Lé Mìana Kpekpedonu Do Nɔ Afɔku Ðe Jɔ

Jɔjɔmɛfɔkuwo va sukɔgbɔ doji sɔwu sa. Nɔ afɔku ɖe jɔɔ, woɖo awa ɖaŋ awa toto nɔ egbla ciwo woado asɔ na kpekpedonu yí agbewɛ keke nɔ ayi nywiɖe. Susu ŋtɔ́ yí dɔ Edɔjikpɔha lɔ wa toto yí woɖo Jɔjɔmɛfɔku Kpedonunana Dɔwaxu do alɔjedɔwaxu ɖeshiaɖe.

Nɔ nɔvi ciwo yí le dɔwaxu cɛ mɛ se mɔ afɔku jɔɔ, woyɔnɔ hamɛmɛshinshin ciwo yí le fini yí enu lɔ jɔ le zeɖeka yí akpɔ ŋciwo yí eŋɛnywidratɔwo ʒan. Nɔ ŋciwo yí dahɛn gangan keke eŋɛnywidratɔ ŋtɔwo datɛnŋ akpɔ wo gbɔɔ, alɔjedɔwaxu lɔ asɔ nɔvi ciwo yí je nɔ woaxɔ ŋkɔ le kpekpedonunanadɔ lɔ mɛ. Nɔvi cɛwo tɛnŋ ʒan lɔnlɔn faa dɔwatɔwo alo amɔ wo le wa lɔnlɔn faa nunana ɖewo koŋ, alo wotɛnŋ xwle ŋɖewo yí ama ŋciwo yí ʒan le fini yí enu lɔ jɔ le.

Nyɔna sugbɔ le enuwo gbɔ kpɔkpɔ ahan mɛ. Édɔ yí wodegbewanɔ edɔ gbali, acaka, yí agu ho koɖo nubu ciwo woatɛnŋ agu nɔ nɔvi lɔ ŋtɔwo mɔ yewoawa enu lɔwo lé edro yewo do o.

Nɔvi ciwo alɔjedɔwaxu lɔ sɔ atɛnŋ anu eho nɛni woʒan koɖo lɔnlɔn faa dɔwatɔ nɛni woʒan le kpekpedonunanadɔ lɔ mɛ. Woatɛnŋ agbedogo koɖo jumɛga ciwo yí le nɔ lɔ ɖɛ. Ecɛ atɛnŋ akpedo mì nu keŋ nɔ kpekpedonunanadɔ lɔ asɔ kaba. Eyi taɖo mɛɖe deɖo aso kpoŋ atɔ eho jɔjɔ, atɔ enuwo sɔsɔ ɖaɖa alo azɔn mɔ ayi fini enu lɔ jɔ le nɔ wodenu ni mɔ le wɛ ahan o.

Ci enyi ahan can nɔ afɔku ɖe jɔɔ, mìjinɔ mɔ mìana kpekpedonu (Ebre 13:16) Mìlɔn mìwo nɔviwo! Nyi mìawa druɔ? Vevitɔ lɔ yí nyi mɔ, mìatɛnŋ ado gbe ɖaɖa do ta nɔ mɛ ciwo ji afɔku lɔ jɔ do koɖo mɛ ciwo yí nakɔ kpekpedonu. Mìatɛnŋ agbena eho to xexeɛ mɛ pleŋ dɔ lɔ ji. Le kacaca mɛ koɖo Edɔjikpɔha lɔɔ, alɔjedɔwaxuwo yí nya finiwo woazan eho cɛwo le yí awa nywi nɔ amɛ sugbɔ. Nɔ édro mì duu mɔ mìawa ɖe le mɛɔ, mìatɛnŋ anu mɔ mìle gbesɔsɔ to alɔdodo wema ci yí nyi Demande d’admission comme volontaire Local Dévéloppement/Construction (DC-50) mɛ.

MÍKPƆ VIDEO CI YI NYI ESHIÐƆÐƆ CI YÍ GBAN NUWO LE BRESIL KEŊ AÐO NYƆBIƆSE CI MÌAKPƆ YƐ ŊCI:

Nyi yí jiŋ nɔ eo le kpekpedonu ci Yehowa kunuɖetɔwo na ci eshi gban nuwo le Brésil le exwe 2020 mɛɔ?