Эткен ижиҥе јакшызынып јӱр

1—3. а) Кӧп улус ижине кандый кӧрӱмдӱ? б) Агару Бичик бисти ишке кандый кӧрӱмдӱ болзын деп кӱӱнзедет ле бу бажалыкта бис кандый сурактар кӧрӧрис?

БӰГӰНГИ телекейде кӧп улус ижинеҥ сӱӱнчи албай јат. Олорго тыҥ јарабай турган ижине кӧп иштеерге келижет, оныҥ учун олор ишке кӱнӱҥ сайын кӱӱн-кӱч јок барат. Эмдиги ӧйдӧ кӧп саба улус јакшызынып иштебей де турган болзо, је олорго иштеген ижинеҥ сӱӱнчи аларга, нени эдер керек?

² Агару Бичик бисти ишке чын кӧрӱмдӱ болзын деп кӱӱнзедип јат. Ондо иш ле оныҥ једими — Кудайдыҥ алкыжы деп айдылат. «Кижи ичип-јип, эткен ижинеҥ сӱӱнчи алып, јакшызынар учурлу. Бу Кудайдыҥ сыйы» — деп, Соломон бичиген (Јарлыкчы 3:13). Иегова бисти сӱӱп јат ла биске эҥ јакшыны кӱӱнзейт; эткен ижис бойыска јарап турзын ла сӱӱнчи экелзин деп кӱӱнзеп јат. Оныҥ учун Кудайдыҥ сӱӱжинде артарга, ишке Оныҥ кӧрӱминеҥ ле принциптеринеҥ тудунар керек. (Јарлыкчы 2:24; 5:18 кычыр.)

³ Бу бажалыкта тӧрт сурак кӧрӧрис: эткен ижиске канайып сӱӱнип јакшызынар? Чындык христиандар кандый иштерге кирбей јат? Ишке ле ич-кӧгӱс керектерге аайлу-башту болорго, нени эдер керек? Бис кандый эҥ јаан учурлу ишти эдер аргалу? Је озо баштап Јер-телекейде эҥ улу эки ишчиниҥ: Иегова Кудайдыҥ ла Иисус Христостыҥ темин кӧрӱп ийеектер.

ЭҤ УЛУ ИШЧИ ЛЕ УС ИШЧИ

4, 5. Иегованыҥ ижи једимдӱ деп, Агару Бичик канайып кӧргӱзет?

⁴ Иегова — эҥ улу ишчи. Башталганы 1:1-де мынайып айдылат: «Баштап Кудай теҥерини ле јерди јайаган». Кудай јерди јайап божогоныныҥ кийнинде эткен ижи керегинде мынайып айткан: «Јакшы эмтир» (Башталганы 1:31). Ӧскӧртӧ айтса, јерде јайаган ончо јайаандары Ого Бойына сӱреен јараган. Иегова, «алкышту [ырысту, ЈТ] Кудай», эткен ижинеҥ јаан сӱӱнчи алган деп алаҥзыбай јадыс (1 Тимофейге 1:11).

⁵ Бистиҥ иштеҥкей Кудайыс ижин качан да токтотпой јат. Јерди ле ондогы ончо немени јайаганыныҥ кийнинде кӧп ӧй ӧдӧ берерде, Иисус мындый сӧстӧр айткан: «Адам Бойыныҥ керегин эмдиге јетире эдет» (Иоанн 5:17). Ол ӧйдӧ Ада Кудай нени эткен? Ол теҥеринеҥ јаантайын улуска башкарту берип, олорды кичееген. Ол «јаҥы јайаанды» — теҥериде Иисусла башкаратан тынла туулган христиандарды јайаган (2 Коринфтегилерге 5:17). Кудай, Оны сӱӱп турган улус јаҥы телекейде ӱргӱлји јӱрӱм алзын деп амадузын бӱдӱрерге, сӱреен јаан иш эткен (Римдегилерге 6:23). Иеговага эткен ижиниҥ једими сӱреен јараган болор. Ол миллиондор тоолу улусты чындыкка экелген: олор Каандык керегинде јарды алынып, Кудайдыҥ сӱӱжинде артарга, јӱрӱмин солып баштагандар (Иоанн 6:44).

