Чындап та, јер-телекейле кем башкарат?

Ӧрӧ турган суракка кӧп улус бир сӧслӧ — Кудай деп, каруузын берер эди. Је текши јарлу Библияда, Иисус Христос ол эмезе оныҥ Адазы јер-телекейдиҥ чын башкараачылары деп, кайда да айдылбаган. Ого удура Иисус айткан: «Бу телекейдиҥ Јайзаҥы мынаҥ сӱрӱлер» анайда ок кошкон: «Бу телекейдиҥ Јайзаҥы келип јат, Менеҥ неде јок» (Иоаннаҥ 12:31; 14:30; 16:11).

Анайдарда, бу телекейдиҥ башчызы Иисуска удура туруп јат. Ол кем болотон андый?

Телекейдиҥ айалгазыныҥ — јартына чыгатан тӱлкӱӱр

Кижи канайып та бастыра акту кӱӱнинеҥ албаданып, чырмайарда да, телекей бастыра тӱӱкиниҥ туркунына коркушту кӱч айалгада болгон. Бу ончо тереҥ сагышту улусты кайкадат, канайып эмдиги ӧйдӧ јада калган јок бичиичи, редакционный статьяныҥ авторын Дейвид Лоренсти кайкаткан чылап: «Јердиҥ ӱстинде амыр-энчӱ» — оны кажы ла кижи кӱӱнзейт. «Јалакай кӱӱн-тап улустыҥ колбузында» — бастыра телекейде улус бу јуук колбуларды бой-бойыныҥ ортозында сезет. Андый болзо керек неде? Нениҥ учун, кижиниҥ јайалган кӱӱнине удура јуу-чактар болот?»

Бу кайкамчылу билдирет, андый эмес пе? Качан ар-бӱткенде кижиниҥ јайалган кӱӱни, ол амыр-энчӱ, јайымда јӱрери, ол ок ӧйдӧ олордыҥ ортозында бой-бойын кӧрӱшпези, андый калапту ӧлтӱриш элбеде јайылган. Кӱӱни јок казыр ла соок кылык кылынарын кӧрӱп ий. Улус бой-бойын килемји јоктоҥ кыйнап, ума јок кӧп улус ӧлтӱрерге газовый камералар, концентрационный лагерьлер, огнемёттор, напалмовый бомбалар оноҥ до ӧскӧ коркушту эп-сӱмелер тузаланган.

Андый тыҥ амыр-энчӱ ле ырыс кӱӱнзеген улус, ойто бойлоры ӧскӧзине удура неге де јарабас калју кылык эдер аргалу деп, сен бодойдыҥ ба? Кандый ийде-кӱч улусты мындый кижи кӱӱни јок керектер эдерге ийде салып сӱмелейт? Качан бирде бойыҥа сурак бердиҥ бе: мындый јӱзӱндӱ албанды бӱдӱрерге, улуска кӧскӧ кӧрӱнбес калју ийде салтарын јетирет пе?

Телекей башкаргандардыҥ кемдер болгоны јарталган

Бу сурак аайынча сананып, бодойтон неме јок. Кажы ла кижини, анайда ок бӱдӱн нацияны кӧскӧ кӧрӱнбес тереҥ сагышту неме башкарат деп, Библия јарт кӧргӱзет. Анда айдылат: «Бастыра јер-телекей тӱбекте јадат [«кара калјуныҥ бийленижинде», ЈТ]». Библия оныҥ кем болгонын аайына чыгып айдат: «Бастыра телекейдиҥ санаазын тӧгӱнле булгап турган учун, диавол ло сатана деп адаткан» (1 Иоанныҥ 5:19; Откровение 12:9).

Бир учуралда, качан Иисус, «диаволдыҥ ченелтезинде» болордо, Сатана телекейдиҥ башкараачызы болгонына ол алаҥзыбаган. Библия не болгонын, айдып берет: «Диавол оны сӱреен бийик кырдыҥ бажына чыгарып, ого бастыра телекейдиҥ байлыгын ла магын кӧргӱзип, ого айдат: меге јада тужӱп мӱргӱзеҥ, бу ончозын сеге берерим. Ол тушта Иисус ого айдат: кедери тур менеҥ, Сатана» (Матфейдеҥ 4:1, 8—10).

