Матфейдиҥ сӱӱнчилӱ јары
15 Мыныҥ кийнинде Иисуска Иерусалимнеҥ фарисейлер ле јасактыҥ ӱредӱчилери келип, айттылар: 2 «Нениҥ учун сениҥ ӱренчиктериҥ алдынаҥ бери јаҥдаган чӱм-јаҥдарды бӱдӱрбей турган? Темдектезе, олор ажанар алдында колдорын јунбайдылар*».
3 Иисус олорго айтты: «А слер нениҥ учун бойоордыҥ чӱм-јаҥдараарга болуп, Кудайдыҥ јасактарын бузуп јадаар? 4 Темдектезе, Кудай: „Ада-энеҥди тооп јӱр“ — деп айткан. Анайда ок „Ада-энезин каргап* турган кижини ӧлтӱрип салар керек“ — деп айткан. 5 А слер айдып јадыгар: „Адазына эмезе энезине: ‚Слерге берерге турганымды Кудайга береечи болгом‘ — деп айткан кижи 6 ада-энезин тообос* аргалу“. Анайып, слер бойоордыҥ чӱм-јаҥдараарга болуп, Кудайдыҥ айтканын керекке албай јадыгар. 7 Эки јӱстӱлер, слер керегинде судурчы Иса́йя чын айткан: 8 „Бу улус мени јӱк тилиле тооп јат, је олордыҥ јӱреги менеҥ ыраак. 9 Олор меге калас бажырып јат, нениҥ учун дезе олор кижи сананып тапкан јасактарга ӱредет“». 10 Мынайып айдала, Иисус улусты бойына кычырып айтты: «Мени угуп, оҥдоп алыгар: 11 кижини ооско киргени эмес, је оостоҥ чыкканы киртидет».
12 Мыныҥ кийнинде ӱренчиктер Иисуска базып келеле, сурадылар: «Сениҥ сӧстӧриҥ фарисейлерди ачындырып салды деп билериҥ бе?» 13 Иисус айтты: «Теҥеридеги Адам отургыспаган ӧлӧҥ тазылыла кожо кодорылып ташталар. 14 Олорго тийбегер. Олор — сокор башчылар. Сокорды сокор кижи апарза, экӱлези орого тӱжер. Олорго тийбегер. Олор — кӧс јок башчылар. Кӧс јокты кӧс јок кижи апарза, экӱлези орого тӱжер». 15 Пётр сурады: «Нени айдарга турганыҥды јартап берзеҥ». 16 Иисус айтты: «Слер де эмдигенче оҥдобой турганаар ба? 17 Ооско кирген кандый ла неме ич-карынды ӧдӧлӧ, тыштына чыгып турганын слер билбезигер бе? 18 Је оостоҥ чыкканы јӱректеҥ чыкканы болот. Шак ла бу неме кижини киртидет. 19 Анайып, јӱректеҥ кинчектӱ санаалар чыгат. Бу санаалардаҥ улам кижи кейтиир*, балыр јӱрӱм јӱрер, кижи ӧлтӱрер, уурданар, тӧгӱндеер, јаман сӧстӧр айдар. 20 Айдарда, кижини колын јунбай курсак јигени эмес, је шак ла бу немелер киртидет».
21 Анаҥ Иисус Тир ле Сидонныҥ јерлерине јӱре берген. 22 Ого Финики́янаҥ бир ӱй кижи келип, јайнай берди: «Кайракан, Давидтиҥ уулы, мени килезеҥ. Кызыма кӧрмӧстӧр кирип калган, ол тыҥ шыралап јат». 23 Је Иисус ого неме айтпады. Ол тушта ӱренчиктери ого базып келеле, сурадылар: «Бу ӱй кижини јӱрзин деп айтсаҥ, оноҥ ӧскӧ ол бистиҥ кийнистеҥ кыйгырып ла божобой јат». 24 Иисус ол ӱй кижиге айтты: «Кудай мени бастыра улуска эмес, је јӱк ле Израильдиҥ јылыйып калган койлорына ийген». 25 Ӱй кижи ого базып келеле, тизеленип, сурады: «Кайракан, меге болушсаҥ!» 26 Иисус ого айтты: «Балдардыҥ калажын алала, кӱчӱктерге бербей јат». 27 Ӱй кижи: «Эйе, Кайракан. Је кӱчӱктер де ээлериниҥ столынаҥ тӱшкен калаштыҥ оодыгын јип јадылар» — деди. 28 Иисус ого айтты: «Сениҥ бӱдӱмјиҥ кандый тыҥ! Кӱӱнзеп турганыҥ бӱдӱп калзын». Ол ло тушта оныҥ кызы јазыла берди.
29 Иисус анаҥ јӱре береле, Галилей талайга келип, кырга чыгала, отурып алды. 30 Ого ал-камык улус келген. Олор аксак, кенек, сокор, тил јок ло оноҥ до ӧскӧ ооруларлу кӧп улусты экелип, Иисустыҥ буды алдына салып турдылар. Иисус олорды јазып турды. 31 Албаты сокор улустыҥ кӧрӱп турганын, тил јок улустыҥ куучындап турганын, кенек улустыҥ су-кадык болуп калганын ла аксак улустыҥ базып турганын кӧрӧлӧ, кайкап, Израильдиҥ Кудайын мактап турды.
32 Иисус бойына ӱренчиктерин кычырала, айтты: «Бу улусты кӧрӱп, ичим ачыйт, олор мениле кожо ӱч кӱн болды, јиир курсагы јок. Јолой олордыҥ кӱчи чыгар, оныҥ учун олорды ажандырбай божодор кӱӱним јок». 33 Је ӱренчиктери ого айтты: «Бу улус јок јерде ал-камык албатыны азырайтан калашты кайдаҥ алатан?» 34 Иисус сурады: «Слерде канча кире калаш бар?» — «Јети болчок калаш ла бир эмеш балык бар» — деп, олор айттылар. 35 Иисус улусты јерге отурып алзын дейле, 36 бу јети болчок калашты ла балыкты алып, Кудайга быйанын айтты. Оноҥ калашты сындырып, оны ӱренчиктерине берди, ӱренчиктери дезе улуска ӱледи. 37 Ончо улус тойо ажанып алдылар. Арткан-калган калашты јууп ийерде, јети јаан корзина чыкты. 38 Ажанган улустыҥ тоозы, ӱй улусты ла балдарды тоого албаза, 4 000 эр кижи болгон. 39 Иисус улусты јандырып ийеле, кемеге отурып, Магадан деп јерге атанды.