Бис Иегова Адабысты тыҥ сӱӱп јадыс

1, 2. Иегова бисти бойыныҥ билезине канайып кожуп алган, нениҥ учун?

БИС Иегованаҥ оныҥ ишчилеринеҥ турган билеге кожулатан кайкамчылу кычырту алганыс. Бу биле Иеговага јӱрӱмин учурлаган ла Кудайдыҥ Уулыныҥ толынты тайылгазына бӱдӱп турган улустаҥ турат. Бистиҥ биледе ончозы ырысту. Анайда ок јӱрӱмис калас ӧтпӧй јат деп сӱӱнип јадыс ла ӱргӱлјиге теҥериде эмезе јерде јӱретен ӧйди тыҥ сакып јадыбыс.

² Иегова бисти тыҥ сӱӱп турганынаҥ улам биске оныҥ билезине кожулатан арга берген. Је мындый арга берерге, јаан баа тӧлӧгӧн (Иоанн 3:16). Ол бисти «јаан баала садып алган» (1 Кор. 6:20). Толынты Иеговала јуук најылар болор арга берет. Биске Јер-телекейдиҥ Бий Кайраканын — Адабыс деп айдатан улу кӱндӱ эдилген. Мынаҥ озо болгон јӧрмӧлдӧ айдылганыла, Иегова — эҥ ле јакшы Ада.

3. Бисте кандый сурактар чыгып турган болор? («Иегова мени кӧрӱп турган ба?» деп рамканы база кӧрӱгер.)

³ Слер Сарнаачы чылап: «Иегованыҥ меге эткен ончо јакшы керектери учун мен Ого нени берерим?» — деп, бойоордоҥ сурап турган болороор (Сар. 116:12). Чынынча болзо, бис теҥеридеги Адабыска нени де берип болбозыс. Је оныҥ сӱӱжин кӧрӱп, бис оны база сӱӱрге кӱӱнзей бередис. «Бис сӱӱп јадыс, нениҥ учун дезе Ол бисти озо сӱӱген» — деп, апостол Иоанн бичиген (1 Иоанн 4:19, ЈК 2003). Айдарда, теҥеридеги Адабысты сӱӱп турганысты канайып кӧргӱзерис?

ИЕГОВАЛА ЈУУК КОЛБУЛАРЫГАРДЫ ЈЫЛЫЙТПАГАР

4. а) Иаков 4:8-ле болзо, нениҥ учун биске Кудайга јууктаарга албаданар керек? б) Иеговага јууктаарга бис нени эдер аргалу?

⁴ Иегова бисти оныҥ јуук најызы болуп, оныла кӧп куучындажып турзын деп кӱӱнзейт. (Иаков 4:8 кычырыгар.) Ол бисти улам сайын мӱргӱп турзын деп кӱӱнзедет, бойы дезе бисти јаантайын угарга белен (Рим. 12:12). Иегова биске: «Меге бош јок сени угарга, мен арып калдым» — деп качан да айтпай јат. Оныҥ учун бис те Иегованы угарга, Агару Бичикти, анайда ок бу бичикти оҥдоорго болужып турган бичиктерди кычырадыс. Бого коштой христиан туштажуларды лаптап угуп турзаас, Иегованы база угуп јадыс. Канайып балдар ада-энезиле кӧп куучындажып турза, јуук колбуларлу болот, анайып ла Иеговала јаантайын куучындашканыс оныла јуук колбуларысты јылыйтпаска болужат.

5. Акту јӱректеҥ мӱргӱӱрге нени эдер керек?

⁵ Слер Иеговала јуук куучындажып турганаар ба? Иегова бисти мӱргӱген ӧйдӧ јӱректеристи ачып турзын деп кӱӱнзейт (Сар. 62:8). Оныҥ учун бойыгардаҥ мынайып сурагар: «Мениҥ мӱргӱӱлдерим неге тӱҥей: бир тӱҥей сӧстӧр бичип салган открыткаларга ба эмезе акту јӱректеҥ колло бичиген самараларга тӱҥей бе?» Слер Иегованы тыҥ сӱӱп, оныла јуук колбуларлу болорго турган эмейигер. Оныҥ учун оныла јаантайын кӧп куучындажып туругар. Ого бӱдӱгер. Сӱӱнчигерди де, кӱчтеригерди де куучындап туругар. Кудайдаҥ кандый ла ӧйдӧ болуш сураарга јараар деп алаҥзыбагар.

6. Теҥеридеги Адабысла јуук колбуларысты јылыйтпаска нени эдер керек?

