Турумкай артып, тӱжӱм экелип турган улусты Иегова сӱӱп јат

1, 2. а) Сӱӱнчилӱ јарды кӧп улус укпай турган јерлерде турумкай јарлап турган ака-эјелердиҥ теми бисти нениҥ учун оморкодып јат? (Јӧрмӧлдиҥ бажындагы јурукты кӧрӱгер.) б) Иисус «алтайында» јарлаар иш керегинде нени айткан? (Кӧчӱрӱни кӧрӱгер.)

СЕРДЖО ЛО ОЛИНДА — Бириктирилген Штаттарда пионерлер болуп турган эш-нӧкӧрлӧр. Олордыҥ јаштары 80-неҥ ажа берген. Калганчы ӧйлӧрдӧ буттары оруп турганынаҥ улам олорго базып јӱрерге кӱч болот. Је андый да болзо, олор кажы ла кӱн эртен тура јети саатта каланыҥ кӧп улусту тепсеҥине келедилер. Олор мынайып кӧп јылдардыҥ туркунына иштеп јат. Серджо ло Олинда автобус токтойтон јерге туруп алала, ары-бери ӧткӧн улуска библиялык бичиктер бергилейт. Улустыҥ кӧп сабазы олор экӱни ајарбай да јат, је олор чӧкӧбӧй, олордӧӧн кӧргӧн улуска удура кӱлӱмзиренип јат. Тал-тӱш једе берзе, олор меҥдебезинеҥ айылына јангылайт. Эртезиндеги кӱн база анайып ла ӧдӧт. Бу чындык ишчилер Каандык керегинде јарды јыл туркунына кажы ла неделеде алты кӱн эрчимдӱ јарлап јадылар.

² Серджо ло Олинда чылап, канча јылдар туркунына јарды укпай турган јерлерде јарлап турган ака-эјелер бӱдӱн јердиҥ ӱстинде бар. Слердиҥ де айалга мындый болзо, бис слерди турумкай артып турганыгар учун акту јӱрегистеҥ мактап јадысa. Слердиҥ мындый темигер кӧп јарчылардыҥ, керек дезе ченемелдӱ ака-эјелердиҥ, анайда ок аймак кӧрӧӧчилердиҥ кӱӱнин кӧдӱрет. Олордыҥ бирӱзи мынайып айдат: «Мен мындый чындык ака-эјелерле јарлап јӱрзем, олордыҥ теми мениҥ кӱӱнимди кӧдӱрет». Экинчизи айдат: «Олордыҥ чындык болгоны мени оноҥ ары турумкай ла јалтанбай јарлаарга кӱӱнзедет». База бир аймак кӧрӧӧчи: «Олордыҥ темин кӧрӱп, оморкоду аладым» — деп айдат.

3. Бис кандый сурактар шӱӱп кӧрӧрис ле нениҥ учун?

³ Иисустыҥ берген јакылтазын оноҥ ары эрчимдӱ бӱдӱрерге, мындый ӱч сурак шӱӱжилер: бис кезикте нениҥ учун кунугадыс? Јарлаар иш тӱжӱмдӱ болзын деп, нени эдер керек? Турумкай артып, тӱжӱм экелерге биске не болужар?

БИС КЕЗИКТЕ НЕНИҤ УЧУН КУНУГАДЫС?

4. а) Еврейлердиҥ кӧбизи јарды укпай турарда, Павелде кандый сезимдер болгон? б) Павел нениҥ учун кунуккан?

