Судурчылардаҥ тем алыгар. Аввакум
1. Бис нениҥ учун Аввакумныҥ сезимдерин оҥдоп јадыбыс?
1 Бастыра телекейдеги јарамас кӧптӧп турганын кӧрӱп, «Јаманды кӧрӧргӧ не јарадып тургаҥ, кыйын-шыраны не кӧрӧдиҥ?» — деп, Иегованаҥ сураган Аввакум чылап, бисте де андый ла сезимдер болот (Авв. 1:3; 2 Тим. 3:1, 13). Иегованыҥ јаргызыныҥ кӱнин сакып тура, Аввакумныҥ јарын ла чындыгыныҥ темин шӱӱп сананганы биске ийде-кӱч берет (2 Пет. 3:7).
2. Бис чындык болуп јӱргенисти, канайып кӧргӱзип јадыс?
2 Чындык болуп, јӱрӱгер. Аввакум нени де этпей отурбаган ла бойын килебеген, карын ич-кӧгӱс јанынаҥ сергек болгон (Авв. 2:1). Иегованыҥ Сӧзи темдектелген ӧйдӧ чике бӱдер ле «акту кижи чындык артып, јӱрер» деп, Кудай судурчызын бӱдӱмјилеген (Авв. 2:2—4). Калганчы кӱндерде јадып турган христиандарга бу нени темдектейт? Учы качан келер деп тереҥ ајару этпей, је ол кыйалта јогынаҥ болор деп, тыҥ бӱдер керек. Бӱдери бисти сергек болорго ло Кудайды јӱрӱмде баштапкы јерге тургузарга јӱткӱдет (Евр. 10:38, 39).
3. Иеговага иштееринде биске нениҥ учун сӱӱнчилӱ болор керек?
3 Иеговада сӱӱнигер. Магог јеринеҥ Гог, качан Иегованыҥ албатызына табару этсе, Кудайга бӱдӱп турганыс ченелер (Иез. 38:2, 10—12). Кандый ла удурлажуда, керек дезе јеҥип те алган кижиде, кӱчтер болуп јат. Курсак-тамак та јетпес болордоҥ айабас. Бис јӧӧжӧбисти де јылыйтып салардаҥ айабазыс, јӱрӱмниҥ кеми сакыбаган јанынаҥ коомойтыыр да болор. Бис мындый айалгада нени эдерис? Аввакум кӱчтерге туштаар деп билер болгон, оныҥ учун Иеговага иштееринде сӱӱнчилӱ болорго бек сананып алган (Авв. 3:16—19). «Иегованыҥ сӱӱнчизи» келер ӧйдиҥ ченелтелерин чыдажып ӧдӧргӧ биске де болужар (Неем. 8:10; Евр. 12:2).
4. Бис бӱгӱнги де кӱнде, келер де ӧйдӧ недеҥ улам сӱӱнчилӱ болорыс?
4 Иегованыҥ јаргызыныҥ кӱнин Оныҥ болужыла ӧткӧн улус оноҥ ло ары Кудайдыҥ јӱрӱм берер јолыла јӱрерге ӱренгилер (Авв. 2:14). Анайда ок тирилгендер де Иегова керегинде билгирлер алар. Иегова ла Оныҥ кайкамчылу керектери керегинде куучындаарга, бӱгӱнги де кӱнде кандый ла арганы тузаланып турактар! (Сар. 34:1; 71:17).