KRISTOTƆWO GBENƆNƆ
‘Pɔlu do akpe nɔ Mawu yí edɔngbegbe ɖo lanmɛ ni’
Ci hamɛ ci yí le Rɔma se mɔ Pɔlu gbɔkɔɔ, nɔviwo gbɛbɔbɔ ɖeka zɔn mɔ kpeci 64 han mɔ yewoavayi do go yi. Lé amɛɖekisɔsɔsavɔn lɔnlɔn wowo tɔ lɔ wa dɔ do Pɔlu ji doɔ? “Ci Pɔlu kpɔ woɔ, édo akpe nɔ Mawu yí edɔngbegbe ɖo lanmɛ ni.” (Edɔ 28:15, nwt) Ci wojeshi Pɔlu ɖɛ mɔ yidonɔ ŋsɛn hamɛ ciwo yí evayi jinɔ kpɔ can ɔ, évanyi mɛ ci yí wodo ŋsɛn hwecinu ele gakpamɛ.—2Kor 13:10.
Le egbemɛɔ, ekán lɔ mɛ hamɛwo jikpɔtɔwo jinɔ hamɛwo kpɔ yí donɔ ŋsɛn nɔviŋsu koɖo nɔvinyɔnuwo. Shigbe mɔ Mawu sɛntɔwo pleŋ hannɛɔ, enucikɔnamɛ, enulolokpɔ koɖo gbɔjɔgbɔjɔ ɖenɔ fun nɔ wowo can hweɖewonu. Nɔ ekán lɔ mɛ hamɛwo jikpɔtɔ koɖo ashiɛ gbevaji míwo hamɛ lɔ kpɔ ɖe, nyi àtɛnŋ awa asɔ do ŋsɛn wo, keŋ nɔ anyi ‘ŋsɛndodo míwonɔnɔwoɔ’?—Rɔm 1:11, 12.
Yinɔ kunuɖegbe bɔbɔwo. Nɔ eŋɛnywidratɔwo sɔ enuwo sa vɔn, keŋ yí ɖe kunu le kwɛshila vevi lɔ pleŋ mɛɔ, edonɔ ŋsɛn lanmɛ nɔ ekán lɔ mɛ hamɛwo jikpɔtɔ. (1Tɛs 1:2, 3; 2:20) Kpɔ mɔ àtɛnŋ awa kpedonu mɔɖeɖedɔ lɔ le wleci ci mɛ yí ekán lɔ mɛ hamɛwo jikpɔtɔ avaji mí kpɔ le ma. Àtɛnŋ ayi kunuɖegbe koɖo eyɛ alo koɖo ashiɛ, alo akplɔ wowo domɛtɔ ɖeka yi Bibla nukplavi ɖe gbɔa? Ejɔnɔ ji nɔ wo mɔ yewoaɖe kunu koɖo eŋɛnywidratɔ vovovowo, ciwo mɛ yí eŋɛnywidratɔ yoyuwo alo mɛ ciwo yí senɔ le wowoɖekiwo mɛ mɔ yewodeɖenɔ kunu nywiɖe o le.
Xɔ wo mɛdru. Àtɛnŋ ana dɔnxu alo ŋɖuɖu ɖe woa? Ecɛ wawa adasɛ mɔ èlɔn ekán lɔ mɛ hamɛwo jikpɔtɔ koɖo ashiɛ. Wodekpɔnɔ emɔ mɔ woawa enu gangan ɖe nɔ yewo o.—Lk 10:38-42.
Ðo to yí awa do emɔdasɛnamɛ koɖo aɖaŋɖoɖo yi tɔwo ji. Ekán lɔ mɛ hamɛwo jikpɔtɔ sɔ lɔnlɔn kpenɔdo mì nu, yí mìkpɔnɔ lé mìatɛnŋ awɛ nɔ Yehowa sɛnsɛn mìwo tɔ agbenyɔ doji wu. Hweɖewonuɔ, átɛnŋ ana aɖaŋɖoɖo sɛnŋ ɖe mì. (1Kor 5:1-5) Nɔ mìɖo to yí sɔ mìwoɖekiwo hweɔ, ejɔnɔ ji ni.—Ebre 13:17.
Dasɛ enujeŋnamɛ. Nu lé egbla ciwo yí ekán lɔ mɛ hamɛwo jikpɔtɔ koɖo ashiɛ dokɔ, hɛn nyɔna vɛ nɔ eo do nɔ wo. Àtɛnŋ anui nɔ wo tiin alo awɛ to enuŋwlɛnɖaɖamɛ ji.—Kol 3:15.