Бу керегинде санан, Сатана Иисусты «бастыра телекейдиҥ каандыгын» береечи болуп, ченеген. Сатана бу каандыктардыҥ башкараачызы эмес болзо, Сатананыҥ берген шӱӱлтези чын ла ченелте болор беди? Јок, болбос эди. Ајарып кӧр: Сатана бу бастыра телекейлик башкарууны бийлеп алганын Иисус јаратпаган эмес, Сатана бийлебей турган болзо, ол нени эдер эди. Оныҥ учун Сатана, Диавол чындап та кӧскӧ кӧрӱнбес телекей башкараачы! Библия оны чынынча «бу чактыҥ кудайы» деп, айдат. (2 Коринфяндарга 4:4). Је канайып, андый калју кӧскӧ кӧрӱнбес неме јаан ийде-кӱчтӱ једимге јеткен?

Кудайдыҥ јайаган ангелы Сатана болуп, Кудайдыҥ бийигине кӱйӱнген. Ол Кудайдыҥ башкарузын јаратпай салган. Бу амадузыла ол баштапкы ӱй кижини, Еваны тӧгӱндеерге, јыланды тузаланды, анайып оныла оныҥ ӧбӧгӧни Адамды, Кудайды угардыҥ ордына, оныҥ јакылтазын бӱдӱрерге ийде салып, албадап эттирткен (Бытие 3:1—6; 2 Коринфяндарга 11:3). Ол онойдо ок Адам ла Еваныҥ чыккалак угын, Кудайдаҥ туураладар аргалу болгонын кӧргӱскен. Оныҥ учун Кудай ол Сатананы бойыныҥ некелтезин ченеп кӧрзин деп, ого ӧй берет, је Сатана мында мӧр алып болбоды (Иов 1:6—12; 2:1—10).

Бодозо до, Сатана бойыныҥ башкарузында телекейди јаҥыскан башкарбай јат. Ол бир кезик ангелдерди ого биригип, Кудайга удура тӱймеен чыгарзын деп, бӱдӱмјилеп алган. Олор кӧскӧ кӧрӱнбес, демондор болуп, јӧмӧшкӧндӧр. Библия ол керегинде айдып, јарт јакару берет: «Кудайдыҥ ончо јепселин кийип, слерге диаволдыҥ јажытту калју керектерине удура турар аргалу болзын; нениҥ учун дезе бистиҥ тартыжу эт-канга удура эмес, је... бу караҥуй чактыҥ телекей башкаруларына удура, теҥери алдында калју ээлерге удура» (Ефесяндарга 6:11, 12).

Калју ээге удура тур

Бу кӧскӧ кӧрӱнбес, телекей башкараачылар албатыны Кудайга бажыртпаска, јастыра јолло апарарга толо белен. Калју ээлердиҥ мындый кылык эдер бир эп-сӱмези, ол ӧлгӧн кийнинде јӱрӱм бар деп, шӱӱлтени јаратканы, је Кудайдыҥ Сӧзи ӧлгӧн улуста санаа-шӱӱлте јок деп јарт кӧргӱзет. (Бытие 2:17; 3:19; Иезекииль 18:4; Псалом 145:3, 4; Екклесиаст 9:5, 10). Ого келиштире, калју ээ, божогон кижиниҥ ӱнине тӱҥейлеп, божогон кижиниҥ тӧрӧгӧндӧри ле, эмезе оныҥ нӧкӧрлӧри ле куучындажар аргалузын кӧргӱзет, кӧскӧ кӧрӱнбес јердеҥ ӱн берип, спиритический медиумдарды тузаланат. «Ӱн» јӧптӧйт, ол — божогон кижи, је чынынча алза ол — демон!

