Ŋkɔnɔtɔ ciwo yí wocunɔ ho nɔ dele mìwo habɔbɔ mɛ o. Shigbe lé Kristotɔwo hamɛ ŋkɔtɔwo wɛ hannɛɔ, woɖo hamɛ jikpɔtɔ ciwo yí je yí anyi “lɛngbɔha kplɔtɔwo . . . le Mawu habɔbɔmɛ.” (Edɔwawawo 20:28) Hamɛmɛshinshin cɛwo nyi amɛ ciwo yí shin le gbɔngbɔnmɛ. Woxɔnɔ ŋkɔ̀ le hamɛ lɔ mɛ yí gbekplɔnɔ lɛngbɔha lɔ nywiɖe. Bibla nu nɔ wo mɔ “mí da wɛ shigbe wo tɛdo mí ji ɛnɛ [o], mì a wɛ koɖo edro míwotɔ, toto edro Mawutɔ ji. Dé nyi ele xoɖyi ŋci o, vɔ, mí a nyi kpɔwɛwo nɔ lɛngbɔ ha lɔ.” (1 Piɛ 5:1-3) Edɔ ciwo yí hamɛmɛshinshinwo wanɔ nɔ mìɔ?

Wolenɔ bu nɔ mì yí gbekpɔnɔ mì ji. Hamɛmɛshinshinwo nanɔ emɔdasɛnamɛwo yí gbekpɔnɔ hamɛ lɔ ji le gbɔngbɔnmɛ. Ci wonya mɔ Mawu yí sɔ edɔ vevi cɛ do alɔ mɛ nɔ yewoɔ, wodeɖunɔ ega do Mawu hamɛ lɔ ji o. Wonanɔ mìkpɔnɔ jijɔ yí gbevonɔ le mìwoɖekiwo mɛ. (2 Korɛntitɔwo 1:24) Shigbe lé lɛngbɔ kplɔtɔwo donɔ gbla yí lenɔ bu nɔ wowo lɛngbɔ ɖeshiaɖe nɛɔ, ahanke hamɛmɛshinshinwo tenɔ kpɔ yí jenɔ shi hamɛ lɔ mɛ tɔ ɖekaɖeka nɛ.​—Elododo Wema 27:23.

Wokplanɔ mì lé mìawa edro Mawu tɔ do. Le kwɛshila ɖeshiaɖe mɛɔ, hamɛmɛshinshinwo kpɔnɔ bɔbɔwo ji le hamɛ lɔ mɛ yí donɔ ŋsɛn mìwo xɔse. (Edɔwawawo 15:32) Ŋsu vevidonutɔ cɛwo gbexɔnɔ ŋkɔ̀ le kunuɖeɖedɔ lɔ mɛ. Wowanɔ edɔ koɖo mì keŋ yí nanɔ ekpla mì le akpaxwe vovovowo mɛ nɔ kunuɖeɖedɔ lɔ.

Wodonɔ ŋsɛn mìwo domɛtɔ ɖekaɖeka. Nɔ mìwo domɛtɔ ɖekaɖeka ate gogo Yehowa dojiɔ, hamɛmɛshinshinwo va jinɔ mìkpɔ le mìwo xwewo mɛ alo le Fyɔɖuxuxɔ mɛ keŋ yí sɔnɔ Ŋwlɛnŋwlɛn lɔwo fanɔ akɔn nɔ mì.​—Ӡaki 5:14, 15.

Gbesɔ kpedo hamɛmɛshinshindɔ lɔ nuɔ, woɖo edɔwaɖu koɖo xomu gbannɔamɛjiwo hɛnnɛ. Edɔ cɛwo biɔnɔ gamɛ koɖo ebu lenɔ nu so wo shi. Ele mɔ mìabunɔ nɔviŋsu edɔ sɛnsin watɔ cɛwo.​—1 Tɛsalonikitɔwo 5:12, 13.

• Edɔ ciwo yí hamɛmɛshinshinwo wanɔ le hamɛ lɔ mɛɔ?

• Kpedonu ciwo yí hamɛmɛshinshinwo nanɔ mìwo domɛtɔ ɖekaɖekaɔ?

Bibla xo nuxu so ŋsu Kristotɔwo gbɛ amɛve ciwo yí axɔ ŋkɔ̀ le hamɛ lɔ mɛ nu. Wowo yí nyi: “jikpɔtɔwo koɖo sumɔsumɔdɔwatɔwo.” (Filipitɔwo 1:1, nwt) Le hamɛ ɖeka mɛɔ, ŋsu cɛwo tɛnŋ sugbɔ yí axɔ agbannɔamɛjiwo. Edɔ vevi ciwo yí sumɔsumɔdɔwatɔwo wanɔ nɔ mìɔ?

Wokpenɔ do hamɛmɛshinshinwo-ha nu. sumɔsumɔdɔwatɔwo nyi mɛciwo yí le ekadodo nywi mɛ koɖo Yehowa. Ðewo nyi ɖajɛviwo yí mɛbuwo nyi mɛganxoxuwo. Wonyi mɛciwo ji woatɛnŋ akando yí wogbedonɔ vevi edɔ. Wokpenɔ ŋkuvi do edɔ vovovowo nu, eyi nanɔ enuwo zɔnnɔ do ɖoɖo nywi nu le hamɛ lɔ mɛ. Egbenanɔ yí hamɛmɛshinshinwo kpɔnɔ vovo sugbɔ do Bibla kplakpladɔ koɖo lɛngbɔkplɔkplɔdɔ lɔ nu.

Wowanɔ edɔ vovovowo. Sumɔsumɔdɔwatɔ ɖewo nyinɔ anyinɔxujikpɔtɔwo yí donɔ ozɔn nɔ amɛ ciwo yí vanɔ bɔbɔ lɔwo. Eɖewo kpɔnɔ ehaxonuwo ji, ebuwo manɔ wemawo nɔ nɔviwo, ebuwo kpɔnɔ hamɛ lɔ hokɔnŋtawo ji, yí ebuwo manɔ nyigbanmama ci mɛ woaɖe kunu le nɔ haamɛ tɔwo. Wogbekpɔnɔ Fyɔɖuxuxɔ lɔ ji yí enɔnɔ mɛmiɖe. Hamɛmɛshinshinwo biɔnɔ so wo shi mɔ woakpedo amɛ shinshinwo nu. Ci yí sumɔsumɔdɔwatɔwo wanɔ edɔ ɖeshiaɖe ci wobiɔ so woshi so ji mɛɔ, wonyi amɛ ciwo yí je nɔ bubu le haamɛ.​—1 Timɔte 3:13.

