Слер билереер бе?

Библиялык ӧйлӧрдӧ башкараачы кижиде кандый молјулар болгон?

БИБЛИЯЛЫК ӧйлӧрдӧ башкараачы кижи ээзиниҥ айыл-јуртын эмезе кыразын башкарган.

Патриарх Иаковтыҥ уулы Иосиф Египетте Потифардыҥ кулы болордо, Потифар «не барын ончозын оныҥ башкартузына бер[ип]», айыл-јуртын башкарар эдип кӧстӧп салган (Баш. 39:2—6). Кийнинде Иосиф Египетте улу башкараачы болуп каларда, бойыныҥ айылында база башкараачы кӧстӧгӧн (Баш. 44:4).

Иисус Христостыҥ ӧйинде кыралу бай улус кӧп сабада бойыныҥ кыраларынаҥ ыраак калаларда јаткан. Оныҥ учун олор бу кыраларда иштеп турган улусты башкаратан башкараачылар кӧстӧп салатан.

Башкараачы кижи кандый некелтелерге келижер учурлу болгон? Б. э. I чагында Римниҥ Колумелла деп бичиичизи кӧрӧӧчи эмезе башкараачы эдип «ишке бӱдӱмјилӱ» кижини кӧстӧзин деп айдатан. Андый кижи «башкарып билер де болзо, јалакай ла јымжак болор учурлу». Колумелланыҥ аҥылап айтканыла болзо, «эҥ учурлузы — [башкараачы] билееркебес учурлу, карын билбес немениҥ јартына чыгып турарга албаданып турзын».

Кудайдыҥ Сӧзинде башкараачы деген сӧс христиан јуун керегинде айдылып турган тушта база тузаланылат. Анайып, элчи Петр христиандарды: «Кажы ла кижи Кудайдыҥ јӱзӱн-башка јакшылыгыныҥ јакшы башкараачызы чылап, алган јайалтазын бой-бойына тузаланзын» — деп кычырат (1 Пет. 4:10, ЈК 2003).

Лука 16:1—8-те бичилген Иисус Христостыҥ укаа сӧзинде башкараачы деген сӧс база туштап јат. Анайда ок Иисустыҥ Каан болуп отуратаны керегинде судурда Иисус бойыныҥ ӱренчиктерин «бӱдӱмјилӱ ле керсӱ кулды», ол эмезе «бӱдӱмјилӱ башкараачыны», кӧстӧп саларында бӱдӱмјилеп јат. Башкараачыныҥ тӧс амадузы — чактыҥ учында христиандарга кӧгӱс курсак белетеери (Матф. 24:45—47; Лука 12:42). Оныҥ учун бистер бӱдӱмјилӱ башкараачыныҥ белетеп, бастыра јердиҥ ӱстинде таркадып турган бичиктериниҥ болужыла бӱдӱмјибисти тыҥыдар аргалу болгоныска тыҥ сӱӱнип јадыбыс!