Agbenɔnɔ Koɖo Sumɔsumɔdɔ Bɔbɔ Nukplawema Nyɔsoxuwo
© 2024 Watch Tower Bible and Tract Society of Pennsylvania
2-8 SEPTEMBRE
MAWU NYƆ MƐ DƆKUNUWO EHAJIJI WEMA 79-81
Dasɛ mɔ Yelɔn Yehowa Ŋkɔ Gangan lɔ
w17.02 9 mm. 5
Tafɛn lɔ Nyi “Enunana ci yí sɔ Egbe vɛ” so Eda Gbɔ
5 Lé mìawɛ adasɛ mɔ mìlɔn Yehowa ŋkɔɔ? Mìadasɛ yi to mìwo gbenɔnɔ mɛ. Yehowa ji mɔ mìale kɔkɔɛɖe. (Hlɛn 1 Piɛ 1:15, 16.) Yi gɔnmɛ yí nyi mɔ mìasɛn Yehowa ɖekɛ kpaŋ yí ase tonu ni so ji mɛ. Nɔ wocikɔ yumɛ nɔ mì can ɔ, mìwanɔ ci ji mìakpe keŋ anɔ agbe asɔ koɖo yi gɔnmɛɖosewo koɖo yi se jɔjɔɛwo. Mìna yí klɛnklɛn mìwotɔ zenɔ sɔ to mìwo gbenɔnɔ jɔjɔɛwo ji eyi ecɛ hɛnnɔ kanfukanfu vɛ nɔ Yehowa ŋkɔ. (Mat. 5:14-16) Ci mìnyi jukɔn kɔkɔɛɔ, mìdanasɛ mɔ Yehowa sewo nyɔ, eyi Satana hwɛdoamɛwo nyi ŋsu. Shigbe lé mì pleŋ wɛni nɛɔ, nɔ mìwa afɛnwoɔ, mìtrɔnɔ ji mɛ nyɔnɔnwitɔ yí minɔ adɛn ciwo dekpenɔ nɔ Yehowa wuwu.—Eha. 79:9.
ijwbv 3 mm. 4-5
Rɔmatɔwo 10:13—“Fan Ekwi yɔ Axwetɔ Nyikɔ”
Le Bibla mɛɔ, enyɔgbe “yɔ Yehowa ŋkɔ” gɔnmɛ denyi mɔ woajeshi Mawu ŋkɔ ɖɛ yí agbezinni le yi sɛnsɛn mɛ kpoŋ yí anyi evɔ o. (Ehajiji Wema 116:12-14) Vɔ ŋci egbelɔ do mɛ yí nyi mɔ, woaɖoŋ do Mawu nu yí akpɔkɔ emɔ mɔ yɛakpedo amɛ nu.—Ehajiji Wema 20:7; 99:6.
Mawu ŋkɔ nɔ veviɖe nɔ Yesu Kristo. Enyɔgbe ŋkɔtɔ ciwo yí ze le kpɔwɛ gbodoɖa yitɔ mɛ ke: “Mìwo Da ci yí le jeŋkwi mɛ, Ao ŋkɔ le kɔ.” alo le nɔ kɔkɔɛɖe. (Matie 6:9) Yesu ɖe mɛ mɔ nɔ mìji mɔ mìakpɔ agbemavɔɔ, mìajeshi Mawu ɖɛ, ase tonu ni keŋ aluin.—Ʒan 17:3, 6, 26.
Bibla mɛ Nuveviwo
it-2 53
Ʒozɛfu
Ŋkɔ yi to nɔ Ʒozɛfu. Ci Ʒozɛfu le nɔxu vevi ɖeka le Ʒakɔbu viwo mɛɔ, ésɔgbe mɔ wozannɔ yi ŋkɔ lɔ hweɖewo nu nɔ woxokɔ nuxu so Izraɛli kɔtawo pleŋ (Eha 80:1) alo akɔta ciwo yí le tagbe nɔ fyɔɖuxu lɔ mɛ nu. (Eha 78:67; Amo 5:6, 15; 6:6) Yi ŋkɔ can ze le Bibla mɛ nyɔnuɖɛwo mɛ. Le ŋtegan ci Ezekiɛli kpɔ mɛɔ, Ʒozɛfu axɔ cinɔnu amɛve (Eze 47:13). Ʒozɛfu ŋkɔ ze le cinɔnu ci axɔ le jugan ci woyɔnɔ mɔ “Yehowa le nɔ” mɛ (Eze 48:32, 35, NWT), eyi hwenu Yehowa xoxu yi jukɔn ɔ, Ʒozɛfu akpa nɔ jukɔn lɔ kpaxwe ɖeka eyi Ʒuda akpa nɔ jukɔn lɔ kpaxwe amɛvetɔ. (Eze 37:15-26) Obadia nyɔnuɖɛ lɔ nu mɔ, “Ʒozɛfu xwe” awa eɖe le “Ezawu xwe” gbangban mɛ. (Ob 18) Zakari nyɔnuɖɛ lɔ yɛ nu mɔ, Yehowa ahwlɛn “Ʒozɛfu xwe gan.” (Zak 10:6) De Efraimu ŋkɔ yí woyɔ do Izraɛli gbɔngbɔn mɛ tɔ lɔ kɔtawo mɛ o, vɔ Ʒozɛfu yɔ.—Enyɔ 7:8.
Ci woyɔ Ʒozɛfu ŋkɔ do Enyɔdasɛ Wema 7:8 mɛɔ, mìatɛnŋ anu mɔ enyɔnuɖɛ ci Ʒakɔbu nu le yi kubaji yikɔ nɔ Izraɛli gbɔngbɔn mɛ tɔ lɔ hɛnnɛ. Ci ele ahan ɔ, mìatɛnŋ anu mɔ, Ʒakɔbu gangantɔ ci yí nyí Yehowa Mawu sɔ Yesu Kristo na yí enyi lɛngbɔkplɔtɔ nywitɔ ci yí avasɔ yi gbe sɔ na do ta nɔ “lɛngbɔ lɔwo.” (Ʒan 10:11-16) Yesu Kristo gbenyi gɔnmɛɖokpe nɔ Mawu gbedoxɔ ci mɛ Izraɛlivi gbɔngbɔn mɛ tɔwo can le. (Efe 2:20-22; 1Piɛ 2:4-6) Nɔ mìanuiɔ, lɛngbɔkplɔtɔ ŋtɔ́ ci yí nyi ekpe lɔ le koɖo Mawu ŋsɛnwopleŋtɔ.—Ʒan 1:1-3; Edɔ 7:56; Ebre 10:12; sɔ sɔ koɖo Gɔn 49:24, 25.
9-15 SEPTEMBRE
MAWU NYƆ MƐ DƆKUNUWO EHAJIJI WEMA 82-84
Enu Ciwo Èwanɔ nɔ Yehowa le Jeŋ nɔ eo
wp16.6 8 mm. 2-3
Enu Ciwo Mìatɛnŋ Akpla so Xeviwo Gbɔ
Ʒerusalɛmu tɔwo jeshi gbolwi ci yí ɖonɔ atɔ do agbaciwo gblamɛ ɖɛ nywiɖe. Ðewo ɖonɔ atɔ do Salomɔ gbedoxɔ mɛ. Éwa mɔ gbolwi ciwo yí ɖonɔ atɔ do gbedoxɔ lɔ mɛ kpɔɛni mɔ texwe cɛ nyi texwe nywui ɖeka ci yewoatɛnŋ ahɛn yewo viwo le.
Kore vi ci yí ji Eha 84 tɔ lɔ yí gbewanɔ sɛnsɛndɔwo le gbedoxɔ lɔ mɛ kwɛshila ɖeka le wleci amadɛn mɛ kpɔnɔ xevi cɛwo le gbedoxɔ lɔ mɛ. Ci eji mɔ yeanɔ Yehowa xomɛ tɛgbɛɛ shigbe gbolwi nɛɔ, énu mɔ: “Tɔhonɔ Ŋsɛnwo pleŋtɔ, Ao sɛnxu nyakpɔkpɔ nyɔnɔnwitɔ. Tɔhonɔ, ŋ da tɛnŋ nɔ̀te yi a ɖo Ao sɛnxu o. Ŋ haya sugbɔ! Anyi ji koɖo anyi ŋcilan jiji a nɔ̀ koɖo Mawu Agbu Agbu. Tɔhonɔ Ŋsɛnwo pleŋtɔ, anyi Fyɔ, anyi Mawu, xeviwo can kpɔ axwe le Ao sɛnxu. Wo ɖo wowo trɔwo do axa nɔ Ao vɔnsakpoɖu, yi le enɔ yi ji wowo viwo!” (Ehajiji Wema 84:1-3) Éjɔnɔ ji nɔ eo koɖo viowo mɔ míanɔ ju koɖo Mawu mɛwo le hamɛ lɔ mɛa?—Ehajiji Wema 26:8, 12.
w08 7/15 30 mm. 3-4
Je Agbla Asɔ Susu Ðonɔ Ŋciwo Àtɛnŋ Awa ji Keŋ Akpɔnɔ Jijɔ
Hweɖowonuɔ, shinshin koɖo edɔ̀lele cukaɖawo ɖenɔ ka kpɔtɔ nɔ edro sɛnŋ ci yí nɔnɔ mì mɛ mɔ mìawa sugbɔ le Yehowa sɛnsɛn mɛ. Nɔ jila ènyiɔ, étɛnŋ wanɔ nɔ eo mɔ yedegbeɖuɖuɔ ale sugbɔ nɔ amɛɖekɛnukplakpla yetɔ alo Kristotɔwo bɔbɔwo o, ɖo yezankɔ ŋsɛn koɖo gamɛ sugbɔ do ye viyewo hɛnhɛn mɛ. Ele ahan gan, Nɔ èsɔ susu ɖonɔ enu ciwo yí xexeɛ emɔ nɔ eo ji ɖoɖu ɖe, dadɔ yí àŋlɔbe enu ciwo ji àkpe awa dru ba?