⁴ Јарлаар иште улус јарды укпай турза, слер кунугадыгар ба? Эйе болзо, элчи Павелдиҥ сезимдерин оҥдоор болорыгар. Ол 30 кире јылдыҥ туркунына кӧп улуска Христостыҥ ӱренчиктери болорго болушкан (Ап. ижи 14:21; 2 Кор. 3:2, 3). Је христиандардыҥ тоозына еврей албатыныҥ јӱк кезиги кожулган. Олордыҥ кӧбизи Павелди угар да кӱӱни јок болгон, керек дезе кезиги оны истежип те туратан (Ап. ижи 14:19; 17:1, 4, 5, 13). Бу ӧйдӧ, Павелде кандый сезимдер болгон? Ол айткан: «Христос алдында чынды айдадым... меге сӱрекей эрикчил, јӱрегимде токтобос сыс» (Рим. 9:1—3). Павел нениҥ учун кунуккан? Ол јарлаар ишти ле улусты чыннаҥ сӱӱген. Еврей албаты учун ол тыҥ санааркаган ла олор Кудайдыҥ килемјизин јектеп турарда, ого коркышту ачу болгон.

5. а) Јарлаарга бисти не кӱӱнзедет? б) Кезикте кунугып турганыста нениҥ учун кайкаар неме јок?

⁵ Бис, Павел ле чилеп, улус учун чыннаҥ санааркап јадыс, оныҥ учун олорго јарлайдыс (Матф. 22:39; 1 Кор. 11:1). Иеговага иштеп турган улуска кӧп алкыштар берилет деп, бис бойыстыҥ да јӱрӱмистеҥ кӧрӱп јадыс. Улус керегинде сананып, олорды бистер чилеп јӱрзин деп, болужарга кӱӱнзейдис. Оныҥ учун улус та бистий ок алкыштар алзын деп, олорго Иегова керегинде чындыкты ла оныҥ амадузын куучындап јадыс. Јартын айтса, бис улуска: «Слерге сӱреен јакшы сый экелдис, сурап турубыс, оны алыгар» — деп айдадыс. Оныҥ да учун олор бисти укпаза, бистерге ачу болот. Мындый сезимдер бистиҥ бӱдӱмјибистиҥ ас болгонын эмес, карын јарлаар ишти сӱӱп турганысты кӧргӱзет. Айдарда, кезикте бис кунугып та турзаас, јарлаар иште турумкай артадыс. 25 јылдаҥ кӧп ӧйгӧ пионер болуп турган Елена эје мынайып айдат: «Јарлаарга меге јеҥил эмес. Је мынаҥ артык иш јок деп сананадым». Андый сезимдер бисте де болот.

ТӰЖӰМ БЕРЕРГЕ, НЕНИ ЭДЕР КЕРЕК?

6. Бис нени шӱӱжерис?

⁶ Бис кайда да јадып турзаас, јарлаар ижис једимдӱ болор деп, нениҥ учун алаҥзыбас аргалу? Бу јаан учурлу сурактыҥ каруузын билип аларга, тӱжӱм экелер керек деп айткан Иисустыҥ эки укаа сӧзин кӧрӱп ийеектер (Матф. 13:23). Баштапкызы — виноградтыҥ сабы керегинде укаа сӧс.

7. а) «Виноград Ӧскӱреечи», «виноградтыҥ чын Тӧс Сабы» ла «саптар» кемдер болот? б) Бис кандый сурактыҥ каруузын билерге кӱӱнзейдис?

⁷ Иоанн 15:1—5, 8 кычырыгар. Бу укаа сӧстӧ Иисус Иегованы — «виноград Ӧскӱреечи» деп адайт, бойын — «виноградтыҥ чын Тӧс Сабы» деп, је бойыныҥ ӱренчиктерин — «саптар»b деп адаган. Оноҥ элчилерине мынайып айткан: «Кӧп јиилек ӧскӱрип, Мениҥ ӱренчиктерим боло берзегер, Адам онызыла макталар». Иисустыҥ ӱренчиктери јиилек ӧскӱрер учурлу, ӧскӧртӧ айтса, тӱжӱм экелер учурлу деген сӧстӧр нени темдектейт? Иисус бу укаа сӧстӧ каруузын чике айтпаган, је бу сурактыҥ каруузын билип аларга болужатан керектӱ шӱӱлте айткан.

8. а) Иисустыҥ укаа сӧзинде тӱжӱм деген сӧс нениҥ учун јаҥы ӱренчиктерди темдектебей јат? б) Иегова биске бӱдӱрип болбос некелтелер тургузат па?

