KRISTOTƆWO GBENƆNƆ
Ji Mawu susu kpɔ
Mìji mɔ mìwo nu ajɔ ji nɔ Yehowa le ŋciwo pleŋ mìwanɔ mɛ. (Elo 27:11) Nɔ mìawa cɛɔ, ele mɔ mìasɔnɔ gbeta ciwo yí sɔgbe koɖo yi susu, nɔ Bibla gɔnmɛɖose ɖe dexo nuxu so ŋci mìjijiɛ awa nu can. Nyi yí atɛnŋ akpedo mì nu mìawɛ ahan ɔ?
Bibla kplakpla gashiagamɛ le mado eo. Hweɖekpokpuinu ci mìle Bibla hlɛnkɔɔ, ele shigbe mɔ mìzankɔ gamɛ doju koɖo Yehowa hannɛ. Nɔ mìkpɔnɔ lé Yehowa wanɔ nu koɖo yi mɛwo do yí gbekpɔnɔ kpɔwɛ nywi alo kpɔwɛ dɔndɔn ci mɛ ciwo yí sin vayi ɖo ɖɛɔ, mìatɛnŋ akpla nu so lé Yehowa kpɔnɔ nuwo do nu. Nɔ evaʒan mɔ mìasɔ gbeta ɖeɔ, gbɔngbɔn kɔkɔɛ lɔ atɛnŋ aɖo ŋwi enuvevi ciwo mìkpla vayi koɖo gɔnmɛɖose ciwo mìkpla le Mawu Nyɔ lɔ mɛ nɔ mì.—Ʒan 14:26.
Wa numɛkuku. Nɔ èjikɔ asɔ gbetaɔ, biɔ eoɖeki se mɔ, ‘Kpukpui alo exɔlɔlɔ ciwo yí le Bibla mɛ ciwo yí atɛnŋ akpedo ŋnu mamɔŋje lé Yehowa kpɔkpɔ cukaɖaa do mɛɔ?’ Do gbe ɖaɖa nɔ Yehowa nɔ akpedo eo nu yí awa numɛkuku le dɔwanu ciwo yí le ao gbemɛ mɛ. Ecɛ awɛ mɔ nakpɔ Bibla gɔnmɛɖose ciwo yí akpedo eo nu le ao nɔnɔmɛ lɔ mɛ.—Eha 25:4.
MÍKPƆ VIDEO CI YÍ NYI MÌÐO “ALƆ JU LƆ KOÐO EJIDODO”—ÐU NU LE GBƆNBƆNMƐ NYWIÐE, KEŊ AÐO NYƆBIƆSE CIWO MÌAKPƆ YƐ ŊCI:
Lé wotɛdo nɔvinyɔnu ci mìkpɔ le video lɔ mɛ ji doɔ?
Nɔ wovatɛdo eo ji ahan ɖe, lé àzan dɔwanu ciwo yí li yí asɔ wa numɛkuku doɔ?
Ele ciwo mìkpɔnɔ nɔ mìji gamɛ yí wanɔ numɛkuku ci yí atɛnŋ akpedo mì nu mìasɔnɔ gbeta nywiwoɔ?—Ebre 5:13, 14