Матфейдиҥ сӱӱнчилӱ јары
24 Иисус ӧргӧӧнӧҥ чыгып јадарда, ӱренчиктери ого ӧргӧӧниҥ тураларын кӧргӱзерге, базып келдилер. 2 Ол ӱренчиктерине айтты: «Мыныҥ ончозын кӧрӱп туругар ба? Чынын айдадым слерге: мында таш ӱстине таш артпас, ӱзе јемирилип калар».
3 Иисус Маслиналарлу кырда отурарда, ӱренчиктери ого базып келеле, сурадылар: «Бу ӱзе неме качан болор? Једип келгениҥди ле бу телекейдиҥ учы јууктап келеткенин недеҥ билип ийерис?»
4 Иисус олорго айтты: «Калак, тӧгӱндедип койдоор, 5 нениҥ учун дезе кӧп улус мениҥ адымнаҥ келип: „Мен Христос“ — деп айдыжар. Кӧп улус олордыҥ тӧгӱнине кирер. 6 Башка-башка јерлерде јуу-согуштар болуп турганын угараар. Је слер коркыбагар, нениҥ учун дезе бу ӱзе неме болор учурлу, је оноҥ до ӧскӧ немелер болор.
7 Албаты албатыга удура чыгар, бир ороон ӧскӧ ороонго удура чыгар, башка-башка јерлерде јер силкинер ле ачана-торо болор. 8 Је оноҥ до ӧскӧ кӱчтер болор.
9 Ол ӧйдӧ слерди истежер, ӧлтӱрер, бастыра албатылар мениҥ адым учун слерди јаман кӧрӧр. 10 Кӧп улус Кудайга бӱтпей барар, бой-бойын садыжып, јаман кӧрӱжер. 11 Кӧп тӧгӱн судурчылар табылар, кӧп улус олордыҥ тӧгӱнине кирер. 12 Јаман керектер кӧптӧгӧнинеҥ улам кӧп саба улус бой-бойын сӱӱбей барар. 13 Је учына јетире чыдашканы дезе тирӱ артар. 14 Бастыра јердиҥ ӱстинде, ончо албатыларга угулзын деп, Кудайдыҥ Башкарузы керегинде сӱӱнчилӱ јар јарлалар, ол тушта бу телекей јоголор.
15 Даниилдиҥ судурлаганыла, јоголтыш экелип турган јескинчилӱ неме агару јерде турар (кычырып јаткан кижи оҥдоп ийзин). Мыны кӧрӱп ийзеер, 16 Иудей јериндеги улус кырларга качсын. 17 Тураныҥ ӱстинде кижи айлынаҥ нени-нени аларга болуп тӱшпезин. 18 Кырада иштенип јаткан кижи кийим-тудумын аларга болуп јанбазын. 19 Ол кӱндерде карынду ӱй улуска ла бала эмизип турган ӱй улуска коркышту кӱч болор. 20 Кышкыда эмезе суббот кӱнде качар керек болбозын деп мӱргӱгер. 21 Нениҥ учун дезе ол ӧйдӧ, кижи јайалганынаҥ бери качан да болбогон, улу тӱбек болор. Андый тӱбек база качан да болбос. 22 Ол ӧй кыскартылбаза, кем де аргадалып болбос, је талдалган улуска болуп ол ӧй кыскартылар.
23 Улус слерге: „Христос мында!“ эмезе „Анда!“ — деп айдышса, бӱтпегер. 24 Нениҥ учун дезе бойын Христос деп аданып турган улус ла тӧгӱн судурчылар табылар. Олор кайкамчылу керектер эдип, талдалган улусты да тӧгӱндеерге албаданар. 25 Мен слерге бу керегинде озодоҥ айдып саларга турум. 26 Айдарда, оны чӧл јерде јӱрӱ дешсе, ары барбагар. Эмезе оны јажытту јерде јӱрӱ дешсе, бӱтпегер. 27 Нениҥ учун дезе кижи Уулыныҥ једип келгени кӱнчыгыштаҥ ала кӱнбадышка јетире јаркындалган јалкындый болор. 28 Кайда сӧӧк јадар, анда мӱркӱттер јуулыжар.
