Efyɔ ciwo yí anyi ketɔnɔwo le azan lɔwo vɔvɔnu

Enyɔnuɖɛ ciwo yí le dakavi lɔ mɛ do nu wowonɔnɔwo mɛ. Wo pleŋ dasɛ mɔ mì le “azan lɔwo vɔvɔnu.”—Dan. 12:4, NWT.

Dakavi ci yí dasɛ enyɔnuɖɛwo koɖo mɛ ciwo yí nyi tagbe fyɔ koɖo fɔde fyɔ lɔ so exwe 1870 keke vaɖo egbɛ.

Mawunyɔkpukpuiwo: Enyɔ. 11:7; 12:13, 17; 13:1-8, 12

Enyɔnuɖɛ lɔ: “Elan lɔ” kpa acɛ nɔ nyigban lɔ keŋkeŋ na nɔ exwe sanŋdi nɛniɖe. Le azan lɔwo vɔvɔnuɔ, wodo abi yi ta amadrɛtɔ lɔ nu. Le yi goduɔ, abi lɔ ku ni yí “mɛ ciwo yí le nyigban ji” pleŋ kplɔ elan lɔ do. Satana azan elan lɔ yí asɔ wa ahwa koɖo “nyɔnu lɔ vi kpɛtɛwo.”

Lé evamɛ do: Le eshiɖɔɖɔ lɔ goduɔ, agbetɔwo cɛkpakpa ciwo yí fɔn gu do Yehowa nu yí kplɔkɔ agbetɔwo. Exwe 3000 koɖo ŋɖe godu le Xexemɛhwa ŋkɔtɔ lɔ mɛɔ, ŋsɛn sugbɔ vɔ nɔ Grande-Bretagne ci yí nyi ɖeka le acɛkpakpa lɔwo mɛ. Ci evaca gbɛ koɖo États-Unis ɔ, yi ŋsɛn gbetrɔ gbɔ. Le ŋkeke kpɛtɛkpɛtɛ cɛwo mɛɔ, Satana zankɔ acɛkpakpa ciwo pleŋ yí le nyigban lɔ ji yí sɔ cikɔ yumɛ nɔ Mawu mɛwo.
Mawunyɔkpukpuiwo: Dan. 11:25-45

Enyɔnuɖɛ lɔ: Le azan lɔwo vɔvɔnuɔ, tagbe fyɔ koɖo fɔde fyɔ wakɔ ahwa koɖo wowonɔnɔwo keŋ akpa cɛ.

Lé evamɛ do: Allemagne wa ahwa koɖo Anglo-Amɛliki. Le exwe 1945 mɛɔ, Union soviétique koɖo eju ciwo yí ca gbɛ koɖi vanyi tagbe fyɔ. Le exwe 1991 mɛɔ, Union soviétique juin yí le yiyimɛɔ, Russie koɖo eju ciwo yí ca gbɛ koɖi vatrɔ tagbɔ fyɔ lɔ.
Mawunyɔkpukpuiwo: Ezai 61:1; Mal. 3:1; Luiki 4:18

Enyɔnuɖɛ lɔ: Yehowa dɔ yi “ŋɛdotɔ ɖaɖa nɔ a dra emɔ do” gbɔxwe woaɖo Mɛsia Fyɔɖuxu lɔ. Gbɛbɔbɔ cɛ tɔ ‘eŋɛnywi lɔ dradra nɔ wamɛnɔwo.’

Lé evamɛ do: So exwe 1870 mɛɔ, C. T. Russell koɖo yi kpenawo wa dɔ veviɖe keŋ kedo Bibla mɛ nyɔnɔnwiwo nu. Le exwe 1881 mɛɔ, wodo jeshi mɔ Mawu sɛntɔwo ɖo adra eŋɛnywi lɔ. Wota nyɔta ciwo yí nyi “Mìʒan eŋɛnywidratɔ 1 000” koɖo “Woshi ami nɔ mì nɔ mìaɖe kunu.”
Mawunyɔkpukpuiwo: Mt. 13:24-30, 36-43

Enyɔnuɖɛ lɔ: Ketɔnɔ ɖeka va do egbe vwiwo do eliku lɔwo mɛ le boji. Botɔ lɔ bɔ nu yí egbe vwin lɔwo shin yí cɔn eliku lɔwo ji. Le jinukusɔsɔ hwenuɔ, wolɔ egbe vwin lɔwo ti le eliku lɔwo mɛ.

