Матфейдиҥ сӱӱнчилӱ јары
2 Иисус Иудей јериндеги Вифлеемде чыккан. Ол ӧйдӧ И́род* каан башкарган. Канча да ӧйдиҥ бажынаҥ Иерусалим дӧӧн Кӱнчыгыштаҥ неме билер улус* келген. 2 Олор сурадылар: «Иудейлердиҥ јаҥы чыккан кааны кайда? Кӱнчыгышта болорыста, биске оныҥ јылдызы кӧрӱнген, оныҥ учун ого бажырып ийерге келдис». 3 Мыны угала, Ирод коркый берген, оныла кожо бӱдӱн Иерусалим коркый берди. 4 Ол абыстардыҥ јаандарын ла јасак билетен улустыҥ ончозын јууйла, Христостыҥ* кайда чыгар болгонын сурап уккан. 5 Олор айдышты: «Иудей јериндеги Вифлеемде деп, судурчы бичиген јок беди: 6 „Иудей јериндеги Вифлеем, сен Иудеяныҥ башчыларыныҥ кӧзинде андый ла уйан эмезиҥ. Сенеҥ Израиль албатымды кабыратан башчы чыгар“».
7 Ирод јаан табыш этпей, неме билер улусты бойына алдырала, јылдыстыҥ качан кӧрӱнип келгенин билип алган. 8 Олорды Вифлеем јаар ийип, айтты: «Барала, баланы табып алыгар. Таап алзаар, меге тил јетиригер. Мен база барып, ого бажырайын». 9 Неме билер улус каанды угала, јӱрӱп ийдилер. Кӱнчыгышта кӧрӱнген байагы јылдыс олордыҥ алдына барып јатты, оноҥ дезе баланыҥ айылыныҥ ӱстине једеле, токтой берди. 10 Јылдыстыҥ токтой бергенин кӧрӱп ийеле, олор тыҥ сӱӱндилер. 11 Турага кирип келерде, анда бала ла оныҥ энези, Мария, болды. Олор тизеленип, балага бажырала, ого сыйлар берди: алтын, ладан ла мирра. 12 Кудай олорго тӱш јеринде И́родко барбазын деп айткан, оныҥ учун олор бойыныҥ јерине ӧскӧ јолло јандылар.
13 Ол улус јӱре берерде, Иосифке тӱш јеринде Иегованыҥ ангелы келип, айтты: «Баланы ла оныҥ энезин алып, Египет јаар качып бар. Ирод баланы ӧлтӱрерге турган, оныҥ учун сени кел деп айтпаганчам, анда јӱр». 14 Ол ло тӱнде Иосиф баланы ла Марияны алып, Египет јаар јӱрӱп ийди. 15 Анда ол Ирод божогончо јӱрди. Анайып судурчы ажыра Иегованыҥ: «Мен уулымды Египеттеҥ алдыргам» — деп айтканы бӱтти.
16 Ирод неме билер улустыҥ оны тӧгӱндеп ийгенин билип ийеле, атыйлана берди. Ол Вифлеемде ле оныҥ јанындагы јерлерде эки јаштаҥ ашкалак уул балдарды ончозын ӧлтӱрип салзын деп јакарды. (Бала эки јаштаҥ ашкалак болор деп, Ирод неме билер улустыҥ айтканынаҥ оҥдоп алган.) 17 Анайып Иеремия ажыра судурлалганы бӱдӱп калды: 18 «Ра́мада коркышту ачу ый-сыгыт угулат. Рахиль балдарын јылыйтканына ыйлап, токунап болбой турды».
19 Ирод божоп каларда, Иегованыҥ ангелы Египетте Иосифке тӱш јеринде келип, 20 айтты: «Баланы ӧлтӱрерге сананган улус божоп калды. Оныҥ учун баланы ла оныҥ энезин алып, Израиль дӧӧн бар». 21 Иосиф баланы ла Марияны алып, Израиль јерине јанып келди. 22 Је Иудей јеринде Иродтыҥ уулы Архела́й башкарып турганын угала, Иосиф ары барарга коркыды. Ары барбазын деп, ого Кудай да тӱш јеринде айткан. Оныҥ учун ол Галилей јерине барды. 23 Ары једип барала, Назарет деп калада јуртай берди. Анайып судурчылардыҥ: «Оны Назареттиҥ кижизи деп адаар» — дегени бӱдӱп калган.