbɛɛ nɔnɔ le nyigban ji mɔkpɔkpɔ nɔ mɛ ciwo yí trɔ jimɛ. Le hwenu ɖekɛ lɔ mɛɔ, Yesu dradra yi dokplɔtɔwo do nɔ enu ciwo mɛ woato zaanɖe yɛ.

8. (a) Enyɔ ci yí Yesu nu nɔ apostolo egbejinɔtɔ yi tɔwoɔ? (b) Lé Yesu nukplaviwo sran edɔngbegbe kpɔwɛ yi tɔ do le exwe ciwo yí kplɔ yi ku do mɛɔ?

⁸ Yesu gbedasɛ edɔngbegbe ci yí delo nu kpɔ kudo cukaɖa ciwo mɛ ato nu o, vɔ yi susuwo le yi apostolo egbejinɔtɔwo ʒanwo ji. Ŋɖuɖu kleŋ nu ci Yesu wa hwecinu enya Ʒuda ti godu, ána mɛ ciwo avanyi yi dokplɔtɔ amɛshiaminɔwo aɖo ŋwi nyɔna ciwo woakpɔ so yi hun ci ekɔ do ta nɔ wo mɛ; agbena woaɖo ŋwi mɔ yewoavanɔ enublabla yoyu lɔ mɛ. (1 Kor. 10:​16, 17) Yesu nu enu ci yí yɛ koɖo Dalɔ kpɔkɔ mɔ mɔ, ye dokplɔtɔwo awa nɔ wo yí asɔ kpedo wo nu nɔ woakpɔtɔ anɔ gbeji keŋ avanɔ koɖi le jeŋkwimɛ. (Ʒan 15:​12-15) Yesu gbenu tetekpɔ ciwo yí ava apostolo lɔwo ji nɔ wo. Le yi goduɔ, éhɛn wowo susu yi yi kpɔwɛ ji, sɔ do ŋsɛn lanmɛ nɔ wo mɔ wo le “gbedɔn!” (Ʒan 16:​1-4a, 33) Le exwe sugbɔ goduɔ, Yesu nukplaviwo kpɔtɔ sransran amɛɖekitɔmajimaji koɖo edɔngbegbe yi tɔ lɔ. Wokpenɔdo wowonɔnɔwo nu le tetekpɔ vovovowo mɛ, nɔ ebiɔ mɔ woakpe fun can.​—Ebre. 10:​33, 34.

9. Lé mìatɛnŋ asran Yesu le edɔngbegbe dadasɛ mɛ doɔ?

⁹ Egbɛ can ɔ, mìdadasɛ edɔngbegbe shigbe Yesu hannɛ. Le kpɔwɛ mɛ, eʒan edɔngbegbe gbɔxwe mìakpedo mìwo nɔvi ciwo yí wocikɔ yumɛ nɔ kudo wowo xɔse ŋci nu. Hweɖewonuɔ, wolenɔ mìwo nɔviwo cu amɛtafutafutɔ. Nɔ ejɔ ahan ɔ, ele mɔ mìawa enushianu ci ji mìakpe nɔ wo, nɔ ebiɔ mɔ mìahwlɛn ta nɔ wo le kojoɖoxu can. (Fili. 1:14; Ebre. 13:19) Emɔ bu ci ji mìato yí adasɛ edɔngbegbe yí nyi, mìakpɔtɔ aɖenɔ kunu “koɖo jitri.” (Edɔ. 14:​3, nwt) Shigbe Yesu hannɛɔ, mìɖui koŋ yí dranɔ Fyɔɖuxu ŋɛnywi lɔ, nɔ amɛwo so do mì nu yí ci yumɛ nɔ mì can. Hweɖewonuɔ, mìatɛnŋ ado jeshi mɔ mìvɔnnɔ. Nyi yí ele mɔ mìawaɔ?

