Lé àwɛ anyi Bibla nukplavi dovevinuɔ?

Àji mɔ yeanyi egbejinɔtɔ le tetekpɔ mɛ shigbe lé Daniɛli wɛ hannɛa? Daniɛli kpla Mawu Nyɔ lɔ koɖo enyɔnuɖɛ citocitowo vevidonutɔ. (Dan 9:2) Vevidodonu le Bibla kplakpla mɛ atɛnŋ akpedo eo nu yí nakpɔtɔ anɔ egbeji. Léɔ? Atɛnŋ ana yí ao xɔse kudo Yehowa gbeɖuwo nu mɔ woavamɛ nyɔnɔnwi, asɛnŋ doji. (Ӡoz 23:14) Agbetɛnŋ akpedo eo nu yí ao lɔnlɔn nɔ Yehowa asɛnŋ doji. Lɔnlɔn cɛ acucu eo yí nawanɔ enujɔjɔɛ. (Eha 97:10) Vɔ fini yí àtɔɛ soɔ? Kpɔ aɖaŋɖoɖo ciwo yí gbɔkɔ ɖa.

• Nyi yí ŋɖo akplaɔ? Enukplakpla madoamɛ nywi lɔnɔ hamɛ bɔbɔwo dradrado domɛ. Kwɛshila lɔ mɛ Bibla hlɛnhlɛn ahɛn nyɔna sugbɔ vɛ nɔ eo wu, nɔ èsɔ hwenu yí wanɔ numɛkuku so enu ciwo mɛ yí demɔŋje o. Gbesɔ kpedonuɔ, mɛɖewo ɖui mɔ yewoakpla nu sugbɔ kudo Bibla mɛ nyɔnuɖɛwo, akpaxwe vovovowo nɔ Mawu gbɔngbɔn kusɛnsɛn, eŋɛnywidradra ejugodutɔ mɔzɔnzɔn apostolo Pɔlu tɔ, alo Yehowa nuwawa ciwo yí wokpɔnɔ nu. Nɔ èbu tamɛ kpɔ so Bibla mɛ nyɔbiɔse ɖe nu le ŋkekeɛ mɛɔ, ŋwliin daɖɛ, yí asɔ do enyɔta ciwo yí àvakpla le enukplakpla hwenu ci yí gbɔkɔ mɛ.

• Fini natɛnŋ akpɔ enyɔtakankanwo leɔ? Le akpa sugbɔ mɛɔ, kpɔ video ci yí nyi: Enumɛkuku dɔwanuwo nɔ gbɔngbɔnmɛ nuxɔafiwo jijikpɔ. Wa numɛkuku yí akpɔ mɔ àjeshi xexeɛ mɛ ŋsɛn ciwo yí wosɔ sɔ koɖo elanwo le Daniɛli eta 7 tɔ mɛ ma, keŋ asɔ do ao nunya kpɔ.

• Gaxoxo nɛni yí ŋɖo asɔ daɖɛ nɔ enukplakpla lɔɔ? Nɔ woanɔ nywiɖe le gbɔngbɔn mɛɔ, enu lɔ kplakpla gashiagamɛ yí nyi vevitɔ. Àtɛnŋ azannɔ gaxoxo hwɛɖeka nɔ ètɔɛ ji kaaka. Le yiyi mɛ, nɔ eӡan ɔ, navajinjinkɔ gamɛ lɔ doji vivivi. Mawu Nyɔ lɔ kplakpla le shigbe mɔ dɔkunu wlawlawo kuku hannɛ; zenɛni ci yí èkpɔkɔ dɔkunu sugbɔɔ, ahanke yí àjikɔ veviɖe mɔ yeaku nu mɛ doji nɛ! (Elo 2:3-6) Mawu Nyɔ lɔ avadrokɔ eo sugbɔ doji, yí Bibla kplakpla gashiagamɛ akpɔtɔ anyikɔ enumadoamɛ nɔ eo.​—1Piɛ 2:2.

NYIWO ELAN CIWO YÍ LE DANIƐLI 7 MƐ, LE DUMƐ NƆƆ?

• 

  Dan 7:4

• 

  Dan 7:5

• 

  Dan 7:6

• 

  Dan 7:7

ENYƆBIƆSE BU:

Lé Daniɛli 7:8, 24 vamɛ doɔ?

ENU CI NAJIKPƆ LE ŊKƆMƐ:

Nyiwo elan ciwo yí le Enyɔdasɛ 13 mɛ, le dumɛ nɔɔ?