Zan videowo asɔ kpla nu ao Bibla nukplaviwo

Foto koɖo videowo, alo enu ciwo yí wokpɔnɔ dɔnnɔ susu nɔ mɛ ci yí kpɔkɔ wo yí esenɔ enu lɔwo gɔnmɛ yí ɖonɔ ŋwi enu ciwo ekpla ji. Yehowa, mìwo Nukplamɛtɔ Gangantɔ zan enu ciwo yí wokpɔnɔ yí sɔ kpla enu veviwo amɛwo. (Gɔnm 15:5; Ʒer 18:​1-6) Yesu, Enukplamɛtɔ Gangan can zan wo hɛnnɛ. (Mt 18:​2-6; 22:​19-21) Video nyi ɖeka le enu ciwo yí wokpɔnɔ mɛ. Enunywi sugbɔ to le yi zanzan mɛ le exwe cɛwo mɛ. Èzannɔ videowo nywiɖe, nɔ èkplakɔ nu koɖo ao Bibla nukplaviwoa?

Wowa video amɛwo ciwo yí akpedo mì nu le Eŋɛnywi ciwo yí so Mawu gbɔ! wemagbaja lɔ kplakpla koɖo amɛwo mɛ. Le akpa sugbɔtɔ mɛɔ, video ɖekaɖeka nyɔta sɔ koɖo enyɔbiɔse ɖeka le ciwo yí wosɔ enuŋwlɛnŋwlɛn tritri ŋwlɛn do enukplakpla ɖekaɖeka mɛ le wemagbaja lɔ mɛ. Wotrɔ ashi le wemagbaja eka ji tɔ nu nɔ aɖonɔ ŋwi hwecinu mìadasɛ video ɖekaɖeka nɔ mì. Gbesɔ kpe niɔ, video buwo li nɔ Bibla nukplawema vovovowo le mìwo nukplakpla dɔwanu dakavi lɔ mɛ.

Èkplakɔ nu so Bibla mɛ nyɔ ɖe nu, ci gɔnmɛsese atɛnŋ agbɔnnu nɔ ao Bibla nukplavia? Alo ao Bibla nukplavi ɖe tokɔ cukaɖa sɛnŋ ɖe mɛa? Ji videowo kpɔ le jw.org® koɖo JW Televiʒiɔn® ji, keŋ akpɔ ɖeka ci yí atɛnŋ akpedo nu. Eo koɖo ao Bibla nukplavi lɔ atɛnŋ akpɔ ɖeka le video lɔwo mɛ doju, keŋ akan seŋ so nu.

Video yoyuwo tonɔ wleci ɖeshiaɖe. Nɔ èkpɔkɔ woɔ, kpɔ lé àtɛnŋ azan wo do nɔ èvakplakɔ nu koɖo mɛbuwo.