6, 7. Иисус нениҥ учун иштеҥкейиле јарлу болгон?

⁶ Иисус иштенкейиле јарлу болгон. Ол јерге келердеҥ озо, Кудайдыҥ «ус ишчизи» болуп, «теҥеридезин де, јердезин де» јайаарында турушкан (Укаа сӧстӧр 8:22—31; Колоссыдагыларга 1:15—17). Иисус јерде јадарда, оноҥ ло ары кӧп иштеген. Ол јаштаҥ ала агашла узанарына ӱренип алган, бу ижиле Ол јарлу болгон (Марк 6:3). Бу јеҥил эмес иш болгон ло бу иште кӧп неме эдип билер керек болгон, нениҥ учун дезе агаш кезер заводтор, не-неме тудатан јепселдерлӱ ле электроинструменттерлӱ магазиндер јок болгон. Иисус агаш белетеп јаткан деп сананып ийзеҥ: агаштарды јыгып, иштеп турган јерине экелип јат. Ол туралар тудат: стропилалар белетеп, јабынчык тудат, анайда ок эжиктер, орындар, отургыштар, оноҥ до ӧскӧ не-немелер эдет. Анайып Ол, чыҥдый эдилген иш сӱӱнчи экелет деп, Бойы да јакшы билер болгон.

⁷ Иисус агару ижин бӱдӱрерге, сӱреен кӧп иштеген. Бу эҥ јаан учурлу иште Ол ӱч јарым јылдыҥ туркунына амыры јок иштенген. Сӱӱнчилӱ јарды кӧп улуска јетирерге, ол таҥ ла туруп, орой тӱн киргенче јарлап јӱрер болгон, ӧскӧртӧ айтса бир де минут калас јылыйтпаска албаданып туратан (Лука 21:37, 38; Иоанн 3:2). Ол «Кудайдыҥ Каандыгыныҥ Сӱӱнчилӱ Јарын јарлап, калалар ла јурттар сайын» јӱрген (Лука 8:1). Иисус улуска сӱӱнчилӱ јарды јетирип, тоозынду јолдорло канча јӱс беристе ӧткӧн.

8, 9. Иисус эткен ижине канайып јакшызынып јат?

⁸ Иисус агару иште албаданып иштегениниҥ једимдерин кӧргӧн бӧ? Кӧргӧн эмей! Ол чындыктыҥ ӱрендерин отургызып, Бойыныҥ кийнинеҥ кыралар артыргыскан. Соондо кыралар быжып келерде, олорды кезер ӧй једип келген. Кудайдыҥ табын бӱдӱргенинеҥ Иисус јаан ийде-кӱч алатан, керек дезе кезикте курсак та јибейтен (Иоанн 4:31—38). Иисус јердеги јӱрӱминиҥ учында ару уйатту: «Сени јерде мактаттым, Меге этсин деп јакып салганыҥды бӱдӱрдим» — деп айдар аргалу болгонынаҥ јаан сӱӱнчи алганын сананып ийзеҥ (Иоанн 17:4).

⁹ Иегова ла Иисус эткен ижине јакшызынып јат ла биске јаан тем кӧргӱзип јат эмей. Иегованы сӱӱп турганыс Оноҥ тем аларга кӱӱнзедет (Ефестегилерге 5:1). А Иисусты сӱӱп турганыс «Оныҥ изиле [чике, ЈТ]» барарга кӱӱнзедет (Петрдыҥ 1-кы самаразы 2:21). Је эмди эткен ижисле бис канайып јакшызынар аргалу деп кӧрӱп ийеектер.

ЭТКЕН ИЖИСКЕ КАНАЙЫП ЈАКШЫЗЫНАР

10, 11. Ишке чын кӧрӱм-санаалу болорго, биске не болужар?

