Kunuɖeɖedɔ vevi ci woawa le septembre mɛ yí asɔ tɔ Bibla kplakpla koɖo amɛwo

Le septembre wleci mɛɔ, mìawa dɔ sɛnsinɖe yí azan Se vivi nɔ agbe lɔ sɔyi mavɔ! wemagbaja lɔ keŋ asɔ tɔ Bibla kplakpla koɖo amɛwo. Eŋɛnywidratɔ ɖe hɛn amɔ yeawa kpedonu mɔɖeɖedɔ lɔ yí ana gaxoxo 30. Lé mìawa kuɖeɖedɔ vevi cɛ doɔ?

• Le yiyi ŋkɔtɔ mɛ: Zan ŋci woŋwlɛ do godu nɔ wemagbaja lɔ keŋ asɔ kpedo amɛ lɔ nu nɔ asɔ ɖe le nyɔ lɔ ji yí agbetekpɔ adasɛ lé mìkplanɔ Bibla koɖo amɛwo do ni. Ðo ŋwi mɛ ciwo yí sɔ ɖe le nyɔ lɔ ji vayi koɖo mɛ ciwo mìwanɔ trɔtrɔyi nɔ. Nɔ wogbe Bibla nukplakpla vayi can ɔ, taŋfuin lé mìvakplakɔ nu koɖo amɛwo do koɖo wemagbaja lɔ ajɔ ji nɔ wo. Wodasɔ wemagbajawo do lɛta mɛ asɔ ɖaɖa mɛ ɖe abi agbe wo do axomɛ daɖɛ nɔ mɛɖe ci yí desɔ ɖe le nyɔ lɔ ji vayi o. Sumɔsumɔdɔ jikpɔgbɛ hamɛ lɔ tɔ tɛnŋ wa toto nɔ kunuɖegbeyiyi bɔbɔ buwo le wleci lɔ mɛ.

• Mɔnukpɔkpɔ buwo: Nɔ ao hamɛ zannɔ kunuɖeɖe kekeviwoɔ, sɔ Se vivi nɔ agbe lɔ sɔyi mavɔ! wemagbaja lɔ sɔ do mɛ. Nɔ mɛɖe sɔ ɖe le ji yí xɔ wemagbaja lɔɔ, nu ni mɔ mìzannɔ wema lɔ yí sɔ kplanɔ Bibla koɖo amɛwo ehomaxɔ. Dre lé nukplakpla lɔ yinɔ do ni kleŋ le seŋkankan lɔ hwenu alo wa toto avadri ni le gabu mɛ. Sumɔsumɔdɔ jikpɔtɔ le wa toto keŋ nɔ eŋɛnywidratɔ bibiwo ayi ajɔdoxu ciwo yí le nyigbanmama lɔ mɛ yí asɔ Bibla nukplakpla ɖo ŋmɛ nɔ amɛwo le nɔ. Àtɛnŋ asɔ Bibla nukplakpla ɖo ŋmɛ nɔ ao dɔmɛ kpenawo alo mɛ ciwo èdonɔ go le avomɛ kunuɖeɖe mɛ.

Yesu dɔ mì mɔ “mìwo le ɖo dɔkplaviwo,” yí “a kpla nu wo.” (Mt 28:19, 20) Mìatekpɔ yí azan Se vivi nɔ agbe lɔ sɔyi mavɔ! wema lɔ le kuɖeɖedɔ vevi lɔ mɛ yí asɔ wa edɔ cɛ.