Lé evamɛ do: So exwe 1870 mɛɔ, wovakpɔkpɔ vovototo ci yí le Kristotɔ adodwiwo mɛ koɖo ŋsukankan Kristotɔwo gblamɛ. Le azan lɔwo vɔvɔnuɔ, wobɔ Kristotɔ adodwiwo do hamɛ lɔ mɛ yí ɖe wo so ŋsukankan Kristotɔwo mɛ.
Mawunyɔkpukpuiwo: Dan. 2:31-33, 41-43

Enyɔnuɖɛ lɔ: Legbamɛmɛ ɖeka ci wosɔ ega vovovowo wa yí afɔwo nyi ega koɖo esu ni.

Lé evamɛ do: Esu lɔ le dumɛ nɔ egufɔntɔ ciwo ji Anglo-Amɛliki Xexeɛmɛŋsɛn kpakɔ acɛ do. Egufɔntɔ cɛwo na yí Xexeɛmɛŋsɛn lɔ detɛnŋ zankɔ yi ŋsɛn ci yí le shigbe ega nɛ nywiɖe o
Mawunyɔkpukpuiwo: Mt. 13:30; 24:14, 45; 28:19, 20

Enyɔnuɖɛ lɔ: Wobɔ “jinuku nywi” lɔwo do “avamɛ” yí ɖo “hwashi egbejinɔtɔ koɖo ŋɖɛnyatɔ lɔ” nɔ akpɔkɔ “axomɛ dɔwaviwo” ji. Wotɔ “Fyɔɖuxu ŋɛnywi lɔ” dradra nɔ “xexe lɔ pleŋ.”

Lé evamɛ do: Le exwe 1919 mɛɔ, woɖo hwashi egbejinɔtɔ lɔ do Mawu mɛwo ji. So hwenɔnuɔ, Bibla Nukplaviwo tɔ eŋɛnywi lɔ dradra veviɖe. Egbɛɔ, Yehowa Kunuɖetɔwo drakɔ eŋɛnywi lɔ le eju ciwo yí wu 200 mɛ yí takɔ Bibla nukplawemawo do egbe ciwo yí wu 1 000 mɛ.
Mawunyɔkpukpuiwo: Dan. 12:11; Enyɔ. 13:11, 14, 15

Enyɔnuɖɛ lɔ: Elan ci yí mi ezo amɛve dɔ amɛwo yí womɛ ‘elan wadan lɔ nukpla’ alo yi nɔnɔmɛtata yí ‘ena gbɔngbɔn’ yi.

Lé evamɛ do: Anglo-Amɛliki Xexeɛmɛŋsɛn wa Jukɔnwo Nublabla. Jukɔn buwo do alɔ nublabla cɛ. So exwe 1926 yi exwe 1933 mɛɔ, tagbe fyɔ can ɖo Jukɔnwo Nublabla lɔ mɛ. Amɛwo xɔɛ ji se mɔ Jukɔnwo Nublabla lɔ ana fafa anɔ xexeɛ mɛ, vɔ etrɔnyi Mawu Fyɔɖuxu lɔ ɖekɛ yí atɛnŋ awɛ. Le yi goduɔ, wogbexɔɛ ji se mɔ Jukɔnwo Xoxoxu Habɔbɔ lɔ can ana fafa anɔ xexe lɔ mɛ.
Mawunyɔkpukpuiwo: Dan. 8:23, 24

Enyɔnuɖɛ lɔ: Efyɔ kpotu lɔ “a dɔ enutrɔntrɔn sugbɔ a nì.”

