11 БАЖАЛЫК
Кыйын-шыра јердиҥ ӱстинде нениҥ учун андый кӧп?
1, 2. Кӧп улус недеҥ улам санааркайт?
БӰГӰНГИ кӱнде кӱнӱҥ сайын кандый ла тӱбек болуп јат. Темдектезе, суу кӧдӱрилип, улустыҥ тураларын алып ийет, терроризмнеҥ улам кӧп улус божойт эмезе рак оорудаҥ божоп калган улустыҥ балдары ада-эне јок артып калат.
2 Улус бу мындый тӱбек болгонын угуп: «Нениҥ учун андый болот?» — деп, сурак бергилейт. Олор јердиҥ ӱстинде нениҥ учун мындый кӧп кыйын-шыра болот деп санааркап јадылар. Слерде мындый сурак болгон бо?
3, 4. а) Аввакум Иеговага кандый сурактар берген? б) Иегова ого кандый каруу берген?
3 Мындый сурактар Кудайга тыҥ бӱткен де улуста болгон деп, Агару Бичиктеҥ билип јадыс. Темдектезе, судурчы Аввакум Иегованаҥ мынайып сураган: «Меге јаманды не кӧргӱзип јадыҥ? Кыйын-шыраны не токтотпойдыҥ? Уурданышты ла базынышты канайып кӧрӧйин? Кериш-тартыш ла ӧӧн-бӧкӧн нениҥ учун токтобойт?» (Аввакум 1:3).
4 Аввакум 2:2, 3-те Кудай бу судурчыга кандый каруу бергени бичилген. Анайда ок Кудай Аввакумга айалга солынып калар деп сӧзин берген. Иегованыҥ улусты тыҥ сӱӱп турганын: «Ол слерди кичееп кӧрӱп јӱрӱ» — деп сӧстӧрдӧҥ кӧрӧдис (1 Петр 5:7). Чынынча болзо, Кудай јаманды ла кыйын-шыраны бистеҥ тыҥ јаман кӧрӧт. Андый болордо, јердиҥ ӱстинде нениҥ учун андый кӧп кыйын-шыра болот? Каруузын Агару Бичиктеҥ билип аларыс.
УЛУС НЕНИҤ УЧУН ШЫРАЛАП ЈАТ?
5. Кандый бир јеткер болзо, кӧп абыстар нени айдыжат? Агару Бичик јеткер керегинде нени айдат?
5 Кижиниҥ јӱрӱминде не болорын, керек дезе кандый бир јеткер болорын Кудайдаҥ берилген салым деп айдыжат. Оныҥ учун кӧп пасторлордыҥ, абыстардыҥ эмезе кудай јаҥныҥ ӱредӱчилериниҥ айтканыла болзо, улустыҥ кыйын-шыразы Кудайдыҥ табыла болуп јат. Кезик улустыҥ санаазыла, Кудай божогон улусты, ол тоодо балдарды бойына теҥеридӧӧн алып алат. Је бу ӱзе тӧгӱн. Иегова качан да кыйын-шыра этпей јат. Агару Бичикте: «Кӱчтӱдеҥ Кӱчтӱ чындык Кудайдыҥ јаман неме эдер аргазы јок!» — деп айдылат (Иов 34:10).
6. Кӧп улус ончо тӱбекте нениҥ учун Кудайды бурулап јат?
6 Кӧп улус јердиҥ башкараачызы Кудай деп сананат, оныҥ учун јердеги болуп турган ончо тӱбекте Кудайды бурулап јат. Је чынынча болзо, 3-чи бажалыктаҥ билип алганысла, телекейле Сатана башкарат.
7, 8. Нениҥ учун телекейде андый кӧп кыйын-шыра болуп јат?
7 Агару Бичикте: «Телекей дезе бӱткӱлинче јаманныҥ [Сатананыҥ] табында» — деп айдылат (1 Иоанн 5:19). Телекейдиҥ коркышту калју башкараачызы — Сатана Дьявол. Ол «бастыра телекейди мекелеп» јат (Ачылта 12:9). Оныҥ башкарузынаҥ улам кӧп саба улус база калју болуп калат. Айдарда, улустыҥ бой-бойын тӧгӱндеп, јаман кӧрӱп, базынып турганыныҥ баштапкы шылтагы — Сатана Дьявол болот.
8 Ӧскӧ шылтактар база бар. Адам ла Ева Кудайга удура туруп, толо кемин јылыйтып салган. Анайып олордыҥ балдары кинчектӱ болуп чыккан. Оныҥ учун кинчек — кыйын-шыраныҥ база бир шылтагы. Улус кинчектӱ болуп калганынаҥ улам, бой-бойынаҥ артык болорго албаданат, јаҥ учун тартыжат, јуулажат ла бой-бойын базынып јат (Јарлыкчы 4:1; 8:9). Анайда ок кыйын-шыраныҥ база бир шылтагы — «ӧй лӧ учурал» (Јарлыкчы 9:11). Бу дезе, кижи келишпес ӧйдӧ лӧ келишпес јерде болуп калганынаҥ улам, тӱбекке кирип каларын кӧргӱзет.
