Alɔlele—Amɛkpena agbe mɛ pleŋ tɔ

Kristotɔwo lɔlele ciwo mɛ jijɔ le hɛnnɔ kanfukanfu vɛ nɔ Yehowa yí asu koɖo ashi lɔwo gbesenɔ vivi. (Mk 10:9) Gbɔxwe jijɔkpɔkpɔ anɔ Kristotɔwo lɔlele mɛ ɖaaɔ, woɖo awa do Bibla gɔnmɛɖosewo ji hwenu wocancan mɛ ci woaɖe.

To “jajɛ hwenu mɛ ɖegbɔ” gbɔxwe atɔ zɔnzɔn koɖo mɛɖe, ɖo le jajɛ hwenuɔ, gbɔdɔndɔn droamuwo sɛnnɔŋ sugbɔ yí atɛnŋ adɔ amɛ asɔ gbeta dɔndɔnwo (1Kor 7:36, NWT) Wa ɖaŋ azan exwe ciwo mɛ yí ènyi trɛnnɔ yí asɔ do ŋsɛn ekacaca ci yí le eɔ koɖo Mawu gblamɛ yí agbeɖo Kristotɔwo nɔnɔmɛ nywiwo. Nɔ èwɛ ahan ɔ, àtɛnŋ awa nu sugbɔ ciwo yí adɔ ao lɔlele amlɛ nɔ eo.

Gbɔxwe àlɔn aɖe mɛɖeɔ, do ʒinxo azan hwenu yí asɔ jeshi “acɔ ejimɛtɔ” mɛ lɔ tɔ. (1Piɛ 3:4) Nɔ ŋɖewo vakpacakɔ eo so mɛ ci àɖe nuɔ, kan seŋ koɖi so wo nu. Le ao lɔlele mɛɔ, ao susu le nɔ enu ci àwa nɔ mɛ ci èjikɔ aɖe ji sɔwu ci yɛawa nɔ eo ji, shigbe lé ele le agbetɔwo kacaca buwo mɛ nɛ. (Fili 2:3, 4) Nɔ èwanɔ do Bibla gɔnmɛɖosewo ji gbɔxwe yí vale alɔɔ, anɔ fafɛɖe nɔ eo mɔ àkpɔtɔ awɛni ahan le alɔlele lɔ godu. Eyi jijɔ anɔ ao lɔlele lɔ mɛ.

MÍKPƆ VIDEO CI YÍ NYI DRADRADO NƆ ALƆLELE—AKPAXWE 3: “DRƆƐ KPƆ,” KEŊ AÐO NYƆBIƆSE CIWO MÌAKPƆ YƐ ŊCI:

• Lé nu lɔwo vayiyiɛ ji do le nɔvinyɔnu lɔ koɖo Shane gblamɛ doɔ?

• Nyi nɔvinyɔnu lɔ vado jeshi ci evajejeɛshi nɔviŋsu lɔ ɖɛ dojiɔ?

• Lé dalɔ koɖo nɔlɔ kpedo nu doɔ, yí gbeta nywi ci evasɔɔ?