¹⁰ Чындык христиандар бу телекейде база иштегилеп јат. Бис иштеген ижиске јакшызынып, оноҥ сӱӱнчи аларга кӱӱнзеп јадыс, је качан иштеп турган ижис биске јарабай турган болзо, сӱӱнчи аларга јеҥил эмес болот. Мындый айалгалар болгон тушта, эткен ижиске јакшызынып јӱрерге, нени эдер керек?

¹¹ Чын кӧрӱм-санаалу бол. Бис кезик айалгаларды солып болбозыс, је бойыстыҥ кӧрӱм-санаабысты солыыр аргалу. Бойыстыҥ ижиске чын кӧрӱм-санаалу болорго, Кудайдыҥ кӧрӱмин шӱӱп сананганы болужар. Темдектезе, сен билениҥ бажы болзоҥ, јарабай турган ижиҥ сеге билеҥди јеткилдеерге болужып турганын сананып кӧр. Бойыныҥ јууктарын кичееп, јеткилдеп турган улусты Иегова сӱреен баалап јат. Оныҥ агару Сӧзинде, билезин кичеебей турган кижи «бӱдӱп јӱреринеҥ јана тӱжӱп, бӱтпес кижидеҥ јаман» деп айдылат (1 Тимофейге 5:8). Иштеп турган ижиҥ Кудайдыҥ берген молјузын бӱдӱрерге болужат деп оҥдоп турзаҥ, сен сӱӱнчи аларыҥ ла нениҥ учун иштеп турганыҥды ундыбай турарыҥ. Сенле кожо иштеп турган улустыҥ кӧрӱми башка болордоҥ айабас.

12. Иштеҥкей ле тӧгӱндебес улус кандый алкыштар алат?

¹² Иштеҥкей ле тӧгундебес бол. Кижи иштеҥкей болзо ло ижин чыҥдый бӱдӱрип турза, јакшы једимдерге једер аргалу. Андый улусты иште сӱреен баалап јат (Укаа сӧстӧр 12:24; 22:29). Бистер, чындык христиандар, иште тӧгӱн айтпас, акча эмезе ӧскӧ не-неме уурдабас, анайда ок иштиҥ ӧйин база «уурдабас» учурлу (Ефестегилерге 4:28). Ӧткӧн бажалыктаҥ мындый кылык-јаҥду улус алкыштар алат деп кӧргӧн болгоныс. Андый улуска иште кӧп сабада бӱдӱп јат. Иш береечи бистиҥ тӧгӱндебей јӱргенисти ајаруга албаза да, «санаабыс [уйадыс, ЈТ] ару» болгоныстаҥ ла сӱӱп турган Кудайысты сӱӱндирип турганыстаҥ бис јаан сӱӱнчи аларыс (Еврейлерге 13:18; Колоссыдагыларга 3:22—24).

13. Иште јакшы керектерис кандый туза экелер аргалу?

¹³ Керектериҥле Кудайды макта. Иштеп турган јеристе Кудайдыҥ бийик нормаларыла јӱрӱп турганыс ајару јок артпас. Бу неге экелер аргалу? Анайып бис «Кудай Аргадаачыбыстыҥ ӱредӱзин» јарандырарыс (Титке 2:9, 10). Эйе, бистиҥ јакшы керектеристеҥ улам, улус кудай јаҥыстыҥ јакшызын оҥдоп, ол керегинде кӧпти билип аларга кӱӱнзегилеер. Кожо иштеп турган кижи сениҥ јакшы керектериҥди кӧрӱп, чындыкла јилбиркей берзе, сен нени сезер эдиҥ деп сананып кӧр! Је эҥ ле учурлузы: сӱреен јакшы керектериҥ Иегованы мактайт ла Оныҥ јӱрегин сӱӱндирет деп оҥдоп турганыҥнаҥ јаан сӱӱнчи бар ба? (Укаа сӧстӧр 27:11; Петрдыҥ 1-кы самаразы 2:12 кычыр.)

