11 УРОК

Агару Бичикти кычырары тузалу болзын деп нени эдер керек?

Кепке базылган чыгарма

Слерге кандый бир јаҥы иш баштаарга кӱч болуп турган ба? Эйе болзо, бу ишти кичинек бӧлӱктерге бӧлӱп ийзе, ол андый ла кӱч деп билдирбес. Анайып ла Агару Бичикти кычырып баштаарга, база кӱч болордоҥ айабас. Слер: «Недеҥ баштаар?» — деп сананып турган болороор. Бу уроктоҥ Агару Бичикти кычырарга ла ӱренерге јеҥил болзын деп болужатан эп-аргалар шӱӱжип ийерис.

1. Агару Бичикти нениҥ учун јаантайын кычырар керек?

Агару Бичикти — Иегованыҥ јасагын, јаантайын кычырып турган кижи ырысту ла једимдӱ болор. (Сарын 1:1—3 кычырыгар.) Озо баштап Агару Бичикти кажы ла кӱн тоолу ла минутка кычырып кӧрӱгер. Оны канча ла кире кӧп кычырзаар, кычырарга ончо ло кире јарап баштаар.

2. Агару Бичикти кычырганаар слерге тузалу болзын деп, нени эдер керек?

Агару Бичикти кычырганаар тузалу болзын деп, токтой тӱжӱп, нени кычырганаарды сананып туругар. Кычырары ла шӱӱп сананары сӱреен керектӱ болуп јат (Иисус Навин 1:8, сноска). Кычырып турган ӧйдӧ бойоорго мындый сурактар беригер: «Мен Иегова Кудай керегинде нени билип алдым? Кычырып алганымды јӱрӱмимде канайып тузаланарым? Улуска болужарга, бу ӱлгерлерди канайып тузаланарым?»

3. Агару Бичикти кандый ӧйдӧ кычырар?

Слерге Агару Бичикти кычыратан ӧй табып турарга кӱч болот по? Кӧп улуска кӱч болот. Оныҥ учун ӧйди баалап, оны калас ӧткӱрбеске албаданып кӧрӱгер (Эфестегилерге 5:16). Айдарда, слер Агару Бичикти кажы ла кӱн кандый ӧйдӧ кычырараар деп сананып алыгар. Темдектезе, кезик улуска Агару Бичикти эртен тура кычырарга јарап јат, а та кем де тал-тӱштиҥ ӧйинде кычырат, а кемге де эҥирде кычырарга эптӱ болот. Слерге кандый ӧйдӧ эптӱ болор?

ТЕРЕҤЖИДЕ КӦРӰГЕР

Агару Бичикти кычырарга јилбилӱ болзын деп нени эдер керек? Агару Бичикти ӱренери тузалу болзын деп канайып белетенер?

Јуруктар: Уул курсак јиирге ӱренип јат. 1. Уулчакка курсак чек јарабай јат. 2. Эмеш јаанап келеле, курсакты јип јат. 3. База эмеш ӧйдӧҥ ол курсакты јакшызынып јип јат. — Канайып јаҥы курсакты сӱӱп баштаарга оны бир эмештеҥ јиир керек, анайып ла Агару Бичикти кычырарга јарап баштазын деп, оны бир эмештеҥ кычырар керек

4. Агару Бичикти јакшызынып кычырыгар

Агару Бичикти кычырып баштаары — јаҥы курсак јиирине тӱҥей. Озо баштап јаҥы курсак амтамду эмес деп билдирер болор, је бир канча ӧйдӧҥ бу курсак јарап баштайт. 1 Пётр 2:2 кычырып, суракты шӱӱжип ийигер:

Канайып сананадаар, Агару Бичикти кажы ла кӱн кычырып баштазаар, слерге ол јарап, оноҥ ло ары оны кычырар кӱӱнеер келер бе?

ВИДЕОНЫ кӧрӱп, бу улуска Агару Бичикти кычырарга, нениҥ учун јарай берген деп билип алыгар. Оноҥ бу сурактарды шӱӱжип ийигер.

ВИДЕО: «Јииттер Кудайдыҥ Сӧзин сӱӱрге ӱренет» (5:33)

Бу уулдарга ла кыстарга Агару Бичикти јаантайын кычырарга нениҥ учун кӱч болгон?
Агару Бичикти јаантайын кычырарга олорго не болушкан?
Агару Бичикти кычырарга олорго нениҥ учун јарап баштаган?

Недеҥ баштаар?

Эмдиги ӧйдиҥ тилине бичилген јарт кӧчӱрмени талдап алыгар. Слердиҥ тилге бар болзо, «Јаҥы телекей» деп кӧчӱрмени тузаланыгар.
Агару Бичикти слерге јилбилӱ болотон јердеҥ ала кычырып баштагар. «Агару Бичикти кычырып баштагар» деп графиктиҥ болужыла кычырарга јараар.
Кычырып салган бажалыктарды темдектеп туругар. Бу бичикте «Агару Бичикти кычыратан график» деген кожултаны тузаланыгар.
JW Library^® приложениени тузаланыгар. Бу приложениени бойыгардыҥ смартфоноорго эмезе ӧскӧ кандый бир электронный эдимеерге тургузып алыгар. Оныҥ болужыла Агару Бичикти кайда да јӱрзеер, кычырарга да, угарга да јараар.
«Јаҥы телекей» деп кӧчӱрмениҥ кожулталарын тузаланыгар. Анда карталар, таблицалар ла сӧзлик бар. Олордыҥ болужыла Агару Бичикти кычырарга јилбилӱ болор.

5. Ӱредӱге белетенип туругар

Сарын 119:34 кычырып, суракты шӱӱжип ийигер:

Агару Бичикти кычырардаҥ озо эмезе ӱредӱге белетенердеҥ озо нениҥ учун мӱргӱӱр керек?

Кажы ла ӱредӱ тузалу болзын деп, слер нени эдер аргалу? Бу курстыҥ урокторына белетенерге, мындый эп-арганы тузаланып кӧрӱгер:

А. Кажы ла уроктыҥ баштапкы бӱгин бойоор кычырып алыгар.
Б. Агару Бичиктиҥ берилген кажы ла ӱлгерин кычырып алыгар. Олор уроктыҥ темазыла кандый колбулу болгонын сананыгар.
В. Суракка каруу берип турган тӧс сӧстӧрди эмезе шӱӱлтелерди тартып алыгар. Анайып слер ӱредӱчиле кожо урокты шӱӱжерге јакшы белетенип алараар.

Јуруктар: Ӱй кижи ӱредӱге белетенип јат. А. Ол уроктыҥ баштапкы бӱгин кычырып јат. Б. Агару Бичиктиҥ ӱлгерлерин кычырып јат. В. Уроктыҥ тӧс сӧстӧрин эмезе шӱӱлтелерин тартып јат.

Слер билереер бе?

Иегованыҥ Керечилери Агару Бичиктиҥ башка-башка кӧчӱрмелерин тузаланат. Је биске анчада ла «Јаҥы телекей» деп кӧчӱрме јарап јат. Нениҥ учун дезе анда Кудайдыҥ ады бичилген. Оны оҥдоорго јеҥил ле јарт. «Иегованыҥ Керечилеринде бойыныҥ Агару Бичиги бар ба?» деп веб-статьяны кӧрӱгер.

КЕЗИК УЛУС АЙДАТ: «Агару Бичикти шиҥдеерге коркышту кӱч. Менде ӧй дӧ, ийде-кӱч те јок».