Woɖonɔ kpɔwɛ nywi. Nɔnɔmɛ nywi ciwo yí le sumɔsumɔdɔwatɔwo shi yí na yí wosɔ wo. Edɔ nywi ciwo yí wowanɔ le bɔbɔ lɔwo mɛ nanɔ mìwo xɔse sɛnnɔŋ doji. Kpɔwɛ nywi ci yí woɖonɔ le kunuɖeɖedɔ lɔ mɛ nanɔ yí ezo ɖonɔ mì mɛ le eŋɛnywi lɔ dradra mɛ. sumɔsumɔdɔwatɔwo wanɔ edɔ alɔ-le-alɔmɛ koɖo hamɛmɛshinshinwo, eyi nanɔ yí jijɔ koɖo ɖekawawa nɔnɔ mì mɛ. (Efezitɔwo 4:16) Nɔ hwenu lɔwo vayikɔɔ, wowo can atɛnŋ avaje anyi hamɛmɛshinshinwo.

• Miwo yí sumɔsumɔdɔwatɔwo nyiɔ?

• Nyiwo yí sumɔsumɔdɔwatɔwo wanɔ yí enuwo zɔnnɔ nywiɖe le hamɛ lɔ mɛɔ?

Bibla kpaxwe ci yí nyi Kristotɔwo Grɛki Ŋwlɛnŋwlɛnwo xo nuxu sugbɔ so Barnaba koɖo apostolo Pɔlu nu. Ŋsu cɛwo nyi ekán lɔ mɛ hamɛwo jikpɔtɔ ciwo yí vayi jinɔ hamɛ ɖekaɖeka kpɔ le exwe sanŋdi ŋkɔtɔ mɛ. Nyi yí taɖoɔ? Ðoɔ, wosɔ eɖe le mɛ nɔ wowo nɔvi Kristotɔwo sugbɔ. Pɔlu nu mɔ, yi drodroɔ ye veviɖe mɔ yewo “atrɔ ayi eju lɔwo mɛ akpɔ lé nɔvi” xɔsetɔwo le do. Éle gbesɔsɔmɛ yí azɔn mɔ kpeci nɛniɖe to emɔ ji alo etɔ ji ayi nɔviwo gbɔ keŋ ado ŋsɛn wo. (Edɔwawawo 15:36) Edro ŋtɔ́ hanke yí le ekán lɔ mɛ hamɛwo jikpɔtɔ mìwo tɔwo mɛ le egbɛmɛ nɛ.

Wovadonɔ ŋsɛn mì. Ekán lɔ mɛ hamɛwo jikpɔtɔ ɖeka jinɔ hamɛ ciwo yí ayi 20 han kpɔ, yí wanɔ kwɛshila ɖeka koɖo wo zeve le exwe ɖeka mɛ. Mìatɛnŋ akpla enu sugbɔ so enutɔxukpɔkpɔ ciwo yí sun nɔvi ŋsu cɛwo koɖo wowo shiwo shi, nɔ woɖe nyɔnu. Wojinɔ mɔ yewoajeshi ɖevihwɛwo koɖo jajɛwo ɖɛ nywiɖe. Wokplɔnɔ mì yi kunuɖegbe koɖo Bibla nukplaviwo gbɔ. Jikpɔtɔ cɛwo koɖo hamɛmɛshinshinwo wanɔ lɛngbɔkplɔkplɔdɔ keŋ asɔ do ŋsɛn mì. Wonanɔ nuxu wadɔdoamɛjiwo le bɔbɔwo koɖo takpekpewo mɛ.​—Edɔwawawo 15:35.

Wosɔnɔ eɖe le mɛ nɔ amɛshiamɛ. Ekán lɔ mɛ hamɛwo jikpɔtɔwo sɔnɔ eɖe le lé hanci hamɛwo dokɔ gbla le Mawu sɛnsɛn mɛ do. Wowanɔ bɔbɔ koɖo hamɛmɛshinshinwo koɖo sumɔsumɔdɔwatɔwo keŋ akpɔ ŋkɔyiyi ci wowa yí aɖo aɖaŋ nɔ wo nɔ woawa wowo dɔwo nywiɖe. Wokpenɔ do emɔɖetɔwo nu nɔ wowo sɛnɛndɔ anyɔ doji, wogbejinɔ mɔ yewoajeshi amɛ yoyu ciwo yí va dokɔ ha koɖo mì ɖɛ keŋ ase ŋkɔyiyi ciwo yí wowakɔ le gbɔngbɔnmɛ. Ekán lɔ mɛ hamɛwo jikpɔtɔ domɛtɔ ɖekaɖeka lɔnnɔ faa yí sɔnɔ yiɖeki jonɔ shigbe mìwo “bɔdonutɔ [yí] wanɔ edɔ” nɔ mìwo nyɔna. (2 Korɛntitɔwo 8:23) Ele mɔ mìaɖyi wo le wowo xɔse koɖo lé hanci wodokɔ vevi nu le Mawu sɛnsɛn mɛ.​—Ebretɔwo 13:7.

• Nyi yí taɖo ekán lɔ mɛ hamɛwo jikpɔtɔwo va jinɔ hamɛwo kpɔɔ?

• Lé àwɛ akpɔ nyɔna so wowo vava mɛɔ?

Nɔ afɔku ɖe jɔɔ, Yehowa Kunuɖetɔwo wanɔ toto le afɔdumɛ keŋ yí nanɔ kpedonu wowo nɔvi ciwo ji afɔku lɔ jɔ do. Afɔɖeɖe cɛ danasɛ lɔnlɔn akun-akun ci yí mìɖo nɔ mìwo nɔnɔwo. (Ӡan 13:34, 35; 1 Ӡan 3:17, 18) Kpedonu ciwo yí mìnanɔɔ?

Mìnanɔ eho kpedonu. Hwecinu yí eju gangan ɖeka to le Ӡudeɔ, Kritotɔ ŋkɔtɔ ciwo yí le Antiɔshi sɔ eho ɖaɖa wowo nɔvi gbɔngbɔnmɛtɔ ciwo yí le Ӡude. (Edɔwawawo 11:27-30) Ahanke nɔ mìse mɔ awobi gangan ɖe xo mìwo nɔviwo le eju ɖe mɛɔ, mìsɔnɔ eho ɖaɖa wo toto mìwo hamɛ ji nɔ woasɔ kpɔ wowo ӡan veviwo gbɔ.​—2 Korɛntitɔwo 8:13-15.

