Матфейдиҥ сӱӱнчилӱ јары
28 Суббот кӱн ӧдӧ берерде, эртезинде* таҥла, Мария Магдалина ла база бир Мария сӧӧк салган јерди кӧрӧргӧ келдилер.
2 Анда тыҥ јер силкинген, нениҥ учун дезе теҥеринеҥ Иегованыҥ ангелы тӱжӱп келген. Ол сӧӧк салар јерди бӧктӧп салган ташты туура јылдырып, оныҥ ӱстине отурып алган. 3 Ангелдыҥ бӱдӱми јалкындый болгон, кийими дезе кардый ак болгон. 4 Оны кӧргӧн каруулчыктар тыҥ коркыганынаҥ тыркыражып, тым тура бердилер.
5 Ангел ӱй улуска айтты: «Коркыбагар. Тӧҥӧшкӧ кададып ӧлтӱрткен Иисусты бедиреп турганаарды билерим. 6 Ол мында јок, тирилип калган. Бойыныҥ тирилери керегинде ол айткан болгон. Јууктай базып, оныҥ сӧӧги јаткан јерин кӧрӱгер. 7 Ол тирилип калган деп, оныҥ ӱренчиктерине тӱргедеп, јетирип барыгар. Олорго айдыгар: „Ол слерди Галилей јеринде сакыыр. Оны анда кӧрӧригер“. Мен слерге мыны айдарга келдим».
8 Ӱй улус коркып та калган болзо, је сӧӧк салган јердеҥ меҥдеп чыгала, Иисустыҥ ӱренчиктерине ӱзе немени куучындап берерге, сӱрекей сӱӱнип, јӱгӱре бердилер. 9 Олор барып јадарда, кенетийин олорго Иисус туштап, јакшылажып ийди. Ӱй улус ого базып келеле, оныҥ будынаҥ тудуп, бажырып ийдилер. 10 Иисус айтты: «Коркыбагар! Барып, карындаштарымды Галилей јерине барзын дегер. Олор мени анда кӧргӱлеер».
11 Ӱй улус јолой барып јатканча, каруулчыктардыҥ кезиги калага барып, абыстардыҥ јаандарына не болгонын ӱзе куучындап бердилер. 12 Абыстардыҥ јаандары аксагалдарла кожо јӧптӧжӧлӧ, јуучылдарга кӧп мӧҥӱн акча берип, 13 айттылар: «Улуска: „Бис тӱнде уйуктап јадарыста, оныҥ ӱренчиктери келип, Иисустыҥ сӧӧгин уурдап апардылар“ — деп айдыгар. 14 Бу табыш башчыга угула берзе, санааркабагар, бис бойыс ӱзе јартап берерис». 15 Јуучылдар акчаны алала, олордыҥ айтканыла эдип салды. Бу куучын еврейлердиҥ ортозында эмдигенче таркадылат.
16 Иисустыҥ айтканыла, 11 ӱренчик Галилей јериндеги кырга бардылар. 17 Иисусты кӧрӱп ийеле, ончозы ого бажырып ийдилер. Је олордыҥ кезиги бу чын ла Иисус па деп алаҥзып турдылар. 18 Иисус базып келеле, олорго айтты: «Теҥериде де, јерде де ончо јаҥ меге берилген. 19 Оныҥ учун барыгар, ончо калыктарда ӱренчиктер белетегер. Олорды Аданыҥ, Уулыныҥ ла агару тынныҥ адыла сууга чӧҥӱрип, 20 слерге јакарганымды ончозын бӱдӱрерге ӱредигер. Мен дезе бу телекей тӱгенгенче, кажы ла кӱн слерле кожо болорым».