Éwa exwe kotokun nɛniɖewo vayi yɛ yí Levitɔ ɖeka ɖo edro ɖeka ci yiŋtɔ nya mɔ yɛdatɛnŋ vamɛ gbeɖe o. Le exwe ɖeka mɛ duuɔ, emɔ hunnɔ ni yí awa dɔ kwɛshila amɛve le gbedoxɔ lɔ mɛ. Ele ahan gan, edro sɛnŋ vale lanmɛ ni mɔ yeawanɔ sɛnsɛndɔwo le vɔnsakpe lɔ gbɔ hweshiahwenu. (Eha. 84:1-3) Nyi kpedo ŋsu egbejinɔtɔ cɛ nu yí ci ewakɔ vɔ jeŋ niɔ? Évakpɔɛ mɔ woawa dɔ ŋkeke ɖeka le gbedoxɔ lɔ mɛ nyi mɔnukpɔkpɔ ci wodatɛnŋ sɔ sɔ koɖo nubu ɖe o. (Eha. 84:4, 5, 10) Ahanke, ci mìava yi jijiɛ enu ciwo ji mìdakpe awaɔ, éle mɔ mìabunɔ tamɛ kpɔ so enu ciwo ji mìakpe awa nu yí woajeŋ nɔ mì.
Èle veviɖe nɔ Yehowa ao Mawu!
12 Nɔ ètokɔ dɔ̀lele cukaɖawo mɛɔ, kando ji mɔ Yehowa nya enu ci yí jɔjɔ do ye ji. Ðe kuku ni nɔ akpedo eo nu naɖo susu nywi do ao nɔnɔmɛ lɔ nu. To vo nɔ yɛɔ, Yehowa na woŋwlɛn akɔnfanamɛnyɔwo do Bibla mɛ nɔ mì, hlɛnnɔ wo. Sɔ susu ɖo kpukpui ciwo yí dasɛ lé Yehowa sɛntɔwo le veviɖe ni sugbɔ ji. Nɔ èwɛni ahan ɔ, àvakpɔɛ mɔ Yehowa wanɔ xomɛvu nɔ mɛ ciwo pleŋ yí sinni le egbejinɔnɔ mɛ.—Eha. 84:11.
Bibla mɛ Nuveviwo
it-2 459
Nyɔcɔviwo
Éle fafɛɖe mɔ woaŋlɔbe mɛ ciwo seseɛ vevi koɖo mɛ ciwo yí dewa mɛɖe ɖɛ o. Yehowa zan nyɔgbe “nyɔcɔviwo” yí sɔ dre enu ci yí adasɛ mɔ Izraɛliviwo nyi amɛjɔjɔɛwo alo amɛmajɔmajɔwo. Nɔ jukɔn lɔ le nywiɖe le gbɔngbɔn mɛɔ, wolenɔ bu nɔ nyɔcɔviwo. Vɔ nɔ wotɔ enumajɔmajɔwo wawa le juɔ mɛɔ, kankandoji li mɔ wodegbelenɔ bu nɔ wo o, eyi ecɛ danasɛ mɔ jukɔn lɔ tɔ kuku le gbɔngbɔn mɛ. (Eha 82:3; 94:6; Ezai 1:17, 23; Ʒer 7:5-7; 22:3; Eze 22:7; Zak 7:9-11; Mal 3:5) Yehowa xonɔ fi do mɛ ciwo yí ɖenɔ fun nɔ nyɔcɔviwo. (2Ese 27:19; Ezai 10:1, 2) Yehowa drenɔ yiɖeki mɔ yenyi Hwlɛngantɔ (Elo 23:10, 11), Kpedonutɔ (Eha 10:14) koɖo Eda (Eha 68:5) nɔ nyɔcɔviwo. Eyi ɖonɔ kojo jɔjɔɛ nɔ wo (2Ese 10:17, 18), kunɔ ŋshishi nɔ wo (Oze 14:3), kpenɔdo wo nu (Eha 146:9) yí lenɔ wowo gbe do te.—Ʒer 49:11.
Enu ci yí adasɛ mɔ mɛɖe nyi Kristotɔ adodwi yí nyi lé ewanɔ nu ɖaɖa kposhuwo koɖo nyɔcɔviwo gbɔ do. Ʒaki ci yí nyi Yesu dokplɔtɔ ŋwlɛ ɖaɖa Kristotɔwo mɔ: “Mawu sɛnsɛn ci yí le kɔkɔɛɖe yi de ɖo edyixoxo le ŋkɔ nɔ Mawu mìwo Da nyi nyɔcɔviwo koɖo kposhuwo jikpɔkpɔ le wowo funkpekpewo mɛ, yi é gbe nyi mɔ amɛ da ɖe emɔ nɔ xexe mɛ a xoɖyi yiɖeki o.”—Ʒaki 1:27.
16-22 SEPTEMBRE
MAWU NYƆ MƐ DƆKUNUWO EHAJIJI WEMA 85-87
Gbedoɖa Kpenɔdo mì nu Mìdonɔ ji
w12 5/15 25 mm.10
Ao Nuwanawo Danasɛ Kanfukanfu Yehowa Tɔa?
10 Nɔ mìadasɛ kanfukanfu Yehowa tɔɔ, éʒan mɔ mìadonɔ “gbe ɖaɖa ni tɛgbɛɛ” hɛnnɛ. (Rɔm. 12:12) Mìɖo adonɔ gbe ɖaɖa nɔ Yehowa mɔ le kpedo mì nu mìasin shigbe lé eji do nɛ. Nɔ mìasun ji awɛɔ, mìabiɔ yi gbɔngbɔn kɔkɔɛ, xɔse do xɔse ji, ŋsɛn ci mìasɔ ɖu tetekpɔ ji koɖo enujikpekpe ci mìasɔ xo nuxu so nyɔnɔnwi lɔ nu nywiɖe.’ (2 Tim. 2:15; Mat. 6:13; Luiki 11:13; 17:5) Shigbe lé ɖeviwo ɖonɔŋ do wowo jilawo nu nɛɔ, ahanke mìwo can mìɖo aɖoŋ do mìwo da Yehowa ci yí le jeŋkwi mɛ nu nɛ. Nɔ mìbiɛ mɔ le kpedo mì nu mìasin doji sɔwuɔ, mìatɛnŋ akando ji mɔ yɛawɛ nɔ mì. Deɖo awanɔ nɔ mì gbeɖe mɔ mìdodoɔ aya nɔ Yehowa o! Vɔ, mìadonɔ gbe ɖaɖa yí akannɔfui, adonɔ akpe ni, abiɛni mɔ lé dasɛ emɔ nɔ mì nɔ mìtotoɔ tetekpɔwo mɛ yí agbebiɛ mɔ yi le kpedo mì nu mìasin le emɔ ci yí akanfu yi ŋkɔ kɔkɔɛ lɔ ji.—Eha. 86:12; Ʒan. 1:5-7.
Lé Yehowa Ðonɔ Mìwo Gbedodoɖawo Ŋci Do
17 Hlɛn Ehajiji Wema 86:6, 7. Ehakpatɔ Davidi kando ji mɔ Yehowa senɔ ye gbedodoɖawo yí ɖonɔ wowo ŋci. Eɔ can, àtɛnŋ aɖo kandoji ŋtɔ́. Kpɔwɛ ciwo nu mìxo nuxu so le nyɔta cɛ mɛ dɔ mìkando ji mɔ, Yehowa atɛnŋ ana mìwo can ŋɖɛnyanya koɖo ŋsɛn ci mìʒan keŋ ado ji le cukaɖawo mɛ. Átɛnŋ azan mìwo nɔviwo alo mɛ ciwo yí desinkɔ hɔɖo o asɔ kpedo mì nu.
