Mi yí Mawu nyiɔ?

1, 2. Enyɔ ciwo yí amɛwo biɔnɔ se kabakabaɔ?

ÐEVIWO biɔnɔ enyɔ sugbɔ se. Nɔ èna ɖoŋci wo can ɔ, wogbebiɔnɔ se mɔ ‘Nyi yí taɖoɔ?’ Nɔ èje agbla yí kpɔ ɖoŋci nywi ɖe nɔ wo can ɔ, woatɛnŋ agbebiɔ se mɔ: ‘Vɔ nyi yí taɖoɔ?’

² Nɔ mìnyi ɖeviwo alo amɛshinshinwo can ɔ, mì pleŋ biɔnɔ enyɔ se. Mìbiɔnɔ enyɔ se kudo enu ci yí mìaɖu, enu ci yí mìado alo enu ci yí mìaxwle nu. Alo mìagbetɛnŋ abiɔ enyɔ vevi ɖewo se kudo agbe koɖo esɔmɛ nu. Ganŋke nɔ mìdekpɔ ɖoŋci nywiwo nɔ enyɔbiɔse lɔwoɔ, atɛnŋ ana mìatashi ɖoŋci lɔwo jiji.

3. Nyi yí taɖo amɛ sugbɔ bunɔ mɔ, yewodatɛnŋ akpɔ ɖoŋci nɔ yewo nyɔbiɔse veviwoɔ?

³ Mìatɛnŋ akpɔ ɖoŋci nɔ mìwo nyɔbiɔse veviwo le Bibla mɛa? Mɛɖewo bui mɔ, ɖoŋci lɔwo le Bibla mɛ, vɔ wowo gɔnmɛsese sɛnŋ sugbɔ. Wokpɔɛni mɔ, enukplamɛtɔwo, fadawo koɖo pastɔwo ɖekɛ yí atɛnŋ ana ɖoŋci lɔwo. Yí enyinɔ ŋkpɛn nɔ mɛbuwo mɔ, woalɔn do ji mɔ yewodejeshi ɖoŋci lɔwo o. Vɔ lé eɔ kpɔɛ doɔ?

4, 5. Enyɔbiɔse vevi ciwo yí le eo shiɔ? Yí nyi yí taɖo ele mɔ àkpɔtɔ ajikɔ ɖoŋci lɔwoɔ?

⁴ Mìkando ji mɔ, àji mɔ yeakpɔ ɖoŋci nɔ enyɔbiɔsewo shigbe mɔ: Nyi yí taɖo wowaŋ do nyigban lɔ jiɔ? Nyi yí ajɔ doŋ ji nɔ ŋkuɔ? Lé Mawu le cucucuɔ? Yesu, Enukplamɛtɔ gangan lɔ nu mɔ: “Míkpɔtɔ abiɔkɔ, yí woana mí; míkpɔtɔ ajikɔ, yí míakpɔɛ; míkpɔtɔ axokɔ ehɔn lɔ, yí woahuin nɔ mí.” (Matie 7:​7, nwt) Ŋgbena ta gbeɖe keke ana nɔ hwecinu yí àkpɔ ɖoŋci ciwo nu yí kankandoji le o.

⁵ Aɛ, nɔ “èkpɔtɔ jikɔ” ɖoŋci lɔwoɔ, àkpɔ wo le Bibla mɛ. (Elododo Wema 2:​1-5, nwt) Ðoŋci ciwo yí le Bibla mɛ gɔnmɛsese desɛnŋ sugbɔ o. Enu ci yí àkpla ana akpɔ jijɔ le agbe mɛ le kakacɛ mɛ, yí agbena esɔmɛ mɔkpɔkpɔ nywi asun eo shi. Na mìaxo nuxu so enyɔbiɔse ɖeka ci yí cakanɔ amɛ sugbɔ nu.

MAWU SƆNƆ EÐE LE MƐ NƆ MÌA, ALO XOMƐVETƆ YÍ ENYI?

