Слер билереер бе?

Нениҥ учун Иегова тайылгага кӱӱлечекти де, кӱӱлени де экелерге јараткан?

МОИСЕЙДИҤ јасагыла болзо, израильтяндарга кӱӱлечекти (горлица) эмезе кӱӱлени тайылга этире экелерге јараар болгон (Лев. 1:14; 12:8; 14:30). Бу эки куш, тайылгалар керегинде айдылып турза, јаантайын кожо айдылат. Олордыҥ кажызын да болзо экелерге јараар болгон. Кижи сананза, бу эки куштыҥ башказы ла јок ошкош, је израильтяндарга тайылгага кӱӱлени эмезе кӱӱлечекти экелерге јаратканы бир канча јеҥилте болгон. Нениҥ учун дезе кезикте кӱӱлечекти табарга јеҥил эмес болотон.

Кӱӱлечек — кеткин куш, бу куш кышкы айларда Израильде болбой јат. Олор ӱлӱрген айда јылу јерлердӧӧн учуп барат, а јас једип келзе, ойто кайра једип келет (Кожоҥ 2:11, 12; Иер. 8:7). Мынаҥ улам кезик израильтяндар кышкы айларда тайылга эдип болбос эди.

Кӱӱлелер дезе, кеткин куштар эмес, олор Израильде јайы-кыжы болуп туратан. Олорды улус та азырап туратан. (Иоанн 2:14, 16 тӱҥдештиригер.) Палестинада бу куштар калаларда да, деремнелерде де болгон. Бир бичикте айдылганыла: «Кӱӱлениҥ уйазы кажы ла айылда болуп туратан. Је јӱк ле чек јокту улуста болбогон болор. Андый да болзо, јокту да улуста кӱӱлениҥ уйазы чеденниҥ ичинде эмезе туралардыҥ стенелеринде болуп туратан»a. Кӧп сабада кӱӱлелер стенелерде эдилген ойдык јерлерде јаткылап туратан. (Исайя 60:8 тӱҥдештиригер.)

Айдарда, израильтяндар тайылга эдип кандый куш бар, ондыйын ла экелер аргалу болгон. Мынаҥ дезе Иегованыҥ сӱӱжи, анайда ок ол улустаҥ эдип болбос неме некебей турганы кӧрӱнет.