Mìnanɔ kpedonu vovovowo. Hamɛmɛshinshin ciwo yí le fini yí afɔku lɔ jɔ le jinɔ wowo hamɛ lɔ mɛ tɔwo kpɔ ɖeka ɖeka yí akpɔ mɔ wole nywiɖe ma. Kpedonunagbɛ ɖeka wanɔ ɖoɖo do ŋɖuɖu, eshinunu, enudodo, dɔnxu koɖo cike nana nu. Kunuɖetɔ sugbɔ ciwo yí nya edɔ ciwo yí ӡan nɔ kpedonu lɔɔ, sonɔ le wowo ɖekiwo shi yí yinɔ fini yí afɔku lɔ jɔ le. Wowo ŋtɔwo gomɛho yí wozannɔ. Wokpenɔ ashi do axwewo koɖo Fyɔɖuxuxɔwo dradrado nu. Ðekawawa ci yí le habɔbɔ lɔ mɛ koɖo enutɔxukpɔkpɔ ci yí sun mì shi yí na mìsonɔ kaba yí nanɔ kpedonu nɔ afɔku jɔ. Ele mɛ mɔ mìwo “hamɛvi xɔsetɔwo nu” yí mìkpenɔ do nɔ afɔku jɔ, ganŋke nɔ mìsunjiɔ mìkpenɔ do mɛciwo yí le sɛnsɛnha buwo mɛ can nu.​—Galatitɔwo 6:10.

Mìsɔnɔ Bibla mɛ nyɔwo fanɔ akɔn nɔ wo. Akɔnfafa yí nyi enu vevi ci yí ӡan mɛciwo yí le efunkpekpe mɛ sugbɔ wu. Le nɔnɔmɛ ŋtɔ́wo mɛɔ, Yehowa, “akɔnfafawo keŋkeŋ” Mawu gbɔ yí mìxɔnɔ ŋsɛn le. (2 Korɛntitɔwo 1:3, 4) Mìxonɔ nuxu so Bibla mɛ gbeɖuwo nu nɔ mɛciwo yí le vevisese mɛ, keŋ nɔ woakandoji mɔ Mawu Fyɔɖuxu avaɖe afɔkuwo koɖo vevisesewo pleŋ si.​—Enyɔdasɛ 21:4.

• Nyi yí taɖo Kunuɖetɔwo sonɔ kaba yí nanɔ kpedonu nɔ afɔkuwo jɔɔ?

• Bibla mɛ nyɔ ciwo yí mìatɛnŋ azan asɔ fa akɔn nɔ amɛ ciwo ji afɔku jɔ doɔ?

Keŋ gbɔxwe Yesu akuɔ, énu enyɔ vevi ɖeka nɔ yidokplɔtɔ amɛnɛ ciwo yí nyi Piɛ, Ӡaki, Ӡan koɖo Andre. Hwecinu yí Yesu xokɔ nuxu so jeshidui ciwo yí aɖokpe yinyinɔnɔ ji le ŋkeke vɔvɔwo mɛɔ, ébiɔ enyɔ vevi cɛ se: “Mi cucucu yí nyi hwashi egbejinɔtɔ koɖo ŋɖɛnyatɔ ci yí yixwetɔ ɖo do yixomɛ dɔwaviwo ji nɔ ana wowo ŋɖuɖu wo le gamɛ nywitɔ jiɔ?” (Matie 24:3, 45, nwt; Maki 13:3, 4) To enyɔ cɛ jiɔ, Yesu na kandoji yinukplaviwo mɔ, eye ci yí nyi wowo “xwetɔ,” yeaɖo mɛciwo yí ananɔ gbɔngbɔnmɛ ŋɖuɖu yedokplɔtɔwo le azan lɔwo vɔvɔnu. Mi yí avanyi hwashi ŋtɔ́ɔ?

Ényi Yesu dokplɔtɔ ciwo yí woshi ami nɔ domɛtɔ ɖewo ha. “Hwashi” lɔ yí nyi Edɔjikpɔha Yehowa Kunuɖetɔwo tɔ. Énanɔ gbɔngbɔnmɛ ŋɖuɖu yikpena Yehowa sɛntɔwo do gamɛ nywitɔ ji. Mìkpɔnɔ emɔ gashiagamɛ mɔ hwashi egbejinɔtɔ lɔ ananɔ “enuɖuɖu [mì] do ega mɛ” ji.​—Luiki 12:42.

Ékpɔnɔ Mawu xomɛtɔwo ji. (1 Timɔte 3:15) Yesu ɖo edɔ gangan ɖeka nɔ hwashi lɔ mɔ yile kpɔnɔ Yehowa habɔbɔ kpaxwe ci yí le nyigban ji dɔwo ji. Edɔ cɛwo yí nyi enunɔamɛshiwo jikpɔkpɔ, kunuɖeɖedɔ lɔ jikpɔkpɔ koɖo enukplamuwo nana mì le bɔbɔwo mɛ. Eyi taɖo “hwashi egbejinɔtɔ koɖo ŋɖɛnyatɔ” lɔ nanɔ mì gbɔngbɔnmɛ ŋɖuɖu ciwo yí ӡan mì teŋ do gamɛ ji. Éwɛni to wema ciwo yí mìzannɔ le kunuɖeɖedɔ lɔ mɛ koɖo nukplamu ciwo yí mìxɔnɔ le bɔbɔwo koɖo takpekpewo mɛ ji.

Hwashi lɔ nyi egbejinɔtɔ, ɖo détɔnɔ shi Bibla mɛ nyɔnɔnwiwo o, yí wanɔ kunuɖeɖedɔ lɔ pɛpɛpɛ shigbe lé wodɔɛ do nɛ. Égbenyi ŋɖɛnyatɔ, ɖo ékpɔnɔ Yesu nunɔamɛshi ciwo yí le nyigban ji le emɔ nywi nu. (Edɔwawawo 10:42) Amɛ sugbɔ ciwo yí vava habɔbɔ lɔ mɛ koɖo gbɔngbɔnmɛ ŋɖuɖu sugbɔ manyanu ciwo yí mìxɔnɔ so Ŋwlɛnnwlɛn lɔwo mɛ dasɛ mɔ Yehowa yrakɔ hwashi lɔ.​—Ezai 60:22; 65:13, nwt.

• Mi yí Yesu sɔ mɔ yɛananɔ gbɔngbɔnmɛ ŋɖuɖu yenukplaviwoɔ?

• Emɔ ciwo nu yí hwashi lɔ nyi egbejinɔtɔ koɖo ŋɖɛnyatɔ leɔ?