6. Nyi yí taɖo mɛɖewo bunɔ mɔ, Mawu desɔnɔ eɖe le mɛ nɔ yewo nɔ yewo le efun kpekɔɔ?

⁶ Amɛ sugbɔ bunɔ mɔ, Mawu desɔnɔ eɖe le mɛ nɔ mì o. Wonunɔ mɔ, nɔ Mawu sɔnɔ eɖe le mɛ nɔ mì nyaoɔ, xexe lɔ anyɔ sugbɔ wu cɛ. Ahwawawa, amɛxaxa, koɖo vevisese ɖɔ xexeɛ mɛ sugbɔ. Amɛwo lenɔ dɔ̀, kpenɔ fun, yí kunɔ. Eyi taɖo amɛwo biɔnɔ se mɔ, ‘Nɔ Mawu sɔnɔ eɖe le mɛ nɔ mì ɖe, nyi yí taɖo dexe mɔ nɔ efunkpekpe cɛwo pleŋ ɔ?’

7. (a) Lé cɔci ŋkɔnɔtɔwo kplanɔ amɛwo do mɔ Mawu nyi xomɛvetɔɔ? (b) Nyi yí taɖo mìatɛnŋ akando ji mɔ, wodatɛnŋ ado hwɛ Mawu do enubaɖabaɖa ciwo yí jɔkɔ ŋciɔ?

⁷ Hweɖewonuɔ, cɔci ŋkɔnɔtɔwo na amɛwo bunɔ mɔ, Mawu nyi xomɛvetɔ. Le kpɔwɛ mɛ, nɔ enubaɖa ɖe jɔɔ, wonunɔ mɔ Mawu dro yɔ. Wonunɔ mɔ, eyi ji mɔ enu lɔ le jɔ. Nɔ wonukɔ ahan ɔ, edasɛ mɔ wodokɔ hwɛ Mawu. Vɔ Bibla kpla mì mɔ, de Mawu yí na enubaɖabaɖawo jɔnɔ gbeɖe o. Ʒaki 1:13 nu nɔ mì mɔ, Mawu desɔ enuvwin tenɔ mɛɖekpokpui kpɔ o. Énu mɔ: ‘Nɔ mɛɖe le tetekpɔ mɛɔ, ŋgbenu mɔ Mawu yí teteɛ ye kpɔ o. Ðoɔ, wodatɛnŋ sɔ enuvwin sɔ te Mawu kpɔ o, yí Mawu ŋtɔ detenɔ mɛɖe kpɔ o.’ Ecɛ dasɛ mɔ, ci Mawu dexenɔ mɔ nɔ enubaɖawo can ɔ, denyi eyi na wojɔnɔ gbeɖe o. (Hlɛn Job 34:​10-12.) Na mìakpɔ yi kpɔwɛ ɖeka.

8, 9. Nyi yí taɖo danyɔ mɔ mìado hwɛ Mawu do mìwo cukaɖawo ŋciɔ? Na yi kpɔwɛ ɖeka.

⁸ Sɔɛ mɔ, ɖajɛvi ɖeka kpɔtɔ le yi jilawo gbɔ le axomɛ. Edalɔ luin sugbɔ yí kplɛ lé asɔ gbeta nywiwo do. Ecɛ yɛɔ, ɖajɛvi lɔ fɔn gu do dalɔ nu yí so le axweɛ mɛ. Évayi wa enubaɖabaɖawo yí vaɖo cukaɖawo mɛ. Woado hwɛ dalɔ do enu ci yí jɔ do eviɛ ji ŋci, ɖo dexe mɔ ni mɔ yiŋgbeto le axweɛ mɛa? Gbeɖe! (Luiki 15:​11-13) Shigbe evida ŋtɔ́ hannɛɔ, Mawu dexe mɔ nɔ agbetɔwo ci wosɔ gbeta mɔ yewoafɔn gu keŋ awa enubaɖabaɖawo o. Eyi taɖo nɔ enuvwin ɖe jɔɔ, ele mɔ mìaɖo ŋwi mɔ, denyi Mawu yí na ejɔ o. Yí danyɔ mɔ mìado hwɛ Mawu o.

