Lé àzan kpɔwɛ seŋkannyɔwo doɔ?

So janvier 2018 jiɔ, kpɔwɛ seŋkannyɔwo nɔnɔ Kristotɔwo gbenɔnɔ koɖo sumɔsumɔdɔ​—Bɔbɔ nukplawema kpa ji. Lé mìazan wo doɔ?

Nɔ wona sukluvidɔ ɖe eo: Èɖo azan nyɔbiɔse lɔ, kpukpui lɔ, koɖo enyɔgbeɖɛ kpɔwɛ seŋkannyɔ lɔ tɔ. Vɔ ecɛ dedasɛ mɔ, enyɔ ciwo yí le kpɔwɛ seŋkannyɔ video lɔ mɛ pɛpɛpɛ yí èɖo anu o. Èhɛn azan kunuɖeɖe lɔkpa bu, anu nyɔ bu doŋkɔ, adre nyɔ lɔ mɛ do alɔkpa bu ji yí agbewa nubuwo. Èhɛn ana ɖeka le wema ciwo yí le mìwo Nukplakpla dɔwanu dakavi lɔ mɛ, nɔ wodenu ahan le emɔdasɛnamɛ edɔ lɔ tɔ mɛ can.

Nɔ èle kunuɖegbe: Wa wowa kpɔwɛ seŋkannyɔ lɔwo nɔ woakpedo mì nu mìanya enyɔ ci hanwo mìatɛnŋ anu. Nɔ nyɔ lɔ jɔ ji nɔ mɛɖe yí eji mɔ yeanya nubuwo kpiɔ, àtɛnŋ ayi seŋkankan lɔ ji koɖi yí azan enyɔ ciwo yí le trɔtrɔyi ŋkɔtɔ kpɔwɛ seŋkannyɔ lɔ mɛ. Àtɛnŋ atrɔ ashi le kpɔwɛ seŋkannyɔ lɔwo nu alo azan ebu ciwo yí to akpo xesexese. Kpɔwɛ seŋkannyɔ alo kpukpui ci wozan le wleci ci yí vayi mɛ jɔ ji nɔ amɛwo wu le míwo nyigbanmama mɛa? Ŋɖe jɔ alo enyɔ yoyu ɖe ɖyiɖyiɛ le míwo ju mɛ ci nu amɛwo aji mɔ yewoakan seŋ soa? Àtɛnŋ azan kpɔwɛ seŋkannyɔ lɔwo do alɔkpa vovovowo ji. Vɔ eɖo anɔ susumɛ nɔ eo mɔ, ‘eŋɛnywi lɔ tamɛ yí èwakɔ enu cɛwo pleŋ do nɔ natɛnŋ anui nɔ mɛbuwo.’—1Kor 9:22, 23.