10. Le kwɛshila ciwo yí ado ŋkɔ nɔ Eŋwiɖoɖo lɔ mɛ ɖe, nyi yí ele mɔ mìawaɔ, yí nyi yí taɖoɔ?

¹⁰ Mìatɛnŋ ado ŋsɛn mìwo xɔse, nɔ mìbunɔ tamɛ kpɔ so emɔkpɔkpɔ ci Kristo tafɛn vɔnsa lɔ hun ɖɛ nɔ mì nu. (Ʒan 3:16; Efe. 1:7) Kwɛshila ciwo yí ado ŋkɔ nɔ Eŋwiɖoɖo lɔ, nyi mɔnukpɔkpɔ vevi ɖeka ci ji mìato yí ana mìwo jijɔkpɔkpɔ do tafɛn lɔ nu agbe gangan doji wu. Le ga ŋtɔ́ mɛɔ, te kpɔ ahlɛn Eŋwiɖoɖo Bibla kpukpui lɔwo yí abu tamɛ so enujɔjɔ ciwo yí trɔdo Yesu ku nu, le gbedodoɖa mɛ. Ecɛ ana mìase Eŋwiɖoɖo kpɔwɛŋɖuɖu lɔwo gɔnmɛ nywiɖe, hwecinu yí mìabɔ doju aɖu Axwetɔ Fiɛfiŋɖuɖu lɔ; agbena mìakpɔ mɔ vɔnsa ɖe desɔ koɖo vɔnsa ci dumɛ yí ŋɖuɖu lɔwo le o. Ci mìse enu ci Yesu koɖo Yehowa wa nɔ mì gɔnmɛ yí gbese nyɔna ci ahɛn vɛ nɔ mìwo koɖo mìwo xlɔwo gɔnmɛɔ, esɔmɛ mɔkpɔkpɔ mìwo tɔ sɛnnɔŋ doji yí écucunɔ mì yí mìsɔnɔ edɔngbegbe donɔ ji keke asɔyi vɔvɔnu.​—Ebre. 12:3.

11-12. Keke vaɖo elɛ ɖe, nyi yí mìkplaɔ?

¹¹ Keke vaɖo lɛɔ, mìkpla mɔ denyi enu vevi ci yí nyi tafɛn ɖekɛ yí Axwetɔ Fiɛfiŋɖuɖu lɔ ɖo ŋwi nɔ mì o, égbeɖo ŋwi Yesu nɔnɔmɛ vevi ciwo yí nyi amɛɖekisɔsɔhwe koɖo edɔngbegbe ji nɔ mì. Akpe gangan ŋtɔ yí ele mɔ mìado mɔ, Yesu ci yí nyi Avɔnsatɔ Gangantɔ ci yí le jeŋkwimɛ, kpɔtɔ dadasɛ nɔnɔmɛ cɛwo yí gbeɖenɔ kuku do ta nɔ mì! (Ebre. 7:​24, 25) Nɔ mìadasɛ akpedodo mìwo tɔ so ji mɛɔ, ele mɔ mìakpɔtɔ aɖonɔ ŋwi Yesu ku lɔ ji shigbe lé ebiɔ so mì shi nɛ. (Luiki 22:​19, 20) Mìwanɔ ecɛ le azan ci yí je ŋkeke 14-tɔ lɔ nɔ Nisan wleci ji; azan cɛ yí nyi vevitɔ le exwe lɔ mɛ.

¹² Mìatɛnŋ agbekpɔ nɔnɔmɛ bu ci yí cucu Yesu yí eku do ta nɔ mì le Axwetɔ Fiɛfiŋɖuɖu kleŋ lɔ mɛ. Hwecinu enyi agbetɔ le nyigban jiɔ, wojeshi nɔnɔmɛ ŋtɔ́ ni nywiɖe. Nɔnɔmɛ ci dɔɔ?

