Бой-бойыгарды акту јӱректеҥ сӱӱгер

1. Иисус ӱренчиктерине кандый аҥылу јакылта берген? (Кадарындагы јурукты кӧрӱгер.)

ИИСУС божоор алдында эҥирде ӱренчиктерине аҥылу јакылта берген. Ол айткан: «Мен слерди сӱӱгемдий, бойы бойыгарды сӱӱп јӱрӱгер». Анайда ок мынайып айткан: «Ортогордо сӱӱш болзо, слерди Мениҥ ӱренчиктерим деп, ончолоры танып ийер» (Иоанн 13:34, 35, ЈК 2003).

2. Биске бой-бойысты нениҥ учун сӱӱр керек?

² Иисустыҥ айтканыла, оныҥ чындык ӱренчиктери улусты Иисус ла чылап сӱӱр. Мындый сӱӱш олордыҥ аҥылу кылык-јаҥы болот. Олор баштапкы да чакта бой-бойлорын сӱӱген, бӱгӱнги де кӱнде анайып ла сӱӱп јат. Оныҥ да учун кандый ла кӱчтерди ӧдӱп, бой-бойысты сӱӱр керек!

3. Бу јӧрмӧлдӧ нени шӱӱжерис?

³ Биске толо кемдӱ эмес болгоныстаҥ улам, бой-бойысты акту јӱректеҥ сӱӱрге кӱч болуп јат. Је андый да болзо, биске Христостоҥ тем аларга албаданар керек. Бу јӧрмӧлдӧҥ сӱӱш биске улусла эптӱ-јӧптӱ јӱрерге, олорды ылгабаска ла кӱндӱзек болорго канайып болужып турганын билип аларыс. Бу материалды ӱренип тура, бойыгардаҥ сурагар: «Кӱч те болуп турза, је бой-бойына чындык сӱӱжин кӧргӱскен ака-эјелердеҥ мен кандый тем алар аргалу?»

УЛУСЛА ЭПТӰ-ЈӦПТӰ ЈӰРИГЕР

4. Матфей 5:23, 24-лӧ болзо, биске ачынып калган кижиле нениҥ учун јаражып алар керек?

⁴ Иисус, биске ачынып калган кижиле јаражып алар керек деп ӱреткен. (Матфей 5:23, 24 кычырыгар.) Бис Кудайды сӱӱндирерге турган болзоос, улусла јакшы колбуларлу болор учурлу деп, Иисус аҥылап айткан. Ака-эјелерле јаражарга бастыра ийде-кӱчистеҥ албаданып турзаас, Иегованы сӱӱндирип јадыс. Је бис ачынып, јаражарга нени де этпей турзаас, Иегова бистиҥ бажырышты јаратпас (1 Иоанн 4:20).

5. Марк акага ӧскӧ акала јаражып аларга нениҥ учун кӱч болгон?

⁵ Ачынып калган кижиле јаражарга јеҥил эмес болордоҥ айабас. Нениҥ учун? Марк аканыҥ темин кӧрӱп ийектерb. Бир ака оны јамандап, ӧскӧ ака-эјелерге ол керегинде эби-јок немелер куучындап салган. Бу ӧйдӧ Марк канайтты? Ол айдат: «Мен коркышту тыҥ ачынала, тудунып болбой калгам». Је соондо ол јастыразын алынып, акала јаражып аларга јаманын таштазын деп сураарда, ол оныҥ јаманын таштабаган. Озо баштап Марк мынайып сананган: «Ол ака менле јаражарга кӱӱнзебей турган болордо, мен не оныла јаражарга тургам?» Је аймак кӧрӧӧчи оны, кӱч те болзо, јаражып алзын деп кӱӱнзеткен. Марк бу јӧпти алынды ба?

6. а) Марк јаражып аларга канайып албаданган? б) Ол Колоссыдагыларга 3:13, 14-тӧги принципти канайып тузаланган?

