Lé woawa kunuɖegbe bɔbɔwo do nɔ amɛwo akpɔ sɔɖu le mɛ

Kunuɖegbe bɔbɔwo le shigbe hamɛwo bɔbɔ nɛ. Enyi nunana ɖeka ci yí so Yehowa gbɔ ci yí kpenɔdo mì nu mìdanasɛ lɔnlɔn koɖo enunywiwawa. (Ebretɔwo 10:24, 25) Bɔbɔ cɛwo axɔ so minici amatɔn yi amadrɛ. Minici cɛwo mɛ yí woama amowo le, anu fini woaɖe kunu le yí ado gbe ɖaɖa. (Nɔ woawa bɔbɔ ɖe ɖegbɔ xwe yí awa kunuɖegbe bɔbɔ lɔɔ, eɖo agbenɔ kleŋ wu minici amatɔn.) Mɛ ci yí akpɔ kunuɖegbe bɔbɔ ji ɖo adra enu ŋtɔŋtɔ ɖeka do, ci yí akpedo mɛ ciwo yí aɖe kunu gbenɔgbe lɔ nu. Le zozangbeɔ, amɛ sugbɔtɔ ciwo yí vanɔ kunuɖegbe bɔbɔ lɔ detɛnŋ ɖenɔ kunu le kwɛshila lɔ mɛ o. Eyi taɖo anyɔ mɔ woakan seŋ so enyɔ ci woanu nɔ axomɛnɔtɔ lɔ nu. Enyɔ ciwo nu wohɛn woakan sɛŋ so yí nɔviwo akpɔ sɔɖu le mɛɔ?

• Kpɔwɛ seŋkannyɔ ci yí le Kristotɔwo gbenɔnɔ koɖo—Bɔbɔ nukplawema mɛ

• Lé woatɔ seŋ ji koɖo enujɔjɔ yoyu ɖe

• Lé woanu do nyɔ ɖe ci amɛwo nunɔ le míwo nyigbanmama mɛ keŋ yí gbenɔ mɔ yewodakan seŋ koɖo mì nu

• Lé woakan seŋ koɖo mɛ ci yí xɔɛ se mɔ Mawu deli o, mɛ ci yí mɔ jɔ nuwo jɔ wowoŋtɔwo, mɛɖe ci yí donɔ gbe bu, mɛ ci yí le sɛnsɛn ɖe ci yí debɔ le nyigbanmama lɔ mɛ o

• Lé woazan enu yoyu ɖe ci yí ze le jw.org ji, JW Library^® dɔwanu ji, alo Bibla mɛ

• Lé woazan dɔwanu ɖe le dɔwanu ciwo yí le Enukplakpla dɔwanu dakavi lɔ mɛ

• Lé woawɛ aɖe kunu to telefonu ji, wema ŋwlɛŋwlɛ ji, lé woaɖe kunu le jugbaja, lé woawa trɔtrɔyi alo Bibla nukplaviwo

• Lé woawɛ yí ŋɖe dawa mɛɖe le kunuɖegbe o, trɔtrɔdo nɔnɔmɛ lɔ nu, enuwana nywiwo, susu nywiwo ɖoɖo do amɛwo nu

• Enukplakpla alo video ɖeka le Do vevi enuhlɛnhlɛn koɖo enukplakpla amɛwo wemagbaja lɔ mɛ

• Lé woado ŋsɛn yí akpedo mɛ ci yí yi kunuɖegbe koɖo amɛ nu

• Xo nuxu so Bibla kpukpui ɖe, alo ŋɖe ci yí jɔ le kunuɖegbe yí edo ŋsɛn amɛ nu