18 Ci yí denyi gashiagamɛ yí Yehowa aɖo mìwo gbedodoɖawo ŋci shigbe lé mìwo jijiɛ do nɛ can ɔ, mìnya mɔ, áɖo wo ŋci. Ána mì enu ci pɛɛ mìʒan le hwenu nywitɔ ji. Kpɔtɔ adonɔ gbe ɖaɖa yí aɖo xɔse mɔ Yehowa aɖo wowo ŋci, kando ji mɔ yiale bu nɔ ye le kakacɛ mɛ yí le xexe yoyu ci yí gbɔgbɔ mɛɔ, yiana “enu ci yí ʒan enu lagbu ɖeka ɖeka.”—Eha. 145:16.
Bibla mɛ Nuveviwo
it-1 492 mm. 2
Eji
Sɛn Yehowa Koɖo “Eji Blebu.” Eji ŋtɔŋtɔ ɖo ale blebu gbɔxwe awa dɔ nywiɖe, vɔ kpɔwɛ ji hɛn ama do ve. Davidi do gbe ɖaɖa mɔ: “Na eji blebuŋ nɔ mavɔn ao ŋkɔ.” Ecɛ dasɛ mɔ mɛɖe hɛn aɖo eji mamu le lé enu wanɔ ni do koɖo enu ciwo yí donɔ vɔnvɔn ni mɛ. (Eha 86:11, NWT) Mɛŋnɔ hɛn aɖo “eji mamu” yí agblɔ le Mawu sɛnsɛn mɛ. (Eha 119:113; Enyɔ 3:16) Mɛɖe hɛn aɖo “eji amɛve” (le kpɔwɛnyɔnunu mɛ, eji ɖeka koɖo eji ɖeka), yí ateteɛ kpɔ mɔ yeasɛn axwetɔ amɛve yí anunuɔ ebu gan yí ebu ale susu mɛ ni. (1Kro 12:33; Eha 12:2, gɔnmɛnuŋwlɛŋwlɛ) Yesu do hwɛ ayemɛnuwatɔ ciwo yí ɖo eji amɛve sɛnŋsɛnŋɖe —Mat 15:7, 8.
23-29 SEPTEMBRE
MAWU NYƆ MƐ DƆKUNUWO EHAJIJI WEMA 88-89
Yehowa Cɛkpakpa yí Nyi Nywitɔ
w17.06 28 mm. 5
Nɔ Godu nɔ Acɛkpatɔnyinyi Yehowa tɔ!
5 Susu bu gbeli ci yí taɖo Yehowa nyi acɛkpatɔ nywitɔ. Acɛkpakpa yitɔ nɔnɔ jɔjɔɛɖe. Énu mɔ: “Enyɛ nyi [Yehowa], Ŋ nyi adɔmɛ nywitɔnɔ yi nyi jɔjɔɛtɔ, yi Ŋ wa enu nywiwo do nyigban ji. Ŋ lɔn enu hunnɔwo.” (Ʒer. 9:24) Nɔ asɔ gbeta so enujɔjɔɛ wawa nuɔ, dekpɔnɔ do agbetɔwo sewo nu o. Yiŋtɔ yí sɔnɔ gbeta so enujɔjɔɛ wawa nu yí enɔnɔ te do yɛ ji yí donɔ sewo nɔ agbetɔwo. “Wo cu [yi] fyɔju do nyɔnɔnwi koɖo jɔjɔɛ ji,” eyi taɖo mìatɛnŋ akando ji mɔ yi sewo pleŋ, yi gɔnmɛɖosewo koɖo gbeta ciwo esɔnɔ le jɔjɔɛɖe. (Eha. 89:14; 119:128) Ci Satana do hwɛ acɛkpatɔnyinyi Yehowa tɔ mɔ yidenyɔ can ɔ, yiŋtɔ desun ji yí ɖo xexe ci mɛ jɔjɔɛnyinyi anɔ tɛgbɛɛ o.
w17.06 29 mm. 10-11
Nɔ Godu nɔ Acɛkpatɔnyinyi Yehowa tɔ!
10 Yehowa cɛkpakpa deʒinnɔ amɛ ji gbeɖe alo agbe vovo mana amɛ o. Vɔ enanɔ vovo koɖo jijɔkpɔkpɔ. (2 Kor. 3:17) Davidi nu mɔ: “Egaɖuɖu koɖo acɔɖoɖo le ŋmɛ nɔ [Mawu], ŋsɛn koɖo jijɔkpɔkpɔ le yi nɔxu.” (1 Kro. 16:7, 27, MWT) Ahanke ehajitɔ Etamu ŋwlɛ mɔ: “Mawu, amɛ ciwo yí kplɔnɔ Eo do yi le ekadodo mɛ koɖu, wo kpɔ jijɔ nyɔnɔnwitɔ. Wo le agbe le Ao xomɛvu klɛnklɛn mɛ. Ao ŋkɔ nanɔ jijɔkpɔkpɔ wo tɛgbɛɛ. Wo kanfu Ao nywi wawa.”—Eha. 89:15, 16.
11 Nɔ mìbunɔ tamɛ kpɔ blaŋblaŋ so enunywi ciwo Yehowa wa nuɔ, ádo ŋsɛn mì yí mìakan do ji mɔ yi cɛkpakpa yí nyi enywitɔ. Mìavanu shigbe mɔ ehajitɔ lɔ nɛ mɔ: “Ŋkeke ɖeka wawa le Ao sɛnxu nyɔ wu ŋkeke kotokun nɛniɖe wawa le afi bu ɖekpokpwi!” (Eha. 84:10) Lé nyɔ cɛ nyi nyɔnɔnwi doɔ? Ci Yehowa mìwo Gbɛɖotɔ lɔ sɔ Lɔnlɔn wa mì yí mìnya kpɔkpɔɔ, énya enu ciwo ana mìakpɔ jijɔ ŋtɔŋtɔ, eyi enanɔ mì sugbɔ sugbɔ. Mìkpɔnɔ shicu nɔ mìwanɔ enu ci ebiɔ mì mɔ mìwo le wa yí le vɔvɔnuɔ, mìvakpɔnɔ jijɔ. Ecɛ dɔ yí mìnɔnɔ gbeji ni nɔ evaʒan mɔ mìawa vɔnsa ɖewo can.—Hlɛn Ezai 48:17.
w14 10/15 10 mm. 13
Ðo Xɔse Sɛnŋ do Mawu Fyɔɖuxu lɔ nu
14 Bu tamɛ kpɔ so egbe ci Yehowa ɖo nɔ Efyɔ Davidi ci yí nɔ Izraɛli blema to Davidi nublabla ji nu. (Hlɛn 2 Samiɛli 7:12, 16.) Yehowa ɖo gbe cɛ nɔ Davidi hwenu enyi fyɔ le Ʒerusalɛmu yí nu ni mɔ Mɛsia lɔ avanyi yi jijimɛvi. (Luiki 1:30-33) Eyi taɖo Yehowa dre mɛ ci koŋ ji jijimɛvi lɔ ato ava yí gbenu mɔ Davidi cinɔɖutɔ ɖeka aɖo “acɛ le se lɔ mɛ” le Mɛsia Fyɔɖuxu lɔ mɛ. (Eze. 21:25-27) Toto Yesu jiɔ, acɛkpakpa Davidi tɔ “a li keke a sɔyì mavɔmavɔ.” Gbesɔ kpe niɔ, Davidi jijimɛvi lɔ a “dɔnji shigbe ewe ɛnɛ. Á kpɔtɔ a li keke a sɔyì mavɔmavɔ shigbe wleci ɛnɛ.” (Eha. 89:34-37) Nyɔnɔnwi yɔ, mɛɖekɛ datɛnŋ asɔ ŋɖe asɔ ble Mɛsia cɛkpakpa lɔ o yí enu ciwo awa ani tɛgbɛɛ!
Bibla mɛ Nuveviwo
cl 281 mm. 4-5
‘Eoɖekɛ yí nyi Egbejinɔtɔ’
4 “Egbejinɔnɔ” nyɔgbe ci wozan le Ebre Nuŋwlɛŋwlɛwo mɛ nyi xomɛvuwawa ci yí ca ka koɖo lɔnlɔn ci woɖo nɔ ŋɖe. Eyi nɔ mìɖo ŋɖe mɔ mìawaɔ, lɔnlɔn cɛ dɔ yí mìwɛni. Ecɛ le ŋkɔ xoxoxo nɔ nyɔnɔnwi kpoŋ toto. Yi gɔnmɛ yí nyi mɔ, mɛɖe tɛnŋ to nyɔnɔnwi ɖo woʒin ji mɔ dandanmɛ yɛawɛ. Vɔ, egbejinɔnɔ yí nyi gunu nɔ lɔnlɔn. Gbesɔ kpe niɔ, woatɛnŋ azan enyɔgbe “egbejinɔnɔ” do ŋciwo mɛ agbe dele nu. Le kpɔwɛ mɛ, ehajitɔ lɔ yɔ wleci mɔ “egbejinɔtɔ ci yí le jeŋkuiwo mɛ” ɖo etonɔ le zan mɛ do gamɛ yitɔ ji. (Ehajiji Wema 89:37, NWT) Vɔ wodatɛnŋ anu mɔ wleci nyi egbejinɔtɔ o. Nyi yí taɖoɔ? Ðoɔ, egbejinɔnɔ nyi lɔnlɔn dadasɛ yí enu ciwo mɛ agbe dele datɛnŋ adasɛ lɔnlɔn o.
