“Mísɔ eju bu mɛ mawuwo dɔŋkpe”

Ci Yehowa dedo ese ɖe do hojusɛnsɛn nu hwenɔnu can ɔ, Ӡakɔbu yɛ nya mɔ Yehowa ɖekɛ kpaŋ woasɛn. (Hun 20:3-5) Ci Yehowa nu nɔ Ӡakɔbu mɔ yi le yi Betɛliɔ, Ӡakɔbu kpla nu mɛshiamɛ ci yí le koɖi mɔ wo le sɔ eju bu mɛ mawuwo dɔŋkpe. Le yi goduɔ, Ӡakɔbu lɔ hoju lɔwo koɖo tonugavi ciwo yí le shigbe ebo hannɛ kɔŋgbe. (Gɔnm 35:1-4) Mìatɛnŋ akando ji mɔ enu ci Ӡakɔbu wa jɔ ji nɔ Yehowa.

Lé mìasɛn Yehowa ɖekɛ kpaŋ do le egbɛmɛɔ? Enu vevi ɖeka ci mìɖo awa yí nyi mɔ, mìagbe hojusɛnsɛn alo gbɔngbɔnyɔyɔ ŋɖekpokpui. Ecɛ dasɛ mɔ mìasɔ ŋɖekpokpui ci yí ca eka koɖo vinvinmɛ ŋsɛn can dɔŋkpe, yí atrɔ ale ŋkuvi do enu ciwo mìsɔ ɖenɔ aye daɖɛ nu nywiɖe. Le kpɔwɛ mɛ, biɔ eoɖeki se mɔ: ‘Wema alo fimu ciwo mɛ yí amɛkuku ciwo wonunɔ mɔ wova gbɔnnɔ hun nɔ amɛ (vampire), kuvitɔ ciwo wonunɔ mɔ wotrɔnɔ agbetɔ (zombie) jɔnɔ ji nɔŋ a? Enu ciwo ŋsɔ ɖenɔ aye daɖɛ danasɛ maӡikinuwo, gbesawo, alo enuɖonamɛ shigbe enu ciwo mɛ afɔku dele nɛa?’ Mìɖo agbe nushianu ci Yehowa delɔnnɔ gbijigbiji.​—Eha 97:10.

MÍKPƆ WADASƐ VIDEO CI YÍ NYI “MÍ TRƆKPE SATAN,” KEŊ ANA ÐOŊCI NƆ NYƆBIƆSE CIWO YÍ GBƆGBƆ:

• 

  Cukaɖa ci yí le Ajowa ci yí nyi Bibla nukplavi jiɔ?

• 

  Nyi yí taɖo enyɔ mɔ woabiɔ kpekpedonu hamɛmɛshinshinwo nɔ gbɔngbɔnvɔnwo dokɔ aya nɔ amɛɔ?

• 

  Nɔ mìji mɔ Yehowa le glɔn ta nɔ mì ɖe, nyiwo yí mìɖo asɔ dɔŋkpeɔ?

• Gbeta vevi ci Ajowa sɔɔ?

• Le fini èle ɖe, ŋɖewo li ciwo mɛ yí àgbe gbɔngbɔnvɔnnuwo lea?