⁶ Марк бойын шиҥдеп турала, јобожыдынбай, бийиркенип турганын оҥдоп ийген. Ого улуска кӧрӱмин солыыр керек болгон (Кол. 3:8, 9, 12). Марк дезе, акага база катап јууктап, јаманын таштазын деп сураган. Анайда ок ого бир канча самаралар бичиген. Бу самаралар ажыра ол јастыразын алынып, ойто најылажарга турганын кӧргӱскен. Керек дезе, ого јарагадый бир кичинек сыйлар да берип туратан. Је аканыҥ јӱреги анайда ла кайылбаган. Је Марк тӱҥей ле чӧкӧбӧй, Иисустыҥ јакылтазы аайынча бойыныҥ аказын сӱӱп, јаманын таштап туратан. (Колоссыдагыларга 3:13, 14, ЈК 2003 кычырыгар.) Айдарда, ака слердиҥ јаманыгарды таштабай турган болзо, чындык христиан сӱӱш оныҥ јаманын тӱҥей ле таштаарга ла јаражып аларга мӱргӱӱрге кӱӱнзедер (Матф. 18:21, 22; Гал. 6:9).

7. а) Иисус бисти неге кӱӱнзеткен? б) Ларада кандый учурал болгон?

⁷ Иисустыҥ ӱреткениле болзо, улус биске кандый болзын деп кӱӱнзеп турганыс, бойыс та олорго анайып ла ок баштанар керек. Анайда ок бисти сӱӱбей де турган улусты сӱӱзин деп айткан (Лука 6:31—33). Јуунда кем-кем слердеҥ качып, эзендешпей барза, нени эдереер? Мындый учуралдар каа-јаа болуп јат, је Лара эједе шак мындый учурал болгон. Ол мынайып куучындайт: «Бир эје менеҥ качып баштаган, је нениҥ учун деп, мен чек аайлабай туратам. Меге коркышту эби-јок болгон. Туштажулардаҥ да сӱӱнчи албай баргам». Лара мынайып сананган: «Мен ого бир де јаман неме этпегем. Јуунныҥ да улузы оны саҥ-башка деп кӧрӧт».

8. Лара ого ачынып калган эјеле јаражып аларга канайып албаданган, оныҥ теми бисти неге ӱредет?

⁸ Лара ол эјеле јаражып аларга, Иеговага мӱргӱп алала, оныла куучындашкан. Олор бастыра немени јартажып, кучактажып ийген кийнинде, кандый да ачыныш болбогон деп билдирген. «Је канча да кире ӧйдӧҥ, ойто ло мындый айалга боло берерде, кӱӱним чек ӧчӧ берген» — деп, Лара эске алат. Озо баштап Лара, ол эје кылыгын солыбаганча, амыр јӱрӱп болбозым деп сананган. Је кийнинде, бу айалгада эјени сӱӱп, оныҥ јаманын акту јӱректеҥ таштаза торт болор деп оҥдогон (Еф. 4:32—5:2). Лара эје чындык христиан сӱӱш — «јаманды тоолобойт», «ончо јаманды таштайт, ончозына бӱдет, јаантайын иженет, ончозын чыдажып ӧдӧт» деп ундыбай јӱрген (1 Кор. 13:5, 7). Анайып Лараныҥ јӱрегине амыр боло берген. Кийнинде ол эје Ларага бир эмеш јакшы баштанып баштаган. Слер де ака-эјелерле мынайып ла јаражып аларга албаданып, олорды сӱӱп турзагар, «сӱӱштиҥ ле амырдыҥ Кудайы слерле кожо болор» деп алаҥзыбагар (2 Кор. 13:11).

УЛУСТЫ ЫЛГАБАГАР

9. Апостолдордыҥ ижи 10:34, 35-ле болзо, улусты нениҥ учун ылгабас керек?

⁹ Иегова кемди де ылгабай јат. (Апостолдордыҥ ижи 10:34, 35 кычырыгар.) Бис те улусты ылгабай турзаас, Кудайдыҥ балдары болгонысты кӧргӱзедис. Анайда ок Агару Бичиктеги јакылта аайынча, улусты бойысты чылап сӱӱп турзаас, кӧгӱс билегистиҥ бирлигине јӧмӧжип јадыс (Рим. 12:9, 10; Иак. 2:8, 9).

10, 11. Ритага улусты јаман кӧрбӧскӧ не болушкан?

¹⁰ Кезик улуска улусты ылгабаска кӱч болот. Рита эјениҥ темин кӧрӱп ийектер. Бала тужында, ӧскӧ ороонныҥ ӱй кижизи оныҥ билезине јаман неме эткен. Мынаҥ улам Рита бу ороонло колбулу ончо немени кӧрӧр кӱӱни јок болуп калган. Ол айдат: «Бу ороонныҥ бастыра улузы, керек дезе ака-эјелер де, бу ӱй кижи ошкош деп санангам». Је Ритага улусты јаман кӧрбӧскӧ не болушкан?

