Јарлаар иштиҥ ӧйин ойгор тузаланыгар
Иштеген 2014 јылда Иегованыҥ Керечилери јарлаар иште 1 945 487 604 саат иштеген, бу Иеговага оноҥ ло ары иштеерге бек шӱӱп алганысты јарт кӧргӱзет! (Сар. 110:3; 1 Кор. 15:58). «Ӧй ас артып јат» деп билип, садып алган баалу ӧйди, бис јарлаар иште оноҥ кӧп улуска кере берерге ойгор эдип тузаланып болорыс па? (1 Кор. 7:29).
Јарлаар иште ӧйди оноҥ артык эдип тузаланарга тапкыр болоры керектӱ. Темдектезе, сеге јарлаар иште бир сааттыҥ туркунына эмезе оноҥ до кӧп ӧйгӧ кемле де куучын баштаарга келишпей турза, сен нени де солыыр аргаҥ бар ба? Айалгалар кандый ла болот, је «кейди темей јудуруктабаска» ӧйди тузалу эдип тузаланарга мындый јӧптӧр болужын јетирер (1 Кор. 9:26).
• Айылдар сайын јарлаары. Кӧп јылдардыҥ туркунына јарчылар јаҥжыккан аайынча, кӱнди айылдар сайын јарлаарынаҥ баштагылайт. Је, тӱште кӧп улус иште деп билип тура, айылдар сайын эҥирде, кӧп улус айылда амырагылап јаткан ӧйдӧ, барарга јараар. Анчада ла тӱште, тышкары эмезе улус иштеп турган јерлерде јарлаганы, јакшы једимдерге экелет.
• Улусту јерлерде јарлаары. Столдорды ла стендтерди кӧп улус ӧдӱп турган јуунныҥ јеринде тургузар керек. (2013 јылдыҥ јаан изӱ айдыҥ «Бистиҥ агару ижибистеҥ» 5 б. кӧр.) Мындый јерлерде улус јӱрери астай берзе, јуунныҥ ижиниҥ комитеди столдорды ла стендтерди кӧп улусту ӧскӧ јерлерге кӧчӱрер деп шӱӱр болор.
• Такып барары ла Агару Бичикти ӱренери. Такып барарга эмезе библиялык ӱредӱни, јарлаар иштиҥ ӧскӧ бӱдӱмдериниҥ тузазы ас болгон ӧйдӧ ӧткӱрер аргаҥ бар ба? Темдектезе, суббот кӱнде эртен тура айылдар сайын јарлаары јакшы једимдер экелип турган болзо, сен Библиялык ӱредӱни тал тӱштиҥ кийнинде эмезе эҥирде ӧткӱрип болорыҥ ба? Јарчылар такып барардаҥ озо, јарлаар ишке кӧп туружарга кичинек бӧлӱктерге бӧлӱнип, кӧп кӧликтер алар аргазы бар ба?
Јарлаар иште ӧткӱрип турган ӧйди отчётко бичиирге јараар да болзо, јарлаар иш једимдӱ болуп турза, бистиҥ сӱӱнчибис кӧптӧӧр. Јарлаар иштиҥ бир бӱдӱмиле кандый бир ӧйдӧ јарлаза, једимдер экелбей турганын ајарып турган болзоҥ, ӧскӧ бӱдӱмин тузаланып кӧр. Јарлаар иштиҥ ӧйин ойгор тузаланарга башкарту берзин деп, «Кыраныҥ Бийине» — Иеговага, мӱргӱп тур (Матф. 9:38).