Оныҥ учун сен качан-бирде андый «ӱн» уксаҥ, бойыҥды тӧгӱндеерге бербе. Нениде айдып турза, ончозын тууралат, Иисустыҥ сӧстӧрин ӧткӧнип айт: «Кедери тур менеҥ, Сатана» (Матфейдеҥ 4:10; Иаковтыҥ 4:7). Кӧскӧ кӧрӱнбес, кейде куулгазынду калју ээлерле сонуркап колбулу болорго јарадарын, кӱӱнзебе. Андый колбуны спиритизм деп айдат. Кудай бойыныҥ улузын, оныҥ ончо бӱдӱминеҥ корулайт. Библия «ырымдап... белгелеп тургандарды ла кандый бир учуралды ырымдап, јаантайын аайлаткыштап тургандарды чокум јаратпайт» (Второзаконие 18:10—12, ЈТ; Галаттарга 5:19—21; Откровение 21:8).

Соондо, спиритизм кижини демондордыҥ салтарына экелет, оныҥ кажы ла турган бӱдӱмдеринеҥ кандый да солун ла кайкамчылу болзо мойножор керек. Бу эдилип турган бӱдӱмдерге «магиялык кристалдардыҥ» болужыла, спиритический сеанстар, планшеткалар тузаланганы, экстрасенсорный восприятие (ЭСВ), колдыҥ чийӱлерин шиҥдегени (хиромантия) ла астрологияга бӱткени кирет. Демондор анайда ок, тураларда бойыныҥ јӱрер јерин тал-табыш чыгарып, ӧскӧ дӧ физический феномендер эткилейт.

Ого коштой, калју ээлер јажытту керектерин кижиниҥ јаман јанына литература, кинофильм ла телевизордыҥ программазында јаантайын кӧргӱзип турар балыр ла эби јок быкчу јӱрӱм кӧргӱзип, салтарын јетирер. Демондор билер — јастыра санааларды сагыштаҥ тура јайлатпаза, ол санаалар качан да ундылбай сагышка артып, демондордыҥ бойлорына тӱҥейлештирип, улусты јаман кылыктӧн ийде салар (Бытие 6:1, 2; 1 Фессалониктерге 4:3—8; Иуданыҥ 6).

Чын, телекейле калју ийделер башкарып турган деп, шӱӱлтеге кӧп саба улус шоодып, каткырыжардаҥ айабас. Је олордыҥ бӱтпези кайкамчылу эмес, нениҥ учун Библияда: «Сатана бойы јарыктыҥ Ангелы болуп кебин алынат» деп айдылган (2 Коринфяндарга 11:14). Оныҥ эҥ ле эптӱ тӧгӱндежи, кӧп саба улустыҥ кӧзин туй тудуп, ол бойы ла, демондордыҥ чын барын билдиртпей турганы. Је тӧгӱндет пе! Диавол ло оныҥ демондоры чын ла бар, сеге јаантайын олорго удурлажар керек (1 Петрдыҥ 5:8, 9).

Ырыс болуп, ол ӧй јууктап келди, Сатана ла оныҥ элчилери база качан да болбос! «Телекей [оныҥ башкараачыларыла кожо] ӧдӱп јат...— Библия ижендирет,— а Кудайдыҥ кӱӱнин бӱдӱрип тургандар, чактыҥ-чакка јӱрер» (1 Иоанныҥ 2:17). Качан ол калју ийде јайладылган кийнинде, ол тушта кандый јайымдалыш болор эди! Оныҥ да учун, бис Кудайдыҥ кӱӱнин бӱдӱрип тургандардыҥ ла ӱргӱлјиге Кудайдыҥ јаҥы чындык јӱрӱмине сӱӱнип тургандардыҥ ортозына болорыс (Псалом 36:9—11, 29; 2 Петрдыҥ 3:13; Откровение 21:3, 4).

Ӧскӧртӧ кӧргӱзилбеген болзо, бастыра Библияныҥ цитаталары Библияныҥ Синодал кӧчӱриштеҥ алынган. Цитатаныҥ кийнинде кыскарта ЈТ болзо, ол цитата англияныҥ тилине кӧчӱрилип чыгарган «Агару Бичикти Јаҥы Телекейдиҥ кӧчӱрижи» болор.

[4 бӱк, јурук]

Бу бастыра телекейдиҥ башкарузы Сатананыҥ эмес болгон болзо, ол Иисуска ончозын берерге кӱӱнзер беди?