⁹ Susu nywi ɖe ŋci yí Mawu deɖo te enubaɖabaɖawo hɔɖo o. Le Eta 11 tɔ lɔ mɛɔ, àkpla nu kudo enyɔ ci Bibla nu so susu lɔ nu. Ganŋke kando ji mɔ, Mawu lɔn mì yí denyi eyi gbɔ yí mìwo cukaɖawo sonɔ o. Le nyɔnɔnwi mɛɔ, yiɖekɛ kpaŋ yí atɛnŋ avaɖe mìwo cukaɖawo si.​—Ezai 33:2.

10. Nyi yí taɖo mìatɛnŋ akando ji mɔ Mawu avadra enu ciwo pleŋ yí agbetɔwo dahɛn doɔ?

¹⁰ Mawu le kɔkɔɛɖe. (Ezai 6:3) Enushianu ci yí ewanɔ nyɔnɔ, nɔnɔ mɛmiɖe, yí gbekɔnɔ. Eyi taɖo mìatɛnŋ akando ji keŋkeŋ. Vɔ agbetɔwo dele ahan o, ɖo wowanɔ enuvwin hweɖewonu. Eyi ŋsɛn dele acɛkpatɔ ci yí tonɔ nyɔnɔnwi wu amɛ ɖeshiaɖe can shi yí adra enu ciwo yí amɛ vwinwo dahɛn do o. Mɛɖekpokpui deɖo ŋsɛn sɔ koɖo Mawu o. Átɛnŋ adra enu ciwo pleŋ yí agbetɔwo dahɛn do, yí kankandoji li mɔ áwɛ. Águ enuvwinwawawo pleŋ si tɛgbɛɛ.​—Hlɛn Ehajiji Wema 37:​9-11.

LÉ MAWU SENƆ LE YIÐEKI MƐ NƆ ÉKPƆ AMƐWO LE EFUN KPEKƆƆ?

11. Lé Mawu senɔ le yiɖeki mɛ kudo ao funkpekpewo nuɔ?

¹¹ Lé Mawu senɔ le yiɖeki mɛ nɔ ékpɔ enu ciwo yí jɔkɔ le xexeɛ mɛ koɖo enu ciwo mɛ yí ètokɔɔ? Bibla kpla mì mɔ Mawu “lɔnnɔ jɔjɔɛnyinyi.” (Ehajiji Wema 37:28) Eyi taɖo ésɔnɔ eɖe le enu ci yí nyi enywi koɖo evwin mɛ veviɖe. Nɔ agbetɔwo le efun kpekɔɔ, evenɔ nu sugbɔ. Bibla nu mɔ, hwecinu yí enuvwinwawa vabɔ le nyigban ji le blemaɔ, Mawu ‘xa le yi ji mɛ.’ (Gɔnmɛjeje 6:​5, 6) Mawu detrɔ o. (Malashi 3:6) Bibla nu mɔ Mawu sɔnɔ eɖe le mɛ nɔ eo veviɖe.​—Hlɛn 1 Piɛ 5:7.

12, 13. (a) Nyi yí taɖo mìlɔnnɔ amɛwo yí gbesɔnɔ eɖe le mɛ nɔ woɔ, yí lé mìsenɔ le mìwoɖekiwo mɛ kudo efunkpekpe ciwo yí le xexeɛ mɛ nuɔ? (b) Nyi yí taɖo mìkando ji mɔ Mawu avagu efunkpekpe koɖo enumajɔmajɔwawawo pleŋ siɔ?

¹² Bibla nu mɔ Mawu wa mì do yi nɔnɔmɛ nu. (Gɔnmɛjeje 1:26) Yi gɔnmɛ yí nyi mɔ, Mawu wa mì koɖo nɔnɔmɛ nywi yi tɔwo. Eyi taɖo nɔ èkpɔ amɛmanyaɖewo yí wole efun kpekɔ yí evenɔ nɔ eoɔ, kando ji mɔ evenɔ nɔ Mawu sugbɔ wu! Lé mìwɛ yí nyaɔ?

