Кижи божозо, оныла не болот?

Слер јуук улузаарды јылыйткан болороор. Бу кӱч ӧйдӧ мындый сурактар чыгардаҥ айабас: «Кижи божоп калза не болот? Ол кижини качан бирде ойто кӧрӧрим бе?» Бу уроктоҥ ло келер уроктоҥ бу сурактардыҥ карууларын Агару Бичиктеҥ билип аларыс.

1. Кижи божоп калза не болот?

Иисус ӧлӱмди тереҥ уйкула тӱҥдештирген. Нениҥ учун? Канайып кижи тереҥ уйуктап јатса, айландыра не болуп турганын билбей јат, анайып ла божоп калган кижи нени де, ол тоодо ооруны да, билбей јат. Кижи тирӱ тужында најыларын, тӧрӧӧндӧрин андый тыҥ сӱӱген де болзо, божоп калза, олорды сананбай да јат, кунукпай да јат. Агару Бичикте: «Божогон улус... нени де билбес» — деп айдылат. (Экклезиаст 9:5 кычырыгар.)

2. Божоп калган улус керегинде чынды билгенис биске канайып болужат?

Кӧп саба улус ӧлӱмнеҥ ле божоп калган улустаҥ коркып јат. Је Агару Бичиктеҥ божоп калган кижиле не болуп турганын билип алзаас, бу бисти токунадар болор. Иисус айткан: «Чындык... слерди јайымдаар» (Иоанн 8:32). Кезик кудай јаҥдар кижиде сӱне бар, кижи божоп калза, ол оноҥ ары јӱрет деп ӱредет. Је Агару Бичик бого ӱретпей јат. Оныҥ учун божоп калган улус шыралап, кыйналып турган деп, биске санааркабас керек. Божоп калган улус нени де билбес болзо, олор биске каршузын јетирип болбос. Оныҥ учун олорго бажырбас та керек, кӱндӱ-кӱрее де этпес керек. Анайда ок бистиҥ мӱргӱӱлдерис те олорго болушпас.

Кезик улус божоп калган улусла куучындажып турганыс деп бӱдет. Је мындый болор аргазы јок. Ӧрӧги айдылганыла, божоп калган улус нени де билбес. Божоп калган улусла куучындажып турганыс деп бӱдӱп турган улус, чынынча болзо, кӧрмӧстӧрлӧ куучындажат. Нениҥ учун дезе кӧрмӧстӧр божоп калган улуска тӱҥей болуп кубулып алала, кезик улуска кӧрӱнет. Айдарда, божоп калган улус керегинде чынды билгенис бисти кӧрмӧстӧрдӧҥ корулап јат. Иегова бисти корулаарга кӱӱнзейт. Оныҥ учун бисти божоп калган улусла куучындашпазын деп айдат. Кӧрмӧстӧрлӧ колбу тутканы коркышту каршулу деп ол билер. (Јаҥды такыганы 18:10—12 кычырыгар.)

3. Божоп калган улусла не болуп турганы керегинде чынды билип алыгар

Ӧлӱм керегинде кажы ла албаты башка-башка айдат. Је олордыҥ кӧрӱми Агару Бичикке келишпей јат.

• Слердиҥ јердеги улус неге бӱдет?

ВИДЕО: «Кижи божоп калза, не болуп турган?» (ӱзӱги) (1:19)

Экклезиаст 3:20 кычырып, сурактарды шӱӱжип ийигер:

• Бу ӱлгерле болзо, божоп калган кижиле не болуп јат?

• Кижи божоп калза, сӱнези оноҥ ары јӱрет пе?

Агару Бичикте Иисустыҥ јуук најызыныҥ, Лазарьдыҥ, ӧлӱми керегинде айдылат. Иоанн 11:11—14 кычырыгар. Кычырып тура, Лазарь божоп каларда оныла не болгоны керегинде Иисус нени айтканын ајаруга алыгар. Оноҥ сурактарды шӱӱжип ийигер:

• Иисус ӧлӱмди неге тӱҥдештирген?

• Бу тӱҥдештирӱнеҥ божоп калган кижиле не болуп турганы керегинде нени билип аладыс?

• Агару Бичиктиҥ бу ӱредӱзи керегинде нени сананадаар?

4. Божоп калган улусла не болуп турганын билери нениҥ учун тузалу?

Кижи божозо оныла не болуп турганын билзеес, божогон улустаҥ коркыбай јадыс. Экклезиаст 9:10 кычырып, суракты шӱӱжип ийигер:

• Божогон улус биске каршу јетирип болор бо?

Анайда ок Агару Бичиктеги чындык бисти тӧгӱн ӱредӱлердеҥ корулайт. Божогон улуска бажырбас керек, олорго кӱндӱ-кӱрее этпес керек. Исайя 8:19 ла Ачылта 4:11 кычырып, суракты шӱӱжип ийигер:

• Божогон улуска бажырып турган ла олордоҥ болуш сурап турган улуска Иегова канайып кӧрӧт?

5. Ӧлӱм керегинде чынды билгенис бисти токунадат

Кӧп улустыҥ санаазыла болзо, кижи божоп калза, бойыныҥ кинчектери учун кыйналар. Је ӧлӱмниҥ кийнинеҥ кем де, керек дезе коркышту јаман керектер де эткен кижи, кыйналбай турган деп билерге кандый јакшы! Римдегилерге 6:7 кычырып, суракты шӱӱжип ийигер:

• Агару Бичикле болзо, кижи божозо, бастыра кинчектери ташталып калат. Андый болзо, божогон кийнинде кижи бойыныҥ кинчектери учун кыйналар ба?

Иегованы канча ла кире јакшы билип алзаар, ол улусты ӧлӱмниҥ кийнинеҥ кыйнабай турган деп, ончо ло кире јарт билип алараар. Јаҥды такыганы 32:4 лӧ 1 Иоанн 4:8 кычырып, сурактарды шӱӱжип ийигер:

• Мындый јакшы кылык-јаҥду Кудай улусты ӧлӱмниҥ кийнинеҥ кыйнап турган ба?

• Кижи божозо не болуп турганы керегинде чындык токунадып јат па? Нениҥ учун?

ТӦС ШӰӰЛТЕЗИ

Кижи божоп калза, оныҥ јӱрӱми токтоп калат. Божогон улус шыралабай да јат, тирӱ улуска каршузын јетирбей де јат.

Нени билип алдыгар?

• Ӧлӱмниҥ кийнинеҥ не болот?

• Ӧлӱм керегинде чынды билгени кандый туза берет?

• Ӧлӱм керегинде чынды билгени бисти канайып токунадат?

ШИҤДЕЙТЕН МАТЕРИАЛ

Кинчектер эдип турган улусты Кудай отту таамыда кыйнап турган ба деп билип алыгар.

«Кижи божозо, отту таамыда кыйналат па?» (3:07)

Божогон улустаҥ коркыыр шылтак бар ба?

«Духи мёртвых. Могут ли они помочь или навредить тебе? На самом ли деле они существуют?» (брошюра)

Бир эр кижи ӧлӱм керегинде чынды билип алала, канайып токунаганын билип алыгар.

«Агару Бичиктиҥ јарт, чокум карууларын билип алала, чынды билип алгам» («Каруулчы шибее», 2015 јыл, кочкор ай 1)