Аксагалдар јуунда кандый иш эдип јат?

Бистиҥ организацияда аксагалдарга ижи учун акча тӧлӧбӧй јат. Је баштапкы чактыҥ христиан јуунында чылап, бисте «Кудайдыҥ јуунын кичеерге» кӧстӧлгӧн ченемелдӱ аксагалдар бар (Апостолдордыҥ ижи 20:28, ЈТ). Аксагалдар — тереҥ кӧгӱстӱ эр улус, олор јуунда башкартуны бойына алып, «Кудайдыҥ ӱӱрин... албан јокко, бойыныҥ кӱӱниле, уйатту кирелтеге болуп эмес, кӱӱнзеп» кичеегилейт (Петрдыҥ 1-кы самаразы 5:1—3). Бистиҥ керексиништеристи јеткилдеерге олор нени эдет?

Олор јуунды корулап јат. Аксагалдар башкарту берет ле јуунды ич-кӧгӱс каршунаҥ корулап јат. Иегова олорго кандый каруулу јакылта бергенин оҥдоп тура, олор Оныҥ албатызын бийленбей, карын бисти сӱӱнчилӱ ле амыр болзын деп, кӧп иштенгилейт (2 Коринфтегилерге 1:24). Бойыныҥ ӱӱринде кажы ла койды билер кичееҥкей кӱдӱчидий, аксагалдар бойыныҥ јууныныҥ кажы ла кижизин билерге албаданып јат (Укаа сӧстӧр 27:23).

Олор бисти Кудайдыҥ табын бӱдӱрерге ӱредип јат. Кажы ла неделеде аксагалдар бистиҥ бӱдӱп турганысты тыҥыдарга, јуунныҥ туштажуларын ӧткӱрип јат (Апостолдордыҥ ижи 15:32). Кудайга чындык мындый эр улус јарлаар ишти башкарып, бисле кожо јарлаарыныҥ башка-башка аргаларына туружат ла бисти јарлаарга ӱредип јат.

Олор кажыбыска ла ајару эдет. Аксагалдар јуунныҥ кажы ла кижизиниҥ ич-кӧгӱс керексиништерин кичееп јадылар. Олор Агару Бичимелди тузаланып айылдарыска келип, эмезе Каандыктыҥ Туразында јолыгыжып кӱдӱчиниҥ ижин бӱдӱрерге биске болужып, токунадар аргалу (Иаковтыҥ самаразы 5:14, 15).

Кӧп саба аксагалдар билелӱ, оныҥ учун јуунныҥ керектеринеҥ башка, олорго иштеерге ле билениҥ молјуларын бӱдӱрерге ӧй керек. Мындый иштеҥкей аксагалдар бистиҥ сӱӱжисти ле тоомјысты аларга јарамык (1 Фессалоникадагыларга 5:12, 13).

• Јуунныҥ аксагалдары кандый иш эдип јат?

• Аксагалдар кажыбыска ла канайып ајару эдет?