Èɖo Xɔsea?

Mìɖo aɖo xɔse gbɔxwe mìwo nu akpe nɔ Yehowa. Ele ahan gan, Bibla nu mɔ “denyi amɛwo pleŋ yí kando Axwetɔ ji o.” (2 Tɛs. 3:2) Apotru Pɔlu xo nuxu so mɛ ciwo yí ci yumɛ ni yí nu mɔ, wonyi “amɛbaɖa koɖo amɛvɔnwo,” ciwo shi woɖo ahwlɛn ye gan le. Vɔ enyɔ ci enu so xɔse nu gbeyikɔ nɔ mɛkpɛtɛwo hɛnnɛ. Mɛɖewo xa ɖui yí gbe mɔ yewodakpɔ kpeɖoji ciwo yí dasɛ mɔ Mawu ɖeka li yí nyi Enuwowatɔ o. (Rɔm. 1:20) Mɛɖewo tɛnŋ mɔ yewoɖo xɔse do ŋɖeka nu alo nu ci yí sɛnŋ wu nu. Vɔ xɔse ŋtɔ́ denyi xɔse adodwi ci yí adɔ mìwo nu akpe nɔ Yehowa o.

Eʒan mɔ mìakannɔdo do ji mɔ Yehowa li yí “ecunɔ shi” nɔ mɛ ciwo yí ɖo xɔse sɛnŋ do nu. (Ebre. 11:6) Xɔse nyi akpaxwe ɖeka nɔ gbɔngbɔn lɔ kusɛnsɛn yitɔ. Kwifanwawa nɔ Yehowa atɛnŋ akpedo mɛɖe nu yí axɔ gbɔngbɔn kɔkɔɛ. (Luiki 11:​9, 10, 13) Mawu Nyɔ lɔ ci yí so gbɔngbɔn mɛ hlɛnhlɛn yí nyi emɔ vevitɔ ci ji mìato axɔ gbɔngbɔn kɔkɔɛ. Eyi mìatɛnŋ abu tamɛ kpɔ so enu ci mìhlɛn nu yí aje agbla yí awa do enu ci mìkpla ji. Nɔ mìwɛwɛ ahan ɔ, mìatashi Yehowa gbɔngbɔn lɔ akpedo mì nu yí mìanɔ agbe ci yí adasɛ mɔ mìɖo xɔse.