¹³ Bibla kpla mì mɔ “Mawu nyi lɔnlɔn.” (1 Ʒan 4:⁠8) Lɔnlɔn yí cucunɔ Mawu le enushianu wawa mɛ. Eyi taɖo ci yí Mawu lɔnnɔ amɛɔ, eyi na mìwo can mìlɔnnɔ amɛ. Bu tamɛ kpɔ so enyɔ cɛ nu: Nɔ ŋsɛn le eo shi yí àtɛnŋ agu efunkpekpe koɖo enumajɔmajɔwawa ciwo yí le xexeɛ mɛ ɖe, àgu wo sia? Àgu wo si dandandan, ɖo èlɔn agbetɔwo. Vɔ Mawu yɛ ɖe? Ci yí ŋsɛn le shi, yí egbelɔn mìɔ, áɖe efunkpekpe koɖo enumajɔmajɔwawawo pleŋ si. Kando ji mɔ Mawu gbeɖu ɖeshiaɖe ci yí le tɔtɔmɛ nɔ wema cɛ avamɛ kokoko! Vɔ gbɔxwe àtɛnŋ akando gbeɖu ŋtɔ́wo jiɔ, eʒan mɔ àjeshi enu sugbɔ so Mawu nu.

MAWU JI MƆ EO LE JESHI YE ÐƐ

14. Lé woyɔnɔ Mawuɔ, yí lé mìwɛ yí nya mɔ mìɖo azannɔ ŋkɔ lɔɔ?

¹⁴ Nɔ èji mɔ yeanyi xlɔ koɖo mɛɖe ɖe, enyɔ ŋkɔtɔ ci yí ènunɔ niɔ? Èyɔnɔ ao ŋkɔ ni. Vɔ ŋkɔ le Mawu shia? Sɛnsnɛnha sugbɔ nunɔ mɔ yi ŋkɔ yí nyi Mawu alo Axwetɔ, vɔ denyi ŋkɔ ŋtɔŋtɔwo yí wonyi o. Bubuŋkɔwo yí wonyi, shigbe mɔ “efyɔ” alo “ejutatɔ” hannɛ. Mawu nu nɔ mì mɔ ye ŋkɔ yí nyi Yehowa. Ehajiji Wema 83:18 nu mɔ: “Na woajeshi mɔ eo, mɛ ci ŋkɔ yí nyi Yehowa, eo ɖekɛ kpaŋ yí nyi Ejiɖaatɔ le nyigban lɔ keŋkeŋ ji.” Bibla ŋwlɛntɔwo zan Mawu ŋkɔ lɔ donu kotokun nɛniɖe. Yehowa ji mɔ eo le jeshi ye ŋkɔ keŋ azinni. Éyɔ yi ŋkɔ nɔ eo, keŋ nɔ natɛnŋ anyi yi xlɔ.

15. Yehowa ŋkɔ lɔ gɔnmɛ ɖe?

¹⁵ Gɔnmɛsese citocito yí le Mawu ŋkɔ, Yehowa nu. Yi gɔnmɛ yí nyi mɔ, Mawu atɛnŋ awa do yi gbeɖuwo pleŋ ji, yí atɛnŋ awa enushianu ci eɖo mɔ yeawa. Ŋɖekpokpui datɛnŋ aɖo te yi o. Yehowa ɖekɛ kpaŋ yí atɛnŋ atɔ ahan.a

16, 17. Bubuŋkɔ ciwo yí gbɔkɔ gɔnmɛ ɖe? (a) “Ŋsɛnwopleŋtɔ” (b) “Efyɔ mavɔmavɔtɔ” (c) “Gbɛɖotɔ”

