Слер Иегованыҥ јуук најызы болор аргалу

Иегова слерле јууктада таныжып аларга турган. Ол улуска канайып баштанып турганын ла слерге нени белетеп салганын билип алзын деп кӱӱнзейт. Иегова, слер оныла јууктада таныжып келзеер, ого најы болорго кӱӱнзей беререер деп иженет. Кудайга најы болотон арга бар ба? (Сарын 25:14 кычырыгар.) Најы болорго нени эдер керек? Бу сурактардыҥ каруулары Агару Бичикте бар. Анайда ок бу бичиктеҥ Кудайла најылашканаардаҥ артык не де јок деп билип алараар.

1. Иегова слерди нени этсин деп кӱӱнзейт?

«Кудайга јууктагар, Ол слерге јууктаар» (Иаков 4:8). Бу сӧстӧрлӧ Кудай нени айдарга сананган? Иегова слерге најы болорго кӱӱнзейт. Је та кем де айдар болор: «Кӧрӱнбей турган Кудайла кижи канайып најылажар?» Агару Бичикте ол бойы керегинде кӧпти ачып салган. Бу бичикти кычырып турзаас, бистиҥ Кудайла колбуларыс тыҥыыр. Оныҥ учун Кудай кӧрӱнбей де турган болзо, бисте оныла најылажатан арга бар.

2. Иегова нениҥ учун эҥ јакшы најы?

Слерди Иегова чылап кем де сӱӱбей јат. Ол слерди ырысту болзын ла мӱргӱӱл ажыра оноҥ јаантайын болуш суразын деп кӱӱнзейт. Оныҥ учун бис не де керегинде санааркабай, ого иженер аргалу (1 Пётр 5:7). Ол најыларын угарга, токунадарга, олорго болужарга белен. (Сарын 94:18, 19 кычырыгар.)

3. Иегова бойыныҥ најыларынаҥ нени сакыйт?

Иегова бастыра улусты сӱӱп јат, је јуук најым деп, кажы ла кижини айтпай јат (Укаа сӧстӧр 3:32). Иегованыҥ јуук најызы болорго, ого јарап турган керектер эдерге албаданып, јарабай турган керектер этпес керек. Та кем де: «Мен Иегованыҥ бийик нормаларыла јӱрӱп болбозым» — деп айдар болор. Је Иегова бисти оҥдоп, эдип болбос немени некебей турган. Эҥ ле учурлузы — биске Иегованы акту јӱрегистеҥ сӱӱр керек. Анайда ок, оныҥ айткан сӧзин бӱдӱрип турар керек (Сарын 147:11; Апостолдордыҥ ижи 10:34, 35).

ТЕРЕҤЖИДЕ КӦРӰГЕР

4. Авраам Иегованыҥ најызы болгон

Авраамныҥ (Аврамныҥ) теминеҥ, Кудайдыҥ најызы болоры — ол не дегенин билип аларга јараар. Авраам керегинде Башталганы 12:1—4 кычырып, бу сурактарды шӱӱжип ийигер:

• Иегова Авраамды нени этсин деп сураган?

• Иегова Авраамга не деп сӧзин берген?

• Иегованыҥ сурагын Авраам канайып бӱдӱрген?

5. Иегова најыларынаҥ нени сакыйт?

Најыларыс биске болужар деп сакып турганыста јаман неме јок.

• Слер најылараардаҥ нени сакыйдаар?

1 Иоанн 5:3 кычырып, бу суракты шӱӱжип ийигер:

• Иегова најыларынаҥ нени сакыйт?

Кудайга јараарга турган болзоос, биске бойыстыҥ кылык-јаҥысты эмезе керектеристи солыырга келижердеҥ айабас. Исайя 48:17, 18 кычырып, бу суракты шӱӱжип ийигер:

• Иегова нениҥ учун најыларын јӱрӱминде та нени де солызын деп сурап јат?

6. Иегова најыларына канайып болужат?

ВИДЕО: «Иегова меге андый кӧп болушкан!» (3:20)

• Иегова бу ӱй кижиге јаман санааларыла, сезимдериле тартыжарга канайып болужат?

Исайя 41:10, 13 кычырып, сурактарды шӱӱжип ийигер:

• Иегова ончо најыларына не деп сӧзин берет?

• Слер канайып сананадаар, Иегова — јакшы најы ба? Јартап беригер.

7. Иегованыҥ најызы болорго, оныла куучындажар керек

Јакшы куучын јогынаҥ најылажар арга јок. Сарын 86:6, 11 кычырып, бу сурактарды шӱӱжип ийигер:

• Бис Иеговала канайып куучындажар аргалу?

• Иегова бисле канайып куучындажат?

ТӦС ШӰӰЛТЕЗИ

Иегова слердиҥ најыгар болорго кӱӱнзеп јат. Оныла јуук колбуларлу болорго, ол слерге болужып берер.

Нени билип алдыгар?

• Иегова најыларына канайып болужат?

• Иегова нениҥ учун најыларын јӱрӱминде та нени де солызын деп сурап јат?

• Иегова најыларынаҥ эдип болбос немени сакыйт па? Јартап беригер.

ШИҤДЕЙТЕН МАТЕРИАЛ

Кудайла најылашсаар, јӱрӱмеер солынар аргалу.

«Иегова Кудайла најылашканы калас болбос» («Каруулчы шибее», 2003 јыл, кочкор ай 15)

Кудайла најылажарга нени эдер керек деп билип алыгар.

«Кудайла најылажарга нени эдер керек?» («Сениҥ сурактарыҥныҥ каруулары», 2 том, 35 бажалык)

Иеговала најылашканы бу ӱй кижиниҥ јӱрӱмин канайып аргадаган?

«Ӧлӧр кӱӱним јок болгон!» («Каруулчы шибее», № 1 2017)

Јииттер Иегованы нениҥ учун баалап турганын куучындайт.

«Иегованыҥ најызы болоры — ол не дегени?» (1:46)