Le exwe sanŋdi ŋkɔtɔ mɛɔ, eha hwɛhwɛ ci yí nyi “apostolowo koɖo hamɛmɛshinshinwo le Ӡeruzalɛmu” yí nyi edɔjikpɔha. Énɔnɔ edumɛ nɔ Kristotɔ amɛshiaminɔ lɔwo pleŋ keŋ yí sɔnɔ gbeta veviwo. (Edɔwawawo 15:2, nwt) Nɔ wojikɔ asɔ gbeta ɖe dojuɔ, wokunɔ Ŋwlɛnŋwlɛn lɔwo mɛ kitokito yí gbeɖenɔ mɔ yí Yehowa gbɔngbɔn kɔkɔɛ danasɛ mɔ nɔ wo. (Edɔwawawo 15:25) Ahanke yí edɔjikpɔha ci yí li le egbɛmɛ wɛni nɛ.

Mawu le wozankɔ yí asɔ wa yidro. Nɔvi ŋsu amɛshiaminɔ ciwo yí le Edɔjikpɔha lɔ mɛ kunɔ do Mawu Nyɔ lɔ nu goŋgoŋ. Wogbebi le hakplɔɖoɖo gbetasɔsɔwo koɖo Bibla mɛ nukplamuwo nana mɛ. Wodonɔ go kwɛshila ɖeshiaɖe yí xonɔ nuxu so xexeɛ pleŋ mɛ nɔviwo habɔbɔ nuӡanӡanwo nu. Shigbe lé enɔ le exwe sanŋdi ŋkɔtɔ mɛ hannɛɔ, Edɔjikpɔha lɔ tonɔ lɛtawo, ekán lɔ mɛ hamɛwo jikpɔtɔwo koɖo emɔ buwo ji yí sɔnɔ Bibla mɛ mɔdasɛnamɛwo ɖaɖa hamɛwo. Toto cɛwo nanɔ yí Mawu mɛwo wanɔ nu doju le ɖekawawa mɛ. (Edɔwawawo 16:4, 5) Edɔjikpɔha lɔ kpɔnɔ Bibla mɛ nukplamuwo nana ji. Égbedonɔ ezo lanmɛ nɔ amɛshiamɛ nɔ woasɔ Fyɔɖuxu ŋɛnywi lɔ dradra ɖo texwe ŋkɔtɔ le agbemɛ. Edɔjikpɔha yí danashi do nɔviŋsu ciwo yí woɖo agbannɔamɛji nɔxuwo ji.

Edɔjikpɔha lɔ zɔnnɔ do gbɔngbɔn kɔkɔɛ mɔdasɛnamɛwo ji. Yehowa, Xexegbɛ Cɛkpatɔgan koɖo Yesu ci yí nyi hamɛ lɔ Ta gbɔ yí Edɔjikpɔha lɔ xɔnɔ emɔdasɛnamɛwo le. (1 Korɛntitɔwo 11:3; Efezitɔwo 5:23) Edɔjikpɔha mɛ tɔwo desɔnɔ wowo ɖekiwo mɔ yewo nyi ega nɔ Mawu sɛntɔwo o. Wowo koɖo Kristotɔ amɛshiaminɔ kpɛtɛwo, “kplɔnɔ Lɛngbɔvi lɔ [Yesu] do le afi ɖekpokpwi ci É yìkɔ.” (Enyɔdasɛ 14:4) Gbedoɖa ciwo yí mìwanɔ do ta nɔ Edɔjikpɔha mɛ tɔwo jɔnɔ ji nɔ wo sugbɔ.

• Miwo yí nyi edɔjikpɔha mɛ tɔwo le exwe sanŋdi ŋkɔtɔ mɛɔ?

• Lé Edɔjikpɔha jinɔ emɔdasɛnamɛ Mawu tɔwo do le egbɛmɛɔ?

Betɛli nyi Ebregbe mɛ nyɔ ci gɔnmɛ yí nyi “Mawu xwemɛ.” (Gɔnmɛjeje 28:17, 19) Ŋkɔ cɛ sɔ pɛɛ nɔ dɔwaxu ciwo yí Yehowa Kunuɖetɔwo ɖo do eju vovovowo mɛ le xexeɛ pleŋ mɛ. So dɔwaxu cɛwo yí wodanasɛ emɔ nɔ kunuɖeɖedɔ lɔ yí gbekpɔnɔ ji le. Edɔjikpɔha le xexeɛ pleŋ mɛ dɔwaxugan le États-Unis (État de New York). Eyi kpɔnɔ alɔjedɔwaxu ciwo yí le eju vovovowo mɛ dɔwo ji. Woyɔnɔ mɛciwo yí wanɔ dɔ le alɔjedɔwaxuwo mɔ Betɛli xomumɛtɔwo. Shigbe xomu ɖeka mɛ tɔwo hannɛɔ, wonɔnɔ ju yí wanɔ dɔ doju, woɖunɔ nu doju yí gbekplanɔ Bibla doju le ɖekawawa mɛ.​—Ehajiji Wema 133:1.

Ényi texwe vevi ɖeka ci yí lɔnlɔn faa dɔwatɔwo wanɔ dɔ le. Le Betɛli ɖekaɖekaɔ, Kristotɔ ŋsuwo koɖo nyɔnuwo sɔ wowo ɖekiwo na nɔ Mawu dro wawa. Wowanɔ dɔ gashiagamɛ yí sɔ donɔ alɔ Fyɔɖuxu kunuɖeɖedɔ lɔ. (Matie 6:33) Wowo domɛtɔ ɖe dexɔnɔ fɛncu alo wlecikukuho o. Vɔ wonanɔ wo dɔnxu, ŋɖuɖu, koɖo gomɛho viɖeka nɔ woasɔ kpɔ wowo ӡan ɖewo gbɔ. Betɛlitɔwo wanɔ dɔ vovovowo, shigbe mɔ bilo mɛ dɔ, enuɖaɖadɔ, enuɖuxu dradrado, wemawo taxu, wemawo blaxu, xɔmɛ dradrado, enunyanyadɔ, enudradotɔxu, koɖo edɔ buwo.

Ényi texwe ci wodonɔ vevi dɔ le yí sɔ donɔ alɔ Fyɔɖuxu ŋɛnywidradradɔ lɔ. Betɛli ɖeshiaɖe susu vevitɔ yí nyi mɔ Bibla mɛ nyɔnɔnwi lɔ aɖo amɛshiamɛ gbɔ nɔ anya wa. Wemagbaja cɛ, ci yí le eo shi nyi yikpɔwɛ ɖeka. Edɔjikpɔha lɔ yí na emɔdasɛnamɛwo yí woŋwliin, keŋ yí sɔɛ ɖaɖa egbegɔnmɛɖetɔwo gbɛ sanŋdi nɛniɖe le xexeɛ pleŋ mɛ to ɔdinatɛɛ ji yí woɖe gɔnmɛ ni. Le yigoduɔ, wotɛ le mìwo wemataxugan ciwo yí le Betɛli ɖewo keŋ yí sɔɛ ɖaɖa hamɛ ciwo yí wu 110 000. Le akpa ɖeshiaɖe nɔ wematatadɔ cɛɔ, Betɛli xomumɛtɔwo wanɔ akpa vevi le alɔkpekpe do edɔ ci yí ӡan kpata wu nu: edɔ lɔ yí nyi eŋɛnywi lɔ dradra.​—Maki 13:10.

