Матфейдиҥ сӱӱнчилӱ јары
20 Теҥеридеги Башкару айылдыҥ ээзине тӱҥей. Ол эрте таҥла виноград отургыскан јерине ишчилер таап аларга чыккан. 2 Ишчилерле кӱнине бир дина́рий тӧлӧӧр деп куучындажала, олорды виноградына ийди. 3 Оноҥ ол эртен тура тогус саат киреде* чыгала, иш јок турган улусты кӧрӱп ийди. 4 Айылдыҥ ээзи олорго айтты: „Слер де барып, мениҥ виноградыма иштенигер. Мен слерге тӧлӧп берерим“. 5 Олор јӧпсинеле, бардылар. Оноҥ айылдыҥ ээзи он эки саат ла ӱч саат киреде* база ла чыгып, ишчилер кычырды. 6 Оноҥ беш саат киреде* чыгала, база да ишчилерди кӧрӱп ийди. Айылдыҥ ээзи олордоҥ сурады: „Кере тӱжине иш јок не турганаар?“ 7 Олор: „Бисти кем де јалдабаган“ — деерде, айылдыҥ ээзи: „Слер де мениҥ виноградыма барыгар“ — деп айтты.
8 Эҥирде виноградтыҥ ээзи болушчызына айтты: „Ишчилерди кычырып, акчазын тӧлӧп бер: озо калганчы келгендерине, оноҥ баштапкы келгендерине“. 9 Эҥирдиҥ беш саадынаҥ ала иштеген улус келип, бир динарийдеҥ алды. 10 Оныҥ учун озо келген ишчилер олордоҥ кӧп аларыс деп сананган, је олор до бир динарийдеҥ алгандар. 11 Акчазын алала, олор комыдажып, 12 айылдыҥ ээзине айттылар: „Бу улус бир ле саат иштеген, бис дезе изӱде кере тӱжине иштееристе, сен биске олорго ло чылап бир динарий тӧлӧдиҥ!“ 13 Айылдыҥ ээзи олордыҥ бирӱзине айтты: „Најым, мен сени тӧгӱндебей јадым. Бис бир динарийге куучындашкан эмес бедис? 14 Бойыҥдыйын алала, бар. Је калганчы келген улуска мен сеге ле чилеп тӧлӧӧргӧ јадым. 15 Кемге канчаны берерин мен бойым кӧрӧр јаҥду эмезим бе? Эмезе јалакай болгоныма сен кӱйӱнип тургаҥ ба?“ 16 Анайып калганчы келгендер баштапкы болор, баштапкы келгендер калганчы болор».
17 Иерусалим барып јадала, Иисус 12 ӱренчигин туура апарып, айтты: 18 «Бис Иерусалим барып јадыс. Анда кижи Уулы абыстардыҥ јаандарына ла јасактыҥ ӱредӱчилерине берилер. Олор оны ӧлӱмге јаргылап, 19 ӧскӧ албатылардыҥ улузына берип ийер. Бу улус дезе ого каткырыжар, оны камчылаар, учы-учында тӧҥӧшкӧ кадап, ӧлтӱрип салар. Је ӱчинчи кӱнде ол тирилип келер».
20 Мыныҥ кийнинде Иисуска Зеведейдиҥ уулдарыныҥ энези уулдарыла кожо базып келеле, тизеленип, та нени де сураарга турды. 21 Иисус айтты: «Нени сураарга туруҥ?» Ӱй кижи каруу берди: «Башкарууҥда мениҥ уулдарымныҥ бирӱзи сениҥ оҥ јаныҥа отурар деп, база бирӱзи сол јаныҥа отурар деп сӧзиҥ бер». 22 Ол каруу берди: «Слер нени сурап турганаарды билбей јадыгар. Мениҥ ичер айагымды слер ичип болороор бо?» — деерде, олор: «Эйе» — дедилер. 23 Иисус айтты: «Мениҥ айагымнаҥ слер ичереер, је кемди сол јанына, кемди оҥ јанына отургызарын талдаар јаҥ менде јок. Бу јерлерди Адам кемдерге белетеген, олор ло отурар».
24 Мыны арткан 10 ӱренчик угуп ийеле, бу эки карындашка ачына бергендер. 25 Иисус олордыҥ ончозын бойына кычырала, айтты: «Албатылардыҥ башчылары ла улу јаҥдулары улусты бийлеп турганын билеригер. 26 Је слердиҥ ортогордо андый неме болбос учурлу. Эҥ јааны болорго турганы слерге јалчы болор учурлу, 27 баштапкы болорго турганы слерге кул болор учурлу. 28 Нениҥ учун дезе кижи Уулы да улусты јалчы эдип аларга эмес, карын улуска јалчы болорго ло кӧп улус учун јӱрӱмин толынты эдип берерге келген».
29 Мыныҥ кийнинде олор Иерихонноҥ јӱрӱп јадарда, олорды ээчий кӧп улус барган. 30 Јолдыҥ јанында эки сокор кижи отурды. Олор бу јолло Иисустыҥ барып јатканын угуп ийеле, кыйгырыжа бердилер: «Кайракан, Давидтиҥ Уулы, бисти килезеҥ!» 31 Олорды улус кыйгырбазын деп токтодып турарда, олор оноҥ тыҥ кыйгырып турдылар: «Кайракан, Давидтиҥ Уулы, бисти килезеҥ!» 32 Иисус токтой береле, олорды бойына кычырып, сурады: «Слерге нени эдип берейин?» 33 Олор каруу бердилер: «Кайракан, кӧстӧрис кӧрӱп баштазын». 34 Иисус олорды килеп, кӧстӧрине тийип ле ийерде, олордыҥ кӧстӧри ачылып, оны ээчий бардылар.