ИШТИ ТАЛДААРЫНДА ӦТКӰН БОЛОР КЕРЕК

14—16. Ишке кирип јатса, јаан учурлу кандый эки суракты ундыбас керек?

¹⁴ Чындык христиандарга кандый ишке иштеерге јараар, кандыйына јарабас деп, Агару Бичик чокум јартабай јат. Је бу, биске кандый ла ишке кирип, иштеерге јараар деп, кӧргӱспей јат. Агару Бичимел биске Иегова Кудайдыҥ чындык принциптерине келижетен, темдектезе уурданбайтан, тӧгӱндебейтен ишти талдап аларга болужып јат (Укаа сӧстӧр 2:6). Кандый ишке кирерин талдап турган ӧйдӧ, эки јаан учурлу суракты ајаруга алып турар керек.

¹⁵ Бу иште Агару Бичик јаратпай турган иш эдери некелбес пе? Кудайдыҥ Сӧзи уурданышты, тӧгӱнди ле чалулар эдерин бир де јаратпай јат (Чыгыш 20:4; Апостолдордыҥ ижи 15:29; Ефестегилерге 4:28; Ачылта 21:8). Мындый немелер эдери некелип турган ишке бис иштебес эдис. Иегованы сӱӱгенистеҥ улам, бис Кудайдыҥ јасактарына чек јарабай турган ишке качан да кирбес эдис. (Иоанныҥ 1-кы самаразы 5:3 кычыр.)

¹⁶ Бу ишти эдип тура, кандый бир керекте бурулу болуп калбазыс па ла кемди-кемди мындый керекке кийдирип салбазыс па? Тем кӧрӱп ийеектер. Секретарь болуп иштееринде јаман не де јок. Је мындый иш балдар ээндеп турган (аборт) клиникада болгон болзо? Секретарьдыҥ ижине балдар ээндеерине туружары некелбей јат. Андый да болзо, ол клиникага иштегенис балдар ээндер ишке јӧмӧжип турганысты кӧргӱзер эмес пе? Андый иш Кудайдыҥ Сӧзине чек јарабай јат (Чыгыш 21:22—24). Бис Иегованы сӱӱп јадыс, оныҥ учун Агару Бичиктиҥ јаратпай турган керектериле јуук колбулу болорго кӱӱнзебей јадыс.

17. а) Иш талдаары јанынаҥ кандый сурактарды ајаруга алар керек? («Бу ишке иштеерим бе?» деп рамканы кӧрӱгер.) б) Бистиҥ уйадыс Кудайга јараар шӱӱлтелер эдерге канайып болужат?

¹⁷ Иш талдаары јанынаҥ сурактарда, кӧп учуралдарда 15-чи ле 16-чы абзацтарда берилген јаан учурлу эки суракты шӱӱп кӧргӧни чын шӱӱлтеге келерге болужар. Анайда ок ишти талдап тура, ӧскӧ дӧ сурактарды шӱӱп сананар керекa. Керсӱ ле бӱдӱмјилӱ кул кажы ла айалгага јарагадый ээжилер тургузып берер деп сакыбас керек. Шак бу айалгада ӧткӱн болор керек. Экинчи бажалыктаҥ ӱренгенисле болзо, бис Иегова Кудайдыҥ принциптерин јӱрӱмисте јаантайын тузаланып, бойыстыҥ уйадысты ӱредер учурлу. Анайып, јакшыны јаманнаҥ ылгаштырарга ӱренип алганыстаҥ улам, бистиҥ уйадыс Кудайга јарап турган шӱӱлтелер эдерге ле Оныҥ сӱӱжинде артарга болужар (Еврейлерге 5:14).

ААЙЛУ-БАШТУ ИШТЕЕРИ

18. Кӧгӱс јанынаҥ аайлу-башту болорго, нениҥ учун јеҥил эмес?