• Miwo yí wanɔ edɔ le Betɛliɔ? Alɔdu ci yí wonanɔ woɔ?

• Edɔ ci yí ӡan kpataɔ? Lé Betɛli ɖekaɖeka donɔ alɔ edɔ cɛ doɔ?

Betɛli xomumɛtɔwo wanɔ edɔ vovovowo yí sɔ donɔ alɔ kunuɖeɖedɔ lɔ le eju ɖeka alo eju sugbɔ mɛ. Edɔ ciwo yí wowanɔ ɖewo yí nyi egbegɔnmɛɖeɖe, wemawo koɖo enyɔdrawemawo tata, wemawo jikpɔkpɔ, enuledokaji (odio) koɖo videowo wawa, koɖo eӡan buwo gbɔ kpɔkpɔ le wowo nyigbanmama mɛ.

Alɔjedɔjikpɔgbɛ yí kpɔnɔ edɔ lɔwo ji. Edɔjikpɔha yí nanɔ emɔdasɛnamɛwo Alɔjedɔjikpɔgbɛ ɖeshiaɖe ci mɛ tɔwo yí nyinɔ hamɛmɛshinshin kpɔnutɔxu amɛtɔn alo ciwo yí atɛnŋ awu ahan. Alɔjedɔjikpɔgbɛ lɔ xonɔ nuxu so lé edɔ lɔ yikɔ do koɖo cukaɖa ciwo yí edokɔ go le yinyigbanmama mɛ nu nɔ Edɔjikpɔha. Enyɔtakankan cɛwo kpenɔ do Edɔjikpɔha lɔ nu nɔ anya enyɔci ciwo nu yí axo nuxo so le mìwo wemawo mɛ, koɖo enu ciwo yí woakpla le mìwo bɔbɔwo koɖo takpekpewo mɛ. Edɔjikpɔha dɔnɔ amɛdɔdɔwo ɖaɖa alɔjedɔwaxuwo nɔ woana emɔdasɛnamɛwo Alɔjedɔjikpɔgbɛwo le wowo dɔwawawo mɛ. (Elododo Wema 11:14) Wowanɔ toto vevi ɖeka ci mɛ yí Edɔjikpɔha mɛdɔdɔ lɔ nanɔ Bibla mɛ nuxu ci yí donɔ ŋsɛn lanmɛ nɔ mɛciwo yí le Alɔjedɔwaxu lɔ nyigbanmama mɛ.

Alɔjedɔjikpɔgbɛ nanɔ mɔdasɛnamɛwo hamɛ ciwo yí le yinyigbanmama mɛ. Nɔvi ciwo yí le agbannɔamɛji nɔxuwo le alɔjedɔwaxu lɔ danashi do hamɛ yoyuwo ɖoɖo ji. Nɔvi cɛwo nanɔ emɔdasɛnamɛwo emɔɖetɔ, eŋɛnywidratɔ ejugodutɔ koɖo ekán lɔ mɛ hamɛwo jikpɔtɔ ciwo yí le Alɔjedɔwaxu lɔ nyigbanmama mɛ tiin. Wowanɔ toto nɔ takpekpewo koɖo takpekpeganwo. Wogbekpɔnɔ Fyɔɖuxuxɔ yoyuwo cucu koɖo wemawo sɔsɔ ɖaɖa hamɛwo ji. Edɔ ciwo pleŋ wowanɔ le alɔjedɔwaxu nanɔ yí kunuɖeɖedɔ lɔ zɔnnɔ do ɖoɖo nu.​—1 Korɛntitɔwo 14:33, 40.

• Kpedonu ci yí Alɔjedɔjikpɔgbɛ nanɔ Edɔjikpɔhaɔ?

• Edɔ ciwo yí wowanɔ le alɔjedɔwaxuɔ?

Nɔ mìatɛnŋ adra “eŋɛnywi” lɔ nɔ “jukɔn ɖeshaɖe, akɔta ɖeshaɖe, egbedodo ɖeshaɖe, koɖo eju ɖeshaɖe[ɔ],” mìwanɔ wema do egbe ciwo yí wu 750 mɛ. (Enyɔdasɛ 14:6) Lé mìwanɔ edɔ gangan cɛ doɔ? Wemaŋwlɛntɔ vovovo ciwo yí le xexeɛ pleŋ mɛ koɖo egbegɔnmɛɖetɔ dovevinuwo lɔdu yí nanɔ mìwɛ ni. Wo pleŋ nyi Yehowa Kunuɖetɔwo.

Ŋlɛshigbe mɛ yí woŋwlɛnnɔ enyɔ lɔ do doŋkɔ. Edɔjikpɔha yí kpɔnɔ Wemaŋwlɛnŋwlɛn Dɔwaxu ji le mìwo dɔwaxugan. Edɔwaxu cɛ yí wanɔ ɖoɖo do wemaŋwlɛntɔ ciwo yí le edɔwaxugan lɔ koɖo alɔjedɔwaxu ɖewo dɔwo nu. Ci yí wemaŋwlɛntɔ lɔwo le eju vovovowo mɛɔ, enanɔ mìwanɔ wema ciwo yí sɔnɔ koɖo eӡan akɔta ɖeshiaɖe mɛ tɔwo tɔ.

Wosɔnɔ wema lɔ mɛ nyɔwo ɖaɖa egbegɔnmɛɖetɔwo. Nɔ wodashi do enuŋwlɛnŋwlɛn lɔwo jiɔ, wosɔnɔ wo ɖaɖa egbegɔnmɛɖetɔ ciwo yí le xexeɛ pleŋ mɛ to ɔdinatɛɛ ji. Egbegɔnmɛɖetɔ lɔwo tenɔ kpɔ yí zannɔ “nyɔnɔnwinyɔ ciwo yí sɔgbe pɛpɛpɛ” yí sɔ ɖenɔ gɔnmɛ nɔ gɔnmɛsese ci teŋ yí le Ŋlɛshigbe mɛ nyɔ lɔ nu do wowo gbe mɛ.​—Ŋununyatɔ 12:10, nwt.

