8 УРОК

Темдер тузаланып ӱрет

Матф. 13:34, 35

АМАДУЗЫ Јӱректи томултып, учурлу чындыктарга ӱредип саларга, јарт темдер тузалан.

МЫНЫ КАНАЙЫП ЭДЕР

Јарт темдер тузалан. Иисустаҥ тем алып, јаан учурлу эмезе оҥдоорго кӱч шӱӱлтелерди улуска таныш темдердиҥ болужыла јарта. Темди кереги јок јетирӱлерле уурлатпа. Јартап турган шӱӱлтеҥге тем јакшы келижип турган ба деп, бӱдӱмјиленип ал. Оноҥ ӧскӧ угаачыларыҥ темди јетире оҥдобой, шӱӱлтени јылыйтып алар.

Ајарыҥкай бол. Айландыра не болуп турганын ајарып, Агару Бичикке тайанган бичиктерди кычырып, анайда ок ченемелдӱ ӱредӱчилердеҥ ӱренип тур. Анайып, сен тузаланып тургадый темдериҥди кӧптӧдип аларыҥ.
Угаачыларыҥ керегинде санан. Угаачыларыҥа јарт темди тузаланып тур. Ол тем олордыҥ јӱрӱмиле, кӱнӱҥ сайын эдип турган керектериле колбулу болзын. Угаачыларыҥды эби јок айалгага тургускадый эмезе ачындыргадый темдерди тузаланбаска албадан.
Тӧс шӱӱлтелерди аҥылап тур. Темдерди тегин шӱӱлтелерди јартаарга эмес, је тӧс шӱӱлтелерди јартаарга тузалан. Угаачыларыҥ јаҥыс темниҥ бойын эмес, је оны не керектӱ тузаланганыҥды сананып алзын.