¹⁸ «Калганчы кӱндердиҥ уур-кӱч ӧйлӧринде» ич-кӧгӱс јанынаҥ аайлу-башту болорго јеҥил эмес (2 Тимофейге 3:1). Ишти таап алала, оны јылыйтпаска кӱч болордоҥ айабас. Бис чындык христиандар болуп, билегисти јеткилдеерге, кӧп иштенер керек деп оҥдоп јадыс. Је бис ајарыҥкай болбозоос, иштиҥ кӱчтери эмезе бу телекейдиҥ акча-јӧӧжӧго тартылатан кӱӱни кӧгӱс керектерге чаптыгын јетирердеҥ айабас (1 Тимофейге 6:9, 10). Айдарда, «эҥ артыгын талдап», канайып аайлу-башту болорын кӧрӱп ийеектер (Филиппыдагыларга 1:10).

19. Бис нениҥ учун Иеговага бӱткӱлинче иженер аргалу ла мынайып иженип турзаас, нени этпезис?

¹⁹ Кудайга бӱткӱлинче ижен. (Укаа сӧстӧр 3:5, 6 кычыр.) Кудай бисти кичееп турарда, бис Ого бӱткӱлинче иженер учурлу эмес пе? (Петрдыҥ 1-кы самаразы 5:7). Биске не керектӱзин Ол бистеҥ јакшы билер ле Оныҥ эдип болбос немези јок (Сарын 37:25). Оныҥ учун Оныҥ Сӧзиндеги: «Акчага ӱстӱкпегер, не барыгарла болорзыныгар. Кудай бойы айткан јок беди: „Сени артырбазым, сени таштабазым“» — деген сӧстӧрин бӱдӱрип турзаас, чын эдедис (Еврейлерге 13:5). Ӧйин толо берип иштеп турган кӧп јарчылар Кудай эҥ керектӱзин берет деп айдар аргалу. Иегова бисти артыргыспас деп бӱткӱлинче иженип турзабыс, билегисти канайып кичеер деп, ӧйинеҥ ӧткӱре санааркабазыс (Матфей 6:25—32). Бу телекейдиҥ ижи кӧгӱс керектериске, темдектезе, сӱӱнчилӱ јарды јарлаарына ла јуунныҥ туштажуларына јӱрерине буудак болзын деп болдыртпазыс (Матфей 24:14; Еврейлерге 10:24, 25).

20. Кӧзис «ару» болзын дегени нени темдектейт ле сен мыны канайып эдериҥ?

²⁰ Баштапкы јерде Кудайдыҥ табы болзын. (Матфей 6:22, 23 кычыр.) Иисус бистиҥ кӧзис «ару» болзын деп айткан. Бу дегежин јӱрӱмди кереги јок немелерле уурлатпай јӱрерин темдектейт. Христиандар карын Иегова Кудайдыҥ табын бӱдӱрерин баштапкы јерге тургузар учурлу. Мынайып эдип турзаас, бис акчалу иштиҥ кийнинеҥ сӱрӱшпезис ле бай јадарга албаданбазыс. Анайда ок кажы ла јаҥы чыгып турган не-немелерди аларга кӱӱнзебезис. Олор бисти бу немелер јокко ырысту болбозыс деп, реклама чылап бӱдӱмјилеерге албаданат. Иегова Кудайдыҥ табын баштапкы јерге тургузарга сеге не болужар? Кереги јок тӧлӱлерге кирбе. Кӧп ӧй баратан ла ийде-кӱч керек болотон не-немелер алба. «Курсакту ла кийимдӱ болзобыс, мыныла болорзыналы» — деп айдылган Агару Бичиктиҥ јӧбин бӱдӱрип јӱр (1 Тимофейге 6:8). Канча кире аргаҥ бар, јӱрӱмиҥди јеҥилтип турарга албадан.

21. Нениҥ учун озо нени эдерин талдап алар керек ле јӱрӱмисте баштапкы јерде не турар учурлу?