5 Shigbe lé Enuŋwlɛŋwlɛ lɔwo dre mɛ nɛɔ, egbejinɔnɔ nyi enu ŋtɔŋtɔ. Egbejinɔnɔ danasɛ mɔ exlɔnyinyi le gblamɛ nɔ mɛ ci yí le egbeji lɔ koɖo mɛ ci ele egbeji nɔ. Egbejinɔnɔ ŋtɔ́ detrɔnɔ o. Dele shigbe axublabla ciwo yí jihɔn sɔnɔ yi finiwo yí drui nɛ o. Ewaɖeɔ, egbejinɔnɔ alo lɔnlɔn egbejinɔnɔtɔ detrɔnɔ o yí esɛnnɔŋ wu cukaɖa ɖekpokpui ci mɛ wototoɔ.
30 SEPTEMBRE–6 OCTOBRE
MAWU NYƆ MƐ DƆKUNUWO EHAJIJI WEMA 90-91
Nɔ Ànɔ Agbe Jinjijn ɔ, Kando Yehowa ji
wp19.3 5 mm. 3-5
Agbe Jinjin Nɔnɔ Jiji
Jɔjɔmɛnununyatɔwo pleŋ delɔn do ji mɔ ŋɖe deli yí woawa yí asɔ jinjin agbe wu lé anɔ do gbɛ o. So exwe 1900 wo mɛ ɖiiɔ, agbetɔwo gbe gbevajinjinkɔ doji. Enu ci yí taɖo enyi ahan yí nyi mɔ agbetɔwo vamɛmɛ̀, yí mɔnu ciwo ji woato ada manyádɔ̀wo vali gbɛ. Ahanke abɔtawo koɖo cike ciwo yí wunɔ akpa vali hɛnnɛ nɛ. Mɛɖewo ciwo yí wanɔ numɛkuku so lanmɛ nuvilagbuwo nu xɔɛ se mɔ agbetɔwo vanɔkɔ agbe yí ajinjin alo akpokpo wu lé anɔ sa.
Éwa exwe 3500 han yɛ yí Bibla ŋwlɛtɔ Moizi nu mɔ: “Nɔ mì nɔnɔ agbe nɔ exwe ho-wo-tó-le-kave mɛ, ɖootɔ. Nɔ́ mì sɛnŋ ɔ, ɖootɔ mì wanɔ exwe kave. Mìwo gbewo ɖɔ koɖo ŋsɛn dɔwawa koɖo vevisese. Zeɖeka tɔntɔn ɔ, mìwo gbewo vɔnɔ! Yi mì zo yí nɔ̀ eku mɛ.” (Ehajiji Wema 90:10) Ci yí agbetɔwo jeje agbla mɔ yewoajinjin agbe lɔ doji can ɔ, agbe lɔ kpɔtɔ le lehanci Moizi nui do nɛ.
Ele ahan gan elan ɖewo shigbe oursin rouge ci yí gangan alo clam d’Islande atɛnŋ anɔ agbe awu exwe 200 yí aciwo shigbe mɔ séquoia atɛnŋ anɔ agbe exwe kotokun nɛniɖewo. Nɔ mìsɔ mìwo gbe sɔ sɔ koɖo enuwawa cɛwo ɖe, mìdabiɔ mìwoɖekiwo se mɔ, ‘Nɔ wonɔ agbe na nɔ xwe 70 alo 80 yí anyi evɔa?’
wp19.1 5, dakavi lɔ
Lé Woyɔnɔ Mawuɔ?
Enyɔ cɛ yí amɛ sugbɔ biɔnɔ wowoɖekiwo se. Taŋfuin eo can èbiɔ ahan se kpɔ. Wohɛn woatrɔ abiɔ nyɔ cɛ se do alɔkpa cɛ ji: Nɔ xexe lɔ koɖo enu ciwo yí li ɖo watɔ ɖe ɖe, finiage yí Mawu yɛ soɔ?
Jɔjɔmɛnununyatɔwo lɔn do ji mɔ xexe lɔ ɖo tɔtɔmɛ. Enyɔ ŋnɔ han pɛɛ yí Bibla kpukpui ŋkɔtɔ nu nɛ. Émɔ: “[Le tɔtɔmɛɔ], Mawu ɖo jeŋkwi koɖo xexe.”—Gɔnmɛjeje 1:1.
Xexe lɔ dejɔ yɛŋtɔ o, eyi ahanke datɛnŋ ajɔ ahan kpoŋ o. Ŋci yí deli datɛnŋ ana enu ɖe o. Nɔ ŋɖe deli keŋ gbɔxwe xexe lɔ jɔɔ, xexe lɔ dali gbɛ o. Ci mìdatɛnŋ amɔŋje enu lɔwo mɛ hlɛnhlɛnhlɛn can ɔ, mìatɛnŋ anu mɔ ŋɖeka ci yí li tɛgbɛɛ yí deso xexe lɔ mɛ o yí wɛ yí xexe lɔ vajɔ. Yehowa Mawu, ŋsɛnwopleŋtɔ ci yí ɖo nunya yí gbenyi gbɔngbɔn yí nyi Amɛ ci yí wa enuwo.—Ʒan 4:24.
Bibla nu so Mawu nu mɔ: “Mawu, E nyi Mawu gbɔxwe wo jɔ etowo, nyigban, koɖo xexe lɔ. Mawu E li tɛgbɛɛ, yí A li tɛgbɛɛ, Mawu.” (Ehajiji Wema 90:2) Eyi taɖo Mawu ŋtɔ li tɛgbɛɛ sa xoxoxo. Eyi taɖo “le tɔtɔmɛɔ,” éwa xexe gbɛ lɔ.—Enyɔdasɛ 4:11.
Lɔnlɔn atɛnŋ akpedo mì nu mìaɖu vɔnvɔn ji
16 Satana nya mɔ agbe mìwotɔ ve nɔ mì. Eyi taɖo enunuɔ mɔ mìasɔ enushianu ci yí le mì shi, keke je exlɔnyinyi ci yí le mìwo koɖo Yehowa gblamɛ sɔ sa vɔn keŋ anɔ agbe. (Job 2:4, 5) Vɔ Satana wa afɛn kpɔɛ! Mìnya mɔ “eku hlɔnhlɔn” le Satana shi yí awu amɛ dru. Eyi taɖo ezannɔ vɔnvɔn nɔ eku ci yí le mì mɛ yí awɛ keke nɔ mìagbe Yehowa sɛnsɛn. (Ebre. 2:14, 15) Hweɖewonuɔ, mɛ ciwo ji Satana kpɔ ŋsɛn do donɔ vɔnvɔn nɔ Mawu mɛwo mɔ yewoawu wo nɔ wogbe mɔ yewodami Yehowa sɛnsɛn o. Nɛnɛke nɔ mìle edɔ̀baji yí enu gbɔnkɔnu nɔ mìɔ, Satana tɛnŋ zan nɔnɔmɛ ŋtɔ́ ado mì kpɔ nɔ mìawa ŋɖewo keŋ ada le Yehowa se ji. Dotowo koɖo mìwo xomumɛtɔ ciwo yí denyi Yehowa Kunuɖetɔwo o, atɛnŋ aʒin mì ji nɔ woado ehun nɔ mì, ci yí adɔ mìada le Mawu se ŋtɔ́ ji. Mɛɖewo tɛnŋ dasɛ edɔ̀damɔnu ɖe nɔ mì yí amɔ nɔ mìwo zin ɔ, mìagan. Vɔ desɔgbe koɖo Bibla gɔnmɛɖosewo o.
