ENUKPLAKPLA 2

Nuxuxoxo le seŋkankan mɔnu

2 Korɛntitɔwo 2:17

SUSU VEVI LƆ: Xo nuxu so ji mɛ, shigbe lé èxonɔ nuxu le jɔjɔmɛ nu hannɛ yí asɔ dasɛ ao seselelanmɛ kudo nyɔci lɔ koɖo ao nyɔsetɔwo nu.

Do gbe ɖaɖa yí adra do nywiɖe. Biɔ le gbedodoɖa mɛ mɔ ye susu le nɔ nyɔ ci yejikɔ anu ji, ŋgbenyi yeŋtɔ ji o. Ao susu le nɔ enyɔ vevi ciwo yí èjikɔ anu ji. Nu susu lɔwo le eoŋtɔ nyɔgbewo mɛ; ŋgbenu nyɔ lɔwo shigbe lé woŋwlɛn wo do wema ji kpoŋ nɛ o.

Nɔ èji mɔ yeahlɛn ŋɖe le Bibla mɛ alo wema bu ɖe mɛɔ, ele mɔ àjeshi enu lɔ ɖɛ nywiɖe nɔ ao nuhlɛnhlɛn lɔ azɔn tiin. Nɔ mɛbuɖe nyɔ yí èjikɔ ayɔ so wema ɖe mɛɔ, sɔ amɛ lɔ seselelanmɛ hliin, vɔ ŋgbewɛ keke adɔn amɛwo susu va eoŋtɔ ji o.
Xo nuxu so ji mɛ. Bu tamɛ kpɔ so enu ci yí taɖo ele mɔ ao nyɔsetɔwo ase nyɔ lɔ. Ao susu le nɔ wo ji. Gbesɔ kpe niɔ, lé ènɔ te do, yí wakɔ alɔ koɖo ŋmɛ do le ao nuxuxoxo lɔ mɛ, ɖo adasɛ vividodoamɛnu koɖo exlɔnyinyi ci yí so ji mɛ.

Woaxo nuxu le jɔjɔmɛ nu dasɛ mɔ woaxo nuxu lɔ koɖo ebelele. Zan enyɔgbe ciwo mɛ kɔ yí agbezɔn do egbe lɔ sewo ji le ao nuxuxoxo mɛ, nɔ bubu akpɔtɔ anɔ ao ŋɛdu lɔ nu.
Ao ŋkuvi le nɔ ao nyɔsetɔwo ji. Kpɔnɔ ŋmɛ nɔ ao nyɔsetɔwo nɔ wowɛni ahan le míwo gbɔ. Nɔ ènakɔ nuxuɔ, kpɔnɔ ŋmɛ nɔ enyɔsetɔ ɖekaɖeka hweɖewonu, ŋgbenyi anyinɔxu lɔ gbajaa doju o.