Lé evamɛ do: Anglo-Amɛliki Xexeɛmɛŋsɛn wu amɛ sugbɔ yí dahɛn nu sugbɔ. Le kpɔwɛ mɛ, le Xexemɛhwa amɛvetɔ lɔ mɛɔ, États-Unis sɔjawo da bɔnŋbu sɛnŋsɛnŋ amɛve ɖaɖa eju ciwo yí nyi ketɔnɔ nɔ Grande-Bretagne koɖo États-Unis. Ahwawanu ɖe dedahɛn nu vayi shigbe ecɛwo nɛ o.
Mawunyɔkpukpuiwo: Dan. 11:31; Enyɔ. 17:3, 7-11

Enyɔnuɖɛ lɔ: “Elan jin” ci yí ɖo zo amɛwo to so edumaɖosɛnxu mɛ, eyi yí nyi efyɔ amɛnyitɔ lɔ. Daniɛli wema yɔ efyɔ lɔ mɔ yɛnyi “enunyɔŋ ci yí ahɛn axwetugbe vɛ.”

Lé evamɛ do: Le Xexemɛhwa amɛvetɔ lɔ mɛɔ, Jukɔnwo Nublabla lɔ juin. Le ahwa lɔ goduɔ, wovasɔ Jukɔnwo Xoxoxu Habɔbɔ “sɔ daɖɛ.” Wosɔ bubu ci Mawu Fyɔɖuxu lɔ je nɔ sɔ nakɔ Jukɔnwo Xoxoxu Habɔbɔ lɔ shigbe lé wowɛni nɔ Jukɔnwo Nublabla lɔ sa nɛ. Jukɔnwo Xoxoxu Habɔbɔ lɔ aje sɛnsɛnwo ji.
Mawunyɔkpukpuiwo: 1 Tɛs. 5:3, NWT; Enyɔ. 17:16

Enyɔnuɖɛ lɔ: Jukɔnwo ado “fafa koɖo vofamɛnɔnɔ” xwa, yí “elan zo amɛwo” lɔwo aje “asuwatɔ lɔ” ji yí agui. Le yi goduɔ, woagu jukɔnwo.

Lé avamɛ do: Jukɔnwo tɛnŋ vado axwa mɔ yewona yí fafa koɖo vofamɛnɔnɔ le xexeɛ mɛ. Le yi goduɔ, jukɔn ciwo yí le Jukɔnwo Xoxoxu Habɔbɔ lɔ mɛ agu ŋsusɛnsɛn ciwo pleŋ yí li. Ecɛ nyi tɔtɔmɛ nɔ efunkpekpe gangan lɔ. Nɔ Yesu gu nuvwinwatɔwo le Harmagedɔn mɛɔ, efunkpekpe gangan lɔ avɔ.
Mawunyɔkpukpuiwo: Eze. 38:11, 14-17; Mt. 24:31

Enyɔnuɖɛ lɔ: Gogi avaje Mawu mɛwo ji. Eyi mawudɔlawo ava bɔ ‘amɛcancan Mawu tɔwo.’

Lé avamɛ do: Tagbe fyɔ koɖo acɛkpakpa kpɛtɛ ciwo le xexeɛ mɛ avaje Mawu mɛwo ji. Gbɔxwe woaje wo jiɔ, woabɔ amɛshiaminɔ kpɛtɛwo do jeŋkwimɛ.
Mawunyɔkpukpuiwo: Eze. 38:18-23; Dan. 2:34, 35, 44, 45; Enyɔ. 6:2; 16:14, 16; 17:14; 19:20

Enyɔnuɖɛ lɔ: “Esɔ ɣi . . . kutɔ lɔ” to nɔ yi “ketɔwo jiɖuɖu” yí agu Gogi koɖo yi hwakɔn. Wolé “elan” lɔ do “etɔ ci yí bibiɛ ezo” mɛ. Yí ekpe ɖeka gban legbamɛmɛ lɔ wliwliwli.

Lé avamɛ do: Yesu ci yí nyi Mawu Fyɔɖuxu lɔ Fyɔ avahwlɛn Mawu mɛwo gan. Yesu, amɛ 144 000 koɖo mawudɔlawo hwakɔn avagu jukɔn ciwo yí je Mawu mɛwo ji. Ecɛ yí ahɛn Satana xexe lɔ va vɔvɔnu.