Агару Бичикти шӱӱжип кӧрӧргӧ белетелген пландарла једимдӱ тузаланыгар

Кижи библиялык ӱредӱлерле танышкан сайын, укканын тузаланып, ич-кӧгӱс јанынаҥ ӧзӱп, тӱжӱм экелет (Сар. 1:1—3). Бис Агару Бичикти шӱӱжип кӧрӧргӧ белетелген пландарла једимдӱ тузаланзас, ӱренип турган кижиге једимдерге јединерге болужарыс. Мында биске не болужар?

Сурактар. Кажы ла планда каруу беретен сурактар бар. Кижини келер туштажуда шӱӱп кӧрӧтӧн суракка јилбиркедип ийерге, бу сурактарды каруу некебей турган сурак эдип тузаланарга јараар. Эмезе ӱренип турган кижини карууны кыскарта берзин деп сураарга јараар. Кижиниҥ айтканы јастыра болзо, тургуза ла тӱзетпес керек. Оныҥ каруулары сеге неге ајару эдетенин билип аларга болужып берер (Укаа 16:23; 18:13).

«Рассуждение» деген бичик. Ӱренип турган кижи материалды тереҥ оҥдоп, билип алганын тузаланып турган болзо, ӱредӱниҥ ӧйинде темага јарагадый материалды «Рассуждение» деген бичиктеҥ шӱӱжип кӧрӧргӧ јараар. Келер туштажуда кижи материалды оҥдоп алды деп бӱдӱмјилӱ болорго, тоолу минуттыҥ туркунына сурактар берерге јараар.

Такып кӧрӧриниҥ сурактары. Кажы ла ӱредӱниҥ учында ӱренгенин такып кӧрӧргӧ, шӱӱжип јаткан материалга тӧзӧлӧнгӧн бир-эки озодоҥ белетеп алган сурактар бер. Ӱренип турган кижиле суракты шӱӱжип тура, тӧс шӱӱлтелерди оҥдогон бо јок по, анайда ок оҥдогонын улуска јартап болор бо деп билип аларыҥ. Мыныҥ кийнинде кандый бир суракты ӱлгерлерге тӧзӧлӧнип јартап берзин деп сура (Ап. иж 17:2, 3).