¹¹ Рита та нени де солыыр керек деп оҥдоп, «Ежегодник» деп бичиктеҥ ол ороонныҥ јарлаар ижиниҥ учуралдарын ла отчетторын кычырып баштаган. Рита айдат: «Меге ол ороонныҥ улузы керегинде јаман сананбаска ӱренерге келишкен. Ондо јадып турган ака-эјелер Иеговага акту јӱректеҥ иштеп турганы керегинде билип алала, олор до бистиҥ телекейлик карындаштыкка кирип турган деп оҥдоп ийгем». Кийнинде Рита олорго сӱӱжин кӧргӱзер керек деп аайлаган. Ол мынайып јартаган: «Ол ороонныҥ ака-эјелерине кажы ла катап туштаган сайын, олорго јакшы баштанарга бастыра кӱчимнеҥ албаданып, олорло куучын баштап, олорды јакшы билип аларга туратам». Мынаҥ кандый туза болды? «Анайып, ӱзе јаман сезимдерим јоголып калган» — деп, Рита куучындады.

12. Сара деп эје бойыныҥ кандый јастыразын кӧрӱп ийген?

¹² Кезик улус улусты ылгап турган деп билбей де јат. Темдектезе, Сара деп эје улусты ылгабай турган деп сананган, не дезе, ол кижиниҥ угы-тӧзине, акча-манадына ла јуундагы молјуларына кӧрбӧй туратан. «Је чынынча болзо, мен улусты ылгап тургам деп оҥдоп баштагам» — деп, Сара айдат. Бу сӧстӧрлӧ Сара нени айдарга сананган? Сара бийик ӱредӱлӱ биледеҥ болгон, анайып ол јӱк ле бойы ошкош бийик ӱредӱлӱ улусла куучындажып туратан. Керек дезе ол бойыныҥ најызына мынайып айткан: «Мен јӱк ле јакшы ӱредӱлӱ ака-эјелерле куучындажып јадым, је ӧскӧлӧрине дезе, бир де ајару этпей јадым». Сарага солынар керек болгон. Солынарга ол нени эткен?

13. Сараныҥ теминеҥ бис неге ӱренедис?

¹³ Аймак кӧрӧӧчи Сарага ака-эјелерге кӧрӱмин солыырга болушкан. Сара эске алат: «Ол мени Иеговага чындык иштеп турганым учун, туштажуларда тереҥ јартамалдар берип турганым учун ла Агару Бичикти јакшы билер болгоным учун мактаган. Је анайда ок биске јӱк ле билгирлер алар керек эмес, је христиан кылык-јаҥдарга, ол тоодо јобош болорына, бийиркенбес болорына ла улусты килеп турарына ӱренер керек деп јартаган». Сара аймак кӧрӧӧчиниҥ јӧбин алынып, тузаланган. Ол мынайып айдат: «Озо ло баштап ака-эјелерди сӱӱп, олорго јалакай баштанар керек деп оҥдоп алгам». Анайып оныҥ ака-эјелерге кӧрӱми солынган. «Иегова кажы ла ака-эјениҥ кандый кылык-јаҥын баалап турганын оҥдоорго албадангам» — деп, Сара куучындайт. Бис мынаҥ неге ӱренедис? Сен јакшы ӱредӱлӱ болзоҥ, бойыҥды улустаҥ артык деп, качан да сананба! Бис бастыра карындаштыкты акту јӱрегистеҥ сӱӱп турган болзоос, улусты бир де ылгабазыс (1 Петр 2:17).

КӰНДӰЗЕК БОЛУГАР

14. Еврейлерге 13:16-ла болзо, бис кӱндӱзек болзоос, Иегова нени сезет?

¹⁴ Бис кӱндӱзек болзоос, Иегова тыҥ сӱӱнип јат. (Еврейлерге 13:16 кычырыгар.) Кудай мыны бистиҥ бажырыштыҥ бӧлӱги деп кӧрӧт, анчада ла немеге јединбей турган улуска кӱндӱзек болзоос (Иак. 1:27; 2:14—17). Оныҥ да учун Агару Бичик бисти: «Кӱндӱзек болыгар» — деп кӱӱнзедет (Рим. 12:13). Кӱндӱзек кижи улуска ајару эдет, сӱӱжин кӧргӱзет ле олорды кичеерге албаданат. Бис улусты чайладып, кӱндӱлеп, кожо ӧй ӧткӱрип турзаас, Иегованы сӱӱндиредис (1 Петр 4:8—10). Је кезик улуска кӱндӱзек болорго јеҥил эмес.