17 Mìdejinɔ mɔ mìaku o, vɔ nɔ evajɔ mɔ mìku can ɔ, mìkando ji mɔ Yehowa akpɔtɔ alɔnkɔ mì.(Hlɛn Rɔmatɔwo 8:37-39.)Nɔ Yehowa xlɔwo kuɔ, ékpɔtɔ ɖonɔ ŋwi wo, ele shigbe mɔ wokpɔtɔ le agbe ni nɛ. (Luiki 20:37, 38) Éjijiɛ veviɖe mɔ yeafɔn wo va agbe. (Job 14:15) Yehowa cu efɛn gangan ɖeka do ta nɔ mì nɔ mìatɛnŋ “a kpɔ agbe mavɔ.” (Ʒan 3:16) Mìnya mɔ Yehowa lɔn mì sugbɔ yí sɔnɔ ɖe le ji nɔ mì. Eyi taɖo nɔ mìlé edɔ̀ veviɖe alo wododoɔ vɔnvɔn nɔ mì mɔ woawu mìɔ, mìdaso gbeɖe Yehowa ɖɛ o, ewaɖeɔ, mìate gogui yí afa akɔn nɔ mì yí ana mì nunya koɖo ŋsɛn. Enu ci pɛɛ yí Valérie koɖo asuɔ wa nɛ.—Eha. 41:3.
Bibla mɛ Nuveviwo
wp17.5 5
Èɖo Mawudɔla ɖe Koŋ ci yí Kplɔnɔ eo Doa?
Bibla dekpla mì mɔ mìɖo mawudɔla ɖe ci yí kplɔnɔ mì do o. Yesu can nu mɔ: “Mí kpɔ míwoɖekiwo ji nywiɖe nɔ mí ŋ gbe gbali ɖevihwɛ cɛwo domɛtɔ ɖeka kpeti o [Kristo dokplɔtɔwo], ɖo ŋ nu nɔ mí mɔ dɔdɔla wowotɔwo ciwo yí le jeŋkwi mɛ kpɔnɔ ŋmɛ nɔ Edanyɛ ci yí le jeŋkwi mɛ tɛgbɛɛ.” (Matie 18:10) Yesu denunuɔ mɔ mɛɖekamɛɖeka ɖo mawudɔla ci yí kplɔɛnido o, vɔ énukɔ mɔ mawudɔlawo sɔnɔ ɖe le ji nɔ mɛɖekamɛɖeka le yi nukplaviwo mɛ. Eyi taɖo Mawu sɛntɔ adodwiwo desɔnɔ wowo gbe donɔ afɔku mɛ yí anunuɔ mɔ mawudɔlawo aglɔn ta nɔ yewo o.
Édasɛ mɔ dɔlawo dehwlɛnnɔ ta nɔ agbetɔwoa? Oo. (Ehajiji Wema 91:11) Mɛɖewo kando ji teŋ mɔ Mawu sɔ yi dɔlawo ɖaɖa yí wovahwlɛn ta nɔ wo yí gbedasɛ emɔ nɔ wo. Ahanke ewa nɔ Kenneth ci nu mìxo nuxu so le nyɔta cɛ mɛ le tɔtɔmɛ nɛ. Ci mìdatɛnŋ amɔ ahan enyi yí evɔ nɛ can ɔ, taŋfuin enyɔ jɔ ni. Blaŋblaŋ ɔ, Yehowa Kunuɖetɔwo kpɔnɔ lé mawudɔlawo kpenɔdo wo nu do le kunuɖeɖedɔ lɔ mɛ. Ele ahan gan, ci mìdatɛnŋ akpɔ mawudɔlawo koɖo ŋkuvi can ɔ, mìdatɛnŋ anu lé Mawu zannɔ wo do yí sɔ kpenɔdo mìwo ɖeka ɖeka nu le enu vovovowo mɛ o. Ðekpokpuiɖe ci anyiɔ, denyi afɛn nɔ mì mɔ mìado akpe nɔ Ŋsɛnwopleŋtɔ nɔ enu ciwo ewa nɔ mì o.—Kolosetɔwo 3:15; Ʒaki 1:17, 18.
7-13 OCTOBRE
MAWU NYƆ MƐ DƆKUNUWO EHAJIJI WEMA 92-95
Yehowa Sɛnsɛn yí Nyi Nunywitɔ le Agbe mɛ!
w18.04 26 mm. 5
Jajɛwo, Míwo Susuwo le Gbɔngbɔn mɛ Tajinuwo Jia?
5 Susu ŋkɔtɔ ci yí adɔ mìaɖo gbɔngbɔn mɛ tajinuwo yí nyi mɔ mìasɔ dasɛ nɔ Yehowa mɔ ejeŋ nɔ mì ci elɔn mì yí gbewa nuwo nɔ mì. Ehajitɔ lɔ nu mɔ: “É nyɔ mɔ wo a kanfu Tɔhonɔ . . . Tɔhonɔ, E do jijɔ lanmɛ nɔ mì koɖo enu ciwo yí E wa. Mì jiha jijɔmɛtɔ so enu hunnɔwo nu.” (Eha. 92:1, 4) Shigbe jajɛ nɛɔ, bu tamɛ kpɔ so enu ciwo pleŋ Yehowa wa nɔ eo nu. Wowo yí nyi ao gbe, xɔse, Bibla, hamɛ lɔ koɖo esɔ mɛ mɔkpɔkpɔ nywi ci ena eo. Nɔ èsɔ gbɔngbɔn mɛ nuwo ɖo texwe ŋkɔtɔɔ, anyi èdadasɛ nɔ Mawu mɔ eshi ciwo yɛcu nɔ ye jɔ ji nɔ ye, eyi ecɛ akpedo eo nu nanyi exlɔ vevi koɖi.
w18.11 20 mm. 8
Mi yí Kpɔnɔ Ŋsɛn do ao Susu Jiɔ?
8 Shigbe jila nywi nɛɔ, Yehowa jinɔ mɔ enu le je ji nɔ ye viyewo le agbe mɛ. (Ezai. 48:17, 18) Eyi taɖo ena wo gɔnmɛɖosewo kudo agbenywinɔnɔ nu koɖo lé woawa nu ɖaɖa mɛbuwo gbɔ do. Eyi taɖo eji mɔ mìwo le je agla akpɔnɔ enuwo shigbe lé yekpɔnɔ wo do nɛ yí agbexonɔ nuxu so kpɛnkpɛnmɛ ci yí le ye nu nɔ mɛbuwo. Ecɛ dedɔ mìxanɔ o, vɔ ekpenɔdo mì nu mìyinɔ ŋkɔ, shinnɔ yí gbebinɔ le susu mɛ doji. (Eha. 92:5; Elo. 2:1-5; Ezai. 55:9) Ecɛ akpedo mì nu mìawa cancan ciwo yí adɔ mìakpɔ jijɔ yí mɛɖekamɛɖeka le mì mɛ akpɔtɔ ale eku nywiwo sɛnkɔ. (Eha. 1:2, 3) Nyɔnnɔnwi yɔ, nɔ mìbubuɔ enuwo kpɔ shigbe Yehowa nɛɔ, enunywiwo tonɔ so mɛ yí mìwo nu gbekpenɔ nɔ mɛbuwo!
Èle veviɖe nɔ Yehowa ao Mawu!
18 Nɔ mìshinkɔ can ɔ, mìatɛnŋ akando ji mɔ ŋɖe li mìawa nɔ Yehowa. (Eha. 92:12-15) Yesu kpla mì mɔ, nɔ mìkpɔɛ mɔ mìdeɖo enujikpekpe sugbɔ can ɔ, ŋɖekpokpui ci mìtɛnŋ wa le Yehowa sɛnsɛn mɛ jɔnɔ ji ni. (Luiki 21:2-4) Eyi taɖo sɔ susu ɖo enu ci àtɛnŋ awa ji. Le kpɔwɛ mɛ, àtɛnŋ axo nuxu so Yehowa nu, ado gbe ɖaɖa do nɔviwo ta yí ado ŋsɛn mɛbuwo nɔ woakpɔtɔ anɔ egbeji. Denyi enujikpekpe ao tɔ yí na Yehowa mɔ eo le wa edɔ koɖo ye o, vɔ ci èlɔn mɔ yease tonu ni yí taɖo.—1 Kor. 3:5-9.
Bibla mɛ Nuveviwo
cl 176 mm. 18
“[Ubububuyi!] Mawu Ŋununyanya Koɖo Enunyanya Yitɔ de ɖo Sɛnxu o!”