⁶ Теҥеридеги Адабысла јуук колбуларысты јылыйтпаска, биске ого јаантайын быйанду болор керек. Бис сарнаачыныҥ: «О-о Иегова Кудайым, сен кӧп кайкамчылу керектер эткеҥ. Бис керегинде кӧп сананып јадыҥ. Сеге једери јок. Сениҥ керектериҥ андый кӧп, ончозын улуска куучындазам да, ӱзезин куучындап болбозым» — деп, айткан сӧстӧриле јӧпсинип јадыс (Сар. 40:5). Бис Иеговага быйанду болгонысты јӱк ле сезип турган эмезис, је быйанысты айткан сӧстӧрисле, эткен керектерисле кӧргӱзип јадыс. Мынайып бис бӱгӱнги кӱнниҥ улузынаҥ аҥыланадыс. Бӱгӱнги кӱнде бис Кудайдыҥ ижин бир де баалабай турган улустыҥ ортозында јададыс. Олордыҥ быйаны јок болгоны калганчы кӱндерде јадып турганысты кӧргӱзет (2 Тим. 3:1, 2). Мындый кӱӱн-санааны качан да алынбай јӱректер!

7. Иегова бисти кандый болзын деп кӱӱнзейт, нениҥ учун?

⁷ Канайып ада-энелер балдарын керишпей-урушпай јӱрзин деп кӱӱнзейт, анайып ла Иегова ончо балдарын бой-бойыла эптӱ-јӧптӱ јӱрзин деп кӱӱнзейт. Бистиҥ ортобыста болгон сӱӱш бисти чындык христиандар деп кӧргӱзет (Иоанн 13:35). Бис: «Ака-эјелерле бирлик јӱргени кандый јакшы, кандый эптӱ!» — деп бичиген сарнаачыныҥ сезимдерин оҥдоп јадыс (Сар. 133:1). Ака-эјелерди сӱӱп турганыстаҥ Иегованы сӱӱп турганыс кӧрӱнет (1 Иоанн 4:20). Бис бой-бойына «быйанзак, буурзак» ака-эјелердеҥ турган билеге кирип турганыска тыҥ сӱӱнип јадыбыс! (Еф. 4:32).

СӰӰЖИГЕРДИ СӦСУККУР БОЛГОНЫГАРЛА КӦРГӰЗИГЕР

8. 1 Иоанн 5:3-ле болзо, Иегованыҥ сӧзин угуп турганыстыҥ тӧс шылтагы кандый?

⁸ Канайып балдар ада-энезине сӧсуккур болот, бис анайып ла Кудайга сӧсуккур болор учурлу (Еф. 6:1). Нениҥ учун дезе ол бистиҥ Јайаачыбыс, Јӱрӱм Береечибис ле эҥ ле ойгор Адабыс. Је Иеговага сӧсуккур болгоныстыҥ тӧс шылтагы — бис оны сӱӱп јадыбыс. (1 Иоанн 5:3 кычырыгар.) Иегованыҥ сӧзин угатан шылтактар кӧп тӧ болзо, ол бисти сӧсуккур болорына албадабай јат. Карын Иегова биске јайым сыйлаган, оныҥ учун бис оны акту кӱӱнистеҥ угуп турзаас, оны сӱӱндирип јадыбыс.

9, 10. Нениҥ учун Иегованыҥ нормаларын билип, олорло јӱрер керек?

⁹ Ада-энелер балдарын корулап аларга кӱӱнзейт. Оныҥ учун олор балдарына кандый бир нормалар тургузып јат. Балдар бу нормаларла јӱрзе, ада-энезине бӱдӱп, олорды тооп турганын кӧргӱзет. Је теҥеридеги Адабыстыҥ тургузып турган нормаларын билери ле олорло јӱрери оноҥ јаан учурлу. Анайып јӱрзеес, бис Иегованы сӱӱп ле тооп турганысты кӧргӱзедис. Бого коштой бу биске бойыска ла туза экелет (Иса. 48:17, 18). Је Иегованы ла оныҥ нормаларын укпай турган улус бойыныҥ ла јӱрӱмин кӱч эдип салат (Гал. 6:7, 8).

¹⁰ Бистиҥ јӱрӱмис Иегованы сӱӱндирип турган болзо, бис физический, эмоциональный ла ич-кӧгӱс јанынаҥ коруда болодыс. Иегова биске не эҥ јакшы болорын билер. США-да јадып турган Орора эје мынайып айдат: «Иегованыҥ сӧзин уксаҥ, сӱрекей јакшы јӱрӱм јӱрериҥ деп алаҥзыбай јадым». Бу эјениҥ сӧстӧри чып-чын. Иеговага сӧсуккур болгоныгар слерге де сӱрекей кӧп алкыштар экелип турганын эске алып ийзеер.

11. Мӱргӱӱлдер биске канайып болужат?