Ɔdinatɛɛwo zanzan nanɔ yí edɔ lɔ sɔnɔ. Ɔdinatɛɛ datɛnŋ anɔ wemaŋwlɛntɔwo koɖo egbegɔnmɛɖetɔwo dumɛ o. Vɔ, toto ciwo yí wowa do ɔdinatɛɛ lɔwo mɛ kpenɔ do wo nu le wowo dɔwo wawa mɛ. Yehowa Kunuɖetɔwo wa ɔdinatɛɛ mɛ toto ci woyɔnɔ mɔ MEPS. Toto cɛ nanɔ yí woŋwlɛnnɔ wema do egbe sanŋdi nɛniɖe mɛ. Égbenanɔ yí enuŋwlɛnŋwlɛnwo koɖo fotowo dodo wema lɔwo mɛ koɖo wowo tata nɔnɔ fafɛɖe.

Nyi yí taɖo mìle egbla gangan cɛwo dokɔ mɔ mìata wemawo do egbe ciwo yí amɛ kotokun hwɛɖeka kpoŋ donɔ mɛɔ? Ðoɔ, Yehowa dro enyi mɔ “wo a hwlɛn amɛwo pleŋ gan. Yí . . . amɛwo pleŋ a jeshi nyɔnɔnwi” lɔ.​—1 Timɔte 2:3, 4.

• Lé woŋlwɛnnɔ mìwo wemawo doɔ?

• Nyi yí taɖo mìɖenɔ mìwo wemawo gɔnmɛ do egbe sugbɔ mɛɔ?

Le exwe ɖeshiaɖe mɛɔ, mìwo habɔbɔ tanɔ Bibla koɖo wema vovovo linlɔn sanŋdi nɛniɖe yí manɔ wo gbali. Mìcunɔ Fyɔɖuxuxɔwo koɖo alɔjedɔwaxuwo yí gbelenɔ bu nɔ wo. Mìgbekpenɔ do Betɛli xomumɛtɔwo, eŋɛnywidratɔ ejugodutɔwo koɖo mɛciwo ji afɔkuwo jɔ do nu. Taŋfuin àbiɔ eo ɖeki se mɔ, ‘Fini mìkpɔnɔ eho so yí wanɔ edɔ cɛwo pleŋ ɔ?’

Mìdexɔnɔ madowo alo jɔnɔ ho le amɛwo shi alo kannɔ eho ɖe koŋ nɔ amɛwo o. Nyɔnɔnwi enyi mɔ mìwo kunuɖeɖedɔ lɔ biɔ eho sugbɔ zanzan, vɔ mìdebiɔnɔ eho mɛɖe o. Ewa exwe sanŋdi ɖeka vayi yɛ yí enyɔdrawema Jutakpɔxɔ amɛvetɔ nu mɔ, mìkandoji mɔ Yehowa yí le godu nɔ mì le edɔ lɔ wawa mɛ. Eyi taɖo “mìdaɖe kuku alo aje kloji nɔ agbetɔwo mɔ wole na eho asɔ kpedo mì nu o.” Le nyɔnɔnwi mɛɔ, mìdewa ahan kpɔ o!​—Matie 10:8.

Lɔnlɔn faa nunana ji mìtonɔ yí wanɔ mìwo dɔwo. Amɛ sugbɔ kpɔnɔ jijɔ so mìwo Bibla nukplakpladɔ lɔ nu, eyi taɖo wonanɔ eho yí sɔ kpenɔ do edɔ lɔ nu. Kunuɖetɔwo ŋtɔ zannɔ wowo gamɛ, wowo ŋsɛn , wowo ho koɖo wowo nunɔamɛshiwo koɖo jijɔ nɔ Mawu dro wawa le nyigban lɔ pleŋ ji. (1 Kronika 29:9, nwt) Le Fyɔɖuxuxɔwo, takpekpewo alo takpekpeganwo mɛɔ, wosɔnɔ dakaviwo danɔ do texwe ɖewo nɔ mɛciwo yí ji mɔ yewoana eho asɔ do mɛ. Woatɛnŋ awa enunana to mìwo siti, jw.org ji. Le nɔnɔmɛ sugbɔtɔ mɛɔ, eho lɔwo sonɔ wamɛnɔ ciwo yí ɖyi kposhu ci Yesu kanfu nywiɖe gbɔ. Kposhu cɛ sɔ ehoga hwɛhwɛ nyɛkwintɔ amɛve do enunana dakavi lɔ mɛ le gbedoxɔ lɔ mɛ. (Luiki 21:1-4) Eyi taɖo amɛshiamɛ atɛnŋ “a sɔ enu do akpo” yí asɔ na “shigbe le hanci é dro eji yitɔ do ɛnɛ.”​—1 Korɛntitɔwo 16:2; 2 Korɛntitɔwo 9:7.

Mìkandoji mɔ Yehowa akpɔtɔ acucukɔ mɛciwo yí ji mɔ yewoa ‘na bubu [yi koɖo wowo] dɔkunuwo’ asɔ donɔ alɔ Fyɔɖuxu dɔwo keŋ nɔ yidro anyi wawa.​—Elododo Wema 3:9.

• Nyi yí taɖo mìwo habɔbɔ lɔ to akpo nɔ sɛnsɛnha kpɛtɛwoɔ?

• Lé wozannɔ lɔnlɔn faa nunana lɔwo doɔ?

Mìyɔnɔ mìwo sɛnsɛnxɔwo mɔ Fyɔɖuxuxɔwo, ɖoɔ Mawu Fyɔɖuxu, ci yí nyi etanyɔ vevitɔ nɔ Yesu kunuɖeɖedɔ nukplamuwo yí mìxɔnɔ le wo mɛ.​—Luiki 8:1.

Wonyi sɛnsɛn adodwitɔ waxuwo. Fyɔɖuxuxɔwo mɛ yí Yehowa Kunuɖetɔwo xɔnɔ mɔdasɛnamɛwo le kudo kunuɖeɖedɔ lɔ nu. (Matie 24:14) Cucumɛ koɖo kloklomɛ nɔ Fyɔɖuxuxɔwo le vovovo, vɔ wonɔnɔ kleŋ. Hamɛ ɖeka alo ciwo yí wu ahan wanɔ bɔbɔ le wo mɛ. Le exwe cɛwo mɛɔ, mìcu Fyɔɖuxuxɔ kotokun nɛniɖe le xexe lɔ pleŋ mɛ (le mama nuɔ, mìcunɔ amatɔn gbeɖeka). Ðoɔ hamɛwo sukɔgbɔ doji. Nyi yí na mìtɛnŋ le edɔ cɛwo wakɔɔ?​—Matie 19:26.

Lɔnlɔn faa nunana toto ɖe koŋ ji woto yí cunɔ wo. Wosɔnɔ eho ciwo yí hamɛ lɔwo jɔ ɖaɖa alɔjedɔwaxu nɔ Fyɔɖuxuxɔ yoyuwo cucu koɖo ebuwo dradrado.

