Бис туштажуларыска нениҥ учун јараш кийинедис?

Слер бу брошюраныҥ фотојуруктарынаҥ Иегованыҥ Керечилери бойлорыныҥ јуундарында ару, эптӱ кийинип тургандарын ајаруга алдар ба? Бис кийимге ле тыш бӱдӱмге нениҥ учун мындый ајару эдедис?

Кудайды тооп турганысты кӧргӱзерге. Кудайга кижиниҥ ичинде не бары тыш бӱдӱминеҥ артык дегени чын (1 Самуил 16:7). Андый да болзо, Иегова Кудайга бажырарга јуулышсас, бис Кудайды ла Ого бӱдӱп тургандарды тооп турганысты кӧргӱзерге тыҥ кӱӱнзейдис. Биске президентке барарга келишсе, оны тооп турганысты кӧргӱзерге кандый кийим кийетенин јакшы сананып талдаар эдис. Анайып ла христиан туштажулардагы бистиҥ тыш бӱдӱмис «чактардыҥ Каанын» — Иегова Кудайды ла Оны мактаарга јуулышкан јерди тооп турганысты кӧргӱзет (1 Тимофейге 1:17).

Кудайдыҥ бийик нормаларына јараар эдип кийинерге. Агару Бичик христиандарды «тӧп лӧ керсӱ» эдип кийинерине кӱӱнзедет (1 Тимофейге 2:9, 10, ЈТ). Тӧп кийинери дегени — ӧткӱре ачык, саҥ-башка, эмезе эби-јок сезимдерге кӱӱнзедип турган кийимдердеҥ кыйып турарын темдектейт. Керсӱ болоры — јараш эдип, аайлу-башту кийинерге болужат. Мындый принциптердиҥ болужыла јараш кийинетен аргалар кӧп. Јарамыкту ла эптӱ кийинзес, бис «Кудай Аргадаачыбыстыҥ ӱредӱзин» јарандырарыс ла Оны мактаарыс (Титке 2:10; Петрдыҥ 1-кы самаразы 2:12). Туштажуларга кийингенис улустыҥ Иегова Кудайга бажырарына салтарын јетирер аргалу.

Слерде јараш кийимдер јок болзо санааркабагар! Каандыктыҥ Туразына келзегер слерди улус јаантайын сӱӱнип уткыыр. Эҥ ле аҥылузы, кийим ару ла эптӱ болор учурлу.

• Христиан туштажуларга бистиҥ канайып кийингенис нениҥ учун јаан учурлу?

• Кийим талдаарына ла чачты канайып јазаарына (прическа) бис кандый принциптерле башкарынадыс?