Бет-Эл дегени ол не?

«Бет-Эл» јебрен еврей тилдиҥ кӧчӱргениле «Кудайдыҥ туразы» деп адалат (Башталганы 28:17, 19, ЈТ, кӧчӱрӱ). Јарлаар ишти јӧмӧжӧргӧ тудулган тураларды мынайып адаганы учурыла сӱреен јакшы келижет. Иегованыҥ Керечилериниҥ андый туралары бастыра јердиҥ ӱстинде бар. Башкару јӧп АБШ-ныҥ Нью-Йорк штадында телекейлик тӧс башкарузында иштейт. Телекейлик тӧс башкару ӧскӧ ороондордо филиалдардыҥ ижин башкарып јат. Бет-Элдерде иштеп тургандарды Бет-Элдиҥ билези деп адайдылар. Бет-Элдиҥ улузы јаан нак биледий кожо јадып иштенгилейт, кожо ажангылайт ла кожо Агару Бичикти ӱренгилейт (Сарын 133:1).

Кудайдыҥ ижине бойын бир де кысканбай берип турган кайкамчылу биле. Бет-Элдиҥ улузы Кудайдыҥ табын бӱдӱрерге ле Каандыктыҥ керектерин бӱдӱрип иштеерге бойыныҥ ӧйин ле кӱчин толо берип јат (Матфей 6:33). Олордыҥ кемизи де иш-јал албай јат, је олорго ончозына јадар кып, курсак-тамак ла кандый бир чыгымдарга керектӱ кӧп эмес акча берилип јат. Кажы ла кижи кандый бир бӧлӱкке иштеерине кӧстӧлӧт. Кем де офисте иштейт, кем де курсак-тамак азар эмезе ажанар јерде иштейт. Кемди де типографияда эмезе бичиктер кадарлаар цехте иштеерине кӧстӧйт, је кемди де кыптар арутаарына, кийим јунарына, не-неме јазаарына ла оноҥ до ӧскӧ јаан учурлу иштер бӱдӱрерине кӧстӧйт.

Каандык керегинде јарлаар ишти ичкерледип турган јер. Бет-Элдиҥ тӧс амадузы — кӧп улусты библиялык чындыкла таныштырары. Бу брошюра андый ла амадулу белетелген. Бу бичик Башкару јӧптиҥ болужыла бичилип, бастыра јердиҥ ӱстинде јӱстер тоолу кӧчӱреечилердиҥ бӧлӱктерине электронный бӱдӱмге аткарылып, кезик Бет-Элдердиҥ типографияларында тӱрген иштеер оборудованиеле кепке базылып, 110 000-наҥ кӧп тоолу јуундарга јетирилген. Бу иштиҥ кажы ла алтамында Бет-Элдиҥ ишчилери сӱӱнчилӱ јарды јарлайтан эҥ керектӱ ишке јӧмӧжип, албаданып иштенгендер (Марк 13:10).

• Бет-Элде кемдер иштейт ле олор неле јеткилделет?

• Бет-Элде кандый иш эдилип јат?