Lɔnlɔn faa dɔwatɔ ciwo yí wodecunɔ fɛn nɔ o yí cunɔ wo. Woɖo Fyɔɖuxuxɔ cugbɛwo le eju sugbɔ mɛ. Exɔcucudɔwatɔ koɖo lɔnlɔn faa dɔwatɔ cɛwo yinɔ hamɛ vovovowo mɛ le eju lɔ mɛ. Woyinɔ kɔxwiwo can mɛ yí kpenɔ do hamɛwo nu yí wocunɔ wowo Fyɔɖuxuxɔwo. Le eju buwo mɛɔ, woɖonɔ Yehowa Kunuɖetɔ ciwo yí nya dɔ nɔ woakpɔ Fyɔɖuxuxɔwo cucu koɖo wowo dradrado dɔwo ji. Vɔ, Yehowa Kunuɖetɔ ciwo yí le fini yí wocukɔ Fyɔɖuxuxɔ lɔ le yí wanɔ edɔ akpa sugbɔtɔ. Yehowa gbɔngbɔn kɔkɔɛ koɖo yimɛ ciwo yí sɔ wowo jiwo pleŋ do edɔ lɔ wawa mɛ yí nanɔ yí mìtɛnŋ wanɔ edɔ lɔ.​—Ehajiji Wema 127:1; Kolosetɔwo 3:23.

• Nyi yí taɖo woyɔnɔ mìwo sɛnsɛnxɔwo mɔ Fyɔɖuxuxɔwoɔ?

• Lé wowɛ yí tɛnŋ le Fyɔɖuxuxɔwo cukɔ le xexe lɔ pleŋ mɛɔ?

Mawu ŋkɔ kɔkɔɛ yí le Yehowa Kunuɖetɔwo Fyɔɖuxuxɔ ɖeshiaɖe nu. Eyi taɖo yí mìsenɔ le mìwo ɖekiwo mɛ mɔ alɔ kpekpe do Fyɔɖuxuxɔwo mɛ dradrado nu nɔ anɔ mɛmiɖe, akɔ yí agbenyakpɔkpɔ, nyi mɔnukpɔkpɔ gangan koɖo mìwo sɛnsɛn kɔkɔɛ kpaxwe vevi ɖeka. Amɛshiamɛ atɛnŋ akpe alɔ do edɔ lɔ wawa nu.

Lɔn faa akpe ashi do Fyɔɖuxuxɔ mɛ dradrado nu le bɔbɔwo godu. Le bɔbɔ ɖeshiaɖe goduɔ, nɔviŋsuwo koɖo nɔvinyɔnuwo kplɔnɔ Fyɔɖuxuxɔ lɔ mɛ koɖo jijɔ. Zeɖeka le kwɛshila alo wleci ɖeshiaɖe mɛɔ, wodranɔ Fyɔɖuxuxɔ lɔ pleŋ mɛ do nywiɖe. Hamɛmɛshinshin alo sumɔsumɔdɔwatɔ ɖeka zɔnnɔ do emɔdasɛnamɛ ɖe koŋ ji yí sɔ kpɔnɔ edɔ lɔwo wawa ji. Le eӡan ciwo yí li nuɔ, mɛɖewo kplɔnɔ exɔ lɔ mɛ alo yí cucunɔ nyigban, mɛkpɔnniwo koɖo flɛsɛwo. Wocucunɔ ӡinkpinwo yí gbetonɔ wo, woɖenɔ ɣeɣiɖɔwo. Woklɔnɔ adaduwo koɖo ɖyiɖɔɖɔxuwo, yí gbedranɔ gbadenu do hɛnnɛ. Le exwe ɖeshiaɖe mɛɔ, wosɔnɔ azan ɖeka koŋ yí sɔ dranɔ Fyɔɖuxuxɔ ɖeshiaɖe mɛ do nywiɖe wu. Nɔ mìwanɔ edɔ cɛwo koɖo mìwo viwoɔ, mìkplakɔ bubudodo mìwo sɛnsɛnxɔwo nu wo.​—Ŋununyatɔ 5:1, nwt.

Kpe alɔ do edɔ ɖeshiaɖe wawa ci yí ӡan nu. Wowa ɖoɖo yí kpenɔ ŋkuvi do Fyɔɖuxuxɔ lɔ pleŋ nu nywiɖe le exwe ɖeshiaɖe mɛ. Ecɛ nanɔ mɔ wodranɔ enu kleŋkleŋ ciwo yí danahɛn do le Fyɔɖuxuxɔ lɔ nu. Edɔ cɛ wawa nanɔ mɔ, degbevaӡannɔ mɔ woazan eho sugbɔ do ayamɛ asɔ dra enu ganganwo do o. (2 Kronika 24:13; 34:10, nwt) Fyɔɖuxuxɔ ci yí le mɛmiɖe nyi texwe ci yí sɔ nɔ mìwo Mawu sɛnsɛn. Nɔ mìkpe ashi do edɔ cɛ wawa nuɔ, mìdanasɛ mɔ mìlɔn Yehowa yí mìwo sɛnsɛnxɔwo nyi enu vevi nɔ mì. (Ehajiji Wema 122:1) Wana cɛwo wanɔ dɔ do amɛwo ji le ekɔ lɔ mɛ.​—2 Korɛntitɔwo 6:3.

• Nyi yí taɖo ele mɔ mìale be nɔ mìwo sɛnsɛnxɔɔ?

• Ðoɖo ciwo yí wowa nɔ Fyɔɖuxuxɔ ɖeshiaɖe anɔnɔ mɛmiɖeɔ?

Ajɔ ji nɔ eo mɔ yeawa numɛkuku nɔ ao Bibla mɛ shijeje asugbɔ dojia? Èji nɔ mɔ yease Mawu Nyɔ kpukpui ɖe gɔnmɛ alo ajeshi amɛ ɖe, texwe ɖe alo enubu ɖe ci nu Bibla xo nuxu soa? Alo èbukɔ tamɛ kpɔ so lé Mawu Nyɔ atɛnŋ akpedo eo nu nɔ nàkpɔ ao cukaɖa ɖe gbɔa? Nɔ enyi ahan ɔ, yi Fyɔɖuxuxɔ mɛ wemadadoxu keŋ awa numɛkuku.

