Матфейдиҥ сӱӱнчилӱ јары
22 Иисус олорго база бир укаа сӧс куучындады: 2 «Теҥеридеги Башкару бойыныҥ уулына той-јыргал эткен каанга тӱҥей. 3 Ол бойыныҥ кулдары ажыра кычырылган улусты айттыртарда, олор тойго келерге кӱӱнзебеген. 4 Каан ӧскӧ кулдарын ийип, айтты: „Кычырылган улуска мынайып айдып барыгар: ‚Мен букаларымды ла семирткен малымды сойып, курсак-тамак белетеп салдым. Ӱзе неме белен. Тойго келигер‘“. 5 Је олор айттыруны керекке албай, бирӱзи — кыразына јӱре берген, база бирӱзи — садыжып јӱре берген, 6 арткандары дезе каанныҥ кулдарын токпоктойло, ӧлтӱрип салгандар.
7 Каан ачынала, бойыныҥ черӱзин ийген. Олор барала, кулдарды ӧлтӱрген улусты ӧлтӱрип, олордыҥ калазын ӧртӧп салды. 8 Каан кулдарына айтты: „Тойго ӱзе неме белен болгон, је бу улус тойго кычырыларга турбас болуптыр. 9 Оныҥ учун каладаҥ чыккан јолдорго барып, туштаган ла улусты той-јыргалга кычырыгар“. 10 Каанныҥ кулдары јолдорго чыгала, туштаган улустыҥ ончозын — јакшызын да, јаманын да тойго јууп ийдилер. Анайып, той болотон јер улусла толо берди.
11 Каан айылчыларын кӧрӧргӧ кирип келеле, улустыҥ ортозында тойдыҥ кийимин кийбеген кижини кӧрӱп, 12 оноҥ сурады: „Тойдыҥ кийимин кийбей, бери канайып кирип келгеҥ?“ Онызы унчукпады. 13 Ол тушта каан кулдарына јакарды: „Оныҥ колы-будын буулайла, караҥуйга таштап ийигер. Анда оныҥ ый-сыгыды ла тиш-кыјырты угулар“.
14 Кычырылганы кӧп, талдалганы дезе ас».
15 Фарисейлер јуулыжып, Иисустыҥ айтканынаҥ јастыра сӧс табарга, куучындажып алдылар. 16 Олор бойыныҥ ӱренчиктерин ле Иродтыҥ улузын Иисуска мынайып айтсын деп ийдилер: «Ӱредӱчи, бис билерис, сен јаантайын чынды айдып јадыҥ, Кудайдыҥ јолына чын ӱредип јадыҥ, улуска јакшы кӧрӱнерге албаданбай јадыҥ, нениҥ учун дезе улусты ылгабай тургаҥ. 17 Айдып бер биске, Римниҥ башчызына* калан* тӧлӧӧргӧ јараар ба, јарабас па?» 18 Је Иисус олордыҥ кара санааларын билип, айтты: «Мени не ченеп туругар, эки јӱстӱлер? 19 Калан тӧлӧйтӧн акчаны меге кӧргӱзигер». Олор ого дина́рий экелип бердилер. 20 Иисус олордоҥ сурады: «Мында кем јуралган, кемниҥ ады бичилген?» 21 Олор: «Римниҥ башчызыныҥ» — деп айтты. Ол тушта Иисус олорго: «Башчыныйын башчыга беригер, Кудайдыйын дезе Кудайга беригер» — деди. 22 Мыны угала, олор кайкажып, Иисусты артыргызала, јӱре бердилер.
23 Ол кӱнде Иисуска тирилишке бӱтпей турган саддукейлер базып келеле, сурадылар: 24 «Ӱредӱчи, Моисей айткан эди: „Кижи бала јокко божоп калза, оныҥ ӱйин кожо чыкканы алып, оныҥ угын улалтар учурлу“. 25 Јети карындаш болгон. Баштапкызы кижи алала, бала јокко божоп калган. Оныҥ ӱйин кожо чыккандарыныҥ бирӱзи алган. 26 Анайып ла ок экинчизи де, ӱчинчизи де... Учында јети карындаштыҥ ончозы бала јокко божоп калды. 27 Учы-учында ӱй кижи де божоп калды. 28 Бу ӱй кижи јети карындаштыҥ кажызыныҥ ла ӱйи болгон. Айдарда, ол тирилип келзе, кемизиниҥ ӱйи болор?»
29 Иисус олорго каруузын јандырды: «Слер јастыра сананып јадаар, нениҥ учун дезе Бичимелди де, Кудайдыҥ ийде-кӱчин де билбейдигер. 30 Тирилген улус кижи албас, кижиге барбас, олор теҥеридеги ангелдердий болор. 31 Слер кычырбаганаар ба, Кудай божогон улусты тиргизер деп? Ол мынайда айткан јок беди: 32 „Мен Авраамныҥ Кудайы, Исаактыҥ Кудайы ла Иаковтыҥ Кудайы“? Ол божоп калгандардыҥ эмес, је тирӱ јӱргендердиҥ Кудайы». 33 Иисустыҥ мынайда ӱредип турганын угала, улус алаҥ кайкажып турды.
34 Саддукейлерди Иисус сӧслӧ туйуктап салган деп угала, фарисейлер олорло биригип, ого базып келдилер. 35 Олордыҥ бирӱзи, јасакты јакшы билетени, Иисусты ченеерге сурады: 36 «Ӱредӱчи, јасактагы јакарулардыҥ эҥ керектӱзи кажызы?» 37 Иисус каруу берди: «„Иегова Кудайыгарды бастыра јӱрегерле, бастыра бойоорло, бастыра санаагарла сӱӱп јӱрӱгер“. 38 Бу дезе јакарулардыҥ баштапкызы ла эҥ керектӱзи. 39 Ого тӱҥей экинчи јакылта бу: „Бойыҥды сӱӱгендий, јуугыҥды сӱӱп јӱр“. 40 Бу эки јакылтага ончо јасак ла судурчылардыҥ бичиктери тӧзӧлӧнгӧн».
41 Фарисейлер јӱргелекте, Иисус олордоҥ сурады: 42 «Христос керегинде нени сананадаар? Ол кемниҥ уулы?» «Давидтиҥ» — деп, олор каруу јандырды. 43 Ол тушта Иисус сурады: «Андый болзо, нениҥ учун Давид агару тынга башкартып, оны Кайракан деп адап, мынайып айткан: 44 „Иегова мениҥ Кайраканыма: ‚Ӧштӱлериҥди будыҥ алдыҥа салып бербегенчем‚ оҥ јаныма отур‘ — деп айтты“? 45 Айдарда, Давид оны Кайракан деп айдып турарда, ол канайып оныҥ уулы болотон?» 46 Олор каруу берип болбоды. Бу ӧйдӧҥ ала олор Иисустаҥ неме сурабай баргандар.