9. Кудайда кыйын-шыраны токтотпой турганында јаан шылтак бар деп, бис нениҥ учун алаҥзыбас аргалу?
9 Иегова улуска јаман этпей јат. Улустыҥ каршулу керектер эдип, јуулажып, бой-бойын базынып турганында, анайда ок јер силкингенинде, јоткон болгонында, суу кӧдӱрилгенинде ле ӧскӧ дӧ тӱбекте Кудайдыҥ бурузы јок. Је слерди тӱҥей ле: «Иегова — Кӱчтӱдеҥ Кӱчтӱ Кудай болордо, нениҥ учун јаманды токтотпой турган?» — деп сурак токунатпай турган болор. Агару Бичикте Кудай бисти тыҥ сӱӱп турган деп айдылат. Айдарда, кыйын-шыраны токтотпой турганында јаан шылтак бар болот (1 Иоанн 4:8).
КЫЙЫН-ШЫРАНЫ КУДАЙ НЕНИҤ УЧУН ТОКТОТПОЙ ЈАТ?
10. Сатана Иегова керегинде нени айткан?
10 Эдем садта Сатана Адам ла Еваны тӧгӱндеп ийген. Ол Иегованы јаман башкараачы деп бурулап, улустаҥ јакшы та нени де јажырып турган деп айткан. Анайып, Дьявол, Иегова Кудайга кӧрӧ јакшы башкарар ла улусты Кудай јогынаҥ јакшы јӱрер деп бӱдӱмјилеерге кӱӱнзеген (Башталганы 3:2—5; 26 Кожултаны кӧрӱгер).
11. Биске кандый сурактыҥ каруузын билер керек?
11 Адам ла Ева Иеговага удура барып, оны укпай баргылаган. Олор јакшыныҥ ла јаманныҥ нормаларын бойлоры тургузар аргалу деп сананган. Иегова Адам ла Еваныҥ сананганыныҥ јастыразын кӧргӱзерге ле улустыҥ ырысту болоры јӱк ле Кудайдаҥ камаанду деп кӧргӱзерге нени эткен?
12, 13. а) Иегова Адам ла Еваны нениҥ учун јоголтпогон? б) Иегова Сатанага телекейле башкаратан, анайда ок улуска бойыныҥ башкаруларын тургузатан ӧйди нениҥ учун берген?
12 Иегова Адам ла Еваны кинчек эткен ле кийнинде јоголтпогон, оныҥ ордына олорго балдарлу болор арга берген. Мынайып эткениле Иегова Адам ла Еваныҥ бала-барказына башкараачыны бойлоры талдаар арга берген. Анайып Кудайдыҥ јерди толо кемдӱ улусла толтырар амадузы, Сатана Кудайга канайып та удурлашкан болзо, тӱҥей ле бӱдӱп калар эди (Башталганы 1:28; Исаия 55:10, 11).
13 Сатана Иегованы миллиондор тоолу ангелдердиҥ алдына јабарлап салган (Иов 38:7; Даниил 7:10). Оныҥ учун Иегова Сатанага бойыныҥ акту болгонын кӧргӱзип кӧрзин деп, ӧй берген. Анайда ок улуска Сатананыҥ болужыла, је Кудайдыҥ алкыжы јогынаҥ бойлоры башкарулар тургузып кӧрзин деп, ӧй берген.
14. Соондо не јарт кӧрӱне берген?
14 Улус канча муҥ јылдардыҥ туркунына бойлоры башкарынарга албаданган, је мыны јакшы эдип болбогон. Је соондо Сатана — тӧгӱнчи болгоны ла улус Кудайдыҥ болужы јогынаҥ једимдӱ башкарынып болбозы јарт кӧрӱне берген. Бу керегинде судурчы Иеремия бичиген: «О-о Иегова, кижи бойыныҥ јӱрӱмин ле алтамдарын башкарып болбос деп, мен билерим» (Иеремия 10:23).
НЕНИҤ УЧУН АНДЫЙ УЗАК?
15, 16. а) Иегова улустыҥ кыйын-шыразын нениҥ учун эмдиге јетире токтотпогон? б) Иегова Сатананыҥ башкарузынаҥ улам болуп турган уур-кӱчтердиҥ аайы-бажына нениҥ учун чыкпай турган?
