Матфейдиҥ сӱӱнчилӱ јары
18 Оноҥ Иисуска ӱренчиктери базып келеле, сурадылар: «Теҥеридеги Башкаруда эҥ јааны кем?» 2 Иисус баланы бойына кычырып, ӱренчиктери алдына тургузып алала, 3 айтты: «Чынын айдадым слерге: слер тӱзединбезеер, бу балдар ошкош болуп калбазаар, теҥеридеги Башкаруга кирбезеер. 4 Бу бала ошкош јобош болуп калган кижи теҥеридеги Башкаруда эҥ јааны болор. 5 Бу балага мениҥ адыма болуп јакшыны эдип турган кижи меге де јакшыны эдет. 6 Кандый бир кижи меге бӱткен бу јобош улустыҥ кемизин-кемизин бӱдӱрилткен болзо, оныҥ мойнына теерменниҥ тажын буулайла, талайга чӧҥӱрип койзо торт.
7 Бу телекейге ачу-корон! Нениҥ учун дезе ол улусты кинчекке ийде салат. Эйе, улусты кинчекке ийде салгадый немелер тӱҥей ле болор, је кем ийде салат, ого ачу-корон! 8 Сени колыҥ эмезе будыҥ кинчекке ийде салып турза, оны кезе чабала, таштап ий. Эки колду, эки бутту бойыҥ качан да ӧчпӧс отко ташталганчаҥ, сыҥар колду эмезе сыҥар бутту тирӱ артсаҥ, торт болор. 9 Сени кӧзиҥ кинчекке ийде салып турза, оны кодороло, таштап ий. Эки кӧстӱ бойыҥ отту гее́ннага ташталганчаҥ, сыҥар кӧстӱ тирӱ артсаҥ, торт болор. 10 Калак, бу јобош улустыҥ бирӱзин де јаман кӧрбӧгӧр. Айдып турум слерге: олордыҥ теҥеридеги ангелдери теҥеридеги Адамныҥ јӱзин јаантайын кӧрӱп јадылар. 11 ——
12 Канайып сананып јадыгар, 100 койлу кижиниҥ бир койы аза берзе, ол 99 койын кырда артыргызып, јылыйып калганын бедиреп барар эмес беди? 13 Ол оны таап алза, јылыйбаган 99 койына кӧрӧ, ого артык сӱӱнер эмей. 14 Анайып ла теҥеридеги мениҥ* Адам да бу јобош улустыҥ бирӱзине де ӧлӱм кӱӱнзебей јат.
15 Карындажыҥ* сеге удура кинчек эткен болзо, барып, оныҥ јастыразын кӧстӧҥ кӧскӧ айдып бер. Ол сени укса, сен ого чын эдерге болужып берериҥ. 16 Је ол сени укпаза, бойыҥла кожо база бир эмезе эки кижини ээчиделе бар. Анайып керек эки эмезе ӱч кижиле кӧрӱлген болор. 17 Је ол бу да улусты укпаза, јуунга айдып ий. Је јуунды да укпаза, ол кижи сеге ӧскӧ албатылардыҥ кижизиндий эмезе калан* јууп турган кижидий болзын.
18 Чынын айдадым слерге: јерде нени буулараар, теҥериде де буулалар. Јерде нени чечереер, теҥериде де чечилер. 19 База айдып турум слерге: јерде слердиҥ экӱгер кандый бир керектӱ неме керегинде мӱргӱӱрге куучындажып алза, теҥеридеги Адам олордыҥ сурагын бӱдӱрер. 20 Мениҥ адыма болуп, эки эмезе ӱч кижи јуулышса, мен де олордыҥ ортозында болорым».
21 Мыныҥ кийнинде Пётр Иисуска базып келеле, сурады: «Кайракан, карындажым меге удура кинчек эдип турган болзо, меге оныҥ јаманын канча катап таштаар керек? 7 катап па?» 22 Иисус айтты: «Айдып јадым сеге: 7 катап эмес, 77 катап таштаар керек.
23 Нениҥ учун дезе теҥеридеги Башкаруны бойыныҥ кулдарынаҥ тӧлӱзин некеген каанга тӱҥейлеерге јараар. 24 Каан тӧлӱлерин јууп баштаарда, ого 10 000 талант* акча тӧлӱлӱ кижини экелдилер. 25 Је ондо тӧлӧӧр немези јок болордо, каан оныҥ бойын, оныҥ ӱйин ле балдарын, анайда ок бастыра јӧӧжӧзин садып ийеле, тӧлӱни тӧлӧзин деп јакарган. 26 Бу ӧйдӧ оныҥ кулы дезе тизеленип, јайнай берди: „Бир эмеш сакып ийзеҥ, тӧлӱӱмди ӱзе тӧлӧп берерим!“ 27 Каан оны килеп, тӧлӱзин тӧлӧбӧс эделе, божодып ийди. 28 Је бу кул кааннаҥ чыгала, ого 100 дина́рий тӧлӱлӱ кулды тудала, бакырылдап: „Меге тӧлӱӱҥди тӧлӧ!“ — деген. 29 Бакырылдаткан кул тизеленип, јайнай берди: „Бир эмеш сакып алган болзоҥ, тӧлӱӱмди ӱзе тӧлӧп берер эдим!“ 30 Је баштапкы кул сакыырга кӱӱнзебеген, оныҥ учун оны тӱрмеге таштап, тӧлӱзин тӧлӧбӧгӧнчӧ, анда отурзын деп јакару берген. 31 Арткан кулдар мыны кӧрӧлӧ, тыҥ кунуга бергендер. Олор каанга барып, ӱзе куучындап берген. 32 Ол тушта каан байагы кулды бойына кычырып алала, айтты: „Јаман кул! Јайнап сурай берериҥде, бастыра тӧлӱӱҥди тӧлӧбӧс эдип салгам. 33 Мен сени килееримде, сеге де најыҥды* килеер керек болгон эмес пе?“ 34 Анайып, чугулданып калган каан оны тӱрмеге таштап, бастыра тӧлӱзин тӧлӧбӧгӧнчӧ, анда тутсын деп јакарган. 35 Теҥеридеги Адам да, карындаштараардыҥ јаманын акту јӱрегердеҥ таштабазаар, слерге анайып ла баштанар».