Exwe 2020 “Eji le jɔnɔ mí hweshahwenu”! takpekpegan lɔ gɔnmɛɖeɖe do egbe buwo mɛ

Xexeɛ mɛ pleŋ nɔviwo habɔbɔ lɔ abɔ akpɔ takpekpegan wanawo doju le hwenu ɖekɛ lɔ mɛ le juillet koɖo août wleciwo mɛ le exwe 2020 mɛ. Ŋkɔtɔ ke yí ejikɔ anyi ahan le mìwo xolɔlɔ mɛ. Gbɔxwe atɛnŋ anyi ahan ɔ, woɖo aɖe takpekpegan lɔ pleŋ gɔnmɛ do egbe ciwo yí wu 500 mɛ. Nɔ nyi mɔ woawa toto nɔ edɔ cɛ yí atɔɛ ji keke avaɖegbɔɔ, woasɔ xwe ɖeka alo ci yí wu ahan ɖo te gbɔxwe awɛ. Vɔ coronavirus dɔ̀vwin lɔ vawɛ mɔ, hwenu ci yí kpɔtɔ nɔ egbegɔnmɛɖetɔwo yí woasɔ ɖe “Eji le jɔnɔ mí hweshahwenu”! takpekpegan exwe 2020 wana lɔwo gɔnmɛ degbesun wleci amɛnɛ o.

Edɔwaxu ci yí donɔ alɔ egbegɔnmɛɖetɔwo koɖo Dɔwaxu ci yí xwlenɔ nuwo nɔ habɔbɔ lɔ le xexeɛ pleŋ mɛ le Yehowa Kunuɖetɔwo Dɔwaxu gangantɔ lɔ yí kpedo nɔviwo nu yí wowa dɔ gangan kpligidi cɛ. Edɔwaxu ci yí donɔ alɔ egbegɔnmɛɖetɔwo kpɔɛ mɔ gbɔxwe egbegɔnmɛɖetɔwo awa dɔ vevi cɛɔ, woɖo akpɔ edɔwanu buwo, taŋtaŋ miklo sɛnŋ ciwo yí wanɔ dɔ nywiɖe. Nɔvi ciwo yí xwlenɔ nuwo nɔ habɔbɔ lɔ tekpɔ yí xwle miklo 1 000 yí sɔ wo ɖaɖa texwe 200 han.

Nɔ ehozanzanwo aɖe kpɔtɔɔ, woxwle miklo lɔwo sugbɔ kɔɖɛ do fiɖeka yí ɖo wo do nuwo mɛ keŋ do wo do bato mɛ yí vasɔ wo ɖaɖa egbegɔnmɛɖexu ciwo yí le xexeɛ pleŋ mɛ. Ci woxwle miklo lɔwo zeɖeka yí vasɔ wo do bato mɛ keŋ yí sɔ wo ɖaɖa texwe vovovowoɔ, wodrɔɛ kpɔ yí kpɔɛ mɔ Amɛliki ho $170 (94 989 franc CFA) han yí nyi eho ci wozan do miklo ɖeka kpaŋ nu nɔ womi sɔsɔɛminasɔɛ; wodrɔ eho ci woxɔ nɔ agban lɔwo can do mɛ. Wokpɔ mɔ, ayexa ci wosɔ xwle miklo lɔwo ɖe ehozanzan kpɔtɔ nywiɖe sɔwu nɔ enyi ɖekaɖeka woxwle wo sa.

Avril koɖo mai wleciwo mɛ le exwe 2020 mɛ yí nɔvi ciwo yí xwlenɔ nuwo nɔ habɔbɔ lɔ ɖo aje agbla axwle edɔwanu lɔwo yí agbesɔ wo ɖaɖa. Wleci ŋtɔ́wo mɛ teŋ yí edɔ̀vwin lɔ dɔ yí ajɔxwe sugbɔtɔ degbesasa nu ahan o. Ci ele ahan can ɔ, egbegɔnmɛɖexu sugbɔtɔ ciwo yí le azɔge, alɔjedɔwaxuwo koɖo egbegɔnmɛɖexu kpɛtɛwo kpɔ dɔwanu ciwo woɖo wudo nɔ yí xɔ gbɔxwe mai wleci lɔ vɔ.

Nɔviŋsu Jay Swinney ci yí kpɔnɔ edɔwaxu ci yí xwlenɔ nuwo nɔ habɔbɔ lɔ le xexeɛ pleŋ mɛ ji nu mɔ: “Sumɔsumɔdɔ jikpɔgbɛ alɔjedɔwaxu lɔ tɔ koɖo amɛ vovovo ciwo shi woxwlenɔ nuwo le, wa ɖaŋ wa dɔ alɔlealɔmɛ le edɔ gangan cɛ wawa mɛ. Ci mìmɔ mìxishi alɔ do dɔ lɔ keŋ awɛ blaŋ can ɔ, Yehowa gbɔngbɔn kɔkɔɛ lɔ ɖekɛ kpaŋ yí kpedo mì nu yí mìsun ji yí wɛ keŋ kpedo mìwo nɔviŋsu koɖo nɔvinyɔnuwo nu yí mìdezan ho sugbɔ o.”

Nicholas Ahladis ci yí wanɔ dɔ le edɔwaxu ci yí donɔ alɔ egbegɔnmɛɖetɔwo nu mɔ: “Ci egbegɔnmɛɖetɔ ciwo yí woxo do xɔ hwenɔnu kpɔ edɔwanu lɔwo yí xɔɔ, edo ŋsɛn wo sugbɔ. Ci wo koɖo nɔvi ciwo yí bɔ ɖenɔ egbe gɔnmɛ le gbɛbɔbɔ ɖekɛ mɛ desɔ nɔnɔ gbɔ can ɔ, wokpɔ lé woawɛ do keke awa dɔ doju koɖo wo nywiɖe. Ecɛ kpedo wo nu wosun ji yí ɖe nuxu lɔwo, video lɔwo koɖo eha lɔwo gɔnmɛ yí gbexɔ wo do ka ji le egbe ciwo yí wu 500 mɛ.”

Ecɛ nyi ɖeka le edɔ gangan ciwo yí wowa mɛ gbɔxwe yí exwe 2020 “Eji le jɔnɔ mí hweshahwenu”! takpekpegan lɔ nyi wawa keke mìwo nɔviwo habɔbɔ ci yí le xexeɛ pleŋ mɛ ɖu le ni. Xomɛvunu ciwo mína le donate.jw.org ji koɖo ciwo mína to alɔkpa buwo ji yí dɔ mìtɛnŋ xwle edɔwanu vevi cɛwo nɔ dɔ lɔ wawa.