18 Kpɔ lé apotru Pɔlu dre lé ŋɖe desɔ koɖo Yehowa ŋununyanya do ɖa. Émɔ: “[Ubububuyi!] Mawu dɔkunuwo gangan nywiɖe! Mawu ŋununyanya koɖo enunyanya yitɔ de ɖo sɛnxu o! Amɛ ɖe de li yí a dre enu ciwo Mawu nu daɖɛ o. Amɛ ɖe da tɛnŋ mɔŋje Mawu mɔwo mɛ o” (Rɔmatɔwo 11:33) Ci Apotru Pɔlu sɔ enukpacamɛ nyɔgbe “Ubububuyi” sɔ tɔ kpukpui lɔ jiɔ, édasɛ lé nu wawa ni do teŋ koɖo bubu gangan ci eɖo nɔ Mawu Nyɔ lɔ. Grɛki nyɔgbe “gangan” ci ezan sɔgbe koɖo nyɔgbe “cito.” Nyɔgbe cɛ ciwo ezan na yí woakpɔ lé enyɔ lɔ le do teŋ le susu mɛ. Nɔ mìbu tamɛ kpɔ so ŋununyanya Yehowa tɔ nuɔ, éwanɔ nɔ mì mɔ mìkpɔkpɔ nu je fini yí sɛnxu deli nɔ o nɛ, dodu ci yí cito yí sɛnxu deli ni o nɛ yí ekeke keke mìdasɛnŋ dre lé ele do teŋ o. Ágbɔnnu mɔ woadre lé ele do teŋ. (Ehajiji Wema 92:5) Ci èbu tamɛ kpɔ so ŋcɛwo nu ɖe, dekpɔ mɔ yedenyi ŋɖe ba?
14-20 OCTOBRE
MAWU NYƆ MƐ DƆKUNUWO EHAJIJI WEMA 96-99
“Dra Eŋɛnywi lɔ”!
w11 3/1 6 mm. 1-2
Nyi Eŋɛnywi lɔ Nyiɔ?
KRISTOTƆWO adra “fyɔɖuxu eŋɛnywi lɔ” sɔ toto nuxu xoxo so nu nɔ mɛbuwo ji. Woanu nɔ amɛwo mɔ, Mawu fyɔɖuxu lɔ yí avakpa nɔ nyigban lɔ keŋkeŋ le esɔ mɛ ci awa enujɔjɔɛ. Ɛɛ, wogbezan enyɔgbe “eŋɛnywi” le emɔ buwo ji le Bibla mɛ. Le kpɔwɛ mɛ, mìkpɔnɔ “hwlɛngan ŋɛnywi” (Ehajiji Wema 96:2); “eŋɛnywi ci yí kudo Mawu nu” (Rɔmatɔwo 15:16); koɖo “ŋɛnywi ci yí kudo Yesu Kristo nu.”—Maki 1:1.
Nɔ mìanuiɔ, nyɔnɔnwi ciwo pleŋ Yesu nu yí yi dokplɔtɔwo ŋwlɛ daɖɛ yí nyi eŋɛnywi lɔ. Gbɔxwe Yesu ayi jeŋkwi mɛɔ, énu nɔ yi dokplɔtɔwo mɔ: “Mí yì a ɖo dɔkplaviwo le jukɔnwo pleŋ mɛ. Mí do wo eshimɛ le Eda koɖo Evi koɖo Gbɔngbɔn kɔkwɛ ŋkɔ mɛ. Mí kpla enu wo nɔ wo a wanɔ do enu ciwo pleŋ yí Ŋ dɔnɔ mí ji. Enyɛ ɔ, Na nɔ̀ koɖo mí tɛgbɛɛ, keke a nanɔ hwecinu yí xexe cɛ a va vɔ” (Matie 28:19, 20) Eyi taɖo Kristotɔwo dɔ denyi mɔ woaxo nuxu nɔ amɛwo kpoŋ so Mawu Fyɔɖuxu lɔ nu o, vɔ woaje agbla aɖo nukplaviwo.
w12 9/1 16 mm. 1
Nyi yí Avajɔ le Kojoɖoɖo Zan lɔ Jiɔ?
Shigbe lé ezezeɛ le foto ci yí le ɖushi mɛ ji nɛɔ, amɛ sugbɔ buini mɔ le Kojoɖoɖo Zan lɔ jiɔ, woayɔ amɛ miliya nɛniɖe va Mawu fyɔʒinkpin lɔ ŋkɔ yí aɖo kojo nɔ wo so ŋciwo wowa vayi nu. Woasɔ agbe nɔnɔ le jeŋkwi mɛ cu fɛn nɔ mɛɖewo yí mɛbuwo ayi zomavɔ mɛ. Vɔ Bibla yɛ nu mɔ ŋci woawa le Kojoɖoɖo Zan lɔ ji koŋ yí nyi mɔ woahwlɛn amɛwo gan so enumajɔmajɔ wawa shi. (Ehajiji Wema 96:13) Mawu can Yesu nɔ anyi Kojoɖotɔ ci yí ahɛn enujɔjɔɛwawa va nɔ amɛ nywiwo.—Hlɛn Ezai 11:1-5; Edɔwawawo 17:31.
w12 9/15 12 mm. 18-19
Fafa na nɔ Exwe Kotokun Ðeka Koɖo Ŋci yí Ajɔ Kplɔɛdo!
18 Ejunɔnɔ cɛ ɖo te hwenu yí Satana kpɔ ŋsɛn do agbetɔwo ji yí wofɔn gu do Yehowa cɛkpakpa ji. Ele ahan gan, so 1914 ɖii yí Mɛsia Fyɔɖuxu sɔsɔ afɔ ɖɔɖɔɖɔ keŋ atrɔ ahɛn ejunɔnɔ koɖo gbenɔju cɛwo vɛ. (Efe. 1:9, 10) Le exwe Kotokun Ðeka Cɛkpakpa lɔ hwenuɔ, enunywi ciwo “mìdekpɔ kpɔ gbeɖe o” yí mìavakpɔ. Le yi goduɔ, “vɔvɔnu” lɔ ava yí Exwe Kotokun Ðeka Cɛkpakpa Kristo tɔ lɔ aɖo te. Nyi yí ajɔ kplɔɛdoɔ? Yesu nu mɔ “ŋsɛn pleŋ yí wo sɔ na Ŋ le jeŋkwi mɛ koɖo le nyigban ji.” Ecɛ dadasɛ mɔ de enu yí biaŋ ni o. Dedrɔdrɔɛ mɔ yeaxɔ texwe le Yehowa shi o. Ásɔ yiɖeki hwe yí “a sɔ fyɔju lɔ do alɔ̀ mɛ nɔ Eda Mawu.” Ávazan texwe ci ɖekɛ desɔ koɖo o koɖo acɛ ci woni yí asɔ hɛn “ejiɖuɖu va nɔ Mawu Eda.”—Mat. 28:18; Fili. 2:9-11.
19 Le yi goduɔ, mɛ ciwo yí anɔ nyigban ji le fyɔɖuxu lɔ gɔnmɛ avatrɔ amɛmaɖoafɛnwo. Woawa Yesu tɔ han yí asɔ wowoɖekiwo hwe yí agbele gbesɔsɔ akpla nu so Yehowa cɛkpakpa lɔ nu. Emɔ ahun nɔ wo yí woadasɛ mɔ yewoɖo dro awa cɛ hwecinu yí woadin pleŋpleŋ nɔ dodokpɔ kpɛtɛkpɛtɛtɔ. (Enyɔ. 20:7-10) Le yi goduɔ, mɛ ciwo pleŋ yí fɔn gu do Mawu ji, agbetɔwo yɔa, gbɔngbɔnmɛnuwawawo yɔa, wo pleŋ, woagu wo yí wodagbeni kpɔ gbeɖe o. Jijɔ koɖo vovo hwenu teŋ yí anyi cɛ! Xexeɛ keŋkeŋ mɛ xomu lɔ asɔ jijɔ kanfu Yehowa ci yí “a ɖufyɔ do enushanu ji.”—Hlɛn Ehajiji Wema 99:1-3.
Bibla mɛ Nuveviwo
it-1 425
Ehajiji
De Ehajiji Wema ɖekɛ mɛ yí wokpɔnɔ enyɔgbe “eha yoyu” le o, vɔ egbele Ezai koɖo apotru Ʒan nuŋwlɛŋwlɛwo mɛ hɛnnɛ. (Eha 33:3; 40:3; 96:1; 98:1; 144:9; 149:1; Ezai 42:10; Enyɔ 5:9; 14:3) Nɔ mìlé ŋkuvi do hwenu ciwo mɛ wozan nyɔgbe “eha yoyu” lɔ le nuɔ, édasɛ mɔ eha ŋtɔŋtɔ yí enyi, ɖo edasɛ lé Yehowa akpa acɛ do xexe lɔ keŋkeŋ ji do. Wosɔ jijɔ xo nuxu so nu le Ehajiji Wema 96:10 mɛ mɔ: “Mí nu nɔ jukɔnwo mɔ Tɔhonɔ nyi Efyɔ.” Emɔ yoyutɔ ci ji Yehowa akpa acɛ le yí akeke yi cɛkpakpa do nyigban koɖo jeŋkwi ji ze le “eha yoyu” cɛ mɛ.—Eha 96:11-13; 98:9; Ezai 42:10, 13.
