Сокор улуска Иегова керегинде билип аларга болуш
1. Иисус сокор улусты килегенин канайып кӧргӱскен?
1 Иисустыҥ ӧлӱмине јетире тоолу ла кӱн арткан. Ол Иерихон каланаҥ чыгып јадарда, јокту эки сокор кижи Иисуска: «Кайракан, Давид Уулы! Биске буурса!» — деп кыйгырыжып јат. Иисустыҥ санаалары удабас болотон ченелтелерде де болгон болзо, Ол токтоп, олорды бойына кычырып, јазып јат (Матф. 20:29—34). Бис сокор улусты килеп турзас, Иисуска канайып тӱҥейлежер аргалу?
2. Тышкары сокор кижиге јолуксаҥ, ого канайып кере берер?
2 Болужып берерин сура. Тышкары сокор кижиге јолуккан болзоҥ, эзендежип, ады-јолыҥды айдып, болужып берейин деп сура. Озо баштап ол сени јуутпас болор, нениҥ учун дезе сокор улус куурмакчыларга тӧгӱндедип турган учуралдар ас эмес. Је бойыҥныҥ јалакай, најылык кӱӱндӱ болгоныҥла, сен оныҥ кӱӱнине кирериҥ. Сокор болорыныҥ кеми башка-башка болот, оныҥ учун олорго болужатан арга бир тӱҥей болбой јат деп ундыба. Кижиге болужып береле, сен библиялык ӱредӱлер ӧткӱрер ишке туружып турганыҥды айдар аргалу. Мыныҥ кийнинде, темдектезе, Сарын 146:8 эмезе Исаия 35:5, 6 кычырып ийерге јӧп сура. Ол Брайльдиҥ шрифттиле кычырып билер болзо, Агару Бичик керегинде кӧптӧдӧ билерге болужатан Брайльдиҥ шрифтине бичилген публикацияларды аларга кӱӱнзейт пе деп, сурап кӧр. Анайда ок ого бистиҥ сайттаҥ аудиофайлдарды чыгарып аларга болужып берерге јараар. Ол экраннаҥ кычыратан программалу компьютерле тузаланып турган болзо, сайтта бар јӧрмӧлдӧрди, анайда ок RTF форматка чыгарып аларга јараар публикацияларла тузаланарга кӱӱнзей берердеҥ айабас. («Сокор кижиге болужып тура...» деген рамканы кӧр.)
3. Слердиҥ јерерде јадып турган сокор улусты канайып бедиреер керек?
3 Сокор улусты бедире. Айылдар сайын јарлап јӱрзес, сокор улуска каа-јаада туштайдыс, нениҥ учун дезе олор таныш эмес улуска эжик ачарга коркып јадылар. Оныҥ учун мындый улусты бедиреерге ле олорго кере берерге аҥылу аргалар тузаланар керек (Матф. 10:11). Сенле кожо иштеп эмезе ӱренип турган улустыҥ тоозында сокор улус бар ба? Олорло куучындажатан арга таап ал. Слердиҥ јууныгардыҥ јарлаар јеринде сокор улустыҥ сургалы бар болзо, Брайльдиҥ шрифтине кепке базылып чыккан публикацияларды сургалдыҥ библиотеказына артыргызып саларга јӧп сура. Сениҥ таныштарыҥда сокор тӧрӧӧн-тугаандар бар ба? Слердиҥ јерерде сокор улуска болужып турган организациялар эмезе карып калган сокор улустыҥ туралары бар ба? Иегованыҥ Керечилери сокор улуска болужарга кӱӱнзеп турган деп, тӧрӧӧн-тугааныҥга, ӱредӱчиге эмезе директорго јартап бер, анайда ок Брайльдиҥ шрифттиле бичилип кепке базылган бичиктерди эмезе аудиобичимелдерди экелерге јараар ба деп сура. Удабас сокор улуска кӧрӧр арга берилер деп айткан Кудайдыҥ сӧзин Агару Бичиктеҥ кӧргӱзип бер. Анайда ок сен бойыҥныҥ мобильный телефоныҥла «Не знаю, что бы я делал без нее!» деген кӧрӱлмени кӧргӱзер аргалу. Кандый амадулу келгениҥди јартап берерге келишсе, сеге кийнинде сокор улусла туштажып куучындажар арга келижер болор.
4. Джанетле болгон учурал бисти неге ӱредип јат?
4 Джанет деген атту сокор эје сокор улус јадып турган карый бергендердиҥ туразына барган болгон. Ол ондо јиит ӱй кижиле куучын баштаган. Джанет ого: «Иисус сокор улусты јаскан, мынайып келер ӧйдӧ ончо сокор улуска нени эдерин кӧргӱскен» — деп, айткан. Джанет оныла Ачылта 21:3, 4 шӱӱжеле, бу айдылган сӧстӧр Кудайдыҥ Каандыгыныҥ болужыла канайып бӱдерин јартап берген. Ӱй кижи санана береле: «Мен бу керегинде баштапкы катап сокор кижинеҥ угуп јадым. Кӧзи су-кадык улустыҥ кӧп сабазы, кижи бойыныҥ эмезе ада-ӧбӧкӧлӧриниҥ кинчектеринеҥ улам сокор болуп калат деп бодогылайт» — деп айтты. Джанет ол ӱй кижиге электронный почтала Агару Бичикти ӱренерге белетелген бичиктиҥ ссылказын аткарып ийген болгон, эмди олор Агару Бичикти неделеде эки катап ӱренгилеп јат.
5. Бис Иисус чылап сокор улусты јазып болбос то болзос, андый улуска нениҥ учун болужар керек?
5 Иисус чылап бис сокор улусты јазып болбозыс, бу чактыҥ кудайы улустыҥ, анайда ок чын сокор улустыҥ сагыжын сокортып салган. Је мындый улуска бис, Кудайдыҥ Сӧзинеҥ чындыкты билип алзын деп, болужар аргалу (2 Кор. 4:4). Иисус Иерихонныҥ јанында эки сокор эр улуска буурсай бергенинеҥ улам олорды јазып ийген (Матф. 20:34). Бис сокор улусты мынайып килезес, олордыҥ оорузын чактыҥ-чакка јоголтып салатан Иегова керегинде билип аларга бир-бирӱзине болужар болорыс.