¹⁶ Shigbe lé mìhlin vayi hannɛɔ, Ehajiji Wema 83:18 nu kudo Yehowa nu mɔ: “Eo ɖekɛ kpaŋ yí nyi Ejiɖaatɔ.” Gbesɔ kpe niɔ, Enyɔdasɛ 15:3 nu mɔ: “Yehowa Mawu, Ŋsɛnwopleŋtɔ, ao dɔwawawo gangan sugbɔ yí gbejiŋ! Efyɔ mavɔmavɔtɔ, ao mɔwo le jɔjɔɛɖe, yí gbenyi nyɔnɔnwi.” Bubuŋkɔ “Ŋsɛnwopleŋtɔ” gɔnmɛ ɖe? Yi gɔnmɛ yí nyi mɔ, Yehowa yí nyi mɛ ci yí ɖo ŋsɛn wu mɛɖekpokpui le xexegbɛ lɔ pleŋ mɛ. Yí bubuŋkɔ “Efyɔ mavɔmavɔtɔ” gɔnmɛ yí nyi mɔ, éli tɛgbɛɛ. Ehajiji Wema 90:2 ɖe mɛ mɔ, yɛli so mavɔ mɛ yi mavɔ mɛ. Ecɛ jiŋ taŋ!

¹⁷ Yehowa ɖekɛ kpaŋ yí nyi Gbɛɖotɔ. Enyɔdasɛ 4:11 nu mɔ: ‘Yehowa, mìwo Mawu, èsun yí axɔ kanfukanfu, bubunana, koɖo hlɔnhlɔn. Eo yí wa enuwo pleŋ. Enuwo pleŋ li yí wowa wo toto ao dro ji.’ Aɛ, Yehowa yí wa enu ciwo pleŋ yí atɛnŋ ava susu mɛ nɔ eo, mawudɔla ciwo yí le jeŋkwimɛ, wlecivi ciwo yí le ejixomɛ, acikusɛnsɛn ciwo yí le aciwo ji, koɖo kpavi ciwo pleŋ yí ɖɔ axu koɖo etɔwo mɛ!

ÀTƐNŊ ANYI YEHOWA XLƆA?

18. Nyi yí taɖo amɛ sugbɔ nunɔ mɔ, yewodatɛnŋ anyi Mawu xlɔ gbeɖeɔ? Lé Bibla nu so enyɔ cɛ nuɔ?

¹⁸ Nɔ mɛɖewo hlɛn enu so Yehowa nɔnɔmɛ jiŋ lɔwo nuɔ, wovɔnnɔ yí nunɔ mɔ: ‘Mawu ɖo ŋsɛn sugbɔ, yí gangan wu nu, yí gbele azɔge ɖaa, eyi taɖo lé awɛ asɔ ɖe le mɛ nɔŋ ɔ?’ Vɔ ahan Mawu ji mɔ mìwo le se le mìwoɖekiwo mɛ nɛa? Oo. Yehowa ji mɔ yeate gogo mì. Bibla nu mɔ Mawu “de jinjin le mì gbɔ o.” (Edɔwawawo 17:27) Mawu ji mɔ eo le te gogo ye, yí eɖo gbe mɔ ‘yeate gogo eo’ hɛnnɛ.​—Ʒaki 4:8.

19. (a) Lé àwɛ anyi Mawu xlɔɔ? (b) Yehowa nɔnɔmɛ ci yí jɔ ji nɔ eo wuɔ?

¹⁹ Lé àwɛ anyi Mawu xlɔɔ? Yesu nu mɔ: “Agbe mavɔmavɔ lɔ yí nyi mɔ wo a jeshi Eo, Mawu adodwi ɖekɛ kpaŋ, koɖo Yesu Kristo ci yí E dɔ ɖaɖa.” (Ʒan 17:3) Kpɔtɔ akplakɔ nu lɔ, keŋ ajeshi Yehowa koɖo Yesu ɖɛ. Nɔ èwɛ ahan ɔ, àtɛnŋ avakpɔ agbe mavɔ. Le kpɔwɛ mɛ, mìkplɛ vayi mɔ, “Mawu nyi lɔnlɔn.” (1 Ʒan 4:16) Vɔ égbeɖo nɔnɔmɛ nywi sugbɔ buwo. Bibla nu nɔ mì mɔ Yehowa nyi “ŋshishikunamɛtɔ koɖo vevisedoamɛnutɔ, amɛ ci yí dedonɔ dɔmɛzi kabakaba o, yí lɔnlɔn egbejinɔnɔtɔ koɖo nyɔnɔnwi yi tɔ sugbɔ.” (Hunhun 34:​6, nwt) Yehowa “nyɔ yí lɔnnɔ sɔsɔke.” (Ehajiji Wema 86:​5, nwt) Mawu nyi jigbɔnɖɛxɔtɔ koɖo egbejinɔtɔ. (2 Piɛ 3:9; Enyɔdasɛ 15:4) Àgbekpla nu sugbɔsugbɔ so yi nɔnɔmɛ nywiwo nu, nɔ èhlɛnnɔ Bibla.