21-27 OCTOBRE
MAWU NYƆ MƐ DƆKUNUWO EHAJIJI WEMA 100-102
Dasɛ mɔ Lɔnlɔn Egbejinɔnɔtɔ Yehowa tɔ Jeŋ nɔ ye
Lé Àwɛ Ale Gbesɔsɔ nɔ Ʒinʒindoshimɛwawa
18 Lɔnlɔn ci èɖo nɔ Yehowa nyi nɔnɔmɛ vevi ɖeka. Lɔnlɔn yí nyi nɔnɔmɛ nywitɔ ci èɖo aɖo. (Hlɛn Elododo Wema 3:3-6.) Lɔnlɔn sɛnŋ ɖoɖo nɔ Yehowa akpedo eo nu nato agbe mɛ cukaɖawo mɛ fafɛɖe. Bibla xo nuxu so lɔnlɔn nyɔnɔnwitɔ ci Yehowa ɖo nɔ yi sɛntɔwo nu zenɛniɖe, enyi ekacaca sɛnŋ ci yí nɔnɔ yi koɖo yi sɛntɔwo gblamɛ. Lɔnlɔn cɛ dɔ yí davagbe yi sɛntɔwo ɖɛ gbeɖe o, alo davami wo lɔnlɔn kpɔ o. (Eha. 100:5) Mawu wa eo do yi nɔnɔmɛ ji. (Gɔnm. 1:26) Lé àwɛ adasɛ mɔ yeɖo lɔnlɔn ŋtɔ́ han niɔ?
19 Enu ŋkɔtɔ yí nyi mɔ enu le jenɔŋ nɔ eo. (1 Tɛs. 5:18) Ŋkeke ɖeka duuɔ, biɔ eoɖeki se mɔ: ‘Lé Yehowa dasɛ do mɔ yelɔnŋ ɔ?’ Eyi nadakpe nɔ Yehowa le ao gbedodoɖawo mɛ yí anu enu ci tɛnŋ ewa nɔ eo. Eyi nakpɔɛ mɔ Yehowa wa enunywi cɛwo nɔ ye, ɖo élɔn ye shigbe lé apotru Pɔlu vado jeshi so Yehowa nu nɛ. (Hlɛn Galatitɔwo 2:20.) Biɔ eoɖeki se mɔ: ‘Ŋji mɔ nadasɛ lɔnlɔn nɔ Yehowa do enu ci ewa nɔŋ ŋcia?’ Lɔnlɔn ɖoɖo nɔ Yehowa yí ana yí naɖu tetekpɔ koɖo cukaɖa ciwo yí àdo go ji. Agbena yí nakpɔtɔ awanɔ gbɔngbɔnmɛdɔwo blaŋblaŋ yí asɔ dasɛ nɔ Dao ci yí le jeŋkwi mɛ ŋkeke ɖeka duu mɔ yeluin.
“Mí Ðu Míwoɖekiwo Ji, A Nɔ̀ Zanŋte”
10 Afɔku ciwo mìɖo aze nɔ ɖewo yí nyi ŋkuvi ɖoɖo nɔ amɛ, ahamuamɛ sugbɔ nunu, sukanuɖuɖu, enyɔveamɛwo nunu, ayeɖedaɖɛnu ciwo mɛ tamɛsɛnnuwawawo le kpɔkpɔ, mamaɖeɖenuwo kpɔkpɔ koɖo enu nɛnɛhantɔ buwo. (Eha. 101:3) Mìwo ketɔnɔ Legba le agbla ji gashiagamɛ yí jijiɛ enu ciwo azan keŋ adahɛn exlɔnyinyi ci yí le mìwo koɖo Yehowa gblamɛ. (1 Piɛ 5:8) Nɔ mìdele zanŋteɔ, Satana ana yí mìwo susu koɖo mìwo ji aɖɔ koɖo ŋɔku, amɛbleble, egoyiyi, ŋbia, amɛxaxa koɖo amɛleledodɔmɛ. (Gal. 5:19-21) Kaka lɔɔ, mìdakpɔ mɔ enu cɛwo nyi afɔku o. Vɔ nɔ mìdeɖe afɔ kaba yí ɖe adɛn dɔndɔn ŋtɔ́wo so mì mɛɔ, woado ke do mì mɛ shigbe aci vwin nɛ yí akplɔ mì do afɔku mɛ.—Ʒaki 1:14, 15.
w11 7/15 16 mm. 7-8
Amɛkanxlenyɔ Yehowa Tɔwo mɛ kɔ—Àɖo to woa?
7 Woaze nɔ ŋsunukplamɛtɔwo gɔnmɛ ɖe? Mìdexɔnɔ wo do mìwo xwewo mɛ alo donɔ gbe nɔ wo o. Ahanke mìgbenɔ mɔ mìdahlɛn wowo wemawo, akpɔ wowo wana ɖe le televiʒiɔn ji, ayi wowo siti ji alo anu do wowo nyɔ ɖe nu o. Nyi yí taɖo mìgbenɔ kpeŋ mɔ mìdawa ŋnɔwoɔ? Ðo mìlɔn Mawu. Mìlɔn “nyɔnɔnwi Mawu” lɔ. Mìwɛni ahan, ɖo mìdejinɔ mɔ mìaɖo to ŋsunyɔ ciwo yí trɔkpe yi Nyɔ ci yí nyi nyɔnɔnwi lɔ o. (Eha. 31:5; Ʒan 17:17) Gbesɔ kpe niɔ, mìlɔn Yehowa habɔbɔ lɔ ci yí kpla nyɔnɔnwiwo mì so Yehowa ŋkɔ koɖo gɔnmɛsese ci yí le nu, ŋci Mawu drɔdrɔ do nyigban lɔ nu, nɔnɔmɛ ci mɛ amɛkukuwo le koɖo fɔnfɔnsoku mɔkpɔkpɔ lɔ nu. Èɖo ŋwi lé ewa nɔ eo hwenu èkpla nu so enu cɛwo koɖo nyɔnɔnwi vevi buwo nua? Ci ele ahan ɖe, nyi yí taɖo àtashi eoɖeki yí mɛ ci yí gbalikɔ habɔbɔ ci yí kpla nyɔnɔnwi gbogbo cɛwo eo, atrɔ eo so nyɔnɔnwi lɔ nuɔ?—Ʒan 6:66-69.
8 Nɔ ŋsunukplamɛtɔ lɔwo gbenukɔ nyɔ ɖekpokpui can ɔ, mìdavakplɔ wo do gbeɖe o! Nɔ mìkplɔ dotɔ ciwo mɛ eshi xu le cɛwo doɔ, woable mì yí agbevave nɔ mì mɔ mìkplɔ wo do. Eyi taɖo mìaɖui koŋ akpɔtɔ anɔ gbeji nɔ Yehowa koɖo yi habɔbɔ ci yí sɔ Mawu Nyɔ lɔ ci yí so gbɔngbɔn mɛ ciciɛ shikɔ nɔ mì so gbeɖegbe ɖii koɖo eshi fafa ci yí mɛ̀.—Ezai. 55:1-3; Mat. 24:45-47.
Bibla mɛ Nuveviwo
it-2 596
Tɔkpaxu
Nɔ xodu ɖɔ tɔkpaxuɔ, ézonɔ yi fini yí ɖoɖa keŋ asɔ eta do awawo mɛ yí nɔnɔ kpuu keke nɔ èkpɔɛ ɖaɖa le azɔgeɔ, nabui mɔ ekpe ɣi ɖe yí le nɔ. Énɔnɔ ahan na nɔ gaxoxo sugbɔ. Hwenu ehakpatɔ lɔ seseɛ veviɔ, ésɔ yiɖeki sɔ koɖo tɔkpaxu ci yí le zogbeji ci enu mɔ: “Ŋ nyi nyɛɖekɛ shigbe [tɔkpaxu] ci yí le zogbeji ɛnɛ.” (Eha 102:6) “Zogbeji” cɛ denyi zogbemɛ ŋtɔŋtɔ o, vɔ enyi afi ci yí le azɔge ci gbɔ axwe ɖe desɔ o. Le hwenu ɖewo mɛ le exwe lɔ mɛɔ, tɔkpaxuwo vacinɔ tagbe nɔ Ʒurdɛn Tɔsasa. Wokpɔnɔ tɔkpaxu hamɛhamɛ amɛtɔn le Izraɛli. Ci wokpɔnɔ blaŋblaŋ yí nyi eɣitɔ (Pelecanus onocrotalus); amɛvetɔ ɖonɔ fuwo shigbe kloklo jakplɛ fuwo nɛ (Pelecanus crispus) eyi ci yí dexabɔ ahan yí nyi blamanyijin (Pelecanus rufescens).