⁸ Иисус бойыныҥ Адазы керегинде: «Мендеги јиилеги бӱтпес кандый ла сапты Ол кезип јат» — деп айткан. Ӧскӧртӧ айтса, бис јӱк ле тӱжӱм экелип турзаас, Иегова бисти бойыныҥ ишчизи деп кӧрӧт (Матф. 13:23; 21:43). Айдарда, бу укаа сӧстӧ айдылганыла, христиан кижи тӱжӱм экелер учурлу дегени јаҥы ӱренчиктер белетеерин темдектебей јат (Матф. 28:19). Оноҥ ӧскӧ Христоско ӱренчиги болзын деп кемге де болужып болбогон Кудайдыҥ чындык Керечилери тӱжӱм јок саптарга тӱҥей болор эди. Је бу андый эмес! Бис кемди де Христостыҥ ӱренчиги болзын деп албадап болбозыс. Иегова бисти сӱӱп јат, оныҥ учун бистеҥ кӱчис јетпегедий ишти бӱдӱрзин деп, ол качан да некебей јат. Карын, кӱчис јеткедий иш берет (Јаҥ. т. 30:11—14).

9. а) Бис кандый ишке турушсаас, тӱжӱм экеледис? б) Бис кандый укаа сӧсти шӱӱп кӧрӧрис, нениҥ учун?

⁹ Андый болзо, тӱжӱм экелери дегени нени темдектейт? Бу дезе, бистиҥ кӱчис јеткедий ишке јаантайын туружып турарын темдектейт. Мындый ишти кажыбыс ла бӱдӱрер аргалу. Бис кандый ишке турушсаас, тӱжӱм экелерис? Кудайдыҥ Каандыгы керегинде сӱӱнчилӱ јарды јарлазаас (Матф. 24:14)c. Бу шӱӱлтени оҥдоорго Иисустыҥ аш ӱрендеечи керегинде укаа сӧзин шӱӱжип ийеектер.

10. а) Укаа сӧстӧги ӱрен ле јер нени темдектейт? б) Буудайдыҥ сабынаҥ не чыгып келет?

¹⁰ Лука 8:5—8, 11—15 кычырыгар. Аш ӱрендеечи керегинде укаа сӧстӧ айдылган «ӱрен» «Кудайдыҥ сӧзин», ол эмезе Каандык керегинде сӱӱнчилӱ јарды темдектейт. Јер — кижиниҥ јӱрегин темдектейт. Јакшы јерге тӱшкен ӱрен ӧзӱп, темдектезе, буудайдыҥ сабы болуп калат. Соондо сап «јӱс катап кӧп тӱжӱм берет». Мында кандый тӱжӱм керегинде айдылат? Ӧзӱп јаткан ӧскӧ кичинек саптар керегинде бе? Јок. Јаҥы ӱрендер керегинде айдылат. Соондо олор ӧзӱп, јаҥы буудайдыҥ саптары болуп калар. Бу укаа сӧстӧ бир ӱреннеҥ јӱс ӱрен чыгып келет. Мынаҥ бис јарлаар иш јанынаҥ неге ӱренедис?

11. а) Аш ӱрендеечи керегинде укаа сӧс јарлаар иш јанынаҥ бисти неге ӱредет? б) Бис тӱжӱмди — Каандыктыҥ јаҥы ӱрендерин канайып экеледис?

¹¹ Канча да јыл кайра Керечилердиҥ кемизи де эмезе ада-энебис биске Каандык керегинде чындыкты куучындаган болзын. Мынаҥ улам сӱӱнчилӱ јардыҥ бистиҥ јӱрегиске киргенин кӧрӱп, олор сӱӱнген. Бу јар Иисустыҥ укаа сӧзиндеги јакшы јерге тӱшкен ӱрен чилеп, бистиҥ јӱрегиске кирип, сӱрлеп айтса, ӧзӱп, ӱренделип калган мажакту буудайдыҥ сабы болуп калган. Канайып саптаҥ јаҥы сап чыкпай јат, је ӱрендерлӱ мажак чыгат, анайып ла бистиҥ экелип турган тӱжӱм — јаҥы ӱренчиктер эмес, је Каандыктыҥ јаҥы ӱрендерин темдектейтd. Је бис мындый тӱжӱмди канайып экелер аргалу? Каандык керегинде јарды улуска кажы ла катап јарлаганысла ӱренди сееп јадыс. Бистиҥ јӱрегиске качан да мындый ла ӱрен отургызылган болор (Лука 6:45; 8:1). Айдарда, Каандык керегинде оноҥ ло ары куучындап турзаас, турумкай артып, тӱжӱм экелип јадыс.