YESU LƆNNƆ AMƐ

13. Lé Ʒan 15:9 koɖo 1 Ʒan 4:​8-10 dre lɔnlɔn ci Yehowa koɖo Yesu dasɛ nɔ mì doɔ, yí miwo yí kpɔkɔ nyɔna so wowo lɔnlɔn lɔ mɛɔ?

¹³ Yesu sran lɔnlɔn gangan Yehowa tɔ pɛpɛpɛ le enushianu ci ewa nɔ mì mɛ. (Hlɛn Ʒan 15:9; 1 Ʒan 4:​8-10.) Ci yí wu ɖeshiaɖe yí nyi mɔ, yi ji cucui yí esɔ yi gbe na do ta nɔ mì. Nɔ mìnyi amɛshiaminɔ alo “lɛngbɔ bu” mɛ tɔwo can ɔ, mìkpɔkɔ nyɔna so lɔnlɔn ci yí Yehowa koɖo Eviɛ dasɛ nɔ mì to vɔnsa lɔ ji mɛ. (Ʒan 10:16; 1 Ʒan 2:2) Gbebu tamɛ kpɔ so Eŋwiɖoɖo ŋɖuɖu kleŋ lɔwo nu, wodasɛ lɔnlɔn koɖo eɖesɔlemɛ Yesu tɔ nɔ yi nukplaviwo. Léɔ?

14. Emɔ ci nu yí Yesu dasɛ lɔnlɔn nɔ yi dokplɔtɔwo leɔ?

¹⁴ Yesu dasɛ yi lɔnlɔn nɔ yi dokplɔtɔ amɛshiaminɔwo, ɖo deɖo kɔnu wana gbɔnnu ɖe o, vɔ eɖo ŋɖuɖu kleŋ ci ji woato aɖo ŋwii. Ci hwenuwo vayikɔɔ, ele mɔ amɛshiaminɔ cɛwo awanɔ Eŋwiɖoɖo lɔ xweshiaxwe le nɔnɔmɛ vovovowo mɛ, nɔ wocu wo do gakpamɛ can. (Enyɔ. 2:10) Wotɛnŋ wa do Yesu se lɔ jia? Ɛɛ, wowa do ji!

15-16. Lé mɛɖewo kpe ji yí wa Axwetɔ Fiɛfiŋɖuɖu lɔ, ci wole nɔnɔmɛ sɛnŋsɛnŋwo mɛ can ɔ?

¹⁵ Keke vaɖo egbɛɔ, Kristotɔ adodwiwo je agbla yí ɖonɔ ŋwi Yesu ku lɔ ji. Wozɔnnɔ do Axwetɔ Fiɛfiŋɖuɖu kɔnu lɔ ji lé woakpe ji do, yí hweɖewonuɔ, le nɔnɔmɛ sɛnŋsɛnŋwo mɛ. Na mìakpɔ kpɔwɛ ɖewo. Ci wocu nɔviŋsu Harold King do amɛɖekɛgakpamɛ le Chineɔ, éɖo ato emɔ ɖe ji yí awa Eŋwiɖoɖo lɔ. Ézan enu ciwo yí le shi, sɔ wa Eŋwiɖoɖo ŋɖuɖu lɔwo. Égbewa kɔnŋta nywiɖe yí nya Eŋwiɖoɖo zan lɔ. Ci Eŋwiɖoɖo ga lɔ xoɔ, éji ha, do gbe ɖaɖa keŋ na Bibla mɛ nuxu lɔ, ci enyi yiɖekɛ yí le gakpa lɔ mɛ can.