Tɔkpaxuwo delɔn nɔnɔ agble nyigbanwo ji fini woavado aya nɔ wo le o. Hunnɔtɔxuwo woɖonɔ atɔ do keke axo vi, alé kpaviwo ɖu gbɔxwe aso. Ci ejinɔ mɔ yeanɔ fini yí mɛɖe dado aya nɔ yeɔ, Bibla zinni do dumɛ nɔ gugu mavɔ. Ci Ezai xokɔ nuxu so gugu mavɔ Edɔmu tɔ nuɔ, énu daɖɛ mɔ tɔkpaxuwo nɔxu yí yɛavanyi. (Ezai 34:11) Zefania nu daɖɛ mɔ tɔkpaxuwo avanɔ Ninivu glikpuwo ji. Yi gɔnmɛ yí nyi mɔ woagui yí mɛɖekɛ dagbevanɔ enɔ o.—Zef 2:13, 14.
28 OCTOBRE–3 NOVEMBRE
MAWU NYƆ MƐ DƆKUNUWO EHAJIJI WEMA 103-104
“Mawu Nya mɔ Wowa mì so Afizɔ mɛ”
Wanɔ Nu Le Dredrenu Shigbe Yehowa Nɛ
5 Ci Yehowa sɔ yiɖeki hwenɔ yí gbesenɔ vevi do amɛ nuɔ, edɔ éwanɔ nu le dredrenu. Le kpɔwɛ mɛ, amɛɖekisɔsɔhwe Yehowa tɔ ze hwenu emɔ yeagu amɛvɔnwo le Sodomu. Yehowa to yi dɔlawo ji yí kanxle amɛjɔjɔɛ Loti mɔ yi le shi yi etowo ji. Vɔ Loti vɔnkɔ nɔ hunnɔtɔxu yiyi. Eyi taɖo eɖe kuku mɔ ye koɖo ye xomu ashi yi Zoa, eju hwɛhwɛ ɖeka ci Yehowa ji mɔ yeagu hɛnnɛ. Yehowa atɛnŋ amɔ duudan yí Loti ɖo awa do enyɔ ci yenu ji. Vɔ dewɛ ahan o, éɖo to yí se enyɔ ci Loti nu yí tashi Zoa ju lɔ gugu si. (Gɔnm. 19:18-22) Exwe sanŋdi nɛniɖe goduɔ, Yehowa se vevi do Ninivutɔwo nu. Édɔ yi nyɔnuɖɛtɔ Ʒonasi nɔ ayi nu nɔ jukɔn lɔ mɔ yeagu ju lɔ koɖo amɛvɔn ciwo yí le mɛ swi. Vɔ ci Ninivutɔwo trɔ ji mɛɔ, Yehowa trɔ yi susu yí degbegu ju lɔ o.—Ʒonasi 3:1, 10; 4:10, 11.
Kando Yehowa Ji Shigbe Lé Samusɔn Wɛ Ɛnɛ
16 Ci afɛn ci Samusɔn wa na yí ekpe fun sugbɔ can ɔ, dena yí emi wawa do edro Yehowa tɔ ji o. Nɔ mìwa afɛn ɖe ci yí na wodɔn to nɔ mì alo woxɔ edɔ ciwo mìwanɔ le hamɛ lɔ mɛ sa le mì shi ɔ, mìdagbɔjɔ o. Ðo ŋwi mɔ Yehowa le gbesɔsɔ asɔ nu ke mì. (Eha. 103:8-10) Nɔ mìwa afɛnwo can ɔ, Yehowa akpɔtɔ azan mì shigbe lé ezan Samusɔn nɛ.
17 Mìasɔ nɔviŋsu jajɛ ɖeka ci yí tɔ mɔ Michael kpɔwɛ. Éwanɔ teokrasidɔ sugbɔwo yí nyi sumɔsumɔdɔwatɔ koɖo gbeshiagbe mɔɖetɔ. Ewa ŋshishi mɔ évawa afɛn ɖeka yí woxɔ edɔ ciwo ewanɔ le hamɛ lɔ mɛ le shi. Énu mɔ: “Keke va ɖo hwenɔnuɔ, ŋwanɔ edɔ sugbɔ le Yehowa sɛnsɛn mɛ. Vɔ zeɖekatɔntɔn ɔ, evawa nɔŋ shigbe mɔ ŋdatɛnŋ agbewa ŋɖe le Yehowa sɛnsɛn mɛ ɛnɛ. Ŋdebui kpɔ gbeɖe mɔ Yehowa atashiŋ o, vɔ ŋbiɔnɔ nyɛɖeki se mɔ nyɛ koɖo Yehowa gblamɛ atɛnŋ agbevanɔ shigbe lé ele sa nɛa, alo nasun ji agbevawa dɔwo le hamɛ lɔ shigbe lé ŋwɛni sa nɛa?”
18 Enyɔ sugbɔ mɔ, Michael dena ta o. Énu mɔ: “Ŋsɔ susu ɖo ŋciwo nawa yí nyɛ koɖo Yehowa gblamɛ agbenyɔ ji, ŋdonɔ gbe ɖaɖa ni so ji mɛ, ŋkplanɔ nu yí gbebunɔ tamɛ kpɔ.” Le yiyimɛɔ, Michael gbevaje yí xɔ dɔwo le hamɛ lɔ mɛ. Ecɛyɛɔ, ényi hamɛmɛshinshin koɖo gbeshiagbe mɔɖetɔ. Énu kpi mɔ: “Ŋsɛndoamu koɖo kpekpedonu ciwo ŋxɔ vevitɔ le hamɛmɛshinshinwo gbɔ kpedo ŋnu yí ŋkpɔɛ mɔ Yehowa kpɔtɔ lɔnŋ. Ecɛyɛ nagbetɛnŋ asumɔ le hamɛ lɔ mɛ ke koɖo ayexa mɛmi. Enu ci mɛ ŋto kplaŋ mɔ nɔ mɛɖe wa afɛn yí trɔ ji mɛ ŋtɔŋtɔɔ, Yehowa asɔ ki.” Nɔ mìwa afɛnwo gan yí wa ŋɖekpokpui ci ji yí mìsun keŋ yí trɔ lé mìwanɔ nuwo do yí kpɔtɔ yí ɖoɖoɔŋ do Yehowa nuɔ, mìatɛnŋ akando ji mɔ Yehowa azan mì yí acu shi nɔ mì.—Eha. 86:5; Elo. 28:13.
Àtɛnŋ Awa Do Gbɔngbɔn Mɛ Tajinu Aotɔwo Ji
2 Nɔ èɖo tajinu ɖe ci ji dekpɔ wa doɔ, ŋgbegbɔjɔ o. Nɔ egbenyi tajinu hwɛhwɛ yɔ can ɔ, eʒan gamɛ koɖo edɔwawa sɛnsinɖe gbɔxwe àwa do ji. Ci èkpɔtɔ jijiɛ mɔ yeawa do tajinu lɔ jiɔ, edasɛ mɔ ekacaca ci le eo koɖo Yehowa gblamɛ ve nɔ eo yí èji mɔ yeawa ci ji èkpe ni. Agbla ciwo yí èjejeɛ jɔkɔ ji nɔ Yehowa. Le nyɔnɔnwi mɛɔ, daji mɔ eo le wa wu ci ji èkpe o. (Eha. 103:14; Mis. 6:8) Eyi taɖo gbɔxwe àɖo tajinu ɖeɔ, kpɔ mɔ yeatɛnŋ awa do ji ma. Nɔ èɖo tajinu ɖe ɖe, lé àwɛ awa do jiɔ? Mìaxo nuxu so ŋɖewo ci àtɛnŋ awa nu.
Bibla mɛ Nuveviwo
cl 55 mm. 18
Enuwowawa Ŋsɛn—“Jeŋkwi Koɖo Nyigban Jɔtɔ”
18 Nyi yí mìkpla le ŋsɛn ci Yehowa sɔ wanɔ enuwo mɛɔ? Yi nuwawawo jinɔŋ nɔ mì. Ehakpatɔ ɖeka nu mɔ: “Tɔhonɔ, E wa enu nyakpɔkpɔ sugbɔ. Nyigban ji ɖɔ koɖo enu ciwo yí E wa.” (Ehajiji Wema 104:24) Nyɔnɔnwi teŋ yí nyi cɛ! Mɛ ciwo yí kplanɔ nu so agbetɔ lanmɛ nu nu mɔ nulagbu hamɛhamɛ ciwo yí awu miliɔn ɖeka yí le nyigban lɔ ji. Amɛwo nanɔ hlɛnhlɛnmɛ miliɔn vovovo so enulagbu hamɛhamɛ ciwo yí li nu. Mɛ ciwo yí tanɔ nu alo mɛ ciwo yí mɛnɔ nu bunɔ tamɛ, vɔ wodekpɔ ŋɖe ata yí ato akpo nɔ enu ciwo yí li vɔ o. Ele ahan gan, ŋsɛn ci Yehowa ɖo yí sɔ wanɔ enuyoyu buwo davavɔ gbeɖe o.