²¹ Озо нени эдерин талдап, анайып ла эт. Биске ончо немени эдип турарга ӧйис јетпей јат, оныҥ учун озо нени эдерин талдап алар керек. Анайда этпезеес, учуры ас керектер јаан учурлу керектердиҥ јерине туруп, ончо ӧйисти алып алар. Бистиҥ јӱрӱмисте эҥ баштапкы јерде не турар учурлу? Бу телекейде кӧп улус иш-јалы јаан ишке кирерге, бийик ӱредӱ керек деп айдыжып јадылар. Је Иисус Бойыныҥ ӱренчиктерин: «Элдеҥ озо Оныҥ Каандыгын... бедирегер» — деп кычырып туратан (Матфей 6:33). Бисте, чындык христиандарда, Кудайдыҥ Каандыгы баштапкы јерде турат. Бистиҥ јӱрӱмистеҥ — эткен шӱӱлтелеристеҥ, тургузып алган амадуларыстаҥ ла эдип турган керектеристеҥ — Каандыктыҥ керектерин ле Кудайдыҥ табын бӱдӱрери, бу телекейде бай болорынаҥ ла ӧскӧ неге де албаданарынаҥ баалу деп, кӧрӱнип турар учурлу.

ЈАРЛААР ИШТИ ЭРЧИМДӰ БӰДӰРИП ЈӰР

22, 23. а) Чындык христиандар кандый ишти баштапкы јерге тургузып јадылар ла бу ишти бис те баштапкы јерге тургузып јадыбыс деп, канайып кӧргӱзерге јараар? («Алдындагы чыгарган јӧбимнеҥ улам, сӱӱнчилӱ ле ырысту јӱредим» деп рамканы кӧрӱгер.) б) Бу телекейдиҥ ижине сениҥ кӧрӱмиҥ кандый?

²² Калганчы кӱндердиҥ учында јадып турганысты оҥдоп тура, бис чындык христандардыҥ агару ижин — ӱренчиктер белетеерин — баштапкы јерге тургузып јадыбыс (Матфей 24:14; 28:19, 20). Иисус Христостоҥ тем алып, бис јӱрӱм аргадап турган ишке эрчимдӱ туружарга кӱӱнзейдис. Бу ишти сӱреен баалап турганысты кӧргӱзип турарга, нени эдерге јараар? Кӧп саба Иегованыҥ ишчилери јуунныҥ јарчылары болуп, јарлаар ишке эрчимдӱ туружип јадылар. Кезиги бойыныҥ јӱрӱмин пионердиҥ эмезе миссионердиҥ ижин бӱдӱрерге келиштирип алган. Кӧп ада-энелер, кӧгӱс амадулар тургузарыныҥ учурлузын оҥдоп, бойыныҥ балдарын ӧйин толо берип иштеерине кӱӱнзедет. Јарчылар сӱӱнчилӱ јарды эрчимдӱ јарлап турганыныҥ једимдерин кӧрӧт пӧ? Кӧрӧт эмей! Јӱк Иеговага акту јӱректеҥ иштегенис бистиҥ јӱрӱмисти сӱӱнчилӱ ле ырысту эдип, тӱгенбес алкыштар экелер. (Укаа сӧстӧр 10:22 кычыр.)

²³ Кӧбизиске билегисти аш-курсакла, кийим-тудумла јеткилдеерге, кӧп иштеерге келижет. Иегова бисти эткен ижиске јакшызынып јӱрзин деп кӱӱнзеп турганын ундыбай јӱр. Бистиҥ ишке кӧрӱмис ле керектерис Иегова Кудайдыҥ кӧрӱмине ле принциптерине келижип турза, эдип турган ижис биске сӱӱнчи экелер. Оныҥ учун бу телекейдиҥ ижи эҥ учурлу ишке — Кудайдыҥ Каандыгы керегинде сӱӱнчилӱ јарды јарлаарына — буудак болбозын деп албаданып јӱреектер. Бу ишти јӱрӱмисте баштапкы јерге тургузып, бис Иегова Кудайды сӱӱп турганыс деп кӧргӱзип јадыбыс, анайып Оныҥ сӱӱжинде артадыс.