20-22. (a) Nɔ mìdekpɔnɔ Yehowa can ɖe, lé mìawɛ ate gogwiɔ? (b) Lé àwɛ nɔ mɛɖewo ji mɔ eo le tashi Bibla kplakplaɔ?

²⁰ Ci wodatɛnŋ akpɔ Mawu ɖe, lé àtɛnŋ ate gogwi doɔ? (Ʒan 1:18; 4:24; 1 Timɔte 1:17) Nɔ èhlɛnnɔ nu so Yehowa nu le Bibla mɛɔ, àvado jeshi mɔ amɛ ŋtɔŋtɔ yí enyi. (Ehajiji Wema 27:4; Rɔmatɔwo 1:20) Zenɛni ci yí èkplakɔ nu so Yehowa nuɔ, ahanke yí àvaluin sugbɔ wu nɛ, yí àdo jeshi mɔ yevate gogwi wu.

²¹ Àvanya mɔ mìwo Da yí Yehowa nyi. (Matie 6:9) Éna agbe mì, yí ji mɔ agbe lɔ le nyɔ nɔ mì. Enu ŋtɔ́ yí evida lɔn-amɛ aji nɔ eviɛwo nɛ. (Ehajiji Wema 36:9) Aɛ, Bibla nu mɔ àtɛnŋ anyi Yehowa xlɔ. (Ʒaki 2:23) Bui kpɔ. Yehowa, mɛ ci yí wa xexegbɛ lɔ, ji mɔ eo le nyi ye xlɔ!

²² Mɛɖewo atɛnŋ aji mɔ eo le tashi Bibla kplakpla. Taŋfuin wovɔnkɔ mɔ àvato le sɛnsɛnha ci mɛ èle. Vɔ ŋgbelɔn nɔ mɛɖekpokpui axe mɔ nɔ eo yí natashi exlɔnyinyi koɖo Yehowa o. Eyi nyi Exlɔ adodwitɔ ci àtɛnŋ aɖo.

23, 24. (a) Nyi yí taɖo èɖo akpɔtɔ abiɔnɔ enyɔ seɔ? (b) Nyi nu yí mìaxo nuxu so le eta ci yí gbɔkɔ mɛɔ?

²³ Nɔ èle Bibla lɔ kplakɔɔ, dase enu ɖewo gɔnmɛ o. Enyɔ biɔbiɔ se alo kpekpedonu biɔbiɔ ŋgbenyi ŋkpɛn nɔ eo o. Yesu nu mɔ mìwo le sɔ mìwoɖekiwo hwe shigbe ɖeviwo hannɛ. (Matie 18:​2-4) Ðeviwo biɔnɔ enyɔ sugbɔ se. Mawu ji mɔ eo le kpɔ ɖoŋci nɔ ao nyɔbiɔsewo. Eyi taɖo kpla Bibla lɔ nywiɖe yí akando ji mɔ enu ci yí yekplakɔ nyi nyɔnɔnwi.​—Hlɛn Edɔwawawo 17:11.

²⁴ Emɔ nywitɔ ci ji woato ajeshi Yehowa yí nyi Bibla kplakpla. Le eta ci yí akplɔɛdo mɛɔ, mìakpɔ enu ci yí taɖo Bibla to akpo nɔ wema ɖeshiaɖe.