¹¹ Мӱргӱӱлдер биске јеҥил эмес те айалгаларда Иеговага сӧсуккур болорго болужат. Кезикте Иегованыҥ сӧзин угарга кӱч болот, је биске ого јарабай турган керектер эдер кӱӱнисле тартыжар керек. Сарнаачы Кудайга мынайып јайнаган: «Сениҥ јасагыҥды бӱдӱрерге ле оны јӱрегиме кичееп турарга, меге оҥдомол берзеҥ» (Сар. 119:34). Текши пионер болуп турган Дениз эје мынайып айдат: «Иегованыҥ кандый бир јасагын бӱдӱрерге кӱч болуп турза, Иегованыҥ айтканы аайынча эдерге оноҥ ийде-кӱч сурайдым». Бис Иегова андый мӱргӱӱлдериске кыйалта јогынаҥ каруу берер деп алаҥзыбас аргалу (Лука 11:9—13).

УЛУСКА АДАБЫСТЫ СӰӰРГЕ БОЛУЖЫГАР

12. Ефестегилерге 5:1-ле болзо, биске нени эдер керек?

¹² Ефестегилерге 5:1 кычырыгар. Иегованыҥ «сӱӱген балдары» чылап бис оноҥ тем аларга бастыра кӱчистеҥ албаданып јадыс. Анайып, бис улусты сӱӱп, олорго јалакай баштанып, олордыҥ јастыраларын таштап јадыс. Иеговага иштебей турган улус бистиҥ јакшы кылык-јаҥысты кӧрӱп, Кудай керегинде кӧптӧдӧ билип аларга кӱӱнзеердеҥ айабас (1 Петр 2:12). Иегова биске канайып баштанып турган, христиан ада-энелер балдарына анайып ла баштанар учурлу. Ол тушта балдар сӱӱштӱ Адабысла најылажарга кӱӱнзеер болор.

13. Коркыбаска биске не болужар?

¹³ Кӧп балдар адазыла оморкоп, улуска адазы керегинде куучындаарга сӱӱп јат. Анайып ла бис теҥеридеги Иегова Адабысла оморкоп јадыс ла улусты оныла таныштырарга кӱӱнзеп јадыс. Бистиҥ јӱрегис Давид каанныҥ сезимдерине тӱҥей сезимдерле толо. Ол мынайда бичиген: «Мен Иеговала мактанарым» (Сар. 34:2). Је бис уйалчаҥ ла арай болзоос, канайдарыс? Коркыбаска нени эдерис? Бис Иегова керегинде куучындазаас, Иегованы сӱӱндирерис ле улуска јӱрӱмин солыырга болужарыс деп сананып турзаас, коркыбазыс. Иегова биске јалтанбас болорго болужар. Ол баштапкы чакта јаткан акаларга јалтанбас болорго болушкан, айдарда биске де болужар (1 Фес. 2:2).

14. Биске нениҥ учун јарлаар ишке туружып, ӱренчиктер белетеер керек?

¹⁴ Иегова кемди де ылгабай јат, оныҥ учун бис улусты ылгабай, ончозын сӱӱп турзаас, Кудайды сӱӱндирип јадыс (Ап. ижи 10:34, 35). Улуска сӱӱжисти кӧргӱзетен эҥ јакшы аргалардыҥ бирӱзи — олорго сӱӱнчилӱ јарды куучындаары (Матф. 28:19, 20). Сӱӱнчилӱ јар олорго кандый туза берер? Бистиҥ јарды угуп турган улус јӱрӱмин солып, ӱргӱлји јӱрӱмге апаратан јолго туруп алар (1 Тим. 4:16).

ИЕГОВА АДАБЫСТЫ СӰӰП ТУРЗАГАР, ЫРЫСТУ БОЛОРЫГАР

15, 16. Бисте ырысту болотон кандый шылтактар бар?

¹⁵ Иегова, бисти сӱӱп турган Ада. Оныҥ учун Ол билезиниҥ ончо улузын ырысту болзын деп кӱӱнзейт (Иса. 65:14). Бисте кӱчтер де болуп турган болзо, ырысту болотон кӧп шылтактар бар. Темдектезе, теҥеридеги Адабыс бисти тыҥ сӱӱп турган деп алаҥзыбай јадыс. Анайда ок бисте оныҥ Сӧзинеҥ, Агару Бичиктеҥ, чике билгирлер бар (Иер. 15:16). Бого коштой бис Иегованы, оныҥ нормаларын ла бой-бойын сӱӱп турган улустаҥ турган кайкамчылу билеге кожулганыска сӱӱнип јадыбыс (Сар. 106:4, 5).

¹⁶ Бис ырысту болор аргалу, нениҥ учун дезе, келер ӧйдӧ јӱрӱм сӱрекей јакшы болор. Иегова удабас калју улустыҥ ончозын јоголтып салза, оныҥ Каандыгы башкарган ӧйдӧ јер рай болуп калар. Анайда ок божогон улус тирилип, бойыныҥ јууктарыла туштажар деп иженип јадыбыс (Иоанн 5:28, 29). Бу ӧй јаан сӱӱнчи экелер! Је эҥ учурлузы — јердеги де, теҥеридеги де ончо јайаандар бистиҥ сӱӱштӱ Адабыска бажырып, мак ла кӱндӱ јетирер деп бӱдӱп јадыс.