37 УРОК
Агару Бичикте иш ле акча керегинде не айдылат?
Слер качан бирде иш эмезе акча јанынаҥ санааркаганаар ба? Кезикте ишти ле Иеговага бажырарын теҥ-тай апарарга јеҥил эмес болот. Агару Бичикте бу јанынаҥ тузалу јӧптӧр бар.
1. Агару Бичикте иш керегинде не айдылат?
Иегова бисти ижистеҥ сӱӱнчи алзын деп кӱӱнзейт. Агару Бичикте: «Кижиге... эткен ижине сӱӱнип јӱреринеҥ артык неме јок» — деп айдылат (Экклезиаст 2:24). Иегова кӧп иштенип јат. Бис оноҥ тем алып, ижисти јакшы бӱдӱрип турзаас, Кудайысты да сӱӱндирерис, эткен ижистеҥ бойыс та сӱӱнчи аларыс.
Иштеер керек, је ижис Иеговага бажырарынаҥ артык болуп калбазын (Иоанн 6:27). Бис Кудайды баштапкы јерге тургузып турзаас, Иегова јӱрӱмге керектӱ ончо немени берер деп сӧзин берет.
2. Акчага чын кӧрӱмдӱ болорго не болужар?
Агару Бичикте акча кору берет деп айдылат. Је анда, кижини јӱк ле акча ырысту эдер деп айдылбай јат (Экклезиаст 7:12). Агару Бичикте, бисти акчаны сӱӱбезин ле не барыла болорзынып јӱрзин деп јӧп берилет. (Еврейлерге 13:5 кычырыгар.) Не барыла болорзынып турзаас, бис ӱсти-ӱстине јӧӧжӧ јуубазыс ла кереги јок тӧлӱлерге кирбезис. Анайда ок јеткерге экелгедий тӱрген байыйтан эп-аргалар тузаланбазыс ла азартный ойындар ойнобозыс (Укаа сӧстӧр 22:7).
3. Кысканбас болорго не болужар?
Иегова — кысканбас Кудай. Бис оноҥ тем алып, кысканбай, ӧскӧ улусла ӱлежерге кӱӱнзейдис (1 Тимофейге 6:18). Бис јуунныҥ керектерине сый эдип акча берер аргалу ла болуш керексип турган улуска, анчада ла бойыстыҥ христиан ака-эјелериске, болужар аргалу. Је Иегова бис канча кире берип турганысты эмес, карын мыны недеҥ улам берип турганысты кӧрӱп јат. Кысканбай, акту јӱрегистеҥ берип турзаас, бойыс та ырысту болорыс, Иегованы да сӱӱндирерис. (Апостолдордыҥ ижи 20:35 кычырыгар.)
ТЕРЕҤЖИДЕ КӦРӰГЕР
Иш јӱрӱмисте кандый јерде болор керек ле не барыла болорзынып јӱрерге канайып ӱренип алар деп билип алыгар.
4. Иегова макталзын деп иштенигер
Иеговала најылашканыс ишке чын кӧрӱмдӱ болорго болужар. ВИДЕОНЫ кӧрӱп, сурактарды шӱӱжип ийигер:
Джейсонныҥ ишке кандый кӧрӱмдӱ болгонынаҥ ла ижинде бойын канайып тудунганынаҥ слерге не јарады?
Ишти де, ӧскӧ дӧ јаан учурлу керектерди теҥ-тай апарарга ого не болушкан?
Колоссыдагыларга 3:23, 24 кычырып, суракты шӱӱжип ийигер:
Иште молјуларысты канайып бӱдӱрип турганыс нениҥ учун јаан учурлу болот?
Иш керектӱ де болзо, је Иеговага бажырары баштапкы јерде болор керек
5. Не барыла болорзынары — кору
Кӧп саба улус канча ла кире кӧп акча иштеп аларга албаданат. Је Агару Бичик ӧскӧ јӧп берип јат. 1 Тимофейге 6:6—8 кычырып, суракты шӱӱжип ийигер:
Агару Бичик бисти неге кӱӱнзедет?
Бисте кӧп неме јок то болзо, бис ырысту болор аргалу. ВИДЕОНЫ кӧрӱп, суракты шӱӱжип ийигер:
Бу билелер коркышту јокту да јадып турган болзо, олор нениҥ учун ырысту?
Бар немениҥ ӱстине база да та нени де аларга кӱӱнзеп турган болзоос, канайдар? Иисус мындый кӱӱн-санаа јаман немеге экелердеҥ айабас деп кӧргӱзерге, укаа сӧс куучындаган. Лука 12:15—21 кычырып, суракты шӱӱжип ийигер:
Иисустыҥ укаа сӧзи слерди неге ӱредет? (15 ӱлгерди кӧрӱгер.)
Укаа сӧстӧр 10:22 ле 1 Тимофейге 6:10 кычырып, тӱҥдештиригер. Оноҥ сурактарды шӱӱжип ийигер:
Слер сананзаар, нези артык: Иеговала најылажары ба эмезе акча ба? Јартап беригер.
Акча сӱрӱшкен улуста кандый кӱчтер болуп јат?
6. Иегова слерге ончо керектӱ немени берер
Бисте акча эмезе иш јанынаҥ кӱчтер болуп турган ӧйлӧрдӧ, бис Иеговага канча киреге тыҥ иженип турганыс јарт кӧрӱне берер. ВИДЕОНЫ кӧрӱп, бого тӱҥей кӱчтер боло берген айалгаларда, нени эдер керек деп билип алыгар. Оноҥ сурактарды шӱӱжип ийигер:
Ака кандый кӱчтерге табарткан?
Бу кӱч айалгада ол нени эткен?
Матфей 6:25—34 кычырып, суракты шӱӱжип ийигер:
Јӱрӱминде Иегованы баштапкы јерге тургузып турган улуска ол нени эдер деп сӧзин берет?
КЕЗИК УЛУС АЙДАТ: «Бойымныҥ билемди јеткилдеерге меге кӧп иштеер керек. Кажы ла неделе јуунныҥ туштажуларына јӱрер аргам јок».
Јӱрӱмде Иеговага бажырарын баштапкы јерге тургусканы — бу эҥ јакшы чыгарган јӧп — деп, слерди кандый библиялык ӱлгерлер бӱдӱмјилейт?
ТӦС ШӰӰЛТЕЗИ
Иш ле акча керектӱ де болзо, је олор биске Иеговага иштеерге чаптыгын јетирбезин.
Нени билип алдыгар?
Ишке чын кӧрӱмдӱ болорго слерге не болужар?
Не барыла болорзынары нениҥ учун кору болот?
Иегованыҥ слерди кичеер деп берген сӧзине бӱдӱп турганаарды слер канайып кӧргӱзер аргалу?
ШИҤДЕЙТЕН МАТЕРИАЛ
Агару Бичик акча — ол јаман деп ӱредет пе?
Кудайды сӱӱндирерге акча-манадысты канайып тузаланарыс?
«Агару Бичикте кысканбас болоры керегинде не айдылат?» (веб-статья)
Азартный ойындар — амыраар јакшы эп-арга ба?
«Агару Бичиктиҥ кӧрӱми. Азартный ойындар» («Ойгоныгар!», 2015 јыл, тулаан ай)
Ойындарды сӱрекей тыҥ сӱӱген тӧгӱнчи кижиге јӱрӱмин солыырга не болушканын билип алыгар.
«Ат јарышты сӱреен тыҥ сӱӱгем» («Каруулчы шибее», 2011 јыл, кӱчӱрген ай 1)