Јуундагы амыр-энчӱни ле бирликти кичеегер

Давид каан мындый сӧстӧр айткан: «Ака-эјелерле бирлик болуп јӱргени кандый јакшы, кандый эптӱ!» (Сарын 133:1). Бистер де ака-эјелердиҥ ортозында бойысты анайып сезедис. Бистиҥ бирлик болгоныс тегиндӱ эмес. Бу бистиҥ ончобыстыҥ бирлик болорго албаданып турганыстыҥ једими болот.

1. Кудайдыҥ албатызы незиле аҥыланат?

Слер ӧскӧ ороондогы јуунныҥ туштажузында болуп калзаар, керек дезе андагы улустыҥ тилин оҥдобой до турган болзоор, слер бойоорды айлаарда деп сезереер. Нениҥ учун? Нениҥ учун дезе бис Агару Бичикти бир ле программала ӱренип јадыбыс. Анайда ок бис бой-бойыска сӱӱжибисти кӧргӱзерге албаданадыс. Бис кайда да јадып турган болзоос, ончобыс бир Кудайга, Иеговага, иштеп, ого бирлик бажырадыс (Софония 3:9, сноска).

2. Јуунда амыр-энчӱ ле бирлик болзын деп, слер нени эдер аргалу?

Агару Бичик бисти кӱӱнзедет: «Эмди дезе бой-бойыгарды акту јӱректеҥ тыҥ сӱӱгер» (1 Пётр 1:22). Бу сӧстӧрди јӱрӱмде канайып тузаланарыс? Ака-эјелердиҥ јастыраларына ајару эдердиҥ ордына, олордыҥ јакшы кылык-јаҥдарына ајару эдигер. Јӱк ле бойоорго јарап турган улусла куучындашпай, башка-башка ака-эјелерле куучындажыгар. Анайда ок бистиҥ кажыбыска ла тереҥ шиҥип калган јастыра кӧрӱм-санааларыстаҥ айрыларга тартыжар керек. (1 Пётр 2:17 кычырыгар.)a

3. Слер јуунда кемле-кемле оҥдошпой турган болзоор, канайдар?

Бис ончобыс толо кемдӱ эмес те болзоос, је бир, нак биле болуп артадыс. Кезикте бис бой-бойысты ачындырып та ийедис. Оныҥ учун Агару Бичикте айдылат: «Иегова Кудай јаманыгарды таштаганы чылап, слер де бой-бойыгардыҥ јаманыгарды таштагар». (Колоссыдагыларга 3:13 кычырыгар, ЈТ.) Бис Иегованы јаантайын ачындырып јадыбыс. Је ол бистиҥ јаманысты јаантайын таштап јат. Айдарда Иегова бисти де ака-эјелердиҥ јаманын таштазын деп сакыйт. Бис та кемди де ачындырып ийгенис деп билип ийген болзоос, амырды кичееп аларга, баштапкы алтамды бойыс эдерис. (Матфей 5:23, 24 кычырыгар.)b

ТЕРЕҤЖИДЕ КӦРӰГЕР

4. Јастыра кӧрӱм-санаадаҥ айрылыгар

Бис ончо ака-эјелерди сӱӱрге кӱӱнзейдис. Је бистеҥ чек башка ака-эјелерле куучындажарга кӱч болордоҥ айабас. Биске не болужар аргалу? Апостолдордыҥ ижи 10:34, 35 кычырып, сурактарды шӱӱжип ийигер:

• Иегова билезине бой-бойына тӱҥей эмес, чек башка улусты јууп алган. Оныҥ учун Иегованаҥ тем алып, угы-тӧзи ле арга-чагы слердийинеҥ башка улуска кандый кӧрӱмдӱ болор керек?

• Бу јанынаҥ слердиҥ јадып турган јереерде кандый јастыра кӧрӱм-санаа таркадылган? Слер андый кӧрӱмди нениҥ учун алынбаска албаданадаар?