¹⁶ Kpɔwɛ bu ke. Wocu nɔvinyɔnu ɖewo do efuntrenamɛ gakpa ɖeka mɛ le xexemɛhwa amɛvetɔ mɛ. Nɔ wonya mɔ wowa Axwetɔ Fiɛfiŋɖuɖu lɔɔ, woatɛnŋ awu wo. Ele ahan gan ci yí ŋɖuɖu lɔwo wawa degbɔnnuɔ, wokpe ji yí wa Eŋwiɖoɖo lɔ le bebemɛ. Wonu mɔ: “Mìsɔ avɔn ɣi cɔn nɔ kataklɛ ɖeka, yí sɔ kpɔwɛŋɖuɖu lɔwo do ji, keŋ yí nɔ te trɔdi godogluu. Nɔ mìtɔ elɛtrikizoɔ, woatɛnŋ anya enu ci mìwakɔ, eyi taɖo enyi buʒi yí mìtɔ do xɔ lɔ mɛ. . . . Mìgbetrɔ yí nu gbetasɔsɔ mìwo tɔ nɔ mìwo Da mɔ mìazan mìwo ŋsɛn pleŋ nɔ Yi ŋkɔ kɔkɔɛ lɔ ŋci kɔkɔ.” Xɔse gangan ŋtɔ yí wodasɛ! Lɔnlɔn ŋtɔŋtɔ yí Yesu dasɛ nɔ mì yí na mìazan ŋɖuɖu kleŋ yí awa Eŋwiɖoɖo lɔ, nɔ mìle nɔnɔmɛ sɛnŋsɛnŋwo mɛ can!

17. Enyɔ ciwo mìatɛnŋ abiɔ mìwoɖekiwo seɔ?

¹⁷ Ci yí Eŋwiɖoɖo lɔ gogokɔɔ, anyɔ mɔ mìabiɔ enyɔ cɛwo mìwoɖekiwo se: ‘Lé natɛnŋ asran Yesu do sɔwu le lɔnlɔn dadasɛ mɛɔ? Ŋbunɔ tamɛ kpɔ so eʒan anyi kpena xɔsetɔwo tɔwo nu wu nyɛŋtɔ tɔa? Nakpɔkɔ mɔ mɔ nɔviwo le wa enu sugbɔ wu ci ji woakpea, alo nasɔ ɖe le wowo ŋsɛn sɛnxu mɛ?’ Mína mìasran Yesu yí ‘ase vevi do amɛ nu.’​—1 Piɛ 3:​8, nwt.

NA NƆ NUKPLAMU CƐWO ACI SUSU MƐ NƆ EO

18-19. (a) Nyi ji yí mìatɛnŋ akandoɔ? (b) Nyi yí èɖo gligaan mɔ yeawaɔ?

¹⁸ Dagbejinjin o mìami Eŋwiɖoɖo Kristo ku lɔ ji wawa. Hwecinu Yesu ‘atrɔ gbɔ’ le efunkpekpe gangan lɔ mɛ yí akplɔ “amɛcancan” yi tɔwo yi jeŋkwimɛɔ, wodagbewa Eŋwiɖoɖo lɔ o.​—1 Kor. 11:26; Mt. 24:31.

¹⁹ Nɔ wovaɖo te Eŋwiɖoɖo lɔ can ɔ, mìkando ji mɔ Yehowa sɛntɔwo akpɔtɔ aɖonɔ ŋwi ŋɖuɖu kleŋ ci yí nyi, kpɔwɛ nɔ amɛɖekisɔsɔhwe manumanu, edɔngbegbe koɖo lɔnlɔn ci mɛbuɖe detɛnŋ dasɛ kpɔ o ji. Kankandoji li mɔ mɛ ciwo yí yinɔ Eŋwiɖoɖo vevi lɔ sa, axo nuxu so nyɔna ciwo yí to so mɛ nɔ mɛ ciwo yí anɔ agbe le hwenɔnu. Vɔ nɔ mìakpɔ nyɔna so ŋɖuɖu lɔ mɛ gbɛɔ, ele mɔ mìaɖui gligaan asran amɛɖekisɔsɔhwe, edɔngbegbe koɖo lɔnlɔn Yesu tɔ. Nɔ mìwɛ ahan ɔ, mìakando ji mɔ mìaxɔ fɛncuwo so Yehowa gbɔ.​—2 Piɛ 1:​10, 11.