15, 16. а) Кезик улус нениҥ учун кӱндӱзек болорго кӱӱнзебей турган? б) Эдитага кӱндӱзек болорго не болушкан?

¹⁵ Кезик улус башка-башка шылтактардаҥ улам кӱндӱзек болорго кӱӱнзебей јат. Темдектезе, Эдита деп тул ӱй кижи Иегованыҥ Керечили болголокто, улусла јууктажып куучындажарга кӱӱнзебей туратан. Нениҥ учун дезе ол бойын кӱндӱзек кижи эмес деп сананган.

¹⁶ Је Эдита Иегованыҥ Керечили болуп калала, кӱндӱзек болорго амадап алган. Ол куучындайт: «Аксагал меге, биске Каандыктыҥ Туразын тудужарга, бир биле келер деп айдып, мен бу билени эки неделеге јатыргызып болорым ба деп сураган. Бу ӧйдӧ мен Иегованыҥ Сарептада јаткан тул ӱй кижиге канайып алкыжын бергенин эске алып ийеле, јӧпсинип ийгем» (1 Каан. 17:12—16). Эдита кандый алкыштар алды? «Ол биле эки неделе јадардыҥ ордына, эки ай јаткан. Је бу ӧйдиҥ туркунына бис јуук најылар болуп калганыс» — деп, Эдита эске алат. Анайда ок ол јуунда кӧп најылар таап алган. Эмди Эдита пионер болуп иштейт. Ого кожо јарлаган ака-эјелерди айылына кычырып, чайладарга јарап јат. Ол мынайып куучындайт: «Улуска болужып турзаҥ, берип турганыҥа кӧрӧ, канча киреге кӧпти аладыҥ! Бу сӧстӧр чын деп, мен бойым бӱдӱмјиленип алгам» (Евр. 13:1, 2).

17. Люк ака ла оныҥ ӱйи нени оҥдоп ийген?

¹⁷ Слер бойыгарды кӱндӱзек кижи деп сананып турган болороор. Је слер оноҥ кӱндӱзек болор аргалу ба? Люк аканыҥ ла оныҥ ӱйиниҥ темин кӧрӱп ийектер. Олор айылына ада-энезин, тӧрӧӧндӧрин, јуук најыларын ла аймак кӧрӧӧчини ӱйиле кожо јаантайын кычырып туратандар. Је Люк ака мынайып айдат: «Бис айылыска јӱк ле јакшы билер улузысты кычырып турганыс деп кӧрӱп ийгенис». Оныҥ учун Люк ака ла оныҥ ӱйи оноҥ кӱндӱзек болорго нени этти?

18. Люк ла оныҥ ӱйине оноҥ кӱндӱзек болорго не болушкан?

¹⁸ Люк ла оныҥ ӱйи: «Слерди сӱӱп тургандарды сӱӱр болзогор, слерди не учун кайралдайтан?» — деп, Иисустыҥ сӧстӧрин шӱӱп сананган кийнинде, кӧрӱмин солыган (Матф. 5:45—47, ЈК 2003). Олор ончо улуска кысканбазын кӧргӱзип турган Иегова Кудайдаҥ тем алар керек деп оҥдоп ийген. Оныҥ учун Люк ла оныҥ ӱйи, олордо бирде айылдабаган ака-эјелерди кычырар деп амаду тургузып алган. Люк мынайып айдат: «Биске бой-бойысла јуулыжарга тыҥ јарап јат. Андый туштажулар кӱӱнисти кӧдӱрип, ийде кӱч берет».

19. Бойысты Христостыҥ ӱренчиктери деп, канайып кӧргӱзерис? Слер нени эдерге бек шӱӱп алдаар?

¹⁹ Ака-эјелерди акту јӱректеҥ сӱӱп турганыс биске олорло эптӱ-јӧптӱ јӱрерге, олорды ылгабаска ла кӱндӱзек болорго канайып болужып турганын шӱӱжип ийдис. Айдарда биске бойыстыҥ јӱрегистеҥ јаман сезимдерди јоголтып, ака-эјелерди акту јӱректеҥ сӱӱр керек. Анайып эдип турзаас, бис ырысту болорыс ла бойысты чыннаҥ ла Христостыҥ ӱренчиктери деп кӧргӱзерис (Иоанн 13:17, 35).