Àkpɔ wema vovovo ciwo mɛ àku nu mɛ le. Enyi nyɔnɔnwi mɔ Bibla nukplawemawo pleŋ ci yí Yehowa Kunuɖetɔwo ta dele ao gbe mɛ o. Vɔ, wema sugbɔtɔ ciwo yí woɖeti le exwe cɛwo mɛ le Fyɔɖuxuxɔ mɛ wemadadoxu. Àtɛnŋ akpɔ Bibla gɔnmɛɖeɖe vovovowo, enyɔgɔnmɛɖewema nywi koɖo numɛkukuwema buwo le mɛ. Àtɛnŋ azan wemadadoxu cɛ doŋkɔ nɔ bɔbɔ lɔwo alo le wowo godu faa. Nɔ ɔdinatɛɛ le nɔɔ, Watchtower Library dɔwanu atɛnŋ ale ji. Ɔdinatɛɛ toto cɛ ci mɛ mìwo wemawo sugbɔ le zan, atɛnŋ akpedo eo nu nɔ nàji enyɔci, enyɔ ɖe alo Mawu Nyɔ kpukpui ɖe le ji bɔbɔɛɖe.

Yizanzan kpenɔ do Agbenɔnɔ koɖo sumɔsumɔdɔ bɔbɔ sukluviwo nu. Zan Fyɔɖuxuxɔ mɛ wemadadoxu lɔ nywiɖe nɔ èdrakɔ ao dɔwo do. Agbenɔnɔ koɖo sumɔsumɔdɔ bɔbɔ totowo jikpɔtɔ yí kpɔɛni ji. Éna wosɔnɔ wema yoyu ciwo yí to donɔ mɛ yí wogbeɖonɔ wo nywiɖe. Eyɛ alo mɛci yí kplakpla Bibla koɖo eo akpedo eo nu nɔ nàkpɔ enyɔci ciwo èjikɔ. Ele ahan gan, wodeɖe mɔ nɔ mɛɖe yí asɔ wema ɖe yi axomɛ o. Anyɔ mɔ mìale bu nɔ wema lɔwo nywiɖe yí mìdaŋwlɛn enu do wo mɛ o. 

Bibla nu mɔ gbɔxwe “[mì]akpla enu so Mawu nu nyɔnɔnwitɔ[ɔ],” mìɖo aɖo edro aku nu mɛ so nu “shigbe dɔkunu ci yí wo wla ɛnɛ.” (Elododo Wema 2:1-5) Fyɔɖuxuxɔ mɛ wemadadoxu atɛnŋ akpedo eo nu yí nàtɔ numɛkuku lɔ ji.

• Numɛkuku dɔwanu ciwo yí le Fyɔɖuxuxɔ mɛ wemadadoxu ci àtɛnŋ azan ɔ?

• Miwo yí atɛnŋ akpedo eo nu nɔ nàzan wemadadoxu lɔ nywiɖeɔ?

Yesu nu nɔ yidokplɔtɔwo mɔ: “mí nanɔ míwo klɛnklɛn a jenɔ ezo le ŋkɔ nɔ agbetɔwo, nɔ wo a kpɔ míwo wana nywiwo nɔ wo a kanfu míwo Da Mawu ci yí le jeŋkwi mɛ.” (Matie 5:16) Nɔ atɛnŋ anyi ahan ɔ, mìzankɔ mashinniɖaŋnunya ciwo yí li le egbɛmɛ, shigbe mɔ Ɛntɛnɛti nɛ. Mìwo nyɔtakankandadoxu, jw.org ji yí mìsɔnɔ enyɔtakankan ciwo yí kudo mìwo dɔwo koɖo mìwo jixɔsewo nu danɔ do. Nyiwo yí le jiɔ?

Àkpɔ ɖoŋci nɔ Bibla mɛ nyɔbiɔse veviwo. Àtɛnŋ akpɔ ɖoŋci nɔ enyɔbiɔse vevitɔ ciwo yí amɛwo biɔnɔ se. Le kpɔwɛ mɛ trakti ciwo yí nyi Efunkpekpewo ava vɔ gbeɖekaa? Koɖo Amɛ kukuwo agbeva nɔ agbe le nyigban ji kea? le Siti lɔ ji le egbe ciwo yí wu 600 mɛ. Àtɛnŋ agbekpɔ Bibla Xexe Yeye Gɔmɛɖeɖe le egbe ciwo yí wu 130 mɛ. Bibla nukplawema sugbɔ ciwo mɛ Nyi yí Bibla kpla mìɔ?, Jutakpɔxɔ koɖo Nyɔ! le, can le Siti lɔ ji. Woatɛnŋ ahlɛn alo ase akpa sugbɔtɔ nɔ wema cɛwo le Ɛntɛnɛti ji. Àgbetɛnŋ awa kɔpi nɔ wo do MP3, PDF alo EPUB nɔnɔmɛ mɛ. Àtɛnŋ agbewa kɔpi ɖewo nɔ mɛciwo yí sɔnɔ eɖe le nyɔnɔnwi lɔ mɛ le wowo ŋtɔwo gbe mɛ! Tokunɔgbe mɛ videowo can li. Àtɛnŋ awa kɔpi nɔ Bibla mɛ nujɔjɔ hlɛndokajiwo, Bibla mɛ nukpɔkpɔsɔkplanuwo koɖo ehaxoxo vivi ciwo yí donɔ jijɔ nɔ amɛ.

Àkpɔ enyɔtakankan ciwo yí sɔgbe pɛpɛpɛ kudo Yehowa Kunuɖetɔwo nu. Wosɔnɔ enyɔtakankan yoyuwo koɖo video ciwo yí kudo mìwo dɔ nu le xexeɛ pleŋ mɛ donɔ Siti lɔ ji. Yehowa Kunuɖetɔ ciwo ji afɔkuwo jɔ do koɖo egbla ciwo mìdonɔ yí kpenɔ do wo nu can le ji. Àtɛnŋ akpɔ takpekpe ciwo yí gbɔgbɔ totowo koɖo mìwo lɔjedɔwaxu adrɛsiwo le ji.

To emɔ cɛwo jiɔ, mìna nyɔnɔnwi lɔ klɛnkɔ do afishiafi le nyigban lɔ pleŋ ji. Amɛ ciwo yí so eju vovovo ciwo mɛ Antartika nyigbanwo can le, kpɔkɔ nyɔna so eŋɛnywi lɔ mɛ. Mìdokɔ gbeɖaɖa mɔ Yehowa Nyɔ lɔ le “ɖeblɛ a gban kpedo” nyigban lɔ pleŋ ji nɔ Mawu kanfukanfu.​—2 Tɛsalonikitɔwo 3:1.

• Lé jw.org kpekpeɛ do amɛ sugbɔ nu yí wokplakɔ Bibla mɛ nyɔnɔnwi lɔɔ?

• Nyi yí àji mɔ yeajikpɔ le mìwo nyɔtakankandadoxu lɔɔ?