Enyɔbiɔse ciwo yí so yi hlɛntɔwo gbɔ

Nyi yí taɖo 2 Samiɛli 21:7-9 nu mɔ Davidi “de na emɔ yí wo a wa enu vɔn koɖo Mefibali o,” vɔ yí gbesɔ Mefibali na mɔ wo le wuɔ?

Mɛɖewo biɔnɔ nyɔ cɛ se nɔ wodedo ʒinxo yí hlɛn exolɔlɔ lɔ o. Vɔ amɛ vovovo amɛve ciwo yí tɔ mɔ Mefibali nu yí kpukpui cɛwo xokɔ nuxu so, yí mìatɛnŋ akpla enuvevi ɖeka so wowo xolɔlɔ lɔ mɛ.

Evi ŋsuvi amadrɛ koɖo nyɔnuvi amɛve yí Efyɔ Sɔlu ji. Eviɛ ŋsuvi ŋkɔtɔ tɔ mɔ Ʒonatan. Rispa ci yí nyi Sɔlu ashiɛ vaji ŋsuvi ɖeka ci yí tɔ mɔ Mefibali ni. Ʒonatan can ɖo evi ŋsuvi ɖeka ci yí tɔ mɔ Mefibali. Ahan yí ejɔ yí Efyɔ Sɔlu ɖo evi koɖo vivi ɖeka ciwo yí ɖo ŋkɔ ɖekɛ lɔwo nɛ.

Hweɖekanuɔ, Efyɔ Sɔlu vatɔ Gibeɔnititɔ ciwo yí le Izraɛli ju mɛ xaxa keke yí tekpɔ mɔ yeavɔ wo pleŋ si. Ewa mɔ wowu sugbɔtɔ le wo mɛ. Enudɔndɔn ŋtɔteŋ ewa. Nyi yí taɖoɔ? Ðo le Ʒozue hwenuɔ, Izraɛli mɛganwo wa fafa nublabla koɖo Gibeɔnititɔwo.—Ʒozue 9:3-27.

Enublabla ŋtɔ́ kpɔtɔ le dɔ wakɔ keke je Efyɔ Sɔlu hwenu. Ci enyi ahan can ɔ, Sɔlu wa enu ci yí to akpo xesexese nɔ enublabla lɔ keŋ tekpɔ mɔ yeagu Gibeɔnititɔwo. Enu cɛ ci ewa dɔ yí yi “koɖo yi xomu . . . nyi amɛ wutɔwo.” (2 Sam. 21:1) Le yiyimɛɔ, Davidi vanyi efyɔ. Gibeɔnititɔ ciwo yí gan xo nuxu ni so xomɛvevenu ci wowa koɖo wo nu. Davidi biɔ wo se mɔ nyi woawa asɔ dra enudakpu ci yí Sɔlu wa do, keŋ nɔ Yehowa acu shi nɔ nyigban lɔ ma. Gibeɔnititɔ lɔwo debiɔ eho o, vɔ wobiɔ mɔ wo le sɔ ŋsu ci yí “wa totomɛ yí a wa nu koɖo” yewo vi ŋsuvi amadrɛ nɔ yewo, nɔ yewoawu. (Amh. 35:30, 31) Davidi wa enu ci wobiɔ.—2 Sam. 21:2-6.

Sɔlu koɖo Ʒonatan ku le ahwa mɛ vayi, vɔ Ʒonatan vi ŋsuvi Mefibali yɛ le agbe. Éje fɔku ɖeka so vihwɛ mɛ yí vanyi atakunɔ yí ci tɔgbiɛ wu Gibeɔnititɔwoɔ, dewa ɖe le mɛ o. Davidi wa exlɔ nublabla ɖeka koɖo Ʒonatan ci mɛ yí eviɛwo akpɔ nyɔna le yí Mefibali ci yí nyi Ʒonatan vi ŋsu can le mɛ. (1 Sam. 18:1; 20:42) Le exolɔlɔ lɔ mɛɔ, wonu mɔ: “Efyɔ [Davidi] cɔn Ʒonatan vi Mefibali ji. Ʒonatan nyi Sɔlu vi. Vɔ, Davidi ta gbe nɔ Ʒonatan le Tɔhonɔ ŋkɔ mɛ. Eyi, Efyɔ lɔ dena emɔ wo yí wo a wa enu vɔn koɖo Mefibali o.”—2 Sam. 21:7.

Davidi wa enu ci Gibeɔnititɔwo jikɔ. Ésɔ Sɔlu vi ŋsuvi amɛve koɖo viviɛ ŋsuvi amatɔn jo nɔ wo. Sɔlu vi ŋsuvi Mefibali can le wo mɛ. (2 Sam. 21:8, 9) Enu cɛ ci Davidi wa dɔ yí Yehowa vacu shi nɔ nyigban lɔ.

De exolɔlɔ ɖe kpoŋ yí enujɔjɔ cɛ nyi o. Mawu se lɔ mɛ kɔ petii. Ese lɔ nu mɔ: “Wo de ɖo a wu eviwo do enu ci yí wowo jilawo wa ji o.” (2 Ese. 24:16) Yehowa daxɔ gbe do enu ci yí jɔ lɔ ji nɔ Sɔlu vi ŋsuvi amɛve koɖo viviɛ amatɔn lɔwo denya ɖe nɔ amɛwuwu nyɔ lɔ sa o. Ese lɔ gbenu mɔ: “Wo ɖo a wu amɛ do enu vɔn ɖekɛ kpaŋ ci yí yiŋtɔ wa ji.” Ci Sɔlu tekpɔ mɔ yeavɔ Gibeɔnititɔwoɔ, ewa mɔ eviɛ koɖo viviɛ cɛwo wa ɖe le Gibeɔnititɔwo wuwu lɔ mɛ nɛ. Eyi taɖo wowu wowo amadrɛ lɔwo do enuvɔn ciwo wowa ŋci.

Enujɔjɔ cɛ dasɛ mɔ nɔ mɛɖe wa enudɔndɔn ɖeɔ, datɛnŋ anu mɔ dɔ wodɔ ye taɖo yí yewɛ kpoŋ o. Elododo ɖeka nu mɔ: “Jɔ finiwo yí etokɔ nywiɖe, eyi kandoji anɔ ao mɔwo nu.”—Elo. 4:24-27, NWT; Efe. 5:15.