12. а) Виноградтыҥ сабы ла аш ӱрендеечи керегинде Иисустыҥ укаа сӧзинеҥ кандый шӱӱлте эдерге јараар? б) Бу сӧстӧрдӧҥ биске кандый сезимдер келет?

¹² Виноградтыҥ сабы ла аш ӱрендеечи керегинде Иисустыҥ укаа сӧзинеҥ кандый тӱп-шӱӱлте эдерге јараар? Бистиҥ тӱжӱм экелетенис улустыҥ јарды укканынаҥ эмезе укпаганынаҥ камаанду эмес. Карын, јарды оноҥ ары јарлаганыстаҥ камаанду болот. Бу шӱӱлте керегинде Павел мындый сӧстӧр айткан: «Кажызы ла канча кире кӱчин салып иштегениле јал [кайрал, ЈТ] алар» (1 Кор. 3:8). Иегова бисти једимдерис учун эмес, је ижис учун кайралдайт. 20 јылдыҥ туркунына пионер болуп турган Матильда эје мындый сӧстӧр айдат: «Иегова бистиҥ албаданганысты кӧрӱп кайралдайт деп билгени јаан сӱӱнчи экелет!»

ТУРУМКАЙ АРТЫП, ТӰЖӰМ ЭКЕЛЕРГЕ НЕНИ ЭДЕР КЕРЕК?

13, 14. Улус Каандык керегинде јарды алынбай турарда, Павел бир де чӧкӧбӧгӧнин Римдегилерге 10:1, 2-де канайып јартаган?

¹³ Турумкай артып, тӱжӱм экелерге биске не болужар? Ӧрӧ айдылганыла, еврей албатыныҥ Каандык керегинде јарды укпай турганы Павелди санааркаткан. Је ол бир де чӧкӧбӧгӧн. Ол еврей албатыга кандый сезимдерлӱ болгонын Римдеги христиандарга мынайып бичиген: «Карындаштар! Израильдиҥ улузы аргадалзын деп, бастыра јӱрегимнеҥ кӱӱнзеп, олор учун Кудайга мӱргип турум. Олор Кудайга чындык болорго сӱрекей кӱӱнзейдилер деп, керелеп турум, је мыны Ого не јараарын билбей эдип јадылар» (Рим. 10:1, 2). Айдарда, Павел нениҥ учун оноҥ ло ары јарлаган?

¹⁴ Баштапкызында, оны еврей албатыга оноҥ ло ары јарлаарга јӱреги кӱӱнзеткен. Павел акту кӱӱнинеҥ олордыҥ кезиги де болзо, аргадалзын деп кӱӱнзеген (Рим. 11:13, 14). Экинчизинде, Павел олор учун Кудайга јайнап, Кудай бу албатыга Каандык керегинде јарды алынарга болушсын деп мӱргӱген. Ӱчинчизинде, Павел олордыҥ Кудайга чындык болорго сӱрекей кӱӱнзеп турганын кӧргӧн. Ол улустыҥ јакшызын кӧрӱп, олор удабас Иегованыҥ ишчилери болор деп иженген. Кудайга јӱткӱп турган кижиниҥ ийде-кӱчин чын јанындӧӧн ууландырза, андый кижи Христостыҥ эрчимдӱ ӱренчиги болуп калар деп, Павел бойыныҥ јӱрӱминеҥ билген.

15. Бис Павелдеҥ кандый тем алар аргалу? Темдер куучындап беригер.