15 Је Иегова улустыҥ кыйын-шыразын нениҥ учун эмдиге јетире токтотпогон? Кудай мыныҥ аайына нениҥ учун чыкпай јат? Нениҥ учун дезе Дьяволдыҥ једимдӱ башкарып болбозы, ончо улуска јарт боло берзин деп, ӧй керек болгон. Улус јӱзӱн-башка аргаларла башкарынган да болзо, качан да јакшы башкарынып болбогон. Анайда ок наука ла техника јанынаҥ јаан једимдерге јединген де болзо, је телекейдеги кыйын-шыраны токтодып болбой јат. Бис улустыҥ јоксырап турганын, каршулу керектер эдип турганын ла јуулажып-согужып турганын кӧрӱп јадыс. Айдарда, улус Кудай јогынаҥ једимдӱ башкарынып болбос.
16 Иегова Сатананыҥ башкарузынаҥ улам болуп турган уур-кӱчтердиҥ аайы-бажына нениҥ учун чыкпай турган? Нениҥ учун дезе, анайып Иегова Сатанага болужып турган болор эди. Анайда ок улус бойын јакшы башкарынып турган деп сананар. Анайып, Кудай тӧгӱнге јӧмӧжип турган болор эди. Је ол качан да мынайып этпес, не дезе ол тӧгӱндебес Кудай (Еврейлерге 6:18).
17, 18. Сатананыҥ кӧдӱрген тӱймеениниҥ каршузын Иегова канайып јоголтор?
17 Иегова Сатананыҥ ла улустыҥ сӧс укпазынаҥ улам табылган ончо уур-кӱчтерди јоголтып болор бо? Эйе, нениҥ учун дезе Кудайдыҥ эдип болбос немези јок. Сатананыҥ тӧгӱни јартала берген кийнинеҥ, Иегова бу уур-кӱчтердиҥ аайы-бажына чыгар. Ол тушта, Кудайдыҥ амадузы аайынча, јердиҥ ӱстинде ойто рай болор. «Сӧӧк салар јерде јаткандар» тирилер (Иоанн 5:28, 29). Оору-јобол ло ӧлӱм болбос. Иисус «кӧрмӧстиҥ керектерин бузар» ла оныҥ тӱймеениниҥ ончо каршузын јоголтор (1 Иоанн 3:8). Је эм тура Иегова улуска оны билип аларга ла бойыныҥ башкараачызы эдип талдап алар арга берет! (2 Петр 3:9, 10 кычырыгар.) Бӱгӱнги кӱнде кӱчтер јогынаҥ кем де јӱрбей јат, је Иегова биске олорды ӧдӱп чыгарга болужар. (1 Коринфтегилерге 10:13 кычырыгар.)
18 Иегова бисти бойына бактырып аларга албадабай јат. Ол улуска баалу сый — јайым кӱӱндӱ болорын сыйлаган. Бу нени темдектеп турганын билип алактар.
СЛЕР НЕНИ ТАЛДААРЫГАР?
19. Иегова улуска нени берген? Биске нениҥ учун оны баалар керек?
19 Улуста, инстинктле јӱрӱп турган тындуларга кӧрӧ, јайым кӱӱн бар, ӧскӧртӧ айтса, канайып јӱретенин бис бойыс кӧрӧр аргалу (Укаа сӧстӧр 30:24). Бистиҥ јӱрӱмис Иегованы сӱӱндирер бе, јок по бойыстаҥ камаанду. Бис программировать эдип салган роботтор ошкош эмезис. Иегова јӱрӱм биске сӱӱнчи экелип турзын деп кӱӱнзеген, оныҥ учун биске кандый кижи болорысты, кемле најылажарысты ла нени эдеристи шӱӱп-сананатан јайым берген.
20, 21. Јӱрӱмде кандый јол эҥ артык?
20 Иегова, бисти оны сӱӱзин деп кӱӱнзейт (Матфей 22:37, 38). Канайып сананадаар, баланы адазына: «Мен сени сӱӱп јадым» — деген сӧстӧрди албадап айттыртса ба эмезе бала бу сӧстӧрди акту јӱрегинеҥ айтса јакшы ба? Анайып ла Иегова — бистиҥ адабыс, бисти оны сӱӱзин деп албадабай јат. Оныҥ учун бис ого иштеерис пе, јок по деп бойыс талдаар аргалу. Је Сатана, Адам ла Ева Кудайды укпай јӱрерин талдап алган. Слер нени талдараар?
21 Јӱрӱмниҥ эҥ јакшы јолын талдап — Иеговага иштеп баштагар! Миллиондор тоолу улус Кудайга иштеер јолды талдап алганыла, Сатананы эмес, је Кудайды сӱӱндирип јат (Укаа сӧстӧр 27:11). Иегова келер ӧйдӧ улус база шыралабас деп сӧзин берет. Бу сӧстӧрдиҥ бӱдерин кӧрӧргӧ, слер нени эдер аргалу? Бу керегинде бис келер бажалыктаҥ билип аларыс.