Кычыраачылардыҥ сурактары

Сарын 61:8-те Давид Кудайдыҥ адын «јажын-чакка» мактаар деп бичилген. Бу сӧстӧр Давидти качан да ӧлбӧс деп кӧргӱзет пе?

Јок. Бу сӧстӧр Давидте кандый кӧрӱм-санаа болгонын кӧргӱзет.

Давид бу да ӱлгерде, ӧскӧ дӧ ӱлгерлерде, кандый сӧстӧр бичигенин кӧрӱп ийектер: «Берген сӧзимди кӱннеҥ кӱнге бӱдӱрип, сениҥ адыҥды кожоҥымла јажын-чакка мактаарым». «Иегова Кудайым, мен сени бастыра јӱрегимле макка чыгарадым. Сениҥ адыҥды јажын-чакка мактап јӱрерим». «Сениҥ адыҥды јажына мактаарым» (Сар. 61:8; 86:12; 145:1, 2).

Мында Давид бу јӱрӱмде качан да ӧлбӧй јӱрерим деп айтпаган. Ол кинчектиҥ јалы — ӧлӱм деп, јакшы билген. Оныҥ учун ол бойы да кинчектӱ деп оҥдогон (Баш. 3:3, 17—19; Сар. 51:4, 5). Анайда ок Давид Кудайдыҥ озогы чындык ишчилери, Авраам, Исаак ла Иаков божоп калган деп билетен. Оныҥ бойын да ӧлӱм сакып јатканын билер болгон (Сар. 37:25; 39:4). Айдарда, Сарын 61:8-теги сӧстӧр Давидтиҥ Иегованы јажын-чакка, ӧскӧртӧ айтса, бастыра јӱрӱмине мактаар кӱӱндӱ болгонын кӧргӱзет (2 Сам. 7:12).

18, 51 ле 52 Сарындардыҥ ӱстиндеги сӧстӧрин кӧрзӧ, кезик сарындарда Давидтиҥ јӱрӱминде болгон учуралдар кӧргӱзилген. Давид кӱдӱчи кижи болгон. Оныҥ учун 23-чи Сарында Иегованы оны баштап апарып јаткан, азырап ла корулап турган кӱдӱчи эдип кӧргӱзет. Иегованыҥ мынайып кичеегени Давидти ого бастыра јӱрӱмине иштеерге кӱӱнзеткен (Сар. 23:6).

Бис ундыбай јадыс, бу судурларды Давид Иегованыҥ агару тыныныҥ болужыла бичиген. Анайда ок ол келер ӧйдӧ бӱдетен оноҥ до ӧскӧ судурлар бичиген. Темдектезе, 110-чы Сарында Кайракан Кудайдыҥ «оҥ јанына» отурар ла сӱреен бийик јаҥ алар деп айткан. Ол Кудайдыҥ ӧштӱлерин бийленер ле јердеги «албатыларды јаргылаар». Давидтиҥ айткан Кайракан — оныҥ калдыгы, ӧскӧртӧ айтса, теҥеридеҥ «јажын-чакка абыс» болуп башкаратан Мессия (Сар. 110:1—6). 110-чы Сарындагы судурда Иисус керегинде айдылган. Бу судур келер ӧйдӧ бӱдӱп калар. Мынайып Иисус бойы айткан (Матф. 22:41—45).

Ӧрӧги айдылганыла, Иегова агару тыны ажыра Давидти озогы ла келер ӧй керегинде бичизин деп кӱӱнзеткен. Келер ӧйдӧ дезе Давид тирилзе, Кудайды јажын-чакка мактаар аргалу болор. Мындый болордо, Сарын 37:10, 11 ле 29 ӱлгерлерде јебрен Израильдеги јӱрӱм керегинде ле Кудай берген сӧзин бӱдӱрип салза, келер ӧйдӧги јӱрӱм керегинде бичилген болот. (Бу чыгарманыҥ «Мениле кожо райда болорыҥ» деген јӧрмӧлинде 8 абзацты кӧрӱгер.)

Айдарда, Сарын 61:8 ле оноҥ до ӧскӧ ӱлгерлер озогы ӧйдӧ Давидтиҥ Иегованы бастыра јӱрӱмине мактаарга кӱӱнзегенин кӧргӱзет. Анайда ок келер ӧйдӧ оны Иегова тиргизип ийзе, Давид Иегованы јажын-чакка мактаар.