Tamɛsɛnnuwo Jɔjɔ Le Politiki Mɛ—Enyɔ Ci Bibla Nu So Nuɔ?

Le xexeɛ mɛɔ, tamɛsɛnnu sugbɔ jɔjɔ le politiki mɛ yí amɛwo lokɔ nu kpɔ.

Le Mexiqueɔ, wowu politikiwatɔ 39 blebu ciwo yí ji mɔ yewoaɖu ga yí tamɛnsɛnnu buwo jɔ le akɔ ci woda le exwe 2023-2024 mɛ.
Dejinjin o, wowa tamɛnsɛnnu sugbɔ le politiki mɛ le Europe; ɖeka yí nyi ci wotekpɔ mɔ woawu premier ministre Slovaquie tɔ le 15 Mai 2024.
Vɔnvɔn lé États-Unis tɔwo ci amɛwo tekpɔ mɔ yewoawu eju lɔ mɛ fyɔ xoxui Donald Trump le 13 Juillet 2024.

Nyi yí taɖo tamɛnsɛnnu sugbɔ jɔjɔ le politiki mɛ ahan ɔ? Ávavɔ kpɔ? Enyɔ ci Bibla nu so nuɔ?

Wonu nyɔ ɖɛ mɔ mama anɔ politiki mɛ

Bibla nu ɖɛ mɔ le mìwo hwenu ci eyɔ mɔ “ŋkeke vɔvɔwo” mɛɔ, amɛ sugbɔ aɖo nɔnɔmɛ ciwo yí ahɛnnɔ tamɛnsɛnuwawa koɖo manyimanyi vɛ.

“Cukaɖa sugbɔ a va le ŋkeke vɔvɔwo mɛ. . . Amɛwo . . . anyi amɛ madoakpe tɔnɔwo. Wodanyi amɛ ciwo yí Mawu dro o. . . Amɛwo anu enyɔ dɔndɔn. . . Amɛ adonɔ dɔmɛzi, . . . yí ave xomɛ . . . woanyi wowo xlɔwo satɔwo. . . . woatɔ sukunuwo wawa. Woanyi . . . egoyitɔwo.”—2 Timɔte 3:1-4.

Bibla nu ɖɛ hɛnnɛ mɔ egufɔnfɔn do acɛkpakpawo ji koɖo tamɛsɛnnuwawa le politiki mɛ abɔ le mìwo hwenu. (Luiki 21:9) Ele ahan gan, tamɛsɛnnu koɖo mama dakpɔtɔ ajɔnɔ le politiki mɛ tɛgbɛɛ o.

Tamɛsɛnnuwawa le politiki mɛ avɔ

Bibla ɖe mɛ mɔ Mawu asɔ yiŋtɔ cɛkpakpa ci yí le jeŋkwi mɛ ɖɔli agbetɔwo cɛakpakpawo pleŋ.

“Jeŋkwimɛ Mawu aɖo efyɔɖuxu ɖeka, ci yí . . . ácuku fyɔɖuxu ŋtɔ́wo pleŋ hannyahannya, yí agu wo, vɔ yi ɖekɛ kpaŋ ani sɔyi mavɔmavɔ mɛ.”—Daniɛli 2:44, NWT.

Mawu Fyɔɖuxu lɔ ana amɛwo asɔ egbe ɖo ju nyɔnɔnwitɔ yí fafa anɔ fiɖekpokpui le xexeɛ mɛ.

Woyɔ Yesu Kristo ci yí nyi Fyɔɖuxu lɔ Fyɔ mɔ ‘Efyɔvi fafanatɔ’ yí mɔ ‘fafa anɔ yi fyɔju mɛ sɔ yì mavɔ mavɔ.’—Ezai 9:6, 7.
Le kakacɛ mɛ can ɔ, mɛ ciwo yí le acɛkpakpa lɔ gɔnmɛ kplakpla lé woanɔ fafa mɛ do. Eyi taɖo Bibla nu mɔ: “Wo a sɔ wowo anŋguwo yí a sɔ wa edukunuwo. Wo a zan wowo dekpiwo yí a sɔ wa acisonuwo. Amɛwo a ɖote egufɔnfɔn do amɛ kpɛtɛwo ji. Amɛwo da gbe kpla ahwa wawa gbeɖe o.”—Ezai 2:3, 4.

Nɔ àkpɔ nubuwo kpiɔ, hlɛn enyɔci ci yí nyi “Nu Kae Mawu Fiaɖuƒea Awɔ?” yí akpɔ video ci yí nyi Nyi yí Mawu Fyɔɖuxu nyiɔ?