2 Коринфтегилерге 6:11—13 кычырып, суракты шӱӱжип ийигер:

• Слерге ончо ака-эјелерди, керек дезе слердеҥ чек башка да ака-эјелерди, сӱӱрге ӱренип аларга не болужар?

5. Акту јӱректеҥ јаманды таштап, јаражып алыгар

Иегова бир де јастырбай јат, ондо бистиҥ алдыста бир де буру јок, је андый да болзо, ол бистиҥ јаманысты таштаарга јаантайын белен. Сарын 86:5 кычырып, сурактарды шӱӱжип ийигер:

• Бу ӱлгердеҥ Иегова јаманды таштап турганы керегинде бис нени билип аладыс?

• Иегованыҥ јаманды таштап турганын слер баалайдаар ба? Јартап беригер.

• Кандый айалгаларда амырды кичееп аларга кӱч болот?

Слер Иегованаҥ тем алып, јуундагы бирликти канайып кичееп алар аргалу? Укаа сӧстӧр 19:11 кычырып, суракты шӱӱжип ийигер:

• Слерди та кем де ачындырып эмезе кыртыштандырып турза, слер нени эдер аргалу?

Кезикте бис та кемди де ачындырып ийедис. Мындый учуралда нени эдер? ВИДЕОНЫ кӧрӱп, суракты шӱӱжип ийигер.

ВИДЕО: «Улусла амыр-энчӱ јӱргенис алкыштар экелет» (6:01)

• Амыр-энчӱ болзын деп, бу эје нени эткен?

6. Ака-карындаштардаҥ ла эје-сыйындардаҥ јакшыны кӧрӧргӧ албаданыгар

Ака-эјелерди јакшы билип алзаас, бис олордыҥ јакшы ла уйан јандарын кӧрӱп јадыс. Је озо ло баштап олордыҥ јакшы јандарын кӧрӧргӧ не болужар? ВИДЕОНЫ кӧрӱп, суракты шӱӱжип ийигер.

ВИДЕО: «Оҥдоп турары бисти јараш эдет» (5:10)

• Биске ака-эјелердиҥ јакшы јандарын кӧрӧргӧ не болужар?

Иегова озо ло баштап бистиҥ јакшы кылык-јаҥдарыска ајару эдет. 2 Летопись 16:9а кычырып, суракты шӱӱжип ийигер:

• Иегова озо ло баштап слердиҥ јакшы кылык-јаҥаарды кӧрӱп турган деп билип турзаар, слерде кандый сезимдер болот?

ТӦС ШӰӰЛТЕЗИ

Улустыҥ јаманын таштап турганаарла, анайда ок ончо ака-эјелерге сӱӱжигерди кӧргӱзип турганаарла слер јуунныҥ бирлигин кичееп алар аргалу.

Нени билип алдыгар?

• Јастыра кӧрӱм-санаадаҥ слер канайып айрылараар?

• Слер кажы бир ака-эјеле оҥдошпой калган болзоор, нени эдереер?

• Слер нениҥ учун Иегова ла чылап јаманды таштаарга ӱренип аларга кӱӱнзейдеер?

ШИҤДЕЙТЕН МАТЕРИАЛ

Иисустыҥ куучындаган теми улусты јаргылабаска канайып болужат деп кӧрӱп алыгар.

«Тоормошты чыгар» (6:56)

Бис бир де јаман неме этпегенис деп алаҥзыбай турган болзоос, јаманысты ташта деп сураарыс па?

«Јаманды таштаары јаражып аларына экелет» («Каруулчы шибее», 2002 јыл, кӱчӱрген ай 1)

Улусты јаман кӧрбӧскӧ, кезик улус канайып ӱренип алганын билип алыгар.

«Слер улусты ылгап турганаар ба?» (5:06)

Јуундагы амыр-энчӱни буспаска, оҥдошпостордыҥ аайына канайып чыгарын билип алыгар.

«Оҥдошпостордыҥ аайына сӱӱштиҥ тыныла чыгыгар» («Каруулчы шибее», 2016 јыл, кӱӱк ай)