29 Улу тӱбектиҥ кийнинеҥ ле кӱн караҥуйлай берер, ай јарытпай барар, јылдыстар теҥеринеҥ тӧгӱлер, теҥериниҥ кӱчтери силкинер. 30 Ол тушта теҥериде кижи Уулы кӧрӱнип келер, ончо албатылар оны кӧрӧлӧ, ачу-коронго алдырып, тӧжине согынар. Олор булуттардыҥ ӱстиле кижи Уулын ийде-кӱчиле, улу магыла келеткенин кӧрӱп ийгилеер. 31 Амыргыныҥ тыҥ табыжы угулза, ол, ак-јарыктыҥ тӧрт толыгынаҥ, теҥериниҥ бир учынаҥ база бир учына јетире талдалгандарды јууп алзын деп, ангелдер ийер.
32 Инжирдиҥ агажын сананып кӧрӱгер. Оныҥ јаҥы ӧскӧн јаш будактарында јалбырактар ӧзӱп келзе, јайдыҥ јууктап келгенин билип ийедеер. 33 Анайып ла мыны ӱзе кӧрӱп ийзеер, кижи Уулыныҥ једип келгенин, эжиктиҥ јанында турганын, билип ийереер. 34 Чынын айдадым слерге: бу ӱйе ӧткӧлӧктӧ, мыныҥ ончозы бӱдӱп калар. 35 Јер ле теҥери јоголып калар, је мениҥ сӧстӧрим јоголбос.
36 Ол кӱнди ле саатты кем де билбес: теҥеридеги ангелдер де, Уулы да билбес, оны јӱк ле Ада билер. 37 Нойдыҥ ӧйи кандый болгон, кижи Уулыныҥ једип келер ӧйи андый ок болор. 38 Чайык чыгар кӱндердиҥ алдында, Ной ковчегке кирердиҥ киргенче, улус ичип-јип, кижи алары алып, кижиге барары барып турган. 39 Олор чайык чыгып, ончозын кырганча, нени де сананбай јӱргендер. Кижи Уулыныҥ келген ӧйинде андый ла ок болор. 40 Ол тушта кырада јӱрген эки кижиниҥ бирӱзин алып баргылаар, бирӱзин дезе артырып койгылаар. 41 Эки ӱй кижи аш теермендеп јатса, бирӱзин алып баргылаар, бирӱзин дезе артырып койгылаар. 42 Айдарда, ойгу болугар, нениҥ учун дезе Кайраканаар кандый кӱнде келерин билбезигер.
43 Сананып кӧрӱгер: уурчы качан келерин айылдыҥ ээзи билген болзо, уйуктабас та эди, оны айылына кийдирбес те эди. 44 Оныҥ учун слер де белен болугар: кижи Уулы сакыбаган ӧйдӧ келер.
45 Јалчыларды башкарып, олорго ӧйинде курсак берип турзын деп, айылдыҥ ээзи тургускан бӱдӱмјилӱ ле керсӱ кул кем болотон? 46 Айылдыҥ ээзи келип, кулыныҥ анайда эдип јӱргенин кӧрзӧ, бу кул ырысту. 47 Чынын айдадым слерге: айылдыҥ ээзи оны ончо јӧӧжӧзин башкаратан кижи эдип тургузар.
48 Бу кул јаман кижи болуп: „Бийим оройтып јат“— деп сананала, 49 ӧскӧ кулдарды согуп, аракызактарла ичип-јип баштаза, 50 айылдыҥ ээзи сакыбаган кӱнде ле сакыбаган саатта једип келер. 51 Ол бу кулды кату каруузына тургузып, эки јӱстӱлер ташталган јерге таштап ийер. Анда ый-сыгыт ла тиш кыјырты болор.