Христиандар аракыга кандый кӧрӱмдӱ болор керек?

Бастыра јердиҥ ӱстинде улус аракыга башка-башка кӧрӱмдӱ. Та кем де аракыны нӧкӧрлӧриле кожо ичерге сӱӱп јат. Кем де аракыны чек ичпес деп шӱӱп алган. А та кем де оныҥ ӧйи-кемин билбей, кӧп ичип јат. Је Агару Бичикте аракы керегинде не айдылат?

1. Агару Бичик аракыны ичпезин деп айдат па?

Агару Бичикте аракы ичерге јарабас деп айдылбай јат. Анда айдылганыла болзо, аракы Кудайдыҥ улуска берген кӧп сыйларыныҥ бирӱзи болот. Керек дезе кызыл аракы кижиниҥ јӱрегин сӱӱндирет деп анда айдылат (Сарын 104:14, 15). Кудайдыҥ кезик чындык ишчилери аракыны ичкен деп, Агару Бичикте бичилип калган (1 Тимофейге 5:23).

2. Агару Бичик аракы јанынаҥ кандый јӧп берет?

Иегова аракыны ӧйинеҥ ӧткӱре кӧп ичкенин јаратпай јат (Галаттарга 5:21). Оныҥ Сӧзинде айдылат: «Кызыл аракыны ӧйинеҥ ӧткӱре кӧп ичип тургандардыҥ ортозында болбо» (Укаа сӧстӧр 23:20). Оныҥ учун слер кемле-кемле эмезе јаҥыскан аракы ичип ийерге турган болзоор, нени ајаруга алар керек? Кижиниҥ санаа-укаазы јоголып, тили-оозы толголып, нени айдып, нени эдип турганын билбей турза, ол эмезе су-кадыгына каршу јетирилген болзо, ол ӧйинеҥ ӧткӱре кӧп ичип ийген. Слерге аракыны ӧйи-кеминеҥ ашпай ичерге кӱч болуп турган болзо, чек ичпезеер торт болор.

3. Аракы јанынаҥ ӧскӧ улустыҥ кӧрӱмин тооп турар керек

Кажы ла кижиге аракыны ичерим бе, ичпезим бе деп, бойына сананып алар керек. Та кем де аракыны ӧйи-кеминде ичип турган болзо, биске андый кижини јаргылабас керек. Је та кем де аракы ичпезим деп шӱӱп алган болзо, бис оны албадабас учурлу (Римдегилерге 14:10). Агару Бичикте: «Кем де бойына туза бедиребезин, је ӧскӧ кижиге бедирезин» — деп айдылат. (1 Коринфтегилерге 10:23, 24 кычырыгар.) Оныҥ учун аракынаҥ улам бис та кемге де буудак болорыс деп сезип турзаас, чек ичпезеес јакшы болор. (Римдегилерге 14:21 кычырыгар.)

ТЕРЕҤЖИДЕ КӦРӰГЕР

4. Ичер бе, ичпес пе?

Иисус аракыга кандый кӧрӱмдӱ болгон? Каруузын билерге, оныҥ баштапкы эткен кайкалын кӧрӱп ийектер. Иоанн 2:1—11 кычырып, сурактарды шӱӱжип ийигер:

• Бу учуралла болзо, Иисус аракыга ла аракы ичип турган улуска кандый кӧрӱмдӱ болгон?

• Иисус аракы ичерин јаргылабаган болордо, аракы ичип турган христиандарга биске кандый кӧрӱмдӱ болор керек?

Христиандарга аракы ичерге јараар да болзо, је кезик айалгаларда ичпезе ойгор болор. Укаа сӧстӧр 22:3 кычырып, бу айалгаларда аракы ичереер бе, јок по деп сананып кӧрӱгер:

• слер машинала маҥтадарга эмезе техникала иштенерге турган болзоор;

• слер удабас балалу болотон болзоор;

• врач слерге аракы ичпезин деп айткан болзо;

• аракыны ӧйи-кеминде ичип билбес болзоор;

• слерге јасак аайынча аракы ичерге јарабас болзо;

• слердиҥ ортогордо алдында тыҥ аракыдаган, је эмди ичпес деп сананып алган кижи бар болзо.

Тойдо ло најыларла јуулышкан тушта аракы уратан ба, јок по? Мындый суракта бу видео болужар. ВИДЕОНЫ кӧрӱгер.

ВИДЕО: «Тойдо аракы уратан ба, јок по?» (2:41)

Римдегилерге 13:13 ле 1 Коринфтегилерге 10:31, 32 кычырыгар. Кажы ла ӱлгерди кычырган кийнинде суракты шӱӱжип ийигер:

• Бу принцип слерге Иегованы сӱӱндиретен тӱп-шӱӱлтеге келерге канайып болужар?

5. Канча кире ичерин озодоҥ сананып алыгар

Иегова аракыны ичерге јарадып турган да болзо, је ӧйинеҥ ӧткӱре кӧп ичерин јаратпай јат. Нениҥ учун? Осия 4:11, 18 кычырып, сурактарды шӱӱжип ийигер:

• Кижи ӧйинеҥ ӧткӱре кӧп ичип ийзе, не болордоҥ айабас?

Ӧйинеҥ ӧткӱре кӧп ичпеске не болужар? Бойыска иженбей, качан токтодынарын билер керек. Укаа сӧстӧр 11:2 кычырып, суракты шӱӱжип ийигер:

• Канча кире ичерин нениҥ учун озодоҥ сананып койор керек?

6. Аракынаҥ канайып айрылар?

ВИДЕО: «Меге бойымныҥ јӱрӱмим кӱӱниме тийип калды» (6:32)

• Дмитрий аракыдап турарда кандый болгон?

• Ого аракынаҥ айрыларга јеҥил болгон бо?

• Учы-тӱбинде аракыдаҥ айрыларга ого не болушкан?

1 Коринфтегилерге 6:10, 11 кычырып, сурактарды шӱӱжип ийигер:

• Аракыдаары нениҥ учун уур кинчек болот?

• Аракызак кижи аракыдаҥ айрылар аргалу деп, бу ӱлгерлердеҥ канайып кӧрӱнет?

Матфей 5:30 кычырып, суракты шӱӱжип ийигер:

• «Колыҥды... кезип» дегени, Иегованы сӱӱндирерге буудак болуп турган не-немедеҥ айрыларын темдектейт. Аракыдаҥ айрыларга турган болзоор, слер нени эдер аргалу?a

1 Коринфтегилерге 15:33 кычырып, суракты шӱӱжип ийигер:

• Слердиҥ најылараар канча кире ичип турганаарга кандый камаанын јетирер аргалу?

ТӦС ШӰӰЛТЕЗИ

Иегова улуска аракыны јакшызынып ичсин деп берген. Је ол эзиргенче ичерин јаратпай јат.

Нени билип алдыгар?

• Агару Бичикте аракы керегинде не айдылат?

• Аракыны эзиргенче ичкени неге экелердеҥ айабас?

• Аракы јанынаҥ улустыҥ кӧрӱмин тооп турганысты канайып кӧргӱзерис?

ШИҤДЕЙТЕН МАТЕРИАЛ

Јииттерге аракы ичер бе, јок по деп сананарга не болужар?

«Аракы. Неге экелерин санан» (2:31)

Аракынаҥ айрыларга не болужар?

«Аракыга чын кӧрӱмдӱ болугар» («Каруулчы шибее», 2010 јыл, чаган ай 1)

Христиандарга чӧӧчӧй кӧдӱрип, тост айдарга јараар ба?

«Кычыраачылардыҥ сурактары» («Каруулчы шибее», 2007 јыл, кочкор ай 15)

«Најым мени тӱби јок бочко деп адаган» деген статьяны кычырып, бир эр кижи аракыдаҥ канайып айрылганын билип алыгар.

«Агару Бичик улустыҥ јӱрӱмин солыйт» («Каруулчы шибее», 2012 јыл, кӱӱк ай 1)