¹⁵ Бис Павелдеҥ кандый тем алар аргалу? Баштапкызында, бис ӱргӱлји јӱрӱмди аларга кӱӱнзеген улусты бедиреерге тыҥ кӱӱнзеер учурлу. Экинчизинде, биске акту јӱректӱ улустыҥ јӱрегин томултарга Иегованаҥ болуш сурап, мӱргӱӱр керек (Ап. ижи 13:48; 16:14). 30 јылдыҥ туркунына пионер болуп турган Сильвана эје мынайып айдат: «Јарлап барардаҥ озо, чын кӧрӱмдӱ болорго Иегованаҥ болуш сурайдым». Бис Кудайга ангелдер биске ачык јӱректӱ улусты табарга болушсын деп, мӱргӱп јадыс (Матф. 10:11—13; Ачыл. 14:6). Пионер болуп турганы 30 јылдаҥ ажа берген Роберт ака айдат: «Ангелдерле кожо иштеерге сӱреен јакшы, не дезе, олор улустыҥ јӱрӱминде не болуп турганын билер!» Ӱчинчизинде, биске улустыҥ јакшызын кӧрӱп, качан бирде олор Иегованыҥ ишчилери болор деп иженер керек. Сууга чӧҥӱрилгени 50 јылдаҥ ажа берген аксагал болуп турган Карл ака мынайып айдат: «Мен улустыҥ бир эмеш те болзо јилбиркеп турганын кӧрӧргӧ албаданадым, темдектезе, кӱлӱмзиренгенин, јалакайын эмезе суракты акту јӱрегинеҥ бергенин». Мынайып бис, Павел ле чилеп, турумкай артып, тӱжӱм экелер аргалу.

«КОЛЫҤДЫ АМЫРАТПА»

16, 17. а) Јарлыкчы 11:6-дагы сӧстӧр биске кандый ӱредӱ берет? б) Јарлаар иштиҥ тузазын кӧргӱзип турган учуралды куучындап беригер.

¹⁶ Улус Кудайдыҥ Каандыгы керегинде јарды керексибей турган деп билдирип турза, јарлаар ижис улуска кандый туза экелип турганын качан да ундыбас керек. (Јарлыкчы 11:6 кычырыгарe.) Олордыҥ кӧбизи бисти укпай да турган болзо, бистиҥ јакшы тыш бӱдӱмисти, улуска тоомјылу баштанганысты ла кӱлӱмзиренгенисти ајаруга алат. Мынайып олор бисти кӧрӱп, бойыныҥ јастыра кӧрӱмин солыыр аргалу. Јӧрмӧлдиҥ бажында айдылган Серджо ло Олинда бу сӧстӧрдиҥ чынын бойыныҥ кӧзиле кӧргӧн.

¹⁷ Серджо куучындайт: «Ооруганыстаҥ улам бис тепсеҥге кандый да ӧйдиҥ туркунына барбаганыс. Је оноҥ келеристе, улус бистеҥ: „Слер кайда болгоноор? Слер јок јаман эмтир“ — деп сураган». Олинда кӱлӱмзиренип айдат: «Автобустардыҥ тискинчилери биске колыла јаҥыган, кезиги кӧзнӧктӧҥ: „Слер талдама!“ — деп кыйгырышкан. Олор бистеҥ бичиктер де сураган». Бир эр кижи бичиктерлӱ стендке базып келеле, Серджо ло Олиндага ижи учун быйанын айдып, сакыбаган јанынаҥ чечектер сыйлаган.

18. Слер нениҥ учун турумкай артып, тӱжӱм экелерге кӱӱнзеп јадыгар?

¹⁸ Айдарда, бис Каандык керегинде чындыктыҥ ӱренин јаантайын сееп турган болзоос, јарлаар ишке јаан болуш јетиредис (Матф. 24:14). Је эҥ учурлузы, Иегованыҥ јарадузын аладыс. Бу биске сӱӱнчи экелет. Турумкай артып, тӱжӱм